Connect with us

Biashara/Uchumi

Wakulima wa chai Kagera wamkalia kooni mwekezaji kuboresha maslahi yao

Published

on

Serikali imesema kuwa haitasitisha mkataba na Mwekezaji wa Kampuni ya Chai Maruku, iliyoko mkoani Kagera, kwa sababu mgogoro wa malipo uliopo baina ya  kampuni hiyo na wakulima pamoja na wafanyakazi wake unaelekea kutatuliwa.

Akizungumza Bungeni mjini Dodoma, Naibu Waziri wa Fedha na Mipango, Dkt. Ashatu Kijaji , alipokuwa akijibu swali la msingi la Mbunge wa Bukoba Vijijini Mhe. Jason Rweikiza (CCM), aliyetaka kujua sababu za Serikali kutovunja mkataba na mwekezaji huyo na kurejesha umiliki kwa Serikali au kwa mwekezaji mwingine atakayejali maslahi ya wakulima na wafanyakazi.

Katika swali lake la msingi, Mhe.   Rweikiza alisema kuwa tangu Kampuni hiyo ibinafsishwe kwa mwekezaji, kumekuwa na malalamiko ya wakulima kutolipwa  fedha za mauzo ya chai kwa wakati na wafanyakazi kutolipwa  mishahara na stahiki zao ipasavyo.

Dkt. Kijaji alisema kuwa, katika kutatua mgogoro huo Serikali kupitia ofisi ya Msajili wa Hazina imekuwa ikifuatilia kwa karibu mwenendo wa utendaji na uendeshaji wa Kampuni hiyo kwa kufanya vikao kwa nyakati tofauti kwa kushirikiana na ofisi ya Waziri Mkuu, Wizara ya Viwanda, Biashara na Uwekezaji, ofisi ya Mwanasheria Mkuu wa Serikali, ofisi ya Mkuu wa Mkoa Kagera, Bodi ya Chai na Wakala wa Maendeleo ya Wakulima wadogo wa Chai (TASHTIDA).

Alisema kuwa katika vikao hivyo haki ya kila upande ilizingatiwa ikiwemo suala la haki za wafanyakazi pamoja na madai ya wakulima, ambapo mpaka sasa mwekezaji amekubali kulipa madai ya wakulima kiasi cha Sh. milioni 12 huku wakiendelea kujadili namna ya kutatua suala la madai ya wafanyakazi.

Dkt. Kijaji aliahidi kuwa Serikali itaendelea kufuatilia kwa karibu suala hilo ili kuhakikisha haki za wakulima na wafanyakazi hazipotei. Pia wakulima kulima kilimo bora cha chai kitakachowanufaisha kiuchumi na kijamii.

                        Wakulima wakivuna chai

 

Chai na changamoto zake

Utafiti iliofanywa na watafiti mbalimbali kutoka kwa Taasisi ya Utafiti wa Chai Tanzania kwa ushirikiano na Jumuiya ya Ulaya (EU) mwaka 2012  katika wilaya ya Mufindi mkoani Iringa ulibaini kuwa wakulima wanatakiwa kuelimishwa zaidi  juu ya njia bora za kulima zao hilo ili kuongeza uzalishaji na faida.

Katika utafiti wao waliwaelimisha wakulima katika kutambua na kukabiliana na changamoto mbalimbali, ambapo pia walikiri  kuwa zao la  chai endapo likilimwa, kuhudumiwa na kuuzwa katika soko sahihi litawakomboa wananchi na kuliingizia taifa kipato.

Kabla ya utafiti huo, wakulima wengi katika wilaya hiyo walikata tamaa kutokana na kupata hasara baada ya kuuza chai kwa bei ndogo.

Mtafiti wa zao la Chai katika wilaya ya Mufindi, Prof.  Bruno Ndunguru akizungumzia hali halisi ya kilimo cha chai alisema walibaini kuwa udongo kukosa rutuba mbadala kwa zao la chai, ambapo wakulima hao walitumia mbolea ya kupandia na kukuzia, swala ambalo lilipelekea kuharibika kwa ardhi na hatimaye kukosa kabisa rutuba kwa zao la chai.

Prof. Ndunguru alisema katika hatua za kwanza, EU ilisaidia kujenga majengo mapya ya ofisi ambazo zitatumika na watafiti wa kilimo hicho na wakulima wadogo wadogo wa Mufindi.

