Connect with us

Jamii

Viongozi wetu wanataka wakumbukwe kwa yepi?

Published

on

Kila mara niangaliapo jinsi mambo yanavyoendeshwa na walio kwenye madaraka ya umma na hasa katika serikali za hivi karibuni kuna jambo ninaloliona haliko sawa. Nafahamu ili uweze kufanya kazi yako vizuri iwe katika ofisi za umma au binafsi lazima uwe na ari na hamasa ya kuifanya hiyo kazi ili iwe na matokeo mazuri na mwisho wa siku tuwe na hayo maendeleo tunayoyataka.

Historia inatufundisha jinsi baadhi ya watu waliopata kuwa viongozi kwenye nchi nyingine  walivyoweza kufanya makubwa na kuacha majina yao mioyoni mwa watu waliokuwa wakiwaongoza “legacy”. Kwangu mimi, kiongozi lazima uhamasishwe na kuiacha hiyo legacy ili watu wakukumbuke hata baada ya kutoka uongozini na hata baada ya kutangulia mbele za haki (kufa).

Kwa bahati mbaya wengi wa watu wetu katika uongozi suala hilo haliwapi motisha. Watu hawa wanapenda vyeo “ubwana mkubwa”, na vitu vingine viendanavyo na ubwana mkubwa mathalani magari mazuri. Pia nyakati zingine kupata fursa za kusukuma masuala yao ya kujinufaisha binafsi (biashara; halali na zisizo halali) kwa kutumia hizo nafasi kupata hili au lile kinyume na utaratibu. Ukisoma historia za nchi za wenzetu na hata ya kwetu kwa wakati fulani kulikuwa na watu wenye hamasa hiyo mfano; Mwalimu Nyerere, kina Bibi Titi au Edward Sokoine ambao bado wanaishi kwenye mioyo ya watanzania.

Kwa nchi za wenzetu zinazopiga hatua kubwa za kimaendeleo, viongozi wao walikuwa na ari ya kufanya makubwa kwenye nchi na kuacha majina mazuri kwenye utendaji wao kwa mataifa na serikali wanazoziongoza. Watu kama Mahathir Mohamed (waziri mkuu wa zamani wa Malaysia), Lee Kuan Yew (ambaye alikuwa waziri mkuu wa kwanza wa Singapore) bado wanaishi kwenye mioyo ya watu waliokuwa wakiwaongoza kwa michango yao katika kusukuma mbele maendeleo ya nchi. Watawala wetu wanajua haya lakini ni kama hawana hamu hiyo ya kukumbukwa na kuingia kwenye historia ya nchi hii! Na kama huna hamasa hiyo bali tu ya kujitajirisha wewe na familia yako, kwa kweli huna haja ya kuumiza akili yako kutafuta uongozi wa umma. Wananchi wanapaswa kuwaogopa viongozi wa namna hii. Wanapaswa kuwakataa na kutokuwapa ridhaa!

Tatizo kubwa linalosababisha ukosefu wa hamasa ya ikiwemo ya mambo ya msingi kama kupiga vita umaskini au kupambana na rushwa ambayo ni matatizo yanayoikwamisha nchi yetu kupiga hatua kimaendeleo ni kutokuwa na mipango na fikra za kutizama masuala kwa muda mrefu. Wengi wa watawala wetu kutokana na matendo yao yanasanifu zaidi fikra zao kuwa katika vipindi vifupi vifupi kwa uwepo wao madarakani (kadiri ya vipindi vya kiuchaguzi). Hawataki kufikiria na kutizama taifa katika muda mrefu  hata baada ya wao kuondoka madarakani muda mrefu baadaye kwa hiyo hawana haja na kuacha majina yao yatajike kwa sababu nzuri.

Kuondoa umaskini na kupiga vita rushwa kwa vitendo badala ya maneno matupu ya kwenye majukwaa ya kisiasa tu ndiyo ingekuwa msukumo hasa unaowapa hamasa watawala wetu kutaka nafasi serikalini. Kwa kweli Tanzania isingewasahau kwa mchango huo lakini hakuna juhudi zinazotia matumaini yaani juhudi hazilingani na ukubwa wa matatizo. Bado kuna upungufu hasa wa kiutendaji kama tukipima kwa matokeo.

Nchini Brazili rais wao wa zamani, Lula da Silva atakumbukwa sana katika kujenga uchumi wa kisasa nchini mwake na hasa kupunguza umaskini wa kutupwa kwa kuwaondoka wabrazili milioni 30 kutoka kwenye umaskini wa kutupwa. Je, viongozi hujiuliza wanataka kuwaondoa watanzania wangapi kwenye umaskini wa kutupwa labda ndani ya miaka mitano?

Brazili ni mbali lakini tuangalie waethiopia watamkumbukaje waziri mkuu wao Meles Zenawi  aliyefariki mwaka jana (2012) ambaye alisimamia ukuaji wa uchumi wa Ethiopia kwa wastani wa asilimia 11 kwa miaka saba toka mwaka 2004 mpaka 2011 (kwa mujibu wa ripoti ya shirika la fedha la kimataifa (IMF)? Mwandishi na mchumi aliyebobea Joseph E. Stiglitz aliandika kwenye kitabu chake kinachoitwa “Globalization and Its Discontents”  juu ya waziri mkuu huyo wa zamani wa Ethiopia; “Meles showed that, with the right policies in place, even a poor African country could experience sustained economic growth, (Meles ameonyesha kwa kuwa na sera nzuri hata nchi masikini ya Afrika inaweza ikapata maendeleo chanya kwenye  maendeleo ya kiuchumi- tafsiri yangu).

Nawapongeza baadhi ya watendaji na mawaziri katika awamu hii hasa baada ya mabadiliko yaliyofanyika kwa kujitahidi kubadilisha hali ya wizara wanazoziongoza na taasisi zake. Tunapaswa kutambua bado kuna kazi kubwa mbeleni. Nilipata fursa kumsikiliza waziri wa uchukuzi, Dk. Harrison Mwakyembe wakati wa uzinduzi wa safari za treni katika mji wa Dar es Salaam; kutoka Ubungo kwenda Stesheni akasema kuhusu hatua hiyo kuwa ni “kiburi tu cha mtu masikini”. Naamini tunahitaji kiburi hicho cha kujaribu pia kwenye maeneo mengine ya kupunguza kero hapana nchini.

Kwa ujumla, uongozi ni dhamana na sio kazi tu kama kazi nyingine kwamba mwisho wa siku alimradi mkono uende kinywani. Kiongozi inabidi awe mtu anayeweza kujinasibisha na watu maskini ambao ni wengi katika nchi hii. Mara nyingi naona kama wapiga kura nyakati nyingine hatufahamu ni nini viongozi wetu tunatakata watufanyie na namna gani wasipoenenda tuwawajibishe, ndiyo maana tunavumilia tu utendaji mbovu.

Ili mtu awe kiongozi lazima awe na hamasa ya kuleta mabadiliko na awe na hamasa ya kuacha jina zuri nyuma yake. Lazima awe mtu mwenye maono ya mbali, uelewa wa kutosha wa jamii hii ya watanzania anayefahamu matatizo ya watanzania na kama aliwahi kuwa kwenye uongozi basi angalau tujue aliwahi kufanya nini kwenye uongozi wake kabla labda hatujamchagua kuwa mbunge au rais.

Kinachosikitisha haionekani hamasa ninayoijadili katika nyuso na juhudi za wengi wanaoutaka urais wa mwaka 2015; naona uroho wa madaraka! Wataka uongozi wengi  hawatuonyeshi uongozi sasa! Watuonyeshe uongozi sasa kabla ya kuanza hizo mbio zao. Haiwezekani watu watumie muda mwingi kutafuta uongozi kana kwamba hiyo ni shughuli ya kudumu na pamoja na kuwa wako kwenye uongozi wa aina fulani, tayari badala ya kutumia muda huo kuonyesha uongozi washaanza kuwazia madaraka zaidi! Tumeshashuhudia baadhi ya viongozi walioenda na njia ya kutumia nguvu na mikakati mingi kupata madaraka na namna walivyoshindwa kuibadilisha nchi. Hivyo hatupaswi kuingia katika mtego ule ule.

Continue Reading
16 Comments

16 Comments

  1. enock gray

    31/01/2013 at 11:11 pm

    kaka  msoma  nimesoma  kwa  makini  sana  makala  yako, ni  makala  nzuri  na  ya  kuumiza  sana  kwa  sababu  walengwa  hasa  wa  makala  yako  ni  viongozi.viongozi  wa  nchi  yetu  hawana  sifa  za  kiuongozi  kwani  mara  zote  wamwteuliwa  kirafiki  na  kindugu  ama  kichama  na  wala  si  kwa  vigezo  vya  uchapakazi.ukiwaangalia  kwa  machoo  kama  ya  kwangu  ya  miwani  utaona  kuwa  wala  hawana  haja  ya  kukumbukwa  kwani  tayari  matumbo  yao  yatawakumbuka, nyumaba  ndogo  zao  zitawakumbuka  ma  mabaa  makubwa  makubwa  ya  sinza  yatawakumbuka!!!!

    • Ramadhani Msoma

      07/02/2013 at 7:38 pm

      Yah kweli Enock kuna shida ya uongozi nimependa hiyo observation yako kwamba watakumbukwa na matumbo yao.Tusiache kuwakumbusha lakini

  2. joel junior

    01/02/2013 at 11:30 am

    That’s true, most of tanzanian leaders wapo for their own benefit,hvyo hawana jambo la mcng litakalopelekea wao kukumbukwa,,,jaman viongoz kumbuken mpo madarakan ili muwatumikie wananch na co kujinufaisha urself…

    Wekeni UZALENDO mbele ndio utakaosaidia kuiondoa nchi yetu kwenye umaskin pia HOFU YA MUNGU inahitajka ndani yenu.

    MUNGU IBARIKI TANZANIA.

    • Ramadhani Msoma

      07/02/2013 at 7:43 pm

      Asante Joel kwa kusoma asante pia kwa kuwakumbusha viongozi watu majukumu yao tutafika tu, Kama sio sisi basi watoto na wajukuu zetu

  3. raheem

    03/02/2013 at 12:30 pm

    Watanzania hatuna budi kuamka, tumebarikiwa kuwa na nchi yenye kila kitu ila uovu na kutowajibika kwa wachache kwa viapo walivyoweka kwenye hizo nafasi ndio kinachoirudisha nyuma nchi yetu. Tanzania inanuka, jamani watanzania tuamkeni.

    MUNGU IBARIKI TANZANIA

    • Ramadhani Msoma

      07/02/2013 at 7:49 pm

      Asante raheem kwa kutuamsha lazima tuamke sasa na sio baadaye Tunaweza

  4. Benworth Ndekile

    06/02/2013 at 12:08 pm

    Ebana nimesoma article yako hongera sana kwa mchango mzuri kwa jamii yetu ambayo imejaa wapiga kura wa kipindi cha uchaguzi tu,wakipewa pesa ya pombe na kanga zenye picha ya mgombea…lakini ujumbe huu tunapata wa mjini tu ambao tuna uelewa mkubwa zaidi ya kijijini ambapo viongozi wetu wanapata kula nyingi sana kwa kuwalagai wananchi uko..!article km hizi zisomwe na watu vijijini pia wapate uelewa..

    • Ramadhani Msoma

      07/02/2013 at 7:51 pm

      Yah Ben unayosema ni kweli inabidi elimu hii pia iende pembezoni ambako ni vijijini tujitahidi tutafiki tu huko tunakotaka kwenda.Asante kwa kusoma

  5. chrispin bitegeko

    07/02/2013 at 8:30 pm

    ni changamoto nzuri viongozi wanaipata toka kwa Rama. lakini viongozi wanapatikanaje? walikua na vision na mission zipi kabla ya kupata madaraka? je wanapokua madarakani ni kwa vipi madaraka yanawaadhibu au kuwatunuku? mkataba gani tumewekeana saini kuufuata kati ya wananchi na watawala? 

  6. Ramadhani Msoma

    08/02/2013 at 10:19 am

    Chriss viongozi wetu ni wa kawaida sana.Benchmark aliyoweka nyerere ni ya juu sana hawaifikii.Kama wananchi tusiwaache wakatuburuza tuangalie ni vipi tunawapata na tuwasaili vizuri kabla ya kuwaamini na hizo nafasi

  7. robin

    11/02/2013 at 8:08 pm

    JAMANI WANATAKIWA KUKUMBUKWA KWA HAYA:

    1:KUDANGANYA WANANCHI WAWAPO MADARAKANI

    2:KUJIPATIA MIANYA YA KUWA WAFANYA BIASHARA WAWAPO MADARAKANI.

    3:WACHEZA DILI MAARURU.

    4:WAPUUZIAJI WA VITU MUHUMU VYA MAENDELE NA USTAWI WA JAMII YA KITANZANIA.

    5:MATAJIRI KUTOKA SERIKALINI VIZIWI,VIPOFU NA WASIIOONA SHIDA ZA WATANZANIA KWA VIZAZI VIJAVYO.

    6:WANAOIPENDA NCHI KATIKA MAJUKWAA NAKUSEMA TUMIENI BIDHAA ZA KITANZANIA LAKINI WAO NI WAKWANZA KUNYA HEINEKEN KAMA BIA BORA,NYAMA ZA KUSINDIKWA KUTOKA MAGHARIBI N.K

    7:WANAO WAANDAA WARITHI WA VYEO NA NAFASI ZAO ILI SIRI ZAO ZISIFICHUKE.

    8:WAPENDA UBWANYENYE NA UHESHIMIWA WAKATI WAO TUMEWATUMA NA KUWALIPA VIZURI WATUTUMIKIE NA WANASAHAU WAJIBU WAO.

    9:WENYE KUTOA MAAMUZI KAMA WAO HAWATA STAAFU AU KUACHA KAZI

    10:WASIO MUOGOPA MUNGU KWA KUKAA MBELE YA MAJUMBA YA IBADA,KUTOA SADAKA NYINGI ILI WATUKUZWE

    (MUNGU WABARIKI WATANZANIA WENYE FIKRA SAHIHI KWA AJILI YA WATANZANIA WENZAO).

    • Ramadhani Msoma

      12/02/2013 at 8:10 am

      Robin,

      Nimependa kwa hayo mambo 10 unayodhani viongozi wetu ndo wanataka wakumbukwe nayo.Ulivyosema ni kweli kwa hivyo kama jamii yabidi tuamke na tuhakikishe wanatutendea haki kwenye uongozi wao tuwabane inavyowezekana ni jukumu letu sote.

      Asante sana kwa kusoma!!

  8. joseph anyonelile

    18/02/2013 at 11:43 pm

    Rama nimependa article yako,mi huwa najiuliza hii nchi mshauri ni nani?ambaye anatupeleka huku,viongozi wamekuwa hawana uzalendo as if wao wana inchi yao.lakini nashukuru watu tunauelewa siku hizi.lakini solution ni kumpata kiongozi ambae atakua dictator kwenye maamuzi nadhani tutanyooka.wanasema “roma haikujengwa kwa siku”,a day will come na kunawatu tutashuhudia wanaelekea “The hague”.

  9. ramadhani msoma

    19/02/2013 at 10:10 am

    Yah Jose tunaangushwa na viongozi nguvu wanazozitumia kwenye kutafuta uongozi wangezitumia kwenye kuleta maendeleo tungekuwa mbali.Kuna tatizo la kiuongozi  Tanzania na labda duniani kwa ujumla.Tanzania tatizo hili ni kubwa zaidi na watu tubadilike ili tuwabane watawala watutumikie sio wajitumikie wao na familia zao.

    Asante kwa Kusoma JOSE

  10. Ramadhani Msoma

    19/02/2013 at 10:25 am

    Yah Jose kuna tatizo kubwa sana la kiungozi hapa Tanzania wengi wanapenda uongozi lakini viwango vidogo.Watu wengi smart wanaona siasa uzushi.Viongozi wetu wangekuwa na viwango hii sio nchi ya kuwa maskini na kama unavyojua amani yetu pia imeanza kuwa hatarini ni wakati wao wa kutuonyesha uongozi sasa!!

    • tonny kilembe

      08/04/2013 at 10:00 am

      Tatizo la wengi sasa hivi ni kutokuwa na utu wa kitanzania, kila mtu antaka kuwa kiongozi kwa manufaa yake na anatumia nguvu nyingi sana aingie kwenye madaraka matokeo akipata hiyo furksa fikra zake zinakuwa hazilengi kwenye mafanikio ya nchi bali mafanikio yake binafsi ambyo huzaa hasara kubwa kwa taifa hasa kwenye swala la mikataba mbalimbali ya sekta muhimu

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma