Connect with us

Uchunguzi

Watu 48,700 wafa katika ajali, wengine 282,000 wajeruhiwa

Published

on

JUMLA ya watu 48,695 wamekufa na wengine 282,194 kujeruhiwa kutokana na ajali za barabarani zilizotokea nchini Tanzania katika kipindi cha kuanzia mwaka 2000 hadi 2015.

Uchunguzi wa FikraPevu umeonyesha kwamba, katika kipindi hicho cha miaka 16, jumla ya ajali 302,875 zilitokea na kati ya hizo ajali mbaya zilizosababisha majeruhi na hata vifo zilikuwa 41,690.

Kwa mujibu wa uchunguzi huo, idadi hiyo ya ajali ni wastani arwa ajali 18,930 kwa mwaka ambayo pia ni wastani wa ajali 52 kwa siku.

Aidha, FikraPevu imebaini pia kwamba, wastani wa watu 10 hufariki dunia kila siku nchini Tanzania kutokana na ajali hizo.

Taarifa kutoka Ofisi ya taifa ya Takwimu pamoja na Jeshi la Polisi zinaeleza kwamba, mwaka 2013 ndio uliokuwa na majanga kutokana na kurekodi jumla ya ajali 24,480 ambapo kati ya hizo, ajali mbaya zilikuwa 3,545 ambazo zilisababisha vifo 4,091.

Kwa mujibu wa takwimu hizo ambazo FikraPevu inazo, makosa ya usalama barabarani yamekuwa yakiongezeka kwa kasi kutoka makosa madogo 148,169 mwaka 2000 hadi kufikia makosa 1,381,705 mwaka 2015, likiwa ni ongezeko la mara tisa zaidi.

Kuhusu ajali, nazo zimeonekana kupanda na kushuka kutoka 15,577 mwaka 2000 hadi 8,777 mwaka 2015 lakini ajali mbaya zilizosababisha vifo zimeongezeka kutoka 1,525 mwaka 2000 hadi 2,909 mwaka 2015.

Aidha, idadi ya watu waliokufa kwenye ajali imeongezeka maradufu kutoka 1,812 mwaka 2000 hadi 3,574 huku idadi ya majeruhi ikipanda na kushuka kutoka 15,123 mwaka 2000 hadi 9,993 mwaka 2015.

Pamoja na kupungua kwa idadi ya ajali, bado watu wengi wanapoteza maisha na wengine kupata ulemavu wa kudumu, idadi ambayo ni kubwa ukilinganisha na nchi zilizoendelea au zinazodhibiti ajali.

FikraPevu inatambua kwamba, idadi ya vifo vinavyosababishwa na magari ni vingi, vinafukuzana na vifo vinavyotokana na malaria ambao ni ugonjwa unaoangamiza zaidi watoto wa chini ya miaka mitano.

Tangu mwaka 2000 hadi 2015, jumla ya makosa madogo ya usalama barabarani yaliyoripotiwa yalikuwa 4,761,760.

Matukio ya kutisha ya ajali

Aliyekuwa Kamanda wa Kikosi cha Usalama Barabarani nchini, ACP Mohammed Mpinga akiongea na waandishi wa habari mwaka 2015, alisema ongezeko la ajali ni kubwa kwa sasa ambapo juhudi za makusudi zisipofanyika hali itakuwa mbaya.

“Kwa kipindi kisichozidi miezi mitatu Januari hadi Machi 2015 kumetokea vifo 866 na majeruhi 2,370 kutokana na ajali 2,116, hii ni hatari sana,” alisema.

FikraPevu inafahamu kwamba, katika mwezi Januari 2015 pekee zilitokea ajali 823 zilizosababisha vifo 273 na majeruhi 876, mwezi Februari zikatokea ajali 641, vifo 236 na majeruhi 726 na mwezi Machi mwaka huo huo zilitokea ajali 652, vifo 357 na majeruhi 761.

Matukio makubwa ya ajali hizo kwa mwaka 2015, ni pamoja na ajali mbaya iliyotokea Machi 11, 2015 katika Kijiji cha Changarawe, Wilaya ya Mufindi, mkoani Iringa iliyohusisha magari mawili likiwamo basi la Majinjah na lori la mizigo na kuua watu 50 na majeruhi 22.

Basi la Majinja likiwa limefunikwa na kontena na kusababisha vifo vya watu zaidi ya 40 huko Mafinga, mkoani Iringa.

Kumbukumbu ambazo FikraPevu inazo zinaonyesha kwamba, Aprili 9, 2015  katika eneo la Mkata mkoani Tanga ilitokea ajali iliyosababisha vifo 10 na majeruhi 12.

