Connect with us

Siasa

Wananchi vijijini kumilikishwa vyombo vya watumiaji maji

Published

on

Serikali imeendelea kutekeleza mikakati mbalimbali ili kuwapatia wananchi wote maji safi na salama. Imejiwekea malengo ya kuhakikisha ifikapo 2020 watu milioni 24 wapate maji ya uhakika ili kuwalinda dhidi ya magonjwa ya mlipuko na mabadiliko ya tabia nchi. Malengo ya Maendeleo Endelevu (SDG’s) ni kuwafikia watu bilioni 1.4 duniani kote kwa maji safi ifikapo 2030.

Malengo ya serikali ni utekelezaji wa matakwa ya Sera ya Taifa ya Maji ya mwaka 2002 ambayo inaitaka serikali kutambua kuwa upatikanaji wa maji safi na salama ni hitaji la msingi na haki ya kila mtu, utoaji wa huduma ya maji vijijini na mjini uimarishwe.

Malengo ya serikali yanatokana na hali halisi ya tatizo la uhaba wa maji ambalo linaendelea maeneo mbalimbali nchini na kuathiri shughuli za uzalishaji mali na kuelekea uchumi wa viwanda na kati ifikapo 2025.  

Kulingana na takwimu za shirika la Water Aid Tanzania (2017) zinaonyesha kuwa zaidi ya watu milioni 26 nchini Tanzania na milioni 844 duniani kote hawapati maji safi na salama. Kwa muktadha mkakati wa serikali utapunguza tatizo kwa sehemu ikizingatiwa kuwa idadi ya watu nchini inaongezeka kwa kasi huku jitihada za kupunguza tatizo zikisuasua.

Katibu Mkuu wa wizara ya Maji na Umwagiliaji, Prof. Kitila Mkumbo akizungumza hivi karibuni katika kipindi cha runinga alikiri kuwepo kwa uhaba wa maji katika maeneo mbalimbali nchini.

“Maji tuliyonayo katika nchi hayaongezeki wakati idadi ya watu inaongezeka, lakini pili kwasababu ya shughuli zetu za kibinadamu tumeathiri baadhi ya vyanzo vya maji,” alinukuliwa Prof. Mkumbo.

Kijiji cha Nang’awanga kilichopo kata ya Njengwa Halmashauri Nanyamba iliyopo mkoa wa Mtwara ni miongoni mwa vijiji vingi nchini ambavyo bado havijafikiwa na huduma ya maji ya bomba na kuwalazimu wakazi wake kutumia maji ya visima vifupi ambavyo havikidhi mahitaji yote katika kijiji hicho.

Hata hivyo, maji hayo sio salama ambapo wanachi hutembea umbali mrefu kufuata maji safi katika vijiji vya jirani kwa ajili ya matumizi ya nyumbani na shughuli nyingine za uzalishaji mali.  

Sera ya Taifa ya Maji 2002 inathibitisha kuwa “Matumizi halisi ya maji vijijini ni kati ya lita 5 kwa mtu kwa siku katika maeneo yenye uhaba mkubwa wa maji, na lita 30 kwa mtu kwa siku kwa maeneo mengine. Kwa ujumla, maji kwa ajili ya matumizi ya nyumbani, ambayo mara nyingi siyo salama, hupatikana mbali na makazi ya watu”.

Mkazi wa Kijiji cha Madoto, tarafa ya Kimamba wilaya ya Kilosa, Joel Ndomembo anasema kwenye kijiji chao kuna zaidi ya visima viwili lakini havikidhi mahitaji ya wakazi wote, “serikali imejenga visima hapa kijijini lakini maji hayatoshi na tunalazimika kuyafuata kijiji cha jirani ambako ni zaidi ya kilomita 2”.