” Utafiti wetu ulihusisha zao la chai kwa kutafuta aina mpya ya mbegu na miche ya kupandwa, uwezo wa kusambaza maji katika mashamba ya chai, rutuba sahihi ya ardhi na kujenga ofisi za kutosha kwa ajili ya kazi nzima ya utafiti,” alisema Prof. Bruno.

Alibainisha kuwa katika kufanya kazi ya kutafiti udongo na ardhi sahihi kwa kilimo cha chai wamehakikisha unapimwa katika maabara za kilimo, kutoa ushauri wa matumizi sahihi ya ardhi kwa wakulima wa chai, kutoa taarifa za maeneo ambayo wakulima walitumia mbolea za chumvi pamoja na kuhamasisha masoko yanayonunua chai.

Katika mwaka wa 2001 hadi 2004 mradi wa utafiti uliwahusisha wakulima wa chai 4,350,364 ambapo katika mwaka wa 2005 hadi 2008 wakulima walikuwa 13,987,901 na kuanzia mwaka 2009 hadi 2012  idadi ya wakulima iliongezeka maradufu,  hali ambayo inahamasisha EU waendelee kutoa misaada zaidi ya pesa kuwakomboa wakulima wa chai.

Mkulima wa chai katika wilaya hiyo, Emmanuel Lugano, alisema kutokana na kulima kilimo cha kisasa baada ya watafiti kufanya utafiti wa chai sasa wanaweza kuwa na uhakika wa maisha ikiwemo kusomesha watoto na kuboresha maisha yao.

“Awali sisi wakulima tulikata tamaa kabisa kuendelea kulima chai, utafiti uliofanywa na watafiti hawa, umetukomboa kutokana na sasa tunalima kilimo bora, tunapata soko la uhakika na tunaweza kuhimili changamoto mbalimbali za kiuchumi tofauti kabisa na hapo awali tukipata hasara”, amesema Lugano.

                                         Chai inapitia mchakato mrefu katika usindikaji

 

Asili ya Chai

Asili ya chai bado haijajulikana hasa ni wapi japokuwa inaaminika chimbuko lake ni China. Nchi  zinazozalisha chai kwa wingi kwa sasa ni China, Japan, Indonesia na Kenya ikiwa nchi ya tatu kwa uzalishaji baada ya India na Sri  Lanka.

Kwa upande wa Afrika, Tanzania ni nchi ya nne baada ya Kenya, Malawi na Uganda ambapo inalimwa katika mikoa ya Kagera, Iringa, Kilimanjaro, Mbeya, Njombe na baadhi ya maeneo ya mkoa wa Tanga. Inakadiriwa kuwa Tanzania huzalisha tani 32, 000 kwa mwaka ambapo husindikwa katika viwanda vilivyomo nchini na nyingine husafirishwa nje ya nchi.

Kuna aina mbili za chai ambazo ni China Tea (Camellia Sinensis) na Assam Tea ambazo hustawi katika maeneo tofauti kulingana na hali ya hewa ya eneo husika. Chai hustawi vizuri  katika maeneo yenye mvua za wastani (1500- 2500mm) lakini inaweza kukua pia katika maeneo ambapo hakuna mvua  kubwa sana yaani milimita 1200 na joto lidi la 18 – 20°C .

Continue Reading
Click to comment

Leave a Reply

Your email address will not be published. Required fields are marked *

Biashara/Uchumi

Wakulima wa mahindi kuunganishwa kwenye mnyororo wa thamani

Published

on

Imeelezwa kuwa kukosekana kwa  teknolojia ya kisasa na masoko ya mazao  ni miongoni mwa changamoto zinazokwamisha  ukuaji wa sekta  ya kilimo nchini. Changamoto hizo zinachochewa na  uwekezaji mdogo wa rasilimali watu na fedha  kwenye huduma muhimu za kilimo.

Kwa kuwa kilimo ni uti wa mgongo wa uchumi wa Tanzania, serikali inawajibika kuwawezesha wakulima nchini kupata pembejeo na teknolojia ya kisasa kuhakikisha wanazalisha mazao yenye ubora yanaweza kushindana kwenye soko la kimataifa.

