Connect with us

Jamii

Walibya wang’aka kuwauza Waafrika, wasema ni propaganda za Magharibi kuichafua nchi yao

Published

on

Mgogoro wa kuuza watu unaoendelea Libya umechukua sura mpya baada ya vyombo vya habari kuripoti matukio ya kuteswa na kuuzwa kwa Waafrika weusi ambao wanakimbia hali ngumu ya kimaisha katika nchi zao na kwenda Ulaya kupitia Libya.

Libya imekuwa mlango muhimu ambao unaunganisha nchi za Afrika na Ulaya, Waafrika wamekuwa wakisafiri hadi katika miji ya Pwani ya nchi hiyo ili wapate mpenyo wa kuingia katika nchi hizo ambazo zinatajwa kupiga hatua kubwa ya kimaendeleo.

Kutokana na nchi ya Libya kuwa katika mzozo mkubwa wa kisiasa ambao umeitumbukiza nchi hiyo kwenye mapigano ya wenyewe kwa wenyewe, maharamia wa baharini hufanya biashara ya kuwasafirisha Waafrika ambao wanavuka bahari kwenda Ulaya.

Hata hivyo, biashara hiyo imegeuka na kuwa ya kuuza watumwa ambao huteswa, kupigwa na kuumizwa 

 

Changamoto iliyopo

Kutokana na kubadilika kwa sera za uhamiaji na idadi kubwa ya wakimbizi wanaoingia Ulaya, baadhi ya nchi zimezuia kabisa wahamiaji toka Afrika kuingia katika nchi zao. Hali hiyo imesababisha wakimbizi wengi kukwama nchini Libya ambapo inasemekana wanapata mateso, kuumizwa na wengine kuuzwa kama watumwa ili wakutumikie kazi katika maeneo mbalimbali ya kazi.

Taharuki hiyo inajitokeza ikiwa zimepita siku chache baada ya Kituo cha runinga cha CNN kuonyesha baadhi ya picha za Waafrika weusi wakiwa kwenye mnada wa watumwa nchini Libya. Wanasiasa, wanaharakati na watu mashuhuri wamejitokeza na kulaani matukio yanayoendelea katika nchi hiyo na kuutaka Umoja wa Mataifa (UN) kuchukua hatua za haraka kunusuru mgogoro huo.

Licha ya CNN kulipoti matukio hayo kwa undani lakini bado kuna maswali mengi ambayo hayajajibiwa ikizingatiwa kuwa kuna taarifa nyingi za uongo zinazosambaa kuhusiana na hali ya Libya kwa wakati huu.

Baadhi ya Wahamiaji wakiwa kwenye boti

Mkazi wa Libya aelezwa undani wa kinachoendelea

Fikra Pevu imepata mahojiano ya Mwanahabari wa chombo kikoja cha kimataifa, Rashid  Chilumba na mkazi mmoja wa Libya ambaye alijitambulisha kwa jina la Abdorahim Nwiji ambapo anasema yale yanayotangazwa na vyombo vya habari vya kimataifa juu ya utumwa unaoendelea Libya ni propaganda ambazo zinalenga kuharibu sifa ya nchi hiyo katika diplomasia ya kimataifa.

Abdorahim anasema, “Sikia kaka, hayo unayoyaona usiyazingatie. Yote unayoyaona yametushtua zaidi walibya kuliko ulivyostuka wewe. Ukweli ni kwamba nchi za Magharibi hasa Ulaya zimekuwa kwenye mzozo wa wahamiaji haramu kwa muda sasa.

Serikali zimezidiwa na wanasiasa wanaounga mkono sera za uhamiaji wameondolewa madarakani au umaarufu wao umesinyaa. Umoja wa Ulaya umegawanyika mno na hata uamuzi wa Uingereza kujitoa kwenye umoja huo sehemu ya sababu zake ni uhamiaji hasa haramu.

Kwa hiyo viongozi wa ulaya wamechanganyikiwa na watu kutoka Afrika wanazidi kumiminika na mipango yao yote ya kuwazuia imeshindikana. Kwa hivyo wameamua kutengeneza video na picha nyingi za propaganda na kuzieneza kwa kasi ili kuwatisha waafrika kuhusu Libya ili waachane na mipango ya kutoroka kwao kwenda Ulaya kupitia Libya.

Hebu ona wewe picha hizo zimekutisha hata kutembelea Libya kihalali vipi wengine walio na mipango ya kwenda ulaya kupitia Libya kwa njia haramu watathubutu?”, anaeleza mkazi huyo wa Libya na kuongeza kuwa,

“Pia sababu ya pili baadhi ya nchi za Ulaya hasa Ufaransa wanataka kuichukua sehemu ya Kusini ya Libya yenye rasilimali nyingi. Hivyo propaganda hii itatengeneza mazingira ya kuingia tena Libya kwa mgongo wa msaada wa kiutu.

Ufaransa ilikuwa mstari wa mbele kumtoa Gaddafi na Rais wa wakati ule Nicolaus Sakorzy alikuwa kiongozi wa kwanza akiongozana na David Cameron wa Uingereza kuja Libya siku chache tu baada ya Gaddafi kufa. Wakasema waliyosema lakini wanataka rasilimali tu hawana lolote”.

