Connect with us

Siasa

Wabunge wasiyakimbie majimbo yao. Kwenye kampeni mpaka wanapiga magoti

Published

on

UMEPITA mwaka mmoja na miezi mitatu tangu tumefanya uchaguzi mkuu na sasa tumesalia na miaka mitatu na miezi saba mpaka uchaguzi mwingine mwaka 2020.

Wakati wa kampeni za mwaka 2015 wabunge walipata fursa ya kuweka sera na ahadi zao hadharani ili kutushawishi tuwapigie kura watuongoze katika nchi ya ahadi.

Mgombea Ubunge jimbo la Mwibara, Kangi Ligora, akionyesha machejo ya furaha, baada ya kuomba kura wananchi katika mkutano wa kampeni wa Mama Samia Suluhu Hassan mwaka 2015.

Ni imani yangu ili sera na ahadi za wabunge hawa ziweze kufanikiwa, ni dhahiri washirikiane na wananchi.

Wabunge wako wapi?

Swali la msingi baada ya kuwapa kura wabunge, leo hii wako wapi? Mbona hatuwaoni majimboni kwetu?

Nikiri kuwa siyo wabunge wote ambao hawaonekani majimboni kwao, kuna baadhi ya wabunge wako majimboni wakitenda kazi na jamii zao, ila pia kuna wabunge ambao huenda majimboni mwao wakati wa misiba, majanga; kama mafuriko ama wakisikia ujio wa waziri Fulani, ndo wao hutokea majimboni.

Wajibu wa wabunge

Kwani wabunge kazi yao ni nini hasa? Je, wabunge hupaswa kwenda bungeni kwa niaba yetu na kuwasilisha shida zilizopo majimboni na kusubiri serikali kutenda ama wanapaswa kutenda zaidi ya hapo?

Kwa mtizamo wangu, nadhani yapo majukumu zaidi ya wabunge kwenda kwenye vikao vya bunge, kwani wabunge wametokana na sisi wananchi, hivyo ni jukumu lao kuhakikisha wanafanya kazi na wananchi wao na sio kwa niaba ya wananchi wao.

Ni vyema kuelewa kuna tofauti ya wabunge kufanya kazi kwa niaba ya wananchi na kufanya kazi na wananchi.

Ni ukweli kwamba kwa muda mrefu wabunge wamekuwa wakitenda kazi zao kwa niaba ya wananchi na sio kufanya kazi na wananchi wao.

Ili maendeleo endelevu na imara yaweze kuonekana ni vyema wafanye kazi na sisi wananchi na sio kwa niaba yao, kwani sisi wananchi tunamajukumu ya kushiriki kwa kiasi kikubwa kuleta maendeleo yetu wenyewe.

Ikumbukwe kuwa wabunge ni ‘kiunganishi’ baina ya wananchi na serikali na ni muhimu kwa wabunge kutushirikisha kila hatua wanayofanya kuleta maendeleo kama walivyoadhidi wakati wa kampeni.

Mantiki ya makala haya ni kueleza yale ambayo wabunge wanapaswa kufanya ili kuleta maendeleo endelevu na sio kubaki kuwa wawakilishi na kutenda kwa niaba ya wananchi.

Ni ukweli kuwa wabunge wengi hurudi katika majimbo yao mara kadhaa, ila wananchi wanaweza wasitambue ya kuwa wamerudi majimboni mwao na wengine huishia kuwaona wabunge wao wakati wa uchaguzi tu.

Ieleweke kuwa wabunge wametokana na wananchi ambao tuliwapa ridhaa, ni wazi wanapaswa kuishi katika majimbo yao.

Haileti mantiki yeyote kama tunamchagua mbunge asiyeishi jimboni mwake na kuwa anaishi sehemu zingine.

Kuwa na wabunge wanaoishi maeneo tofauti na majimbo yao, ni sawa na kuwa na baba asiyeishi na familia yake, ambaye anaishi kwa jirani, anachokifanya ni kuja kuwasalimia watoto wake pale anapojisikia.

Wasikae ofisini

Kwa upande mwingine, wabunge wanapokuwa  majimboni muda wote, kazi yao kubwa sio kukaa ofisini, kwani hatukuwachagua ili wakae ofisini, bali ofisi zao ni katika mitaa, vijiji ama mijini katika majimbo yao.