                                                                        Mtoto akichota maji bombani

 

Mkakati wa Serikali

Licha ya serikali kutekeleza miradi ya maji vijijini imekuwa ikiendelea kupungua na mahali pengine miradi kutofanya kazi kabisa kutokana na sababu mbalimbali, zikiwemo kutosimamiwa vizuri na kukosa matengenezo muhimu. Katika baadhi ya maeneo, watumiaji wa maji wengine bado wanadhani kuwa jukumu la kuwapatia wananchi huduma ya maji ni la Serikali pekee, kama ilivyokuwa hapo awali.

Serikali imeanzisha program maalumu ya uundwaji wa vyombo vya watumiaji maji (registration of legal community owned water supply organizations) katika maeneo ya vijijni ili kutoa fursa kwa wadau mbalimbali kushirikishwa katika uendelezaji wa rasilimali hiyo muhimu nchini na kuachana na dhana ya kuisubiri serikali kuwapelekea maji.

Programu hii inahusu ujenzi wa miundombinu ya maji vijijini, uhamasishaji wa wananchi kuhusu usafi wa mazingira vijijini, na uimarishaji wa Halmashauri na taasisi mbalimbali. Utekelezaji wa programu unahusisha taasisi mbalimbali, zikiwa katika ngazi ya taifa, mikoa, Halmashauri, vijiji, na sekta binafsi.  Ngazi ya mkoa inafuatilia na kutoa ushauri kwenye Halmashauri. Ngazi ya Halmashauri ndio nguzo kuu ya utekelezaji.

 Lengo kuu la kuanzisha vyombo vya watumiaji maji ni kuifanya miradi imilikiwe na kusimamiwa na wananchi wenyewe ili kuhakikisha kuwa huduma ya maji inakuwa endelevu. Ili miradi ya maji iwe endelevu na iweze kutoa huduma ya maji kwa ufanisi ni lazima iwe na fedha za kujiendesha zitakazotokana na mauzo ya maji.

Hii itawezesha huduma ya maji kuwa endelevu. Sera ya maji inasisitiza miradi ijengwe, iendeshwe na kusimamiwa na wananchi ili ijiendeshe kwa kufanya matengenezo kila inapohitajika bila kutegemea ruzuku kutoka serikalini.

Continue Reading
Click to comment

Leave a Reply

Your email address will not be published. Required fields are marked *

DATA

Maambukizi  ya Ukimwi yanavyoshamirisha yatima shule za msingi Iringa, Mbeya

Published

on

Mikoa ya Iringa, Mbeya na Njombe imetajwa kuongoza kwa idadi kubwa ya wanafunzi yatima wanaondikishwa katika shule za mingi, jambo linaloweza kuongeza gharama za matunzo kwa watoto hao.

Kulingana na uchambuzi wa takwimu za Wizara ya Tawala za Mikoa na Serikali za Mitaa (TAMISEMI) za mwaka 2016 zinaeleza kuwa mkoa wa Iringa ulishika nafasi ya kwanza kitaifa kwa kuwa na wanafunzi  29,062 yatima sawa na asilimia 14.4% ya wanafunzi wote wa shule za msingi kwa mwaka huo.

Iringa ilikuwa na wanafunzi  wa shule za msingi wapatao 202,113 lakini kati ya hao mwanafunzi 1 kati ya 10 alikuwa ni yatima.

Kulingana na Sheria ya Mtoto ya Mwaka 2009, mtoto anahesabika kuwa ni yatima endapo atafiwa na mzazi mmoja au wote wawili. Kimsingi anakosa matunzo au upendo wa mzazi mmoja au wote wawili ambapo inaweza kuwa ni changamoto kwa ukuaji wake hasa katika upatikanaji wa elimu.

Takwimu hizo zinaonyesha kuwa siyo Iringa pekee ndiyo yenye idadi kubwa ya wanafunzi yatima lakini mikoa yote inayounda kanda ya Nyanda za Juu Kusini iko kwenye nafasi ya juu kabisa miongoni mwa mikoa 5  ya Tanzania bara yenye yatima wengi.