Aidha, Aprili 12, 2015 ilitokea ajali mbaya mkoani Morogoro katika eneo la milima ya Iyovi na kusababisha vifo 19 na majeruhi 10, ambapo 13 waliteketea kabisa kwa moto wakati basi la Nganga kutoka Mbeya kwenda Dar es Salaam lilipoteketea baada ya kugongana na Fuso kwenye kona kali za milima hiyo.

Mnamo Aprili 17, 2015 ajali ya basi dogo la abiria lililotumbukia mtoni wilayani Rungwe mkoani Mbeya ilisababisha vifo vya watu 20 na kuacha majeruhi kadhaa.

Matukio mengine ya kusikitisha ya ajali ni vifo vya watu 24 na majeruhi 51 kufuatia ajali mbaya ya basi la Chatco iliyotokea Januari 2011 mkoani Tanga.

Aidha, watu 26 walikufa papo hapo na wengine 45 kujeruhiwa mkoani Tabora mwaka 2011 kufuatia kuanguka kwa basi la AM Cooach lililokuwa linatokea Arusha kwenda Mwanza.

Mnamo Machi 2011, abiria wote 11 waliokuwa katika gari dogo aina ya Toyota Hiace (Kipanya) walikufa baada ya kufunikwa na lori la mafuta eneo la Kibamba, nje kidogo ya jiji la Dar es Salaam.

Ni mwezi huo huo ambapo wasanii 13 wa kundi la muziki la Five Stars Modern Taarab walipoteza maisha katika eneo la Hifadhi ya Taifa ya Mikumi mkoani Morogoro baada ya dereva wa basi dogo aina ya Toyota Coaster lililowabeba wasanii hao kuparamia lori la mizigo lililokuwa limeegesha pembeni mwa barabara kuu ya Iringa–Morogoro.

Inaelezwa kwamba, asilimia 78 ya waathirika wa ajali za barabarani ni abiria na watu wanaotembea kwa miguu, ambapo kwa mujibu wa takwimu za kuanzia miaka ya 2000, asilimia 40 ya wanaokufa kwenye ajali ni abiria ndani ya magari hayo na zaidi ya asilimia 38 ni watembea kwa miguu.

Vyanzo vya ajali

Jeshi la Polisi limesema kwamba kukua kwa uchumi na kuboreshwa kwa miundombinu ya barabara na kukua kwa kipato kwa baadhi ya Watanzania kumeongeza vyombo vya moto vya usafiri.

Gari la Taqwa likiovateki malori katika kona mbaya ya Mlima Kitonga mkoani Iringa.

Hata hivyo, ongezeko hilo halijaenda sambamba na elimu ya utumiaji wa barabara kwa madereva na waenda kwa miguu, hali ambayo imefanya kuwepo kwa ukiukaji wa sheria za barabarani kwa madereva pamoja na waenda kwa miguu.

Hali hiyo, limeeleza Jeshi la Polisi kwamba, imesababisha kuongezeka kwa ajali za barabarani ambazo siyo tu zimesababisha upotevu wa nguvu kazi, lakini pia kuongeza uharibifu wa miundombinu na mali, na kusababisha vifo na majereha kwa manusura.

Sababu zinazochangia ajali za barabarani zimetajwa kuwa ni sababu za kibinadamu, uchakavu au ubovu wa vyombo vya usafiri, na sababu za kimazingira.

Takwimu ambazo FikraPevu inazo zinaonyesha kwamba, sababu za kibinadamu zinachangia ajali nne kati ya tano, ukiwa ni wastani wa asilimia 82.5.

Miongoni mwa sababu hizo za kibinadamu ni udereva wa uzembe, mwendokasi, uzembe wa wapanda baiskeli na pikipiki, mifugo kuvamia barabara, uzembe wa waenda kwa miguu na wenye mikokoteni pamoja na ulevi.

Ubovu ay uchakavu wa magari pamoja na baadhi ya magari kutokuwa na taa ama kuwa na taa hafifu ni sababu zinazochangia pia ajali hizo.

Sababu za kimazingira zimetajwa kuwa ni moto, vizuizi vya barabarani, ubovu wa barabara, vivuko vya reli na uzembe wa abiria.

Yohana Sinkala, mkazi wa Kilyamatundu wilayani Sumbawanga, alisema ajali nyingi zinatokana na uzembe kwa madereva wanaokwenda kasi bila kujali kiwango cha mwisho kinachoelekezwa hata na alama za barabarani.