Hapa ningependa kusisitiza kuwa kazi kubwa ya wabunge ni kufanya vikao na wananchi wao ama makundi mbalimbali ya wataalamu katika majimbo yao, ili kujua changamoto na maoni ya wananchi kuhusu maendeleo.

Wabunge wanapaswa kukaa na wananchi katika sehemu mbalimbali za majimbo yao na kutoa mrejesho wa kila hatua wanayopitia katika kuhakikisha sera walizoahidi zinatimia.

Fedha za serikali

Ni wazi ya kuwa mara nyingi sera zinazoahidiwa na wabunge hutegemea fedha za serikali ili kuona zinatimia, hivyo serikali ikishindwa kutoa fedha, ni wazi kuwa ahadi za wabunge hazitatimia.

Hapa ndo maana nasisitiza kuwa maendeleo ya majimbo yanachangiwa na wananchi na sio kuwaachia wabunge watende kwa niaba yetu.

Wabunge wanapaswa kuwa chachu ya maendeleo kwa kuwashirikisha wananchi katika jitihada wanazofanya na kuweka bayana changamoto, ili kuchangia mawazo ya kuzitatua.

Shida Tarime

Ni vyema nikatoa mfano katika hili, mimi naishi wilayani Tarime, mkoani Mara, kwa sasa, ambako shida kubwa ya wilaya yetu ni maji safi na salama, kwani bado asilimia kubwa ya wakazi wa wilaya hiii wanategemea maji ya visima vya asili ama vile vya kuchimbwa kwa mikono. Ni watu wachache sana wenye uwezo wa kupata maji ya bomba.

Lakini kitu cha ajabu, wilaya hii imezungukwa na mto mkubwa, Mto Mara na pia kwa upande mwingine imezungukwa na Ziwa Victoria, ila vyanzo hivi havitumiki kuleta maji safi na salama kwa wananchi wake.

Kutotumika kwa maji ya vyanzo hivyo kunatokana na kile kinachoelezwa kuwa kukosekana kwa fedha za kuyavuta maji hao, kwa kuwa  serikali haijatenga fedha.

Hapa tukisubiri serikali itenge fedha kwa ajili ya kuleta haya maji, tutasubiri sana.

Tunapopaswa kuona jitihada za mbunge ambapo anapaswa kukaa na wananchi na kuzungumza na wananchi wake na kutoa mapendekezo ya pamoja kuona nini tunaweza kufanya ili kupata maji kutoka vyanzo hivyo.

Ni muhimu wabunge kushirikisha wananchi na watalaamu katika kutatua changamoto zinazokabili majimbo yao, na siyo kusubiri tu michango kutoka serikalini.

Uwepo wa wabunge majimboni sio kushiriki misiba na sherehe tu, bali ni kuwa chachu ya maendeleo majimboni.

Continue Reading
Click to comment

Leave a Reply

Your email address will not be published. Required fields are marked *

Jamii

Mahakama kutoa uamuzi Mei 28 kama Maxence na wenzake wana kesi ya kujibu

Published

on

Mahakama ya Hakimu Mkazi Kisutu imepanga kuwa Mei 28, 2018 itatoa uamuzi kama Mkurugenzi Mtendaji wa Mtandao wa JamiiForums, Maxence Melo na mwenzake wana kesi ya kujibu au la.

Uamuzi huo wa Mahakama ulitolewa jana Mei 22, 2018 jijini Dar es Salaam na Hakimu Mkazi Mwandamizi wa Mahakama hiyo, Godfrey Mwambapa baada ya upande wa mashtaka kufunga ushahidi wao.

Katika kesi hiyo ya jinai namba 457/2016, Melo na mwanahisa wa mtandao huo, Micke William wanakabiliwa na shtaka la kushindwa kutoa ushirikiano kwa Jeshi la Polisi kwa kuzuia taarifa binafsi za wateja wao.

Kabla ya uamuzi wa mahakama, Wakili wa Serikali, Batilda Mushi alidai mahakamani hapo kuwa kesi hiyo imekuja kwa ajili ya uamuzi na kwamba wao wamefunga ushahidi.

Baada ya maelezo hayo, Hakimu Mwambapa ameahirisha kesi hiyo hadi, Mei 28 atakapotoa uamuzi dhidi ya Melo na mwenzake kama wana kesi ya kujibu au laa.

Tayari mashahidi wawili wa upande wa Jamhuri wameshatoa ushahidi wao mahakamani hapo dhidi ya washtakiwa.