Nafasi ya pili inashikwa na mkoa wa Njombe ambao ulikuwa na wanafunzi  yatima 19,794 sawa na asilimia 12.7, ikifuatiwa na Mbeya (41,956) sawa na 11.3%. Mkoa wa nne ni Pwani (26,545) sawa na 10.4% na nafasi ya tano ni Kagera (45431) sawa na asilimia 9.8.

Mikoa hiyo mitano inaunda jumla ya asilimia 44.2  ya wanafunzi wote  731,536 yatima waliokuwepo katika shule za msingi kwa mwaka wa 2016. Hiyo ni sawa na kusema kuwa watoto 4 wa mikoa hiyo mitano kati ya 10 ya Tanzania bara ni yatima.

Lakini iko mikoa ambayo imefanikiwa kuwa na idadi ndogo ya wanafunzi  yatima ikiwemo Manyara ambayo ilikuwa na wanafunzi 15,854 sawa na 6.2% ikifuatiwa na Kigoma (6.5%),  Singida na Mtwara ambazo zote kwa pamoja zilikuwa na 6.7 %. Na mkoa wa tano toka chini ni Lindi (6.8%).

Nini kiini cha kuwepo utofauti mkubwa wa kimkoa wa uwepo wa wanafunzi yatima katika shule za msingi za serikali na binafsi nchini?

ASILIMIA ZA WANAFUNZI YATIMA KATIKA SHULE ZA MSINGI KIMKOA- 2016

 

Wadau waelezea dhana hiyo

Wadau wa afya na masuala ya elimu ya jamii wanaeleza kuwa kuna uhusiano mkubwa wa ugonjwa wa UKIMWI na uwepo wa wanafunzi wengi au wachache yatima katika maeneo mbalimbali nchini.

 Kulingana na takwimu za Tume ya Kudhibiti Ukimwi Tanzania (TACAIDS) za mwaka 2017 zinaeleza kuwa mikoa ya Mbeya, Njombe na Iringa ambayo ina wanafunzi wengi yatima ndiyo vinara wa maambukizi ya Virusi vya Ukimwi nchini.

Kwa muktadha huo idadi ya wazazi wanaofariki kwa maradhi hayo nayo ni kubwa; uwezekano wa watoto wengi kubaki au kuondokewa na wazazi wote wawili ni mkubwa. VVU husambazwa zaidi kwa njia ya ngono (Uasherati na uzinzi), Matumizi ya pombe na dawa za kulevya, kutakasa wajane na baadhi ya mila na desturi. Ugonjwa huo hauna dawa wala kinga.

TACAIDS inaeleza kuwa  mkoa wa kwanza ni Njombe wenye  asilimia 14.8 ikifuatiwa na Iringa kwa asilimia 9.1 na Mkoa wa Mbeya unashika nafasi ya tatu kwa asilimia 9. Lakini imebainika kuwa mikoa yenye wanafunzi yatima wachache katika shule ina viwango vidogo vya maambukizi ya UKIMWI. Mafano  Manyara (1.5%) na Lindi (2.9%).

Msemaji wa Tacaids, Glory Mziray, wakati akiongea na wanahabari alisema maeneo watanzania walioonesha kuwa na ufahamu sahihi wa elimu kuhusu Virusi vya Ukimwi (VVU) na Ukimwi wanafikia asilimia 60 jambo linalosababisha kuwepo mwamko mdogo wa kubadili tabia katika maeneo yenye maambukizi makubwa ya maradhi hayo.

Alibainisha kuwa njia mojawapo ya kupunguza maambukizi ya Ukimwi ni tohara kwa wanaume. Njia hiyo napunguza maambukizi ya Ukimwi kwa asilimia 60 na kusisitiza kuwa ipo haja ya kutoa elimu zaidi juu ya uelewa wa ugonjwa huo ili watoto wapate matunzo ya wazazi wote wawili.

Kwa upande wake, Mkurugenzi Mtendaji wa Asasi ya Vijana ya YOPOCODE, Alfred Mwahalende amesema mila, ushirikina na kugombania mali ni sababu nyingine inayoongeza watoto yatima shuleni.