Abdorahim ambaye hivi karibuni alikuwa Ulaya kuhudhuria kozi ya kuandaa maudhui ya vyombo vya habari ili kukabiliana na ongezeko la misimamo mikali  hasa katika nchi za Mashariki ya Kati na Kaskazini ya Afrika, anaendelea kusema,

“Kaka sisi ni waafrika na tuna marafiki wengi kutoka Afrika na tuna programu nyingi tu zinazowasaidia waafrika kutokimbilia Ulaya. Hatuwezi kufanya unyama huo.

 

Biashara ya kusafirisha watu

Abdorahim  anakubali kuwa biashara ya kusafirisha Waafrika kwenda nchi za Ulaya imeshamiri na inawaingizia fedha nyingi.

“Lakini kingine kinachoendelea cha ukweli  ni kwamba walibya wanaingiza hela nyingi sana kwa kuwasaidia waafrika kwenda Ulaya. Wahamiaji wanalipa maelfu ya Dola kuvuka na walibya wanawasaidia kwenda huko siyo kuwauza na sisi tumekuwa tunapigania sana hiyo biashara ya kusafirisha watu kwenda Ulaya ikome.

Halafu ni CNN ndiyo kwa sehemu kubwa imeripoti hizo taarifa na sehemu kubwa ya picha hazitoki Libya, ‘google’ inaweza kukusaidia.

Mfano kituo cha runinga cha France24 kiliripoti kuhusu kijana mmoja kutoka Cameroon akidai Libya ilimchukua kama mtumwa na kumlazimisha kufanya kazi katika shamba la njugu (pistachio) Kusini mwa eneo la Jangwa lakini cha kushangaza Libya hailimi njugu na hata walibya tumeshangaa kusikia tunalima njugu.

Picha halisi kutoka Libya ni zile zinazoonesha makundi ya wahamiaji kwenye kambi wakiwa na wanajeshi wa serikali kwa lengo la kuwahesabu na kuwasaidia kurudi makwao. Unaweza tizama juhudi hizo kupitia tovuti ya shirika la uhamiaji la ulimwengu (IOM) na utawaona walibya halisi”,

 

Watanzania Walaani

Wananchi wa Tanzania wakiwemo wanasiasa wamelaani matukio yanayoendelea Libya na kutaka hatua zichukuliwe ili kurejesha heshima ya Afrika kwasababu biashara ya utumwa ilikomeshwa miaka mingi iliyopita.

Mbunge wa Kigoma Mjini, Zitto Kabwe, kupitia ukurasa wake wa Twitter ameandika, “Kwa nini Watanzania waliopo Dar tusichukue hatua dhidi ya udhalilishaji wa Waafrika? Siku ya Ijumaa tukutane ubalozi wa Libya hapa nchini kuongea na Balozi na kumpa risala yetu kupinga Biashara ya Utumwa inayofanyika nchini Libya”.

Kabla ya kutimiza hazma hiyo, Ubalozi wa Libya nchini umetoa tamko na kusema taarifa zinazosambazwa na baadhi ya vyombo vya habari kuhusu kile kilichotokea kama tukio la mapatano ya mauzo na manunuzi ya watu walio na asili ya Afrika ni kwamba huenda makusudio ya tukio hilo yalikuwa ni kuwatorosha ili wafike katika kituo chao cha mwisho (Ulaya)kama wahamiaji na wala sio kama watumwa.

 

 Hatua iliyochukuliwa na Jumuiya za Kimataifa

Umoja wa Mataifa (UN), Umoja wa Ulaya (EU) na Umoja wa Afrika (EU) wamekubaliana kuwarejesha wakimbizi hao katika nchi zao, wakati taratibu nyingine za uchunguzi juu ya biashara ya utumwa katika nchi hio zikiendelea.

Akihojiwa na kituo cha runinga cha AFP, kiongozi mmoja kutoka Ufaransa ambaye alishiriki katika kikao cha UN kilichofanyika mwanzoni mwa wiki hii amesema, “Tunawasaidia Waafrika ambao wanataka kurudi kwa hiari katika nchi zao. Hii kazi itafanyika siku chache zijazo kwa kushirikiana na nchi wanazotoka”.

Naye Rais wa Zimbabwe, Emmerson Mnangagwa ameandika katika ukurasa wa Twitter, “Hali ya Libya ya kuuza watu utumwani; inaogopesha na haikubaliki. Tutafanya kila liwezekanalo kuwalinda raia wetu kokote walipo. Pia tumeanza kuwarudisha Wazimbabwe wote waliokwama Libya na kwingine kote ikiwa ni hatua ya kupinga”.

Kulingana na Shirika la Umoja wa Mataifa la Uhamiaji (IOM) linasema kuwa mwaka jana liliratibu safari za wahamiaji 13,000 kurudi kwa hiari katika nchi zao hasa za Kusini mwa Jangwa la Sahara wakitokea Libya.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2018 FikraPevu.com