“Dereva anakanyaga mafuta kana kwamba anataka gari lipae kama ndege, hajali kama kuna matuta, mashimo wala kona na anapenda kuyapita magari mengine bila tahadhali… ajali ikitokea hawezi kujihami,” alisema Sinkala.

Hata hivyo, Ripoti ya Mwaka 1994 kuhusu hali ya usafiri nchini Tanzania iliwahi kubainisha kwamba japokuwa kuna vitu vitatu vinavyosababisha ajali – dereva, gari na barabara – lakini madereva hasa ndio wanaochangia ajali kutokea.

Kulingana na Ripoti hiyo, sababu kubwa ya ajali nchini Tanzania hutokana na madereva wenyewe ambapo ajali za namna hiyo ni kiasi cha asilimia 76.

“Umahiri na umakini wa kuendesha unatokana na mafunzo sahihi na utahini usiopendelea; dereva kujiandaa vya kutosha kabla ya safari; asiendeshe huku amelewa au amechoka; afuate sheria za barabarani; na uwezo wa dereva kubaini endapo gari lake lina udhaifu au kasoro,” alisema Born Again Pagan, Mtanzania aishiye nchini Marekani.

“Madereva wengine ni walevi; hupenda kunywa vileo kabla ya safari na wakati mwingine kupumzika safarini kwenye visima vya ulevi.” Alisema Mwalimu Pagan na kuongeza; “Kuna pia baadhi ya abiria wenye kutaka kufika mapema kungali na jua kule waendapo. Abiria kama hao huhimiza dereva aendeshe kwa kasi. Madereva wengine nao wanapenda sana kuendesha kwa kasi ili wapate muda wa kupumzika, na kupata angalau “moja baridi” au kuwaona wapenzi wao huko waendapo au mwisho wa safari.”

Mwalimu Pagan anasema, madereva wengine, hasa kwenye barabara zisizo na lami, wanapenda kutangulia kuepuka au kuogopa mavumbi yanayoachwa na gari liliotangulia.

“Huwa ni mashindano. Kuna wengine, hasa wamiliki, hupenda sana kushindana kuwa wa kwanza kuchukua abiria au shehena kabla ya wenzao. Tabia hii ni ya kawaida kwenye barabara zetu nyingi.”

Hata hivyo, wananchi wengine wanashusha lawama kwa askari wa usalama barabarani kwamba wanachangia kutokea kwa ajali kutokana na kusimamisha magari ovyo bila kujali eneo walilopo na hata mwendo wa gari wanalolisimamisha.

“Matrafiki wengi wanajificha pembeni ya barabara, gari likitokea likiwa kasi wanajitokeza ghafla na kulisimamisha, yote hiyo ni kutaka kuwatoza faini ama kuchukua fedha ambazo hazipelekwi kokote, ni hatari sana,” alisema Jaffari Kauzeni, mkazi wa Mlowa mkoani Dodoma.

Kauzeni alisema pia kwamba, wamiliki wa magari na madereva wamewaweka baadhi ya wakuu wa trafiki wa wilaya na mikoa mikononi, ambapo yapo madai ya baadhi ya maofisa hao kupelekewa ‘bahasha’ kila wakati ili ‘kuyalinda’ magari yao barabarani hata kama yatafanya makosa.

“Hata kama ofisa wa trafiki mdogo akimkamata mhalifu, kesi yake itafutwa na “wakubwa”.”

Lakini Ripoti hiyo ya 1994 inaelezea kuwa asilimia 7 ya ajali husababishwa na matatizo ya barabara.

Katika kukabiliana na wimbi la ajali hizo, mwaka 2015 Jeshi la Polisi lilitangaza kufuta leseni kwa madereva wote watakaosababisha ajali kwa uzembe, zikiwemo ajali zilizotokea hivi karibuni.

Continue Reading
Click to comment

Leave a Reply

Your email address will not be published. Required fields are marked *

Jamii

Vigogo Halmashauri za Monduli, Karagwe, Biharamulo kikaangoni upotevu wa milioni 171.8 za miradi ya maji

Published

on

Maji ni uhai. Ni uhai kwasababu  yanabeba dhana nzima ya mwanadamu yeyote kuishi na kufanya shughuli zingine za maendeleo. Pia maji ni uhai kwasababu yanagusa sekta zote za uzalishaji, popote utakapokwenda utahitaji maji. Hiyo ndiyo thamani ya maji.