Kwa kutambua hilo serikali ilianzisha benki ya Maendeleo ya Kilimo Tanzania (TADB) ili kuhakikisha wakulima wanapata fedha kutoka taasisi hiyo kuendesha shughuli zao. Lakini tangu kuanzishwa kwake, benki hiyo haijawafikia wakulima wengi, jambo linalowakosesha fursa ya kupata mikopo na ushauri wa kiteknolojia.

Naibu Waziri wa Fedha na Mipango, Dkt. Ashatu Kijaji amesema  serikali imeitaka benki hiyo kuongeza matawi  ili kuwafikia wakulima wengi ambao wanahitaji mikopo kuongeza tija kwenye kilimo.

Amesema tayari benki hiyo imefika mkoa wa Dodoma na hadi kufikia Juni 30, 2018 itakuwa imefunguliwa ili kuwahudumia wakulima wa kanda ya kati  inajumuisha mikoa ya Dodoma, Singida.

“Baada ya ufunguzi wa ofisi ya Kanda ya Kati kukamilika Benki Itafanya uchambuzi wa fursa zilizopo Kikanda na hivyo kuchukua hatua na taratibu za kufungua ofisi nyingine kulingana na upatikanaji wa rasilimali fedha”, alisema Dkt. Kijaji.

Ameongeza kuwa TADB inatekeleza mpango wa miaka mitano (2017- 2021), wa kusogeza huduma karibu na wateja kwa kuanzisha ofisi za Kikanda katika Kanda ya Kaskazini, Kusini, Kati, Ziwa, Nyanda za Juu Kusini na Zanzibar kwa awamu mbalimbali.

Dkt. Ashatu amesema mikopo itakayotolewa kwa wakulima itatumia mfumo wa makundi; kundi la kwanza litahusisha wakulima wadogo wadogo kwa riba ya asilimia 8- 12, kundi la pili la miradi mikubwa ya kilimo kwa asilimia 12 – 16 kwa mwaka. Kundi la mwisho ni mikopo ya ushirika ambapo riba yake inaendana na hali ya soko la matumizi ya mkopo.

Amebainisha kuwa serikali inafanya majadiliano na wadau wa kilimo ili kupunguza kiwango cha riba ili kuwavutia wakulima wengi kukopa na kufaidika na kuwa sehemu ya ukuaji wa uchumi wa viwanda nchini.

Kwa upande wake, Mkurugenzi Mwendeshaji wa TADB, Thomas Samkyi alisema kukosekana kwa masoko ya mazao ya kilimo ni changamoto nyingine inayorudisha nyuma maendeleo ya sekta ya kilimo nchini.

Katika kutekeleza majukumu ya Benki hiyo, serikali imeanza kutoa huduma kwa kulenga minyororo michache ya ongezeko la thamani katika kilimo cha mahindi kwa kutoa mikopo ya ununuzi wa pembejeo, vifaa na vifungashio vya kisasa vya kuhifadhia mahindi na teknolojia ya uhifadhi wa mahindi ili kukidhi mahitaji ya soko la kimataifa.

“Kwa sasa tumejikita katika mnyororo mzima wa uongezaji wa thamani kuanzia uandaaji wa shambani hadi kwa upatikanaji wa masoko, ikiwemo mahitaji ya uzalishaji wenye tija kwenye sekta nzima ya kilimo kuanzia hatua za awali za utayarishaji wa mashamba.

“Kupima ubora wa udongo na virutubisho vinavyohitajika kwenye uzalishaji wa mahindi, upatikanaji wa pembejeo za kilimo zikiwemo mbegu bora, mbolea, madawa na vifaa na teknolojia mbali mbali za umwagiliaji na fedha kwa ajili ya kulipia gharama mbalimbali za uzalishaji wa mahindi,” alisema.

Samky alisema usaidizi na mikopo itakayotolewa itakuwa kwa ajili ya ujenzi na uboreshaji wa miundombinu ya kilimo katika kuimarisha minyororo ya thamani katika kilimo

“Inajumuisha ujenzi wa miundombinu ya umwagiliaji na mitambo ya umwagiliaji, uchimbaji wa visima vya maji ya umwagiliaji, ujenzi wa mabawa ya uvunaji maji ya mvua, ujenzi wa maghala bora ya kuhifadhia mahindi na ujenzi wa miundombinu ya masoko,” alisema.