Katika kesi ya msingi, Micke na Melo, wanadaiwa kuwa kati ya Mei 10 na Desemba 13,2016 , eneo la Mikocheni, wakiwa Wakurugenzi wa Jamii Media Co Ltd ambao unaendesha tovuti ya JamiiForums wakijua Jeshi la Polisi Tanzania linafanya uchunguzi kuhusiana na mawasiliano ya kimtandao yaliyochapishwa katika tovuti yao, walishindwa kutekeleza amri ya kutoa data walizonazo kwa nia ya kuzuia uchunguzi.

Chapisho hilo lilidai kuwa Kampuni za CUSNA Investment na Ocean Link ilikuwa inakwepa kodi bandarini, kuchonga nyaraka, kutorosha makontena na kunyanyasa wafanyakazi wa kitanzania. JamiiForums iliamini kuwa chapisho hilo lilikuwa halina nia mbaya ya kuichafua kampuni hiyo.

 Mwanzilishi wa JamiiForums, Maxence Melo (kushoto) akiwa Wakili wake Jebra Kambole wakati wakitoka katika Mahakama ya Mkazi Kisutu siku za hivi karibuni.

Katika kesi nyingine namba 458 inayohusu kuendesha mtandao wa Jamiiforums.com bila kutumia kikoa cha dot.TZ inayomkabili Maxence Melo na Micke William ilisikilizwa tena jana ambapo shahidi mwingine wa Jamhuri alitoa ushahidi wake mbele ya mahakama ambapo alidai kuwa mtandao huo unaendeshwa kwa kikoa cha dot.com na siyo dot.TZ.

Katika shauri hilo ambalo linasimamiwa na Hakimu Huruma Shahidi, upande wa Jamhuri uliwakilishwa na Wakili Batilda Mushi huku upande wa Watetezi ukiwakilishwa na Wakili Peter Kibatala akishirikiana na Jeremiah Mtobesya na Jebra Kambole

Shauri lilianza kusikilizwa kwa upande wa Jamhuri kumuongoza shahidi wao aliyejitambulisha kwa jina la Afande Peter Kayumbi.

Wakili wa Jamhuri, Batilda Mushi alianza kwa kumuuliza shahidi: Unafanya kazi wapi?

Shahidi: Nafanya kazi katika Ofisi ya upelelezi iliyopo Polisi central Dar

Wakili Batilda: Kazi yako hasa ni nini?

Shahidi: Kusikiliza watuhumiwa kupeleleza kesi na baadae kuja kutoa ushahidi Mahakamani

Wakili Batilda: Elimu yako umeipata wapi?

Shahidi: Elimu yangu nimeipata ndani na nje ya nchi na nina uzoefu wa karibu miaka 9 katika kazi yangu

Wakili Batilda: Elimu yako ulichukua ni juu ya nini hasa?

Shahidi: Elimu ya kuchukua vielelezo juu ya makosa ya mtandao na namna ya kupeleleza makosa ya mtandao

Wakili Batilda: Unakumbuka nini mnamo tarehe 14/12/2016?

Shahidi: Nilikuwa ofisini na niliitwa na Mkuu wangu ZCO, Wambura na nilipewa jalada la kesi lililokuwa linahusu kumiliki tovuti ambayo haijasajiliwa kwa kikoa cha .co.tz

Baada ya kupokea nilisoma jalada na kugundua kuwa watuhumiwa walikuwa Maxence Melo na Micke William

Wakili Batilda: Watuhumiwa hao unaweza kuonyesha Mahakama ni wepi?

Shahidi: Ndio (Huku akinyanyuka na kwenda kuwaonyesha watuhumiwa kwa Hakimu)

Wakili Batilda: Baada ya hapo ulifanya nini?

Shahidi: Baada ya kuwajua watuhumiwa, kwa kuwa Max alikuwa ameshakamatwa, tangu 14/12/2016 hivyo nilimuomba kwa ajili ya mahojiano. Baada ya kuongea nae aliniambia anaendesha tovuti aliyosajili tangu 2008 nchini Marekani kwa .com

Baada ya hapo juhudi za kumtafuta mwenzake Micke zilifanyika na Januari 16, 2017 naye alihojiwa

Wakili Batilda: Baada ya kuwahoji ulifanya nini shahidi?