Ni dhahiri kuwa jambo lolote linalofanyika kwa nia ya kuvuruga au kuhalibu mfumo wa upatikanaji wa maji safi na salama, linalenga kuuawa uhai wa binadamu. Kuanzia kwenye uhalibifu wa mazingira, vyanzo vya maji, ukosefu wa rasilimali fedha na watu kutekeleza miradi ya maji hadi kukosekana kwa utashi wa kisiasa kuhakikisha wananchi wanapata maji ya uhakika.

Katika makala hii tunajadili matumizi mabaya ya fedha za miradi ya maendeleo katika baadhi ya halmashauri za wilaya nchini ambazo zimetumia vibaya fedha na kuwahatarishia uhai wakazi wa maeneo yao.

Halmashauri hizo ni Monduli, Karagwe na Biharamulo ambazo  zimekiuka makubaliano ya mkataba wa utekelezaji wa miradi ya maji na kusababisha milioni 171.8 kutumika kwa matumizi ambayo hayakukusudiwa.

Halmashauri hizo 3 katika mwaka wa fedha unaoishia Juni 2017 zilikuwa zinatekeleza miradi ya maji chini ya ufadhili wa Mfuko wa Maendeleo ya Sekta ya Maji (WSDP). Fedha za mfuko wa WSDP hutolewa na nchi wahisani au mashirika ya kimataifa kuhakikisha wananchi hasa maeneo ya vijijini wanapata maji safi na salama.

Wahisani hao wanaongozwa na dhamira kuu; maji ni uhai na binadamu popote alipo ni lazima aypate ili aweze kuishi. Lakini wapo baadhi ya watendaji katika halmshauri hizo kwa kujua au kutokujua wanahujumu miradi inayofadhiliwa na wahisani hao.

Tabia hiyo inatajwa kuwa kikwazo kwa wafadhili kuendelea kuwasaidia wananchi kupata maji kwasababu kukosekana kwa utashi wa kisiasa  kwa baadhi ya watendaji ambao kwa namna moja ama nyingine wanatumia tatizo la maji kama mtaji wa kujinufaisha kisiasa na kupata nafasi za uongozi serikalini.

Kulingana na Mkataba wa makubaliano (MoU) wa uanzishaji wa Mfuko wa WSDP aya ya 9.2.2 pamoja na marekebisho yake ya mwaka 2013 inaeleza kuwa, “Serikali imekubali kusamehe kodi zote zilizowekwa moja kwa moja au zisizo za moja kwa moja kwenye matumizi yote yanayostahili ya bidhaa, kazi na huduma za kifedha chini ya WSDP”.

Lakini halmashauri za  wilaya za Monduli mkoani Arusha; Karagwe na Biharamulo mkoani Kagera zilikiuka kifungo hicho na kutoza kodi yenye thamani sh. Milioni 171.8 kwenye miradi minne ya maji iliyofadhiliwa na mfuko wa WSDP ambayo haikupaswa kukatwa.

Kwa mujibu wa ripoti ya Mdhibiti na Mkaguzi Mkuu wa Hesabu za Serikali (CAG) ya mwaka wa fedha unaoishia Juni 2017 inaeleza kuwa katika halmashauri ya Wilaya ya Monduli ilibainika mikataba miwili ambayo ilitozwa kodi yenye thamani ya sh. Milioni 87.7 kutoka kwenye miradi ya maji ambayo haikustahili kulipa kodi katika wilaya hiyo.

“Nimebaini mikataba miwili, Na. LGA/004/2016/17/RWSSP/W/14 na Na. LGA/004/2016/17/RWSSP/W/10 katika Halmashauri ya Wilaya Monduli Mkoani Arusha, ambapo kiasi cha VAT (ongezeko la thamani) Sh. 87,765,679 kililipwa kwa ajili ya miradi ya maji iliyosamehewa kodi”, imeeleza ripoti hiyo ambayo ilitolewa na CAG, Prof. Mussa Assad wiki iliyopita.

Halmashauri za Karagwe na Biharamulo nazo zilifuata mkondo ule ule wa Monduli kwa kutoza kodi ya sh. Milioni 84.035 kwenye miradi miwili ya maji iliyokuwa ikitekelezwa na mfuko wa WSDP katika wilaya zao.

Taarifa ya CAG inafafanua kuwa “Nimebaini pia mikataba miwili katika Halmashauri za Wilaya Karagwe na Biharamulo yenye namba LGA/033/W/2016/17/W/NT/07 na LGA/032/2016-2017/HQ/WSDP/W/76 LOT 03 ambapo kodi ya ongezeko la thamani (VAT) yenye thamani ya Sh. 84,035,685 ilijumuishwa katika gharama ya miradi ya maji iliyosamehewa kodi.”

