Connect with us

Kimataifa

Ugomvi wa Kiir na Machar unavyoisambaratisha Sudan Kusini

Published

on

Sudan Kusini ni nchi changa iliyojipatia uhuru wake miaka michache iliyopita na kuwa taifa huru lenye mamlaka kamili ya kisiasa na kiuchumi. Nchi hiyo  ilitangaza uhuru wake tarehe 9 Julai 2011 na kuwa nchi ya 54 Afrika na 193 duniani na kujitenga rasmi na nchi ya Sudan ambayo imekuwa na migogoro ya kisiasa muda mrefu.

Utengano huo ulitokana na ukweli kuwa Sudan ina wakazi wengi ambao ni Waislamu na wenye kufuata tamaduni za Kiarabu, wakati huohuo wakazi wengi wa Sudan Kusini ni Wakristo na wanaofuata mila za jadi. Mgongano huo wa kidini na kisiasa ulisababisha mizozo isiyoisha, kila upande ukitaka kutimiza matakwa yake na kudharau dini nyingine.

Lakini kiuchumi na kielimu nchi hiyo iko nyuma ikilinganishwa na Sudan ambapo mgawanyo wa rasilimali hasa mafuta haukuwa wa haki na usawa na kusababisha upande mmoja kutofaidika na utajiri uliopo katika eneo hilo la Afrika.

Kutokana na hali hiyo tete ya kisiasa ambayo iliharibu uhusiano wa nchi hizo mbili ambapo hapo awali Sudan Kusini ilikuwa ni  moja ya majimbo ndani ya Sudan, ikawalazimu wananchi wa Sudan Kusini kupiga kura ya kujitenga na Sudan mnamo Januari 2011. Na matokeo yake wananchi wengi wa Sudan Kusini walipendekeza kujitenga na miezi michache nchi hiyo ilijitangazia uhuru wake.

Lakini ikumbukwe juhudi zote hizo ziliongozwa na raisi wa kwanza wa nchi hiyo Dkt. John Garang ambaye aliliongoza kundi la wanamgambo lijulikanalo kama Sudan People’s Liberation Army (SPLA) mwaka 1983 kupigania uhuru wa nchi hiyo baada ya Sudan kutangaza kuwa nchi ya kiislamu. Pamoja na harakati hizo, nchi hiyo iliingia katika mapigano ya wenyewe kwa wenyewe.

Vita hivyo viliisha mwaka 2005 kwa mkataba wa amani uliocha Kusini kama sehemu ya kujitawala ndani ya Sudan hadi ilipopigwa kura ya kujitenga. Nchi imeathiriwa vibaya na vita vya wenyewe kwa wenyewe vya SPLA ambavyo vilidumu kwa miaka 21.

Agosti 1 mwaka huohuo John Garang alifariki baada ya ndege ya rais wa Uganda aina ya helikopta Mi-172 aliyokuwa akisafiria kuanguka katika mojawapo ya milima iliyoko kusini mwa Sudan.

Baada ya kifo cha Garang majeshi ya Sudan Kusini na ‘South Sudan Defence Force’ (SSDF) yalisitisha uhasama wao na kuungana mnamo mwaka 2006 chini ya Azimio la Juba. SSDF ilianzishwa na Makamu wa Rais wa wakati huo wa Sudan Kusini, Dkt. Reik Machar  aliyefukuzwa na rais Salva Kiir baada ya kutoelewana katika masuala ya uongozi.

John Garang siku za uhai wake

Wakati huu tunashuhudia Sudan Kusini iliyoanza kustawi na kuimarika kiuchumi,  kutumbukia katika mapigano ya wenyewe kwa wenyewe kati ya majeshi yanayomtii raisi Salva Kiir na Dkt. Reik Machar yaliyoanza  miaka minne iliyopita.

Vita hivyo vya ndani vimewaacha raia wa Sudan Kusini katika hali ya wasiwasi ikizingatiwa kuwa raia hao wamegharimika na kumwaga damu yao kuupata uhuru.  Lakini raia wengine wamekimbilia nchi za jirani, huku miundombinu ikiharibiwa vibaya na shughuli za kiuchumi kusitishwa.

Hatua hiyo ilifikiwa pale rais Kiir alipomvua wadhifa wa umakamu wa raisi Dkt. Machar Julai 2012, kwa madai kuwa makamu huyo alitangaza kugombea nafasi ya uraisi katika uchaguzi uliotarajiwa kufanyika mwaka 2015 ambapo angechuana vikali na raisi Kiir.

