Connect with us

Michezo/Burudani

Wachezaji wetu na upeo mdogo wa soka

Published

on

“Yanga wakija na dau zuri, nitajiunga nao tu. Mimi nacheza kwa kutafuta maslahi, sijali nachezea wapi”  ni kauli iliyoanza kuzoeleka sana miongoni mwa wachezaji kadhaa wa soka Tanzania ikiwa ni  kudhihirisha na kuwakilisha upeo mdogo walionao wachezaji wetu.

Kabla sijaingia ndani kusema kwa nini naiona kauli hiyo kuwa imetolewa na watu wasio na upeo wa kutosha, naomba kwa ufupi sana nieleze kuhusu matendo kadhaa yaliyowahi kuthibitisha upeo mdogo wa wacheza soka wa nchi hii.

Wachezaji wetu, wanaotafuta kufikia viwango vya kukubalika kimataifa, walishawahi mara kadhaa kucheza ovyo ili viongozi wao waliowakera waonekane hawafai na waondolewe madarakani wakati kwa kufanya hivyo walioonekana hawafai ni wao kwani wengi hawakuijua njama hiyo bali waliona tu kwamba wachezaji hao wamekwisha kisoka!

Walishavurunda makusudi kupinga mshahara mkubwa aliolipwa kocha mwenye wasifu mkubwa kimataifa kama Trott Moloto wa Afrika Kusini dhidi ya mishahara yao midogo bila kujali kuwa yule ni mtaalaam wa kuwatengenezea maisha yao ya hali ya juu ya baadaye!

Wenzao Ulaya, wachezaji wenye mishahara midogo sana ikilinganishwa na ya nyota wao fulani kwenye timu, huushinikiza uongozi wa timu umlipe nyota huyo mshahara mkubwa zaidi kama anavyodai ili wabaki naye kutokana na kuyajali mafanikio ya timu na yao binafsi kwa sababu kuwa na nyota huyo, kunasaidia nao kung’ara kwa mipira mizuri anayowatengenezea uwanjani.

Kwetu, mshahara wa kocha umevuruga kiwango cha timu! Ni wachezaji wetu hawa waliowahi kugomea kambi ya mazoezi kwa madai kwa uongozi wa klabu yao wakati mazoezi hayo ni kwa faida yao, familia zao, ndugu zao na kwa ujumla wote kwa maisha yao.

Yote yaliyozungumzwa hapa, hayakufanywa na Nonda Shaaban “Papii” alipokuwa Yanga ingawa kwenye kipindi hicho migomo migomo ya aina hiyo ilijitokeza tokeza klabuni hapo na ndiyo maana hivi sasa, mchezaji huyo yuko mbali kimaisha.

Upeo mdogo mwingine wa wachezaji wetu ulidhihirika pale mchezaji mkubwa Victor Costa alipoelezewa kwenye vyombo vya habari kukataa ushauri wa nadaktari wa yeye kufanyiwa upasuaji wa mguu, tiba ambayo ina umuhimu mkubwa katika maisha yake ya soka, ikizingatiwa kuwa bado ana safari ndefu katika mchezo huo.

Miongoni mwa watu walioshangazwa na kusikitishwa sana na uamuzi huo wa Costa ni mtu mwenye uchungu wa dhati wa soka la nchi hii,Erick David Nampesya wa BBC.

Mdau huyo, alisikitishwa na uamuzi huo akiuweka kwenye upande wa pili wa uamuzi wa mchezaji Daniel Agger wa Liverpool  ya Uingereza aliyefurahia ushauri kama huo aliopewa na madaktari siku hizo hizo ambazo Victor Costa alishauriwa na kukataa ambapo naye alishauriwa hivyo baada ya kuanza kucheza akitoka kwenye kuuguza mguu.

Ukiitafakari mifano yote hiyo ya upeo mdogo wa wachezaji wetu, utaona kuwa huwa hawaangalii mbali kuhusu maisha yao kisoka na hivyo, maisha yao kwa ujumla.

Nikija kwenye sababu iliyofanya niamini waliotoa kauli niliyoanzia makala haya ni wachezaji wa Simba wenye upeo mdogo, swali la kujiuliza, kwa nini Yanga na si Mtibwa, Moro United, Toto African au Prisons?

Kwa nini waelekeze kauli zao moja kwa moja kwa Yanga wakati timu nyingine zinaweza kuwapa mkataba mnono zaidi ya Yanga? Hili lina majibu mawili: Kwanza, wanaona Yanga na Simba ndiyo kilele chao.

Wachambuzi wa soka kwenye vyombo vya habari kama kina Edo Kumwembe watamaliza maneno yote kuwapa ushauri wa nini cha kufanya kuwafikisha alikofika Nonda Shaaban lakini wanajisumbua tu kwani wenzao tayari wako kileleni Simba na wakitoka hapo basi waende kwenye kilele cha pili Yanga, mchezo unaisha.

Kwa maana hiyo, kwenda Prisons na kupata ajira ya kudumu ndani ya Jeshi la Magereza  au kwenda Polisi Dodoma na kupata ajira ya kudumu ndani ya Jeshi la Polisi.

Jibu la pili ni kwa wachezaji hao kutumia kauli hiyo kama njia ya kuongezewa dau na uongozi wa Simba ili wabaki klabuni hapo. Wakisema wako tayari kwenda timu yoyote itakayowaahidi donge nono bila kutaja Yanga, viongozi wa Simba hawatarushwa roho sana.

Kwa hiyo wanaitaja Yanga ili kupandisha dau hapo Simba walipo. Kama wangekuwa na upeo mzuri, ambacho wangefanya ni kuzungumza na uongozi wa Simba kwa kuwaambia: “Wazee, nadhani mmeiona kazi yangu nzuri kwenye msimu huu, kwa hiyo bila kiasi fulani cha pesa, naweza kufanya mazungumzo na wengine watakaonihitaji kwa kiasi hicho”.

Matokeo ya mazungumzo yatakayofuata yatakuwa ama mchezaji huyo abaki kwa malipo yatakayokubaliwa au akajaribu kwingine baada ya kushindwa kukubaliana lakini haipendezi kwa soka la kisasa kukimbilia kwenye vyombo vya habari moja kwa moja na kusema “Yanga njooni”.

Hii inaathari kithamani ya mchezaji hata huko Yanga anakojinadi kwa sababu Simba wanaweza kuachana naye na akakosa uchaguzi na hivyo Yanga kumchukua kwa bei ndogo kwani chema chajiuza, kibaya chajitembeza.

Kwa wadogo zangu wa Prisons mlio na ajira za kudumu ndani ya Jeshi la Magereza, tafakarini sana kabla ya kushawishika kwenda Yanga au Simba kwa dau kubwa la mara moja la usajili.

Kumbukeni yaliyowakuta Herry Morris na Primus Kasonso. Waliokuwa wakiwawekea pingamizi wasihame, hadi kuwachukulia hatua za kijeshi waliyajali sana maisha yao. Hebu tafakarini sana kabla ya kuamua.

Katika dunia ya sasa, wachezaji wetu jaribuni kuishi maisha kama wanayoishi wenzenu wa Ulaya kimaamuzi. Kuzidiwa kwa mbali viwango vya soka, kusiwe sababu ya kutofautiana kwa mbali kiupeo. Tafadhali jirekebisheni kabla hamjawakatisha tamaa wadau wa soka wa nchi hii wanaowapenda kwa dhati.

Continue Reading
9 Comments

9 Comments

  1. Mafichoni

    14/02/2011 at 10:25 am

    Tatizo la YANGA ni kuajiri makocha wa kigeni na kuwapa madaraka makubwa ya kusajili anachoangalia ni maslahi yake binafsi na siyo tija.kama kocha anaulizwa na uongozi atoe taarifa ya usajili na yeye kuamua kujiondoa hauoni kuwa hapo kuna jambo?.

  2. Husein W.M.Makumbo

    22/06/2011 at 12:30 pm

    Ni kweli hilo pia linadhihirishwa na mchezaji fulani wa Simba aliyekuwa akisakata soka Sweden akidhubutu kuacha kuendelea na ajira yake kwa madai anakatwa kodi kubwa katika mshahara wake kitu ambacho si kweli kwani fungu hilo lingerudi pindi mkataba unapoisha. Je,wataweza kufika walipo kina Etoo,Drogba,etc.

    • sir henry

      18/09/2011 at 3:16 pm

      nikweli nduguyangu hudanganywa na watu ambao maisha yao yashatoka yeye ndio kwanza anajenga maisha yake hukubali kudanganywa achilia nidhamu ndogo hata upeo wa akili ni mdogo jambo ambalo hawalioni nikwamba hawajali heshima yao kama pua inavyotizama chini huangalia maslshi ya wakati ule tu NO FUTURE.

  3. Seif

    25/06/2011 at 9:40 am

    Ni kweli kabisa ,umeeleza mambo ya msingi, hasa ukizingatia tupo katika wakati muafaka,na kama mwanahabari na mzalendo ,umenitimiza wajibu wako hongera kaka,tatizo ni wachezaji wetu wengi hawajitambui, na hii imetokana na kutokuwa na msingi mzuri ili kujua thamani zao ndio maana mpk leo bado wanaishi maisha ya kitumwa mwingine yuko tayari akaue kiwango kwa kukaa benchi yanga au simba kuliko kucheza akiwa Mtibwa, Hatufiki kwa staili hii.

  4. MUDYTZ

    29/06/2011 at 10:42 pm

    YAWEZA KUWA NI TATIZO SAWA,,LAKINI NANI WA KUMFUNGA PAKA KENGERE?

  5. SADICK

    24/08/2011 at 2:30 pm

    Ni kweli kabisa ,kama viongozi wa TFF wangekuwa na upeo wangewafungulia ofsi wachambuzi hawa kama Edo kumwembe na wenzake na kulipa mishara waachane na shughuli nyingine wabaki kuwashauri wachezaji wetu wawe na upeo mpana hata baadhi ya viongozi wa TFF na VILABU vyetu

  6. Beda B.M.

    02/09/2011 at 1:04 am

    Tatizo la wanasokawengi tulionao hapa kwetu ni kwamba, akianza kusifiwa kidogo tu kwa mafanikio yake aliyopata naye anavimba kichwa na kujiona hakuna wa kumfikia. Hii ni moja ya sababu kubwa zinazofanya wanasoka wetu kushindwa kufikia viwango vya kimataifa kama wenzetu wa Afrika Magharibi, Kaskazini na hata Ulaya. Kwa kifupi vitendo vya namna hiyo ni utovu wa nidhamu maana wanakuwa hawaambiliki/hawashauriki.

  7. ky

    23/05/2012 at 11:15 pm

    michez

  8. Emmanuel

    05/10/2012 at 3:05 pm

    Mastaa wa kibongo ni ngumu sana ku behave kama profesiona na ukizingatia hawakusoma na hakuna wanachotegemea maishani..

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Muhimu Kusoma

Copyright © 2018 FikraPevu.com