“Sababu zingine ni masuala ya kishirikina ambayo hayazungumzwi sana. Katika maeneo ambayo tumekutana na wanavijiji wanaseama baba alirogwa kutokana na mali ili ndugu zake warithi. Wengine wanatafuta utajiri kwa kutoa ndugu zao kafara.” Ameeleza Mwahalende.

Amebainisha kuwa elimu itolewe kwa jamii juu ya kuwatunza watoto yatima na jinsi ya kujikinga na maradhi yote yanayosababisha vifo kwa wazazi ambao wanawajibika kuwalea na kuwasomesha watoto.

“Ninachoweza kusema ni elimu  itolewe lakini pia Asasi zinazoshughulika na masuala ya watoto yatima zione njia ya kuweka sawa kuimarisha na kuwapokea watoto wengi kwenye vituo vyao.” Amesema Mwahalende.

Continue Reading

Sayansi na Teknolojia

Maxence awataka vijana kuchangamkia fursa za mtandao ya kijamii

Published

on

Mkurugenzi Mtendaji wa JamiiForums, Maxence Melo amesema licha ya kuwepo kwa sheria zinazoonekana kuminya uhuru wa mitandao ya kijamii, bado vijana wana nafasi kubwa ya kufaidika na fursa mbalimbali zilizopo kwenye teknolojia hiyo inayokuwa kwa kasi duniani.

Akizungumza mwishoni mwa wiki katika semina iliyofanyika Tume ya Sayansi na Teknolojia Tanzania (COSTECH) jijini Dar es Salaam, Melo alisema kuna fursa nyingi ambazo zikitumika vizuri zinaweza kubadilisha maisha ya vijana ambao wanatumia mitandao ya kijamii kwasababu Tanzania iko kwenye ramani ya dunia.

“Fursa ni kwamba mitandao imetufungua sana kwa kiwango ambacho Tanzania imeiingia kwenye ramani. Kuna vitu vingi vinatokea ambavyo tunaweza kuvifanya ni innovation (uvumbuzi). Lazima tutengeneze innovation ambazo zinaweza kutusaidia.” amesema Melo.

Amesema fursa ya kwanza ni ya miamala ya fedha inayofanyika kwa njia ya mtandao ambayo inawezeshwa na intaneti ambapo kijana anaweza kupata fedha popote alipo kwaajili ya shughuli zake za kijamii au kiuchumi na kuokoa muda wa kwenda benki au kwenye mashine za kutolea fedha (ATM Machine).

“Miamala mnayoifanya kwa M-pesa isingewezekana bila kuwa na mtandao wa intaneti. Inaweza kufanyika lakini ingeweza kufanya kama inavyofanyika bila mtandao wa intaneti. Intaneti ikikata kabisa hapa nchini, mabenki hayatafanya kazi kwa ufanisi kama ambavyo yanafanya kwa sasa,” amesema Melo.

Amebainisha kuwa fursa nyingine ujio wa sarafu ya digitali (Cryptocurrency) inayowawezesha vijana kufanya biashara ya mtandao ikiwemo kuweka dhamana, kununua hisa. Cryptocurrency ni sarafu iliyojificha ambayo huwezi kuiona kwa macho lakini unaweza kuitumia kwa matumizi ya kila siku.

“Hata kwenye mitandao mnaona kuna kitu kinakuja kinaitwa “Cryptocurrency” ni fursa. Fursa zinaweza kuwa zimegawanyika; fursa ya kupigwa au fursa ya kufanya kihalali kwasababu hata humo katikati wameingia wapigaji. Tumejaribu kuangalia wale wanaosema kwenye “cryptocurrency” na uhalisia wake na jinsi ya kwenda mbele.” Amefafanua Melo.