Kwa vyovyote vile katika miradi hiyo mitatu kuna harufu ya ufisadi, kama miradi hiyo haikutakiwa kulipa kodi fedha hizo zimeenda wapi?. Na kama serikali ilipokea hizo fedha ilitumia vigezo gani kwasababu masharti ya mkataba ambao serikali ilisaini hayaruhusu kodi ijumuishwe kwenye gharama za mradi wa maji.

Kiasi cha milioni 171.8 kukatwa kodi huenda kimewakosesha wananchi katika maeneo mengine kupata huduma ya maji. Kwa mafano fedha hiyo ingetumika vizuri ingeweza kujenga miradi mingine ya kusambaza maji katika halmashauri hizo na kuwapunguzia wananchi tatizo la upatikanaji wa maji.

 

Nini kifanyike…

CAG katika ripoti yake ameonyesha kusikitika na mwenendo  huo wa baadhi ya watendaji wa halmashauri kutozingatia maadili ya kazi zao. Amebainisha kuwa tabia hiyo ikiendelea inaweza kuwakatisha tamaa wafadhili kuendelea kutoa fedha za misaada.

“Kwa maoni yangu, malipo ya VAT kwa miradi iliyosamehewa kodi yanapunguza uwezo wa Halmashauri kugharamia miradi mingine. Aidha, kutofuata MoU kunakatisha tamaa nia za wafadhili kuendelea kutoa ruzuku katika miradi mingine.”, amesema CAG, Prof. Assad katika ripoti yake.

Kwa kutambua kuwa fedha zilizopotea ni nyingi, Makatibu Tawala wa halmashauri za wilaya hizo 3 wanapaswa kuchukuliwa hatua za kisheria kwa kitendo chao cha kukwamisha upatikanaji wa huduma muhimu ya maji kwa wananchi.

“Napendekeza kwamba, katika siku zijazo Uongozi wa Halmashauri ufuate mkataba wa makubaliano uliosainiwa. Aidha, Afisa Masuuli achukuliwe hatua kwa ulipaji wa VAT katika miradi iliyosamehewa kodi,” ameshauri CAG, Prof. Assad.

Continue Reading

Afya

Ubakaji, ulawiti watoto usifumbiwe macho Kinondoni

Published

on

Na Daniel Samson

Kulingana Sheria ya Mtoto ya mwaka 2009 sehemu ya pili (II) inatoa wajibu na majukumu ya mzazi katika kumlea mtoto ambapo inaeleza kuwa “Kila mzazi atakuwa na wajibu na majukumu yaliyowekwa ama na sheria au vinginevyo kwa mtoto wake ambayo yatajumuisha wajibu wa kumlinda mtoto dhidi ya utelekezwaji, ubaguzi, vurugu, unyanyasaji, madhara ya kimwili na kiakili na ukandamizaji”

Ni tofauti na matakwa ya sheria, wako baadhi ya wazazi ambao wanawafanyia watoto wao ukatili wa aina mbalimbali na kukiuka jukumu la msingi la kuwalinda na kuwatengenezea mstakabali mzuri wa maisha.

Lucy (4) (jina hilo sio halisi) ni miongoni mwa watoto wengi duniani ambao wamefanyiwa ukatili wa kijinsia na watu ambao wanapaswa kuwalinda na kuhakikisha wanakuwa na furaha wakati wote.

Lucy alibakwa na baba yake mzazi aliyetambulika kwa jina la Clement (40) (jina la pili tumelihifadhia). Tukio hilo lilitokea kata ya Bunju B wilaya ya Kinondoni ambapo alimsababishia maumivu makali sehemu zake za siri.

“Baba aliniingiza vidole huku chini, amekuwa akinifanyia muda mrefu. Aliniingiza chumbani akanilaza kitandani na kufungua zipu na kutoa dudu”,amesema Lucy na kuongeza kuwa baba yake alimuingilia nyumbani kwao Bunju B ambako wanaishi kwenye nyumba ya kupanga.

Akihojiwa na mwandishi wa makala haya Lucy amesema baba yake alimkataza kuwa asimuambie mtu yoyote lakini maumivu yalipozidi alimwambia mama yake aitwaye Beatrice (jina la pili tunalihifadhi kwa ajili ya usalama)

Beatrice anasema aligundua kuwa mtoto wake ameingiliwa wakati akimuogesha ambapo alikuwa akilalamika kwamba anapata maumivu sehemu za siri.