Shahidi: Pia, niliandika barua kwenda tzNIC ili kupata taarifa kama tovuti ya JamiiForum imesajiliwa kwa kikoa cha .co.tz

Wakili Batilda: Uliandika wewe hiyo barua?

Shahidi: Mimi nili-draft na ikapitiwa na kiongozi wangu Bakari, alisaini na kunirudishia nami nikaituma

Wakili Batilda: tzNIC walijibu nini?

Shahidi: tzNIC walijibu kwanza JamiiForum waliisajili 2010 mara ya kwanza kwa kikoa cha .co.tz. mwaka 2013 iliondolewa na baadae mwezi Juni 2016 ikasajiliwa tena, ilisajiliwa tena kama Jamiiforum.co.tz isipokuwa alieleza kuwa haikuwa ikitumia kikoa hicho

Wakili Batilda: Uligundua nini katika upelelezi wako?

Shahidi: Niliandika barua BRELA kujua kama wamesajiliwa pale. Walijibu kuwa hakuna kitu kinaitwa Jamiiforum isipokuwa JamiiMedia na ndani ya JamiiMedia ndio kuna JamiiForum inafanya kazi

Pia, nilikusanya maelezo ya mashahidi ambao asilimia kubwa walikuwa wanatoka ofisi ya JamiiMedia iliyopo Kinondoni, Mikocheni. Na baadae niliandaa jalada kwa ajili ya kulipeleka ofisi ya Mwanasheria ili aweze kusoma na baadae kuitolea uamuzi

Wakili Batilda: Uligundua nini kama mpelelezi kwa taarifa kutoka tzNIC?

Shahidi: Nikitaka kujua kama Jamiiforum ilikuwa inaendeshwa kwa kikoa cha .co.tz na walijibu haiendeshwi kwa kikoa hicho bali JamiiForums.com ndio hasa niligundua hicho

Wakili Batilda: Ulihoji mashahidi ambao ni Wafanyakazi? Ulihoji akina nani na uliwahoji wapi?

Shahidi: Tulifika katika ofisi zao zilizopo Mikocheni, Kinondoni na kukuta zinafanya kazi na matangazo yanarushwa ambapo nilikuta kama wafanyakazi 7 hivi ambao wengi wao walikuwa ni Wahariri. Wahariri yaani Moderators

Wakili Batilda: Unamaanisha nini kwa kusema Moderators?

Shahidi: Kwa majibu yao ni kwamba wanachuja habari inapoingia kwenye mtandao wao kuona kama inaweza kwenda kwa jamii

Wakili Batilda: Unawakumbuka wafanyakazi hao kwa majina?

Shahidi: Siwezi kuwakumbuka wote kwa hakika ila kuna Asha, Deusdeus, na mwingine anaitwa Mdoe sijui

Wakili Batilda: Kingine ulichofanya juu ya jalada hili?

Shahidi: Niliandaa jalada la kwenda kwa Wakili wa Serikali

Wakili Batilda anamwambia Hakimu hana maswali ya ziada

Baada ya Wakili wa Jamhuri Batilda Mushi kumaliza kumuongoza shahidi wake, Hakimu anaruhusu upande wa utetezi kuanza kumhoji shahidi (Cross-examination). Wakili Peter Kibatala anaanza kumhoji shahidi.

Wakili Kibatala: Shahidi, Unafahamu mashitaka yanayowakabili washtakiwa?

Shahidi: Ndio

Wakili Kibatala: Naomba useme mashitaka yanayowakabili, yaani kama vile wizi au ujambazi kama hufahamu si shida tuendelee tusipoteze muda.

Shahidi: Ndio nafahamu, watuhumiwa wanashtakiwa kwa kuwa walikuwa wanaendesha tovuti ambayo haijasajiliwa kwa kikoa cha Tanzania

Wakili Kibatala: Kuna lingine?

Shahidi: Shitaka lilikuwa moja tu!

Wakili Kibatala: Kuna sehemu umesema Max wakati unamuhoji alikusimulia vitu fulani hivi, unakumbuka alikamatwa lini na muda gani?

Shahidi: Alikamatwa 14/12/2016 majira sikumbuki exactly

Wakili Kibatala: Ulimuhoji saa ngapi?

Shahidi: Max hakuhojiwa na mimi

Wakili Kibatala: Haya uliyosimulia vipi? Ni hear-say? Alitoa kisheria au mlikuwa sehemu mnapiga tu story?