Hata hivyo, amewataka vijana kuwa makini na biashara za mtandaoni ili kuepuka matapeli ambao wanatumia teknolojia ya mitandao vibaya, “Ni vema mnapokuwa mnafanya hayo mambo mkajua kabisa kupigwa ni rahisi.”

Ameongeza kuwa mitandao inaweza kuwa njia nzuri ya kuimarisha Demokrasia ya vyama vingi ambapo wananchi wanapewa uhuru wa kuchagua kiongozi wanayemtaka kwa kutumia teknolojia rahisi ambayo itaepusha vurugu za kisiasa na kuongeza ajira kwa vijana.

“Kwa ambao mnafuatilia nchi moja ya kiafrika imetumia ‘Cryptography’ (maandiko ya mficho) kwaajili ya uchaguzi. Inasaidia kuepusha haya mambo ya kusema kwamba si tumeibia kura, kwahiyo kwa yeyote atakayetengeneza teknolojia hiyo ataisaidia Tume ya Uchaguzi, vyama vya siasa kusimamia uchaguzi. Kila kitu kiko wazi aliyeshinda kashinda kihalali. ‘Cryptography’ ndio mustakabali wa kizazi hichi tulichonacho.” Amesema Melo.

Lakini amesema ujio wa Sheria ya Maudhui ya Mtandaoni ya mwaka 2015 na Kanuni zake za mwaka 2018 zimeminya utendaji wa mitandao hasa kwa vijana wanaoendesha majukwaa, blogu hata redio na runinga za mtandaoni kwasababu sio sehemu salama kwa wafanyabiashara na makampuni kutangaza bidhaa au huduma zao.

“Sheria na kanuni zinazotengenezwa na mamlaka hapa niwaambie ukweli eneo hilo sio salama tena. Ninaweza kukuambia wekeza lakini halilipi. Tangu kuingia kwa kanuni za maudhui mtandaoni makampuni yameondoa matangazo”, amesema Melo.

Kwa upande wake, Mtaalamu wa Usalama Mtandaoni kutoka kampuni ya Kabolik, Robert Matafu amesema wakati vijana wanatumia fursa za mtandaoni ni muhimu pia wafikirie kujihakikishia usalama wao binafsi na miradi yao.

“Teknolojia ni njia inayokusaidia kurahisisha kazi. Ukitaka kuwa salama ni muhimu ukajenga mfumo thabiti utakaokulinda na hatari zote. Kwasababu kwenye mtandao kunapatikana kila taarifa hata jina lako, makampuni na mashirika ni muhimu kuwa nasera na miongozo “ amesema Matafu.

Amesema ili kujihakikishia usalama zaidi ni kuweka neno la siri (password) kwenye simu na kompyuta ili kutokuruhusu mtu yeyote asiyehusika kuingilia mawasiliano au shughuli zako.

Naye, Dkt. Philip Filikunjombe kutoka Mamlaka ya Mawasiliano Tanzania (TCRA) amesema watumiaji wa mitandao ya kijamii wanatakiwa kuzisoma na kuzielewa sheria na kanuni za Makosa ya mtandao ili kuepuka kuingia kwenye matatizo yasiyo ya lazima.

Amebainisha kuwa vijana wakifahamu sharia itawasaidia kufahamu mambo halali na haramu kwenye mitandao na kuwasaidia kuendeleza miradi itakayowanufaisha kiuchumi na kijamii.

Continue Reading

Afya

Kadi alama ya lishe  kutokomeza utapiamlo, udumavu kwa watoto chini ya miaka 5

Published

on

Serikali imeanza kutumia kadi alama ya lishe ili kuongeza uwajibikaji kwa watoa huduma itakayosaidia kupunguza tatizo la utapiamlo na udumavu kwa watoto nchini.

Muhtasari wa hali ya utapiamlo Tanzania ya mwaka 2016 inaonyesha kuwa asilimia 34 ya watoto chini ya umri wa miaka mitano nchini wamedumaa. Kwa maeneo maeneo ya mjini ni asilimia 25 na vijijini ni asilimai 38.