“Nilimuuliza tatizo nini lakini hakuniambia akabaki analia na kuonyesha sehemu zake za siri”, amesema Beatrice na kuongeza kuwa alimuita mama Vena ambaye wanaishi pamoja katika nyumba yao ambapo walimchunguza na kukuta ameharibiwa sehemu zake za siri.

“Nikampandisha juu ya kiti nikwambia wapi panauma? Ebu nionyeshe akapanua miguu. Nikamuuliza mbona uko hivi kuna tatizo gani huku mbona kuna damu, kulikuwa na michubuko, maana kulikuwa kwekundu kote…”, Amesema Mama Vena.

“Nikamuuliza  mbona uko hivi umefanyaje? Akaniambia baba amefanya hivi, baba alifungua zipu akatoa dudu akaingia huku”, amebainisha Mama Vena.

Anasema usiku huo huo, aliambatana na Beatrice hadi kwa kaka yake (Clement) ambaye anaishi mtaa wa Idara ya Maji kata ya Bunju B ili wasaidiwe kumkamata mtuhumiwa. Walifanya kikao ambapo walianza kumtafuta Clement ambaye tayari alikuwa ameondoka nyumbani baada ya kutekeleza unyama huo.

Familia hiyo haikutaka kulifikisha suala hilo kwenye vyombo vya dola na ili kumnusuru mtuhumiwa. Inaelezwa kuwa msimamo huo wa familia ulipata nguvu kwasababu Beatrice, mke wa Clement ilikataa kumfikisha mme wake polisi kwa kuhofia kukosa matunzo.

Mama Vena anasema siku tatu baada ya tukio hilo alitoa taarifa kwenye ofisi ya serikali ya mtaa wa Idara ya Maji na kutaka suala hilo lifikishwe polisi.

 Lucy aliyefanyiwa udhalilishaji wa kingono na baba yake mzazi

 

 Kesi yafikishwa Polisi

Kutokana na shinikizo la majirani, Beatrice, aliripoti tukio hilo kwenye kituo cha Polisi cha Mabwepande ambako huko jalada la kesi ya ubakaji lilifunguliwa Novemba pili 2017.

Beatrice alipewa Fomu ya Polisi (PF3) ambapo alimpeleka mtoto huyo hadi hospitali ya Mwananyamala iliyopo Wilaya ya Kinondoni kwa ajili ya vipimo.  Alionana na daktari na Lucy alifanyiwa vipimo viwili, cha Maambukizi ya virusi vya UKIMWI na kile cha kuingiliwa kimwili.

Majibu ya daktari  yalionyesha dhahiri kuwa mtoto huyo amenajisiwa na sehemu zake za siri zimeharibiwa na majibu ya kipimo cha maambukizi ya UKIMWI yamefanywa kuwa siri ili kutoharibu upelelezi wa kesi hiyo ambayo iko polisi.

Siku hiyo hiyo aliwasilisha majibu hayo kwa Mkuu wa Kituo Cha Polisi Cha Mabwepande, ambapo majibu yalipokelewa kwa ajili ya ushahidi. Upelelezi wa tukio hilo unaendelea ili kumkamata mtuhumiwa Clement ambaye alitoroka kusikojulikana baada ya kupata taarifa kuwa anatafutwa na polisi.

 

 Ukubwa wa Tatizo la ubakaji

Katika kuangazia ukubwa wa tatizo la ubakaji katika Manispaa ya kinondoni, Chama Cha Wanahabari Wanawake  (TAMWA), kimeshirikiana na mwanadishi wa makala haya ili kuibua na hatimaye kutoa suluhu juu ya njia sahihi ya kukomesha vitendo hivi.

Kwa mujibu wa takwimu za Jeshi la Polisi Tanzania (2016) zinaonyesha kuwa katika kipindi cha miezi saba ya kwanza ya mwaka 2016 yaani kuanzia Januari hadi Julai, Kinondoni ambayo Kipolisi ni Mkoa ilikuwa inaongoza kwa kuwa na kesi 187 za ubakaji katika kipindi hicho huku ikifuatiwa na Mbeya (177), Morogoro (160),  Pwani (159), Temeke (139) na Ilala (109).

Pia Takwimu za Jeshi hilo zinaonyesha kuwa matukio ya ubakaji nchini Tanzania yameongezeka kutoka 6,985 mwaka 2016 na kufikia matukio 7,460 mwaka 2017 na ongezeko hilo ni asilimia 6.8.  Makosa ya kunajisi yalikuwa 16 kwa mwaka 2016 na yaliongezeka hadi kufikia 25 mwaka uliofuata

Kinondoni inatajwa kuwa na matukio mengi ya ubakaji kwa sababu kuna mwamko wa watu kupinga vitendo vya ukatili wa kijinsia ikiwemo kuwaripoti  watuhumiwa wa vitendo hivyo ili wachukuliwe hatua za kisheria.

