Connect with us

Jamii

Uminyaji wa Demokrasia ya vyama vingi waendelea ndani ya Bunge la Tanzania

Published

on

Mwenyekiti wa Kamati ya Kudumu ya Bunge ya Hesabu za Serikali, Mohamed Mchengerwa ameitaka ofisi ya Msajili wa Vyama vya Siasa kuvifuta vyama vya siasa vinavyodaiwa kukiuka sheria na taratibu za kuendesha shughuli za kisiasa nchini.

Kauli hiyo imetolewa Bungeni wakati wa uwasilishaji wa bajeti ya ofisi ya Waziri Mkuu ya mwaka 2018/2019, ambapo ni mapendekezo ya kamati  kuhakikisha vyama vya siasa vinatekeleza wajibu wao uliopo kikatiba na sheria.

“Ofisi ya Msajili ihakikishe kunakuwa na usimamizi wa karibu kwa kufuatilia na kuchunguza mienendo inayoharibu sifa na vigezo vya vyama vya siasa nchini na kwamba msajili asisite kukifutia usajili chama chochote cha siasa kitakachokiuka kanuni, sheria na taratibu za uendeshaji wa vyama vya siasa hapa nchini”, alisema Mchengerwa ambaye ni mbunge wa Rufiji mkoani Pwani.

Hakuishia hapo, lakini ameitaka ofisi ya msajili wa vyama vya siasa kuvifuta vyama vyote vinatumia vibaya ruzuku inayotolewa na Serikali ili kuwa fundisho kwa vyama vingine vinavyokiuka misingi ya matumizi ya rasilimali za umma.

Kwa wadadisi wa masuala ya kisiasa wanapatwa na wasiwasi juu ya ushauri huo wa kamati wa kufuta baadhi ya vyama vya siasa kwa makosa ambayo yanaweza kujadiliwa na vyama hivyo vikaendelea na shughuli zao.

Inaelezwa kuwa vitisho na adhabu dhidi ya vyama vya siasa nchini sio njia pekee ya kustawisha demokrasia ya vyama vingi  nchini. Kauli hizo za viongozi hasa kutoka chama tawala zinadaiwa kuwa ni mkakati wa kuzoofisha nguvu ya vyama vya upinzani ambavyo vinatoa ushindani kwa viongozi waliopo madarakani.

Tangu kuingia madarakani kwa Serikali ya awamu ya tano inayoongozwa na Rais John Magufuli, uhuru wa vyama vya siasa hasa vya upinzani kutimiza majukumu yao ya kisheria umepungua kutokana na baadhi ya matukio yasiyo ya kawaida ambayo hayakushuhudiwa katika awamu za Serikali zilizopita.

Bendera za vyama vya siasa zikipepea katika eneo la Ubungo, Dar es Salaam wakati wa uchaguzi mkuu 2015

 

Kuzuiwa kwa mikutano ya kisiasa na maandamano

Mwaka 2016 Serikali ilizuia mikutano yote ya wazi ya vyama vya siasa mpaka 2020, kwa madai kuwa wakati wa kufanya kampeni na siasa za majukwaani umeisha na wananchi wanatakiwa kufanya kazi kwa bidii ili kuinua uchumi wa nchi ikizingatiwa kuwa Serikali inatekeleza sera ya uchumi wa viwanda.

Lakini zuio hilo lilienda mbali zaidi hadi kupiga marufuku maandamano na mikutano ya ndani ya vyama vya siasa isipokuwa pale wahusika wanapokuwa wamepata kibali kutoka Jeshi la Polisi. Matukio kama haya yamekuwa yakilalamikiwa na wadau wa siasa kuwa ni njia ya kuminya uhuru wa kujieleza na kuikosoa Serikali pale inapokosea.

Mara kadhaa, Serikali kupitia Jeshi la Polisi imekuwa ikizuia vibali vya maandamano kwasababu mbalimbali ikiwemo ukosefu wa usalama, jambo ambalo linakiuka matakwa ya katiba na sheria ambayo yanatoa uhuru wa watu kukusanyika na kutoa maoni yao.

Mnamo Machi 9 mwaka huu, akiwa mjini Chato mkoani Geita, Rais Magufuli aliendelea kusisitiza msimamo wa Serikali wa kuzuia shughuli za kisiasa na kutoa tahadhari kuwa Serikali yake haitasita kumchukulia hatua mtu yoyote atakayejaribu kuandamana.

“Wapo watu ambao wameshindwa kufanya siasa za kweli wangependa kila siku tuwe mabarabarani tunaandamana. Watu hao wanahamia huku wao wanataka wabaki wanaandamana kule,

“Nimeshasema ngoja waandamane wataniona. Kama kuna baba zao wanawatuma, watakwenda kuwasimulia vizuri. Niliapa kwa Katiba kwamba nchi hii lazima iwe ya amani”, alinukuliwa Rais Magufuli.