Kutokana na viwango vikubwa vya utapiamlo na udumavu vinavyosababisha na lishe duni, vimeathiri ukuaji na uwezo wa watoto kijifunza shuleni, jambo ambalo lina matokeo hasi kwa nguvu kazi ya taifa.

Waziri wa Afya, Maendeleo ya Jamii, Jinsia, Wazee na Watoto, Ummy Mwalimu amesema  matumzi ya kadi alama ya lishe utasaidia kufuatilia ufanisi na uwajibikaji wa watoa huduma za lishe nchini ili kuhakikisha viashiria vyote vya utapimlo vinadhibitiwa  mapema na kuwawezesha watoto na watu wazima kuepukana na udumavu wa akili na mwili.

“Katika kufuatilia kiwango cha ufanisi katika utekelezaji wa afua za lishe nchini na kuhimiza uwajibikaji kwa watoa huduma, Wizara imeanza kutumia Kadi Alama ya Lishe (Nutrition Score Card). “ amesema Waziri Ummy.

Amesema Kadi hiyo itakuwa na viasharia 18 ambavyo vitatumika kupima utekelezaji wa lishe katika maeneo mbalimbali nchini. Viashiria hivyo vitatumika kama vigezo vya msingi ambavyo vinaonyesha mtoto aliyekidhi vigezo muhimu vya lishe ikiwemo kupata matone ya vitamin, madini, chakula bora na chanjo.

“Kadi Alama hii ina jumla ya viashiria 18 ambavyo vinatumika kufuatilia utekelezaji wa afua za lishe na matumizi ya kadi hii yamezingatia uzoefu uliopatikana katika matumizi ya kadi alama nyingine zilizopo nchini kama ile ya Malaria na ile ya Afya ya Uzazi, Mama na Mtoto. “, amesema Waziri Ummy.

Kwa upande wake, Mwenyekiti wa Kamati ya Bunge ya Huduma za Jamii, Peter Serukamba amesema  ili kampeni hiyo ifanikiwe, serikali inatakiwa kuongeza bajeti kwa taasisi  ya Chakula na Lishe (TFNC) kuwezesha kutimiza majukumu yake ikizingatiwa kuwa taasisi hiyo inafanya kazi na sekta zaidi ya moja.

Amesema viwango vya udumavu vinavyotokana na lishe duni kwa watoto nchini siyo vya kuridhisha na serikali ifanye juhudi za makusudi kutatua changamoto hiyo kwa watoto.

Kwa mujibu wa Ripoti ya Mapitio ya bajeti ya Lishe iliyotolewa na Shirika la Watoto duniani (UNICEF-2015/2016) nchini Tanzania inaeleza kuwa bajeti iliyotengwa kwenye shughuli za lishe ya taifa imeongezeka hali iliyochochea ongezeko la matumizi mara mbili zaidi ukilinganisha na mwaka wa fedha wa 2011/2012 na 2014/2015.

Ripoti hiyo inaeleza kuwa matumizi halisi katika sekta hiyo kwa mwaka 2011/2012 yalikuwa bilioni 10.5 na bajeti hiyo imekuwa ikiongezeka kila mwaka na hadi kufikia 2014/2015 ilikuwa bilioni 22.5. Licha ya ongezeko hilo bado bajeti hiyo haikidhi mahitaji yote ya lishe inayoelekezwa katika sekta mbalimbali ambazo zinahusika kuboresha afya za watoto.

Matumizi ya bajeti ya lishe yanaelekezwa katika maeneo matatu makuu ambayo ni kuhimiza ulaji wa chakula bora kwa watoto wachanga na watoto wadogo; kuzuia na kupambana na utapiamlo na kuboresha mazingira kuiwezesha serikali kutoa huduma bora za lishe nchini.

Shughuli zote hizo zinaratibiwa na sekta za afya na ustawi wa jamii, maendeleo ya jamii, jinsia na watoto; elimu; kilimo, usalama wa chakula; maji na usafi; mifugo na uvuvi; biashara na viwanda na taasisi za fedha.