Kwa upande wake, Mkuu wa Wilaya ya Kinondoni, Ali Hapi ameitaka jamii kushirikiana na vyombo vya dola kwa kutoa taarifa sahihi za matukio ya ubakaji, “ Jeshi la Polisi limejipanga ili kila aliyepatikana na hatia ya ubakaji achukuliwe hatua”.

 

Ustawi wa Jamii

Mshauri na Mtaalamu wa Saikolojia kutoka Taasisi ya Ustawi wa Jamii Tanzania, Zainabu Rashidi amesema ubakaji una athari nyingi kwa watoto ambapo zinaweza kuendelea hadi ukubwani.

Amesema mtoto aliyebakwa hujiona duni na mpweke na hufikia hatua ya kujitenga na kuogopa kucheza na wenzake kwa sababu jamii humnyooshea kidole ambapo hujiona mwenye hatia.

“Athari kubwa ni kwamba mtoto anakuwa mnyonge, mpweke na anakosa hamu ya kushiriki na wenzake katika mambo mengine kwa sababu vitendo vya ubakaji katika jamii vinatafsiriwa kama aibu na unyonge. Na haijalishi mtoto amebakwa na nani? Jamii huanza kumnyoshea kidole kwamba Yule mtoto alibakwa”,  amesema Mtaalamu huyo na kuongeza kuwa,

“Anapokuwa mtu mzima anaendeleza tabia ambazo ni mbaya, anaweza kufanya vitendo vya kikatili, kulipiza kisasi, kumchoma mtoto mikono na mwingine anaweza kufikia hatua ya kuchanganyikiwa”.

Ameitaka jamii kujenga utamaduni wa kutoa taarifa na kuwasaidia waathirika wa ubakaji kwa kuwapeleka Ustawi wa Jamii ili wapate tiba ya kisaikolojia na kurejea katika hali ya kawaida.

                                            Beatrice, mama wa Lucy  aliyebakwa na baba yake mzazi

 

Msimamo wa Serikali dhidi ya Ukatili

Serikali kupitia Naibu Waziri wa Afya, Maendeleo ya Jamii, Jinsia, Wazee na Watoto, Dkt Faustine Ndungulile ameitaka jamii kutoyafumbia macho matukio ya ubakaji aidha inapaswa kutoa taarifa ili watuhumiwa wachukuliwe hatua za kisheria.

“Kupaza sauti katika kupinga ukatili wa kijinsia na kuondokana na utamaduni wa kukaa kimya dhidi ya vitendo vya kikatili na madhara yake yanamgusa kila mmoja katika ngazi tofauti”, amesema Dkt. Ndungulile.

Hata hivyo, Serikali imezifanyia maboresho Sera na Sheria ikiwemo  Sheria ya Elimu sura 353 ambayo inatoa adhabu ya kifungo kisichopungua miaka 30 kwa mtu yeyote atakayembaka na kumpa mimba mwanafunzi wa shule ya Msingi au Sekondari.

Pia Serikali imeanza utekelezaji wa Mpango Kazi wa Taifa wa kutokomeza Ukatili dhidi ya wanawake na watoto unaojumuisha sekta zote zinazohusu wanawake na watoto kwa lengo kuzuia aina zote za ukatili.

 

 Nini Kifanyike?

Ili kupunguza au kuyamaliza matukio haya, jamii inapaswa kuacha tabia ya kuwalinda wabakaji lakini wanatakiwa kuwafikisha kwenye vyombo vya dola ili wachukuliwe hatua za kisheria.

Pia kuboresha sheria na sera ikiwemo Sheria ya Ndoa ya mwaka 1971 ambayo inatoa mwanya kwa watoto kuolewa katika umri mdogo. Mabadiliko hayo yaambatane na mikakati ya kitaifa ya kuwalinda watoto dhidi ya vitendo vyote vya ukatili ukiwemo ubakaji na ulawiti.

Continue Reading

Afya

Waendesha bodaboda wanachangia asilimia 13 ya mimba za utotoni nchini

Published

on

  • Kuna uhusiano gani kati ya bodaboda na ongezeko la mimba za utotoni kwa wasichana wanaosafiri umbali mrefu kwenda shule?