Shahidi: Yapo kisheria

Wakili Kibatala: Hiyo statement uliyosema ulitoa wewe?

Shahidi: Hapana

Wakili Kibatala: Ulishuhudia ikiandikwa?

Shahidi: Hapana

Wakili Kibatala: Kwa hiyo ni hear-say? Umeitoa kama kielelezo Mahakamani?

Shahidi: Hapana sijatoa

Wakili Kibatala: Nimesikia umeandika barua kwenda tzNIC na BRELA umezitoa kama ushahidi?

Shahidi: Hapana

Wakili Kibatala: Unasema BRELA walikujibu vitu viwili vitatu, hayo majibu umetoa kama kielelezo?

Shahidi: Hapana

Wakili Kibatala: Nimesikia umesema pia tzNIC walikujibu, ulitoa kama kielelezo?

Shahidi: Hapana

Wakili Kibatala: Nani alikuwa muhifadhi(Custodian) wa hizi barua?

Shahidi: Sikuwa mimi

Wakili Kibatala: Hati ya mashtaka inadai kwamba Maxence Melo Mubyazi mshitakiwa wa kwanza na Micke William mshitakiwa wa pili kuwa kama directors (Wakurugenzi) wa JamiiForum. Uliwahi kutapa barua ya kielelezo cha directorship? (kurugenzi)

Shahidi: Ndio nilishapata

Wakili Kibatala: Unafahamu kama mpelelezi au ulishafanyia kazi tofauti ya JamiiForum na JamiiForums?

Shahidi: Hapana

Wakili Kibatala anaomba na kupewa Exhibit D1 kutoka kwa Hakimu Huruma Shaidi. Kisha anampa shahidi na kumuuliza kama alishawahi kukiona na kukifanyia kazi

Shahidi anajibu kuwa hajawahi kukiona wala kukifanyia kazi

Wakili Kibatala: Kwa kukiona unafahamu ni nini?

Shahidi: Mpaka nisome (Kibatala anampa asome). Shahidi anaendelea kwa kusoma kwa haraka haraka inajaribu kuelezea kuhusu JamiiForum

Wakili Kibatala: Na kuwa imesajiliwa sio?

Shahidi: Ndio

Wakili Kibatala: Kutoka kwenye Exhibit D1, Unahafamu Maxence na Micke wana uhusiano gani kati Maxence na Micke na taarifa ya usajili?

Shahidi: Sitaki kuzungumzia Exhibit D1 Kwa sababu sikifahamu

Wakili Kibatala: Hati ya mashitaka inasema hivi Maxence Melo aliendesha Forum ambayo haijasajiliwa wa kikoa cha do.tz. Je, wewe unakifahamu hicho kitu?

Shahidi: Ndio, nakifahamu

Wakili Kibatala: Umetolea ushahidi hiki kitu do.tz?

Shahidi: Hapana (Wakili Kibatala anajisemesha “Sasa kama unatoa ushahidi kitu ambacho hakipo kwenye hati, nakosa hata cha kukuuliza.”)

Wakili Kibatala: Mhe. Hakimu sina maswali zaidi

Baada ya Wakili Kibatala kumaliza kumuhoji shahidi Hakimu anauliza upande wa Utetezi kama wana maswali ya ziada, Wakili Jebra Kambole anasema anayo

Hakimu anaruhusu Wakili Kambole kumhoji shahidi

Wakili Kambole: Shahidi umesema JamiiForums imesajiliwa kwa .co.tz lakini ukasema kilikuwa hakitumiki?

Shahidi: Ndio

Wakili Kambole: Umetoa ushahidi hapa Mahakamani kwamba hakitumiki?

Shahidi: Ndio, kwa maelezo ya shahidi aliyepita

Wakili Kambole: Nakuuliza wewe sio shahidi aliyepita

Shahidi: Sijatoa kielelezo chochote mimi

Wakili Kambole anamaliza na kusema hana maswali ya ziada. Wakili Jeremiah Mtobesya anapewa  muda wa kumhoji na anaanza kumuuliza shahidi

Wakili Mtobesya: Shahidi kwa sababu umekuja kama mpelelezi, ni nani ana-draft kosa ambalo linapelekea upelelezi?

Shahidi: CRO-Sehemu ya kupokea taarifa

Wakili Mtobesya: Hivyo wewe unapeleleza jalada kutoka CRO?