Duru za kisiasa zinasema kutokana na changamoto hiyo ya kiuongozi na malumbano yasiyoisha baina ya wawili hao, rais Kiir kulinda heshima yake alimfukuza kazi makamu wake ili ajipange vizuri kuendelea kukaa madarakani na washirika wake.

Hadi kufikia sasa, Dkt. Machar alikimbilia uamishoni Afrika Kusini lakini bado anaoongoza mapambano dhidi ya Kiir katika nchi yake. Kiir alimchagua James Wani Igga kuwa Makumu Rais na Taban Deng Gai kuwa Makamu Rais wa kwanza.

Licha ya mabadiliko hayo bado Sudan Kusini haijapata muafaka wa kisiasa. Kulingana na ripoti ya Shirika la Wakimbizi Duniani (UNHCR-2017)inaeleza kuwa zaidi watu 2.7 wameikimbia nchi hiyo na kwenda mataifa ya jirani kutafuta hifadhi, huku wengine wakibaki kuwa wakimbizi wa ndani.

Shirika hilo linasema zinahitajika Dola za Kimarekani bilioni 1.4 ili kukagharimia mahitaji ya chakula, maradhi, maji na huduma za afya kwa wakimbizi waliopo nje ya Sudan Kusini ambao wanafikia million 1.8. Wakimbizi hao wanapatikana katika nchi za Uganda, Kongo DRC, Sudan, Kenya, Ethiopia na Jamhuri ya Afrika ya Kati.

Kwa upande wake mchambuzi wa siasa ya Afrika na Mashariki ya Kati, Ahmed Rajab katika safu yake iliyoitoa katika gazeti moja  hapa nchini anasema mapigano yalipozuka mjini Juba kati ya wafuasi wa Rais Salva Kiir  na Dkt. Reik Machar vyombo vya habari vikayaelezea mapigano hayo kuwa ni ya kikabila. Sababu yao kubwa ni kuwa Kiir ni Mdinka na Machar ni Mnuer.

Anasema ingawa mzozo huo ulichukuwa sura ya kikabila chanzo chake ni tofauti za kisiasa za mahasimu hao wawili ambapo Machar anaungwa mkono na mjane wa John Garang kiongozi muasisi wa vuguvugu la kupigania Sudan ya Kusini (SPLA). Rebecca ni Mdinka kama Kiir.

Anaongeza kuwa Wadinka na Wanuer wamekuwa mahasimu tangu jadi na jadi. Daima wamekuwa wakizozana kuhusu ardhi na wakiibiana ng’ombe. La ajabu ni kwamba makabila yao mawili yamekuwa na uhasama mkubwa  licha ya kwamba yana mila zinazofanana sana na tamaduni zao zinalingana.

“Wadinka wa Bor wanawaogopa watu wa kabila dogo la Murie ambao raha yao ni kuyavamia mazizi ya ng’ombe ya Wadinka karibu na mji wa Bor. Wadinka siku zote wanakashifu Wanuer kwa kusema kwamba ni wakali, wanakasirika mara moja na Wanuer kuwa ni vichaa” anasema Rajab.

Mchambuzi huyo anasema Wadinka wanadai kwamba hawasahau aliyoyafanya Machar mwaka 1991. Mwaka huo Machar aliparurana na Garang na Kiir akawaacha  mkono na kuunda vuguvugu lake ambalo liliungwa mkono na watu wa kabila lake.

Baadaye Machar akawa anashirikiana na serikali ya Khartum ili kuwadhohofisha akina Garang na Kiir na chama chao cha SPLM.

Lakini mwaka 2002 Machar akapatana na Garang na Kiir na kurudi katika chama cha SPLM  na kuteuliwa kuwa kamanda mkuu wa jeshi la Sudan Kusini. Alipofariki Garang Machar akawa makamu wa rais huku Kiir akiwa rais wa nchi hiyo.

Rais Salva Kiir (Kushoto) akiwa na Reak Machar kabla ya Makamu huyo wa rais kuondolewa

katika nafasi yake

Kwa uchambuzi huo wa Ahmed Rajab, utagundua wazi kwamba ukabila unahusishwa na siasa, na matokeo yake taifa hilo kutotengamaa na kustawi kiuchumi. Taifa lolote ambalo halitengenezi maridhiano ya kisiasa na watu wake wakaendelea kupigania haki za makundi yao ni vigumu kusimama na kujenga uchumi imara.

Pamoja na mzozo huo nchi wapatanishi za jumuiya ya Maendeleo ya Pembe ya Afrika (IGAD) yalianzisha mazungumzo ya kuzipatanisha pande zote mbili, ambapo mazungumzo yalifanyika Ethiopia makao makuu ya Umoja wa Afrika. Mazungumzo hayo yanaendelea lakini mwafaka bado haujapatikana.