Continue Reading

Biashara/Uchumi

RIPOTI YA CAG: Rais Magufuli asisitiza trilioni 1.5 hazijapotea, aitupia lawama mitandao ya kijamii

Published

on

Rais John Magufuli amesema ripoti ya Mdhibiti na Mkaguzi Mkuu wa Serikali (CAG) aliyokabidhiwa haionyeshi upotevu wa trilioni 1.5 na kwamba ni upotoshaji unaofanywa na baadhi ya watu kwenye mitandao ya kijamii una lengo la kuigombanisha Serikali na wananchi.

Kauli ya Rais imekuja ikiwa zimepita siku chache tangu Katibu wa Itikadi na Uenezi wa Chama Cha Mapinduzi kutoa kauli inayofanana na ya Rais kuwa hakuna fedha iliyopotea na kilichopo ni kutokueleweka kwa ripoti ya CAG.

Akizungumza leo muda mfupi baada ya kuwaapisha Majaji wa Mahakama, Ikulu jijini Dar es Salaam, Rais Magufuli amesema aliwasiliana na CAG, Prof. Mussa Assad na kwamba alikiri kuwa hakuna upotevu wa trilioni 1.5 zinazosemekana hazijulikani zilipo.

“Nilikuwa ninasoma baadhi ya mambo mengine wanasema Serikali imeiba trilioni 1.5. Siku moja nikampigia Controller and General Auditor General (Mdhibiti na Mkaguzi Mkuu wa Serikali) mbona kwenye ripoti yako uliyonisomea hapa Ikulu hukunieleza huu wizi wa trilioni 1.5.” amesema Rais Magufuli.

Amesema kama kweli upotevu wa fedha huo ungekuwa umetokea angechukua hatua mapema za kuwafukuza kazi watendaji waliohusika na ufisadi huo lakini kinachoonekana ni upotoshaji unaofanywa kwenye mitandao ya kijamii na kuwaaminisha wananchi kuwa fedha zimeibwa na Serikali.

“Kwasababu ungenisomea hapo siku hiyohiyo ningefukuza watu, kama nimefukuza wakurugenzi watatu siku hiyohiyo kwasababu ya hati chafu, hawa trilioni 1.5 uliwaficha wapi? Nimejaribu kusoma kwenye ripoti yako (ripoti ya Ukaguzi ya CAG) sioni mahali palipoandikwa zimepotea trilioni 1.5. Prof. Assad aliniambia hakuna kitu kama hicho, nikamuuliza Katibu Mkuu akasema hakuna kitu kama hicho.” Ameeleza Rais Magufuli.

Hata hivyo, Rais Magufuli hakufafanua trilioni 1.5 zimetumikaje kama kweli hazijapotea, zaidi ya kuwalaumu watumiaji wa mitandao ya kijamii kutumia uhuru wa kutoa maoni kujadili ripoti ya CAG ambayo inaonesha trilioni 1.5 hazijulikani zimetumikaje.

“Kuna ugonjwa tumeupata Tanzania wa kufikiri kila kinachoandikwa kwenye mitandao ni cha ukweli. Sasa sifahamu huu ugonjwa umetoka wapi? Lakini ni kwasababu hii mitandao hatuicontrol (hatuisimamii) sisi, wako huko wenye mitandao yao, wao interest (maslahi) yao ni kutengeneza biashara hawajali madhara mtakayoyapata.” Amesema Rais.

Kauli ya Rais imeungwa mkono na Naibu Waziri wa Fedha na Mipango, Dkt. Ashatu Kijaji akiwa bungeni Dodoma wakati akitoa tamko la Serikali juu kutoonekana kwa matumizi ya trilioni 1.5 kwenye matumizi ya Serikali kwa mwaka wa fedha wa 2016/2017.

“Kutokana na matumizi ya mfumo huu wa viwango vya Kimataifa vya Uhasibu katika sekta ya umma, napenda kuliarifu Bunge lako Tukufu na Watanzania kwa ujumla kwamba hakuna fedha taslimu ya shilingi trilioni 1.51 iliyopotea au kutumika kwenye matumizi ambayo hayakuidhinishwa na Bunge. Hivyo basi, madai ya baadhi ya watu wasiolitakia mema Taifa letu na Serikali yetu ya Awamu ya Tano hayana msingi wowote wenye mantiki.” Amesema Naibu Waziri.