 

Utapimlo na Udumavu

Kwa mujibu wa Shirika la Afya Duniani (WHO) linaeleza kuwa utapiamlo ni upungufu, ziada au kutokuwa na usawa katika kiwango cha chakula kinachompa mtu nguvu au virutubisho mwilini. Hali hii hutokea kwenye makundi mawili; kwanza kutokuwa na lishe ya kutosha ambako kunajumuisha kudumaa, kuwa  na uzito mdogo pamoja na kukosa virutubisho vya kutosha.

Pili ni kula vyakula vinavyoleta  unene uliopitiliza na magonjwa yanayotokana na mtindo wa maisha. Na hali hii huwapata zaidi watoto na watu wenye kipato kizuri waishio mjini.

Sababu kubwa ya watoto kupata utapiamlo ambao unasababisha udumavu wa akili na mwili ni kwamba familia nyingi hula vyakula vya wanga kwa wingi mfano ugali wa mahindi, unga wa mtama, muhogo, mchele na vyakula vya jamii ya maharage. Milo mingi hukosa mchanganyiko wa protini ya wanyama, mimea, mbogamboga na matunda.

Ripoti ya ya Shirika la Watoto Duniani  (UNICEF) inayoangalia  viwango vya ukosefu wa lishe kati ya mwaka 1992-2015 inaonyesha kuwa udumavu na utapiamlo sugu umepungua kutoka asilimia 50 hadi 34, huku utapiamlo uliokithiri ukipungua kutoka asilimia 7 hadi 5 na hali ya upungufu wa uzito ikipungua kutoka asilimia 24 hadi 14.

Waziri wa Afya, Ummy Mwalimu anaendelea kuwa kuwa, “Katika kupambana na utapiamlo nchini, Wizara yangu kwa kushirikiana na wadau wa Lishe imetoa matone ya nyongeza ya vitamin A kwa watoto wa kati ya miezi sita na miaka mitano sambamba na dawa za minyoo kwa watoto wa umri kati ya mwaka mmoja na miaka mitano.”

Amebainisha kuwa wizara yake itaendelea  kutoa huduma za matibabu ya utapiamlo mkali kwa watoto kupitia; kuongeza idadi ya Hospitali zinazotoa matibabu ya utapiamlo na kuboresha miundombinu ya hospitali kwenye wodi  17 za kulaza watoto.

“Wizara yangu pia imeendelea kuimarisha mfumo wa upatikanaji wa chakula dawa na vifaa vya kupimia hali ya Lishe pamoja na kujengea uwezo wa watoa huduma.” Amesema Waziri Ummy.

Naye, Waziri wa Fedha na Mipango, Dkt. Philip Mpango Amesema kuwa kwa mwaka wa fedha 2018/2019 Serikali itakua na miradi mingi ya kutekeleza, miongoni mwa miradi hiyo ni kupambana na tatizo la utapiamlo hivyo ni vema kama nchi ikaangalia namna bora ambayo Benki ya Dunia inaweza kusaidia katika utekelezaji wake.

“Kitaalamu mpaka mwanadamu anapofikisha siku 1000 ni kipindi muhimu sana kinachoamua maisha ya mwanadamu atakapokuwa mtu mzima atakuwa na uwezo gani wa kufikiri, kutokana na hali hiyo mtu ambaye atakua na utapiamlo uwezo wake utakua ni mdogo zaidi kulinganisha na mtoto aliyepata lishe bora’” alifafanua Dkt. Mpango.

Katika kutekeleza mradi huo Serikali itafanya kazi na Benki ya Dunia kwa kushirikiana na Wizara ya Afya pamoja na Taasisi ya Chakula na Lishe ili kuhakikisha kwamba Taifa linapunguza kwa kiasi kikubwa tatizo la utapiamlo.

Continue Reading

Must Read

Copyright © 2018 FikraPevu.com