 

Katiba na sheria zinasemaje?

Shughuli za kisiasa ikiwemo mikutano na maandamano yanatambulika na Katiba ya Jamhuri ya Muungano wa Tanzania ambapo katika Ibara ya 20 (1) inasema, kila mtu anao uhuru wa kukutana na watu wengine kwa hiari yake na kwa amani, kuchanganyika, kushirikiana na watu wengine.

Kwa muktadha huo, kukutana na kuchanganyika ni sehemu ya shughuli za vyama vya siasa ambayo watu wanaelezea fikra na maoni yao juu ya jambo lolote lile kwa masharti ya kulinda amani na sheria za nchi.

Shughuli za kisiasa zinaenda sambamba na uhuru wa kujieleza na kwa mujibu wa Katiba ya mwaka 1977 ibara ya 18 (a), kila mtu ana uhuru wa kuwa na maoni na kueleza fikra zake.

Kadhalika, Sheria ya vyama vya siasa ya mwaka 2002 ibara ya 11 inatambua maandamano na mikusanyiko kama sehemu ya Demokrasia na watu kufurahia uhuru wao bila kuingilia na mamlaka yoyote.

Sambamba na hilo Mikataba ya kimataifa ambayo Tanzania imeridhia inatoa jukwaa (Civic Space) la watu kukusanyika kutoa maoni au kuelezea yale wanayoyaamini bila kutishwa au kuzuiwa kwa namna yoyote ile ambapo vyama vya siasa vina nafasi yake.

 

Lakini misingi hiyo inazingatiwa?

Licha ya Katiba na Sheria kufafanua haki za msingi za vyama vya siasa, bado hali ya utendaji wa vyama hivyo nchini siyo ya kuridhisha. Na wanasiasa wanaojaribu kutekeleza haki zao wamekuwa wakikabiliwa na vitisho, adhabu na vifungo.

Hivi karibuni, Mbunge wa Mbeya Mjini, Joseph Mbilinyi (Sugu) alihukumiwa kwenda jela kifungo cha miezi sita kwa kile kinachotajwa kutoa kauli ya ‘uchochezi’ dhidi ya Rais katika moja ya mikutano ya kisiasa iliyofanyika katika jimbo lake mapema mwaka huu.

Pia viongozi 7 waandamizi wa chama cha upinzania CHADEMA wakiongozwa na Mwenyekiti wao, Freeman Mbowe wiki hii walifikishwa Mahakamani kwa kosa la kuandamana bila kibali mnamo Februari 17, 2018 wakati wakienda kwa Msimamizi wa Jimbo la Kinondoni kudai hati za viapo za mawakala wao.

Katika maandamano hayo  alifariki mwanafunzi  mmoja wa Chuo Cha Taifa Cha Usafirishaji (NIT),  Akwilina Akiline  kwa kupigwa risasi wakati polisi wakiwatawanya wafuasi wa CHADEMA.

Kutokana na maandamano hayo, Msajili wa Vyama vya Siasa, Jaji Francis Mutungi aliiandikia CHADEMA barua ya kujieleza kwanini wasipewe adhabu kutokana na kukiuka sheria inayowakataza kuandamana bila kibali na kusababisha taharuki katika jamii.

Kimsingi Msajili ni mlezi wa vyama vya siasa ambaye wakati wote anapaswa kuwa mtetezi na mlinzi wa vyama hivyo dhidi ya hatari yoyote ile inayonuia kuvidhoofisha visitimize majukumu yake.

Sambamba na hilo tayari, Serikali imeanza mchakato wa kuifanyia marekebisho sheria ya vyama vya siasa ya mwaka 2002, ambapo katika Rasimu iliyotolewa kipengele kimojawapo kinazuia kufanyika kwa mikutano ya kisiasa isipokuwa tu wakati wa uchaguzi.

Matukio haya yanaweza kuashiria kuwa mfumo wa vyama vingi nchini Tanzania unapitia kipindi kigumu na kama hatua muhimu hazitachukuliwa kuturejesha katika misingi tuliyojiwekea, uwezekano wa vyama vingi kupotea ni mkubwa. Na kitachofuata ni kurudi kwenye utawala wa kiimla unaongozwa na viongozi wanaofuata nadharia za ‘kidikekta’.

Tunahitaji mjadala wa kitaifa, kutathmini ni wapi tumekosea au ni mfumo upi wa uongozi unatufaa watanzania kwa siku zijazo.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Must Read

Copyright © 2018 FikraPevu.com