Amesema wakati CAG akifanya ukaguzi wa mahesabu, Serikali ilikuwa inatekeleza mpango mpya wa kimataifa wa mahesabu katika sekta ya umma (International Public-Sector Accounting Standard IPSAS Accural) na kwamba ndio ulioleta mkanganyiko wa mahesabu.

“Napenda kulitaarifu Bunge lako Tukufu kwamba, kuanzia mwaka 2016/17, Mamlaka ya Mapato Tanzania ilianza rasmi kuyatambua mapato kwa mfumo wa Accrual. Hivyo basi, kati ya mapato haya ya shilingi trilioni 25.3, yalikuwemo pia mapato tarajiwa (receivables) kama mapato ya kodi yenye jumla ya shilingi bilioni 687.3 pamoja na mapato ya kodi yaliyokusanywa kwa niaba ya Serikali ya Mapinduzi ya Zanzibar ya jumla ya shilingi bilioni 203.92 (transfer to Zanzibar).” Amesema Naibu Waziri na kuongeza kuwa,

“Katika uandishi wa taarifa ya ukaguzi, CAG alitumia taarifa za hesabu na nyaraka mbalimbali ikiwa ni pamoja na Taarifa za Utekelezaji wa Bajeti (Budget Execution Report) ambapo hadi kufikia tarehe 30 Juni 2017, mapato yalikuwa jumla ya shilingi trilioni 25.3 na matumizi yalikuwa shilingi trilioni 23.79.”

Naibu Waziri amefafanua kuwa Matumizi ya trilioni 23.79 hayakujumuisha bilioni 697.85 zilizotumika kulipa dhamana na hati fungani za Serikali zilizoiva. Pia Matumizi hayo yalikuwa hayajafanyiwa uhamisho (re-allocation) wakati ukaguzi unakamilika.

Ameongeza kuwa, baada ya kufanya uhamisho jumla ya matumizi yote kwa kutumia Ridhaa za Matumizi (Exchequer issues) yalikuwa shilingi trilioni 24.4. Amedai kuwa trilioni 1.51 zilizodaiwa kutoonekana kwenye matumizi ya Serikali zilitokana na mchanganuo ufuatao;

Katika ripoti ya CAG aliyoitoa hivi karibuni katika ukurasa wa 34 imeelezea kwa undani kuhusu kutoonekana kwa matumizi ya fedha hizo, ambapo aliwataka wabunge kuihoji Serikali ziliko trilioni 1.5 kwasababu katika ukaguzi wake hakubaini zimetumikaje ingawa hakusema zimepotea.

Tangu kutolewa kwa ripoti ya CAG ya ukaguzi wa hesabu za Serikali na mashirika mbalimbali nchini kwa mwaka wa fedha unaoishia June 2017. Mijadala mbalimbali imeendelea kwenye mitandao ya kijamii kuhusu mambo mbalimbali yaliyoibuliwa na CAG ikiwemo kutojulikana kwa matumizi ya trilioni 1.5.

Baadhi ya vyama vikiwemo vya CCM, ACT-Wazalendo na CHADEMA vilitoa maoni yao kuhusu ripoti hiyo.

Mbunge wa Kigoma Mjini, Zitto Kabwe amekuwa alijitokeza kwenye mitandao ya kijamii akisisitiza kuwa ukaguzi wa CAG ulihusisha fedha zilizokusanywa na sio za hati fungani ambazo Serikali imezitolea maelezo.

Continue Reading

Biashara/Uchumi

Ripoti ya CAG kaa la moto. CCM yaibuka kuitetea serikali upotevu trilioni 1.5

Published

on

Kufuatia ripoti ya Mdhibiti na Mkaguzi Mkuu wa Hesabu za Serikali (CAG) kuibua upotevu mkubwa mapato Serikalini wa trilioni 1.5, Chama Cha Mapinduzi (CCM) kimejitokeza kutoa ufafanuzi na kudai fedha hizo hazijapotea bali ni mkanganyiko wa mahesabu ambao haujaeleweka kwa wananchi.

Hatua hiyo ya CCM inakuja siku chache baada ya Kiongozi Mkuu wa Chama cha ACT Wazalendo, Zitto Kabwe kuitaka Serikali itoe maelezo ya kinakuhusu fedha hizo na kuzitaka Kamati za kudumu za Bunge za Hesabu za Serikali (PAC) na ile ya Bajeti kuchunguza upotevu huo ili waliohusika wachukuliwe hatua za kisheria.

Kauli hiyo ya Zitto aliyoitoa mwishoni mwa juma, imeibua mjadala mpana kwenye mitandao ya kijamii ambapo wananchi wanaitaka Serikali itoe ufafanuzi wa fedha hizo zimetumikaje na nani alihusika kuidhinisha malipo hayo ambayo hayapo kwenye bajeti iliyopitishwa na Bunge.

Mapema leo CCM kupitia Katibu wake wa Itikadi na Uenezi, Humphrey Polepole, amejitokeza mbele ya wanahabari kujibu tuhuma hizo na kudai kuwa chama chake kinakubaliana na ripoti ya CAG na mapendekezo aliyoyatoa wanayafanyia kazi ili kuongeza uwajibikaji Serikalini.

“Hivi karibuni kumekuwa na mjadala mkubwa ambao umejitokeza baada ya ripoti ya Mdhibiti na Mkaguzi Mkuu wa Hesabu kuwekwa hadharani. Ni utaratibu mzuri ambao Chama Cha Mapinduzi kimejiwekea na kimeielekeza Serikali katika dhamira njema ni kuhakikisha ukweli na uwazi na shughuli za Serikali unaendelea kuwa bayana wakati wote”, amesema Polepole.

Licha ya Polepole kuikubali ripoti ya CAG aliwatupia lawama wanasiasa akiwemo Mbunge wa Kigoma Mjini, Zitto Kabwe kwamba anaupotosha umma kwa kutoa taarifa za uongo juu ya kile kinachodaiwa ni kutojulikana kwa zilipo trilioni 1.5 ambazo ripoti ya CAG ilihoji.

“Sisi kama chama hatuna tatizo na mtu anayetoa taarifa mbalimbali hadharani; ni uhuru kutoa maoni hadharani lakini sisi tuna tatizo la mtu mwongo anayetoa taarifa za uongo za kuupotosha umma”, amesema Polepole.

                                              Katibu wa Itikadi na Uenezi wa CCM, Humphrey Polepole

Akizungumzia suala la trilioni 1.5, amesema kinachotokea ni kutokueleweka kwa kwa taarifa ya CAG kwasababu vitabu na hesabu za Serikali ziko vizuri na hakuna upotevu wa pesa yoyote na kinachofanyika ni wanasiasa kujenga taharuki kwa wananchi.

“Sasa nianze na trilioni 1.5 maana yake nini, tuoneshane hapa kuwa huyu mtu ni mwongo, mwongo mkubwa. Hesabu zote zimeeleza vizuri kabisa, vitabu vya Serikali vimeeleza vizuri kabisa. Mjue kwamba mtu huyu ni mwongo anatoa taharuki”, amesema Polepole na kuongeza kuwa,

“Ndio maana Mkaguzi na Mdhibiti wa fedha za Serikali amesema hili jambo ni hesabu na kwenye ukaguzi wa hesabu baada ya kuwa ukaguzi umepita yako mambo mnarekebisha ili mambo yakae sawasawa. Imepotea wapi? Hakuna senti tano iliyopotea”.

Amesema kulingana na mfumo mpya wa ukaguzi wa kimataifa unaitaka Serikali inapokuwa inahesabu fedha zake za mapato kuhusisha na fedha ambayo tayari imetolewa kwenye huduma mbalimbali kwa wananchi.

Ameeleza kuwa mfumo wa zamani ilikuwa ni lazima Serikali ihesabu fedha zake ambazo imekusanya tayari na sio zile ambazo ziko kwenye huduma na hazijaingizwa kwenye mapato.

“Matumizi ya Serikali katika mtindo mpya ambao unafuata vigezo vya kimataifa vya ukaguzi wa hesabu za umma unaitaka Serikali inapokuwa inahesabu fedha zake ziliyoingia kuhesabu pia na fedha baada ya kuwa Serikali imetoa huduma. Zamani ilikuwa lazima pesa tuishike mkononi”, amesema Polepole.