Shahidi: Kama mpelelezi unapewa jalada lililofunguliwa na unaanza kufanya kazi kwa jalada ulilopewa

Wakili Mtobesya anasema hana Maswali zaidi

Baada ya upande wa utetezi kusema wamemaliza kuuliza maswali yao Hakimu Shahidi anauambia upande wa Jamhuri kumalizia kama wana maswali.

Wakili wa Jamhuri Batilda Mushi anarejea tena kumuongoza shahidi(Re-examination)

Wakili Batilda: Shahidi jukumu lako kama mpelelezi katika kesi hii lilikuwa ni nini?

Shahidi: Jukumu langu kubwa ni kuthibitisha kosa lilikokuwa linalalamikiwa

Wakili Batilda: Katika kuthibitisha huko ulifanya nini?

Shahidi: Kwa jibu watakalokupa tzNIC ndio litakuwa la kuanzia katika upelelezi

Wakili Batilda Mushi: Wewe uligundua nini katika upepelezi wako?

Shahidi: Kwanza tzNIC hawakuwa na ubishi kuwa hawa watu hawajajisajili, wamejisajili lakini walikuwa hawatumii kikoa cha .tz (dottizii)

Wakili Mtobesya anaomba kuongea na kuruhusiwa na kusema “Shahidi ni kama anajaribu kuziba majibu ya awali sasa anasema .tz(dottizii). Awali hakusema hivi

Hakimu Shaidi: Anauliza upande wa Jamhuri “But this is a new issue?” (Lakini hili ni jambo jipya?)

Batilida na Shahidi: Hapana. Ilikuwa hivi toka mwanzo.

Hakimu Shaidi: Okay, tuendelee maana mimi mwenyewe si ninaweka rekodi hapa na ninajiamini.

Wakili Batilda: Shahidi wewe una-draft mashtaka?

Shahidi: Hapana

Wakili Batilda: Nani anafanya hivyo?

Shahidi: Ofisi ya Mwanasheria wa Serikali

Wakili Batilda anasema amemaliza kuuliza maswali

Hakimu, Shaidi: Anauliza upande wa Jamhuri “Mna shahidi mwingine?”

Wakili Batilda: Hapana

Hakimu, Shahidi: Mnafunga?

Wakili Batilda: Hapana tunaomba kuahirisha

Hakimu anauliza wote, Mnataka tarehe ngapi? Wakili Peter Kibatala anaomba mbele ya tarehe 12/06/2018

Hakimu Shaidi: Tarehe 18 Juni?

Wote (Upande wa Utetezi na Jamhuri): Sawa

Wakili Kibatala anaomba kwa Hakimu kuwa upande wa Jamhuri ukija siku hiyo waje na shahidi zaidi ya mmoja. Hakimu anaridhia na kuuliza upande wa Jamhuri kama wamesikia ombi la Utetezi na upande wa Jamhuri unasema sawa na anaihirisha shauri hadi hadi Juni 18, 2018.

Kufahamu kwa undani mwenendo wa kesi 3 zinazoikabili JamiiForums pitia hapa

Continue Reading

Afya

Wilaya 6  vinara ugonjwa wa ukoma nchini. Mila potofu zachochea tatizo kwenye jamii

Published

on

Imeelezwa kuwa watanzania wanashauriwa kuendelea kujihadhari na ugonjwa wa ukoma, licha ya kupungua kwa maambukizi yake katika maeneo mbalimbali nchini.

Tahadhari hiyo inatokana na uchunguzi wa Wizara ya Afya, Maendeleo ya Jamii, Jinsia, Wazee na Watoto uliofanyika katika mwaka wa fedha wa 2017/2018 na kubaini kuwa wilaya 6 za Tanzania zilibainika kuwa na vimelea vya ukoma katika ngazi ya jamii.

Katika hotuba ya wizara hiyo kwa mwaka 2018/2019, Waziri wa Afya, Ummy Mwalimu alibainisha kuwa,  “kwa upande wa ugonjwa wa Ukoma, Wizara ilifanya uchunguzi wa vimelea vya Ukoma katika ngazi ya jamii kwenye Wilaya 6 zenye maambukizi makubwa katika mikoa ya Geita (Chato), Lindi (Liwale), Mtwara (Nanyumbu), Morogoro (Kilombero) na Tanga (Mkinga na Muheza).”