Gazeti la The Guardian la Tanzania, linawaweka waendesha bodaboda kama kiini cha ongezeko la mimba za utotoni nchini Tanzania. Kwa mujibu wa tafiti zilizofanywa hivi karibuni, waendesha bodaboda wanachangia asilimia 13 ya mimba za utotoni nchini.

Matumizi ya bodaboda, ama pikipiki kwaajili ya biashara, yameongezeka sana nchini Tanzania hasa pale ambapo ni ngumu kupata usafiri mwingine. Umaarufu wake unasababishwa na upatikanaji mgumu wa usafiri pamoja na bei nafuu za pikipiki; na huwa zinaendeshwa na vijana wadogo waliotoka kumaliza tu elimu ya sekondari.

Kwa mujibu wa utafiti huo, wasichana wadogo, hasa wale wa vijijini, wako katika mazingira hatarishi zaidi kushawishika kingono kwasababu inawabidi kusafiri umbali mrefu kwenda shule. Gazeti la Financial Times linasema, baadhi ya wasichana huishi umbali wa hadi kilometa 15 kutoka shuleni, hivyo huwalazimu kupanda bodaboda badala za kutembea umbali huo.

Kwakuwa hawana fedha za kutosha kuwalipa waendesha bodaboda hao, huishia kulala nao kama njia ya malipo. Wanapopata ujauzito kwa jinsi hii, huishia kufukuzwa shuleni.

 

Swali hapa ni je, mimba ngapi za utotoni ambazo zinasababishwa na waendesha bodaboda nchini Tanzania?

PesaCheck imefanya uchunguzi na kubaini ya kwamba, madai ya kuwa waendesha bodaboda wanachangia ongezeko la mimba za utotoni Tanzania ni kweli kwa kiasi kikubwa kwa sababu zifuatazo:

Utafiti wa Taifa kuhusu Vichocheo na Madhara ya Ndoa za Utotoni nchini Tanzania, unafafanua kwamba wasichana kutoka kaya masikini ni kundi hatarishi kwasababu ya hali yao ya kiuchumi. Kukosa mahitaji yao ya msingi, kama kuweza kulipia usafiri, kunawafanya iwe rahisi kunyanyaswa kingono.

Ni ngumu kujua idadi kamili ya mimba zilizosababishwa na waendesha bodaboda. Lakini, kilicho bayana ni kwamba wasichana waishio vijijini nchini Tanzania ni kundi hatarishi la kunyanyaswa kingono na watu wanaohusika na usafiri sehemu mbalimbali nchini.

Watoto wengi hukumbana na changamoto mbalimbali wanapokuwa njiani kwenda na kutoka shule. Baadhi ya makondakta hukataa kuwachukua kwasababu wanalipa nauli ndogo. Safari ya kwenda na kutoka shule huwaweka watoto katika mazingira hatarishi. Ripoti ya “Ukatili Dhidi ya Watoto Tanzania” inaonyesha kwamba kati ya wasichana wanne waliotoa taarifa ya kufanyiwa ukatili wa kijinsia, mmoja kati yao ilimtokea akiwa anaenda shule, aidha kwa usafiri wa umma au akiwa anatembea.

Kwa mujibu wa Ripoti ya Ukatili Dhidi ya Watoto Tanzania (2011), msichana 1 kati ya 25 mwenye umri wa miaka 13 hadi 17 amewahi kupewa pesa au zawadi ili afanye ngono. Ripoti hii inaonyesha kwamba asilimia 23 ya wasichana wananyanyaswa kijinsia wakiwa wanaenda au kutoka shule.

Hivyo, madai ya kwamba waendesha bodaboda wanachangia ongezeko la mimba za utotoni nchini Tanzania ni kweli kwa kiasi kikubwa. Kuna ushahidi unaoonyesha kuwa wasichana wanaotoka kwenye kaya masikini, hasa walioko vijijini, wanapata shinikizo kubwa kulipia usafiri wao kingono. Kwa kuwanyanyasa wasichana hao, waendesha bodaboda huwaongezea ugumu ambao tayari wanao.

Matokeo yake, maamuzi ya kuwafukuza shule wasichana waliopata ujauzito huleta matokeo hasi. Kunawafanya wakose nafasi ya kupata elimu ambayo wangeihitaji kujikwamua na umasikini. Hivyo, huwaweka katika hali hatarishi zaidi.

 

Makala hii imeandikwa na PesaCheck Fellow Belinda Japhet, Mwandishi na Mshauri Mtaalamu wa maswala ya mawasiliano.

Continue Reading

Muhimu Kusoma

Copyright © 2018 FikraPevu.com