Ameendelea kutoa maelezo na kudai kuwa “Tumekusanya trilioni 25.3 pesa ambayo huduma imetoka inatarajiwa tumekwisha kuiingiza ipo. Lakini hii trilioni 25.3 ambayo ni makusanyo ya jumla. Ukitaka kujua makusanyo halisi unachukua pesa halisi unatoa makusanyo tarajiwa”.

Amesema makusanyo tarajiwa ambayo yanapatikana kwenye huduma ambazo Serikali imetoa kwa mwaka 2016/2017 na zilikuwa bado hazijakusanywa ni bilioni 687.3 na trilioni 25.3 ni fedha au mapato ghafi ambayo yanajumuisha fedha halisi na mapato tarajiwa (receiver bonds).

Amebainisha kuwa katika trilioni 25.3 ziko fedha zingine za Serikali ya Zanzibar ambazo zinafikia bilioni 203.92 na kwamba hazijumuishwi kwenye mapato na bajeti ya Tanzania Bara lakini zinatambulika kwenye mfumo wa mapato.

“Ukichukua trilioni 25.3 ukatoa bilioni 687.3, ukatoa bilioni 203.92 utapata 24.4 (trilioni 24.4), hii ndio pesa halisi iliyotumika 2017/2018. Sasa yule Bwana wa chama cha Mbunge mmoja anasema ilitumika kutoka ile trilioni 25.3 ni 23.79 (trilioni) kwahiyo kwenye trilioni 25.3 imetumika 23.79”, amesema Polepole.

Amesema katika trilioni 23.79 wakati CAG anakagua mapato, fedha ya Serikali ilikuwa kwenye hati fungani (unmatured bonds) yenye thamani ya bilioni 697.85 ambapo ikijumlishwa na fedha halisi za trilioni 23.79 unapata trilioni 24.4 ambazo zilikuwa ni makusanyo halisi ya mwaka 2017/2018.

“Nimekueleza mapato na matumizi, ukichukua trilioni 25.3 ukatoa trilioni 23.79 (fedha zilizotumika) utapata 1.5 trilioni ambayo huyu Bwana Zitto anasema imepotea, hesabu hajui”, amesema Polepole.

 

Zitto kushtakiwa

Kutokana na kile kinachodaiwa ni upotoshaji wa ripoti ya CAG kwa wananchi juu ya upotevu wa trilioni 1.5 kulikofanywa na Zitto, CCM kimetaka mwanasiasa huyo achukuliwe hatua za kisheria.

 “Siasa za namna hii ni siasa za hovyo, kauli ya Chama Cha Mapinduzi ni kwamba wale wenye dhamana ya kusimamia sheria wafanye hivyo; mizaha na kuchekacheka na watu wa tabia kama hii ndiyo iliyotufikisha pabaya. Kutoa taarifa za uongo ni kosa katika nchi yetu”, ameshauri Polepole na kuongeza kuwa,

“Tabia hii haivumiliki, wanaosema mambo ya uongo, wanaoleta taharuki kwa watu wetu sheria ichukue mkondo wake”.

Kulingana na Sheria ya Takwimu ya mwaka 2015, inaeleza kuwa mtu yeyote anayetoa taarifa za uongo zenye lengo la kupotosha au kupingana na zile zilizotolewa na mamlaka husika atakabiliwa na adhabu ya kufungwa kifungo kisichopungua miaka 2 au kulipa fidia.

Kwa upande wake, Zitto ameandika katika ukurasa wake wa Facebook kuwa, “Kuna mtu anasema nikamatwe kwa kupotosha Kuhusu TZS trilioni 1.5 zinazohojiwa na CAG. Mimi Kabwe Zuberi Ruyagwa Zitto, Mwenyeji wa Kigoma, Muislam, NAAPA kwamba Serikali ya CCM ya Awamu ya Tano imeshindwa kuonyesha kwa CAG matumizi ya shilingi trilioni 1.5.

Nipo tayari kukamatwa kwa kusema hivyo ( haitafuta ukweli wa ubadhilifu huo ). Nipo tayari kuuwawa kwa kusema hivyo ( mawazo yangu hayatakufa)”.

Continue Reading

Must Read

Copyright © 2018 FikraPevu.com