Ni muhimu mahasimu hao wafahamu kuwa wanaoumia ni wananchi na sio viongozi, hivyo maridhiano yanahitajika haraka ili kujenga taifa hilo changa ambalo limekuwa katika vita vya wenyewe kwa wenyewe zaidi ya miaka 21. Mstakabali wa Sudan ya Kusini uko mikononi mwa wananchi wake.

Umoja na mshikamano ndio silaha pekee ya kufikia maendeleo endelevu,kwa sababu mataifa makubwa yanapigania kuungana ili kutumia rasilimali zilizopo katika nchi zao ili kutengeneza mstakabali mzuri wa raia.

Kuna haja ya viongozi wa Sudan Kusini kuliona hili ikizingatiwa kuwa nchi hiyo ni mwanachama wa Jumuiya ya Afrika Mashariki.

Ukabila na urasimu wa madaraka ukiwekwa kando utachagiza mwafaka baina ya pande mbili hasimu na kuliweka taifa hilo katika sura mpya mbele ya diplomasia ya kimataifa ambalo lina utajiri mkubwa wa mafuta.

 

Continue Reading
Click to comment

Leave a Reply

Your email address will not be published. Required fields are marked *

Biashara/Uchumi

Mradi wa Stiegler’s Gorge kutua mikononi mwa Kamati ya Urithi wa Dunia

Published

on

Kamati ya Urithi wa Dunia ya Umoja wa Mataifa inatarajia kuamua kama Pori la akiba la Selous liondolewe miongoni mwa maeneo ya urithi wa dunia, kufuatia Serikali ya Tanzania kuanza mchakato wa kujenga bwawa la Stiegler’s Gorge kwa ajili ya kuzalisha umeme wa kilowati 2,100 ndani ya pori hilo.

Kamati hiyo inatarajia kukutana baadaye mwezi Juni katika jiji la Manama, Bahrain na miongoni mwa ajenda zitakazojadiliwa ni uamuzi wa Serikali kujenga mradi mkubwa wa kuzalisha umeme katika pori hilo ambalo ni urithi muhimu wa dunia ambao uko hatarini kutoweka.

Kamati hiyo inakutana kila mwaka na kikao cha mwaka huu kitakuwa cha 42 tangu kuanzishwa kwake na ina kazi moja kubwa ya kujadili maendeleo ya utunzaji wa maeneo ya urithi na kufanya maamuzi ya kufuta au kuendelea kuyaweka maeneo yaliyopewa hadhi ya kuwa kwenye orodha ya Urithi wa dunia ulio katika hatari ya kutoweka.

Akizungumza hivi karibuni na jarida moja la kila wiki la Afrika Mashariki, Meneja wa Programu wa Kituo cha Urithi wa Dunia cha Shirika la Umoja wa Mataifa la Elimu, Sayansi na Utamaduni (UNESCO), Richard Lo Giudice amesema; mradi wa uzalishaji umeme katika pori la Selous utajadiliwa kwenye mkutano wa mwaka wa Kamati ya Urithi wa Dunia na kisha UNESCO itatoa mrejesho.

Suala hilo litajadiliwa katika kikao cha 42 cha Kamati ya Urithi wa Dunia itakayoketi Manama kuanzia Juni 24 hadi Julai 4, wakati inatathmini hali ya uhifadhi wa pori la akiba la Selous,” alinukuliwa Giudice na jarida hilo.

Serikali imetenga Bilioni 700 ambayo ni sawa na asilimia 41 ya bajeti ya Wizara ya Nishati ya mwaka wa fedha wa 2018/2019 inayofikia Trilioni 1.69 kwaajili ya mradi huo, ambapo imesema ni muhimu kwa ajili ya uzalishaji wa umeme ili kuchochea ajenda ya uchumi wa viwanda.

Licha ya tahadhari iliyotolewa na wadau mbalimbali wa mazingira na wanasiasa akiwemo Mbunge wa Kigoma mjini, Zitto Kabwe na Nape Nnauye wa Mtama kuhusu athari zitakazotokea endapo mradi huo utatekelezwa, bado Serikali imeendelea kushikiria msimamo wake wa kujenga mradi huo kwa madai kuwa wanaokosoa hawaitakii nchi mema.

Serikali ilienda mbali zaidi na kutahadharisha mtu yeyote atakayejaribu kuzuia mradi huo atakabiliwa na hatua kali za kisheria ikiwemo kufungwa jela.