Katika kubaini visa vya ugonjwa huo, wananchi 500 walifanyiwa uchunguzi ambapo watu 54 sawa na asilimia 10.8 waligundulika kuwa na vimelea vya ugonjwa wa ukoma na kuanzishiwa matibabu.

Kati ya hao 500 waliofanyiwa uchunguzi, takriban watu 300 wamepatiwa tiba kinga ili wasisambaze kwa watu wengine au  kuathirika zaidi na maambukizi hayo.

Waziri Ummy amesema wizara yake inaendelea na jitihada za kuwaelimisha wananchi jinsi ya kujikinga na ugonjwa huo. Na wilaya ambazo zina maambukizi makubwa zimewekwa kwenye Mpango wa Taifa wa Kudhibiti Kifua Kikuu na Ukoma.

                          Dalili za wazi ni kuwepo kwa ganzi na vidonda visivyouma kwenye mikono na miguu

Ukweli kuhusu Ukoma

Kwanza ifahamikie kuwa ukoma ni ugonjwa kama yalivyo magonjwa mengine. Kumekuwa na imani potofu kwa baadhi ya watu wakihusisha ukoma na visa vya kulogwa au kurithi.

Kwa mujibu wa Wizara ya Afya, Ukoma ni ugonjwa wa kuambikiza ambao unaathiri ngozi na mishipa ya fahamu. Ukoma huenezwa kwa njia ya hewa. Chanzo cha maambukizi hayo ni mgonjwa ambaye hajaanza matibabu.

Kuna aina mbili za ukoma. Ukoma hafifu yaani wenye vimelea vichache na huwapata watu wenye kinga kubwa dhidi ya ukoma. Aina ya pili ni ukoma mkali au wenye vimelea vingi na huwapata watu wenye kinga ndogo dhidi ya ukoma. Mgonjwa mwenye aina hii huweza kuwaambukiza watu wengine kwa njia ya hewa iwapo hajapata matibabu.

Dalili za ukoma ni kujitokeza kwa baka au mabaka yasiyo na hisia katika sehemu yoyote ya mwili. Mabaka hayo yanaweza kuwa bapa, yamevimba, hayawashi, hayaumi na kukosa hisia ya mguso.

Dalili za wazi ni kuwepo kwa ganzi na vidonda visivyouma kwenye mikono na miguu. Kuvimba vinundu kwenye masikio na sehemu nyingine ya mwili. Kushindwa kufumba macho na kuishiwa nguvu kwenye misuli na kukamaa kwa viganja vya mikono na miguu.

Kuvimba mwili kukiambatana na homa kali na upofu. Kupoteza kwa viungo vya mwili kama vile vidole vya mikono au miguu. Dalili zote ni dhahiri, ukizipata unashauriwa kufika kwenye kituo cha tiba kilicho karibu yako kwaajili ya matibabu.

Ukoma  hutibiwa kwa dawa mchanganyiko zinazojulikana kama ‘Multi Drug therapy’ (MDT). Tiba  hutolewa bure katika vituo vyote vya tiba nchini.

Kwa mujibu wa Shirika la Afya (WHO) Kila mwaka visa vipya 200,000 vya ukoma huripotiwa. Umoja wa Mataifa umeitaja Tanzania kuwa miongoni mwa nchi 22 ambamo kila mwaka kuna visa vipya vya wagonjwa wa ukoma.

Continue Reading

Afya

MPANDA:  Shule inayoongoza kwa ufaulu Kyela licha ya changamoto lukuki

Published

on

Wanafunzi wa shule ya msingi Mpanda iliyopo kata ya Ipyana wilayani Kyela wanalazimika kusoma kwa kupokezana kutoka na madarasa ya shule ya kuchakaa na kutokufanyiwa ukarabati kwa muda mrefu.

Mwalimu Mkuu wa shule hiyo, Hilder `Kajubili ameiambia Fikra Pevu kuwa  shule yake inakabiliwa na upungufu wa madarasa kutokana  na ukweli kwamba madarasa yaliyokuwepo yalijengwa muda mrefu na tayari yameanguka.

Jitihada za kujenga madarasa mapya ili kuwawekea mazingira mazuri wanafunzi zimekuwa zikisuasua jambo linaloleta changamoto katika ufanisi wa walimu kufundisha darasani.

“Tuna uhaba wa madarasa sana, kwahiyo tuna double sessions (mikondo miwili) umeona madarasa tuliyanayo mengi ni magofu. Kwa hiyo tuna vyumba vya madarasa 6 tu, hao ni wengi sana (wanafunzi)wengine wanaingia mchana, wengine wanaingia asubuhi,” amesema Mwalimu Hilder.

Shule hiyo ambayo ilianzishwa mwaka 1957 ina wanafunzi 832 ambapo wavulana ni 417 na wasichana 415 ambao hutumia vyumba 6 tu. Hiyo ina maana kuwa kwa wastani kila darasa lina wanafunzi  72 ambapo ni juu  ya uwiano unaohitajika wa darasa 1 kwa wanafunzi 40 (1:40).

Awali kabla ya madarasa kubomoka wanafunzi wote walikuwa wanaingia asubuhi, lakini uchakavu na kuanguka kwa kuta za madarasa kulikosababishwa zaidi na mvua za msimu kumeifanya shule hiyo kuzungukwa na magofu.

Upungufu huo wa madarasa pia umechochewa na mwamko wa wazazi kuwapeleka watoto shuleni baada ya kuanza kwa utekelezaji wa elimu bila malipo lakini imekuwa ni changamoto kwa walimu kuwahudumia wanafunzi wote katika shule hiyo.

              Moja ya darasa liliaharibika katika shule ya msingi Mpanda

Licha ya shule hiyo kukabiliwa na upungufu wa madarasa, pia ina upungufu mkubwa wa matundu ya vyoo ambapo walimu na wanafunzi wanatumia matundu 4 tu.

“Tulijenga vyoo vya muda kwanza, vyoo vya kawaida lakini ni vichache matundu yako manne; mawili wasichana na mawili wavulana. Ni vile vya kuflashi, unamwaga maji,” amesema Mwalimu Hilder.

Licha ya shule msingi Mpanda kukabiliwa na changamoto ya upungufu wa madarasa na matundu ya vyoo kwa miaka miwili mfululizo, bado walimu wameendelea kufundisha kwa moyo  na kuifanya shule hiyo kuwa miongoni mwa shule zinazofanya vizuri katika matokeo ya darasa la saba wilayani Kyela.

Mathalani katika matokeo ya mwaka 2016, wakati choo cha wanafunzi kimetitia, shule hiyo ilishika nafasi ya 8 kiwilaya na mwaka uliofuata wa 2017 ilipanda na kushika nafasi ya 3  kati ya shule 42.

Naye mwanafunzi wa darasa la sita katika shule hiyo, Joyce Mwabwagilo (13) amesema wanashirikiana na walimu wao kuhakikisha mazingira yanayowazunguka ikiwemo usafi wa vyoo yanawasaidia kupata maarifa sahihi. “Masomo tuko vizuri, ufaulu uko vizuri lakini changamoto ni upungufu wa madarasa.”

Kwa upande wake, Mwalimu Douglas Mwalukasa ameiomba serikali na wadau kuguswa na hali iliyopo shuleni hapo na kuchukua hatua ya kuwaboreshea mazingira ya kufundishia ili shule hiyo iendelee kufanya vizuri kitaaluma.

“Tuna upungufu wa madarasa, vyumba kama viwili hivi. Tunaendelea kufanya juhudi kuwasiliana na wadau kuweza kutusaidia kukamilisha vyoo vipya tunavyojenga.

                Darasa lingine ambalo halina madirisha na limepata nyufa

Akizungumza na Fikra Pevu, Mratibu wa Elimu kata ya Kyela, Hezron Mwaikinda amesema wanaendelea na mipango ya kutatua changamoto za elimu katika shule za msingi ikiwemo kujenga madarasa na vyoo katika shule ambazo zina upungufu mkubwa  ili kuhakikisha wanafunzi wanapata mazingira bora ya kusomea.

“Tunayo mipango kazi, kuna mambo ambayo unakuwa umepewa kipaombele kwa msimu wa mwaka huu ni kujenga madarasa na vyoo. Jukumu tulilonalo ni kuwaomba wadau mbalimbali watusaidie katika ujenzi,” amesema Hezron

Kwa upande wake, Katibu wa Muungano wa Asasi za Kiraia Wilaya ya Kyela, Loth Mwangamba amesema wataendelea kushirikiana na Halmashauri ya Kyela kuhakikisha wanatafuta fedha kutoka kwa wafadhili ili kuboresha elimu wilayani humo.

Continue Reading

Must Read

Copyright © 2018 FikraPevu.com