Piga ua, garagaza Serikali itatekeleza mradi wa Stiegler’s Gorge. Hawa wanaopinga mradi huu ukiwatazama wanataka umeme ufike vijijini mwao, ukiwatazama wengine ni wachumi wanapinga’” alinukuliwa Naibu Waziri wa Ofisi ya Makamu wa Rais, Muungano na Mazingira, Kangi Lugola wakati akijibu hoja za wabunge Mei 26 mwaka huu.

Kamati ya Urithi wa Dunia inajumuisha wawakilishi 21 ambao wanachaguliwa na Baraza la Umoja wa Mataifa kwa ajili ya kuratibu shughuli za ulinzi wa Urithi na Utamaduni wa dunia.

“Hilo litakuwa pigo kwa asili,” limesema shirika la uhifadhi wa asili la World Wildlife Fund (WWF). Bwawa hilo litakuwa na urefu wa mita 130 na upana wa mita 700. Litatengeneza ziwa kubwa la zaidi ya kilomita 1000 za mraba, na maji yatasambaa katika eneo ambalo ni kubwa hata kushinda jiji la Berlin, Ujerumani.

 

Mambo Bayana

Kamati ya Urithi wa Dunia itakutana wakati Serikali kupitia Wakala wa Misitu Tanzania imetoa zabuni ya kukata miti isiyopungua milioni mbili katika eneo la Selous ambalo baadhi ya wabunge wamesema lina ukubwa unaolingana na jiji la Dar es Salaam.

Zabuni hiyo pia itahusisha ukataji na uuzaji wa miti hiyo ili kuiingizia Serikali mapato yatakayotumika katika huduma za kijamii.

Lakini wanaopinga mradi huo, wanaeleza kuwa miti itakayokatwa ni mingi sana na ujenzi wa bwawa hilo utasababisha athari za mazingira zinazoweza kuangamiza wanyama wengi zaidi na kuchangia ongezeko la joto duniani.

Kwa mujibu wa Ripoti ya Tathmini ya Mazingira juu ya Mradi pendekezwa wa Stiegler’s Gorge iliyotolewa mwaka 2009 na Prof. Raphael Mwalyosi wa Chuo Kikuu cha Dar es Salaam imebainisha wazi kuwa kutakuwa na athari kubwa katika eneo la Selous endapo mradi huo utatekelezwa.

Hata hivyo ripoti hiyo inaeleza kuwa mradi huo utazalisha umeme wa kutosha lakini ina mashaka juu ya matokeo ya kijamii na kiuchumi yanayoweza kupatikana.

Wachambuzi wa masuala ya mazingira, wanaeleza kuwa Tanzania ina kibarua kigumu cha kujieleza mbele ya kamati hiyo ikizingatiwa kuwa ni miongoni mwa wanachama wa kamati hiyo muhimu duniani. Nchi zingine za Afrika ambazo zinaingia katika kamati hiyo ni Burkina Faso, Tunisia, Uganda na Zimbabwe.

Kamati hiyo itakuwa na kazi ya kutathmini hali ya utunzaji wa maeneo mbalimbali yaliyoko kwenye urithi wa dunia na kuzitaka nchi wawakilishi kuchukua hatua za kutunza na kuhifadhi urithi huo ili kuhakikisha dunia inakuwa mahali salama pa kuishi.

       Baadhi ya wanyama kuathirika na mradi wa umeme

Historia ya Pori la Selous

Pori la Akiba la Selous ambalo lina eneo la kilomita 50,000 za mraba, ni moja ya mbuga kubwa zaidi barani Afrika, ambayo inajulikana kwa kupatikana kwa tembo, vifaru weusi, duma, twiga, viboko, mamba, na wanyama pori wengine.

Pia pori hilo lina aina nyingi tofauti ya viumbe wa pori, vikiwemo miombo, msitu, sehemu za nyasi, kinamasi, ikisemekana kuwa mbuga hiyo ni maabara ya mabadiliko ya kibaolojia na kiekolojia.

Uwindaji kwa ajili ya biashara unaruhusiwa katika mbuga ya Selous. Ni chanzo cha pato kwa mbuga hiyo na zaidi ya watu milioni 1.2 ambao wanaishi viungani mwa mbuga hiyo. Katika baadhi ya maeneo, uwindaji haukubaliwi kabisa. Watalii wanaweza kuzuru. Lakini kuna watalii wachache ikilinganishwa na mbuga ya kitaifa ya Serengeti, ingawa mbuga ya Selous imeizidi Serengeti mara tatu kwa ukubwa.

Mto Rufiji ni mwokozi wa mbuga hiyo. Ni mto wenye urefu wa kilomita 600 na unaishia katika Bahari ya Hindi kusini mwa Dar es Salaam, lakini maji ya mto kwa sehemu kubwa yatatumika kuzalisha umeme.

Kutokana na umuhimu wake, mwaka 1982, UNESCO lilitangaza na kuiingiza Selous miongoni wa maeneo machache ya urithi wa dunia na kuanza kuhifadhiwa.

Lakini mwaka 2014, Kamati ya Urithi wa Dunia ya UNESCO, iliyokutana mjini Doha, Qatar, iliingiza mbuga ya Hifadhi ya Wanyama ya Selous, iliyopo kusini mashariki mwa Tanzania katika orodha ya Urithi wa Dunia ulio Hatarini kutoweka, kwa sababu ya ujangili wa kupindukia.

Ujangili ulisababisha kupungua kwa idadi ya wanyamapori, hasa kwa upande wa tembo na vifaru, ambao idadi yao imepungua kwa asilimia 90 tangu 1982, wakati mbuga hiyo ilipoorodheshwa kwenye urithi wa dunia.

Continue Reading

Kimataifa

Uuzaji, umiliki wa silaha Rwanda usiwe sababu ya kuvuruga amani Afrika

Published

on

Hivi karibuni Rwanda imebadili Sheria yake ya mwaka 2009 iliyokuwa inakataza umiliki na uuzwaji wa silaha za moto. Sheria mpya ya silaha za moto nchini humo inaruhusu wananchi kumiliki silaha na pia watu binafsi kufungua maduka ya uuzwaji wa silaha za moto.

Sheria inaenda mbali zaidi na kuruhusu uwekezaji wa viwanda vya silaha za moto nchini Rwanda.

Serikali ya Rwanda imetetea uamuzi huo kwa kusema ni wakati sahihi kwa raia wake kumiliki silaha na kudai kuwa itasimaia vizuri sekta hiyo ili isilete madhara.

Hatua hii ya kubadili Sheria na kuruhusu watu binafsi kuwa na maduka ya kuuza silaha za moto na pia kuruhusu uwekezaji katika viwanda vya silaha za moto imeamsha hisia tofauti za wananchi na wachambuzi mbalimbali masuala ya usalama Afrika.

Nchi zetu za Afrika bado zinakabiliwa na changamoto lukuki ikiwamo usalama, vita vya wenyewe kwa wenyewe, ujambazi uliokithiri, ugaidi, fujo katika chaguzi na mambo mengine mengi.

Haya na mengine mengi yanaleta hofu endapo ubinafsishaji holela unafanyika katika silaha za moto. Hapa najaribu kufikiria matokeo ya mbele zaidi, kwani madhara yake yanaweza yasiwe sasa ila katika muda mrefu ujao tunaweza kuyaona kwa wingi.

Nieleze wasiwasi wangu katika uamuzi huo wa kubinafsisha sekta ya silaha za moto. Kwanza kabisa sio wananchi kumiliki silaha, hili halina tatizo sana kwani hata Tanzania tunafanya hivi lakini kupitia kwa taasisi za Serikali.

Wasiwasi mkubwa nilionao ni kubinafsisha silaha za moto kuuzwa katika masoko huria na wawekezaji kuwekeza katika sekta hiyo.

Najaribu kutafakari, Je, hitaji la wananchi lilikuwa silaha za moto kana kwamba kulikuwa na upungufu kiasi cha kuruhusu watu kuwekeza katika sekta hiyo?

Je, ajenda hii haina msukumo wowote kutoka kwa mabepari ambao biashara yao kubwa ni uuzaji wa silaha za moto na wanatafuta masoko mapya Afrika?

Duka la silaha za aina mbalimbali

Twakimu za Taasisi ya Utafiti ya Stockholm International Peace (SIPRI) za mwaka 2015 zinaonesha kuwa makampuni makubwa kumi bora ya utengenezaji wa silaha za moto duniani, nane yanatoka Marekani, moja Italia na lingine Umoja wa Ulaya.

Takwimu hizi pia zinaonesha nchi zinazouza silaha za moto kwa wingi duniani ni pamoja na Marekani, Urusi, China, Ufaransa, Ujerumani, Uingereza, Uhispania, Italia, Ukraine na Israeli.

Taarifa ya SIPRI ya mwaka 2012 zinaeleza kuwa nchi kumi bora zinazoagiza silaha kwa wingi duniani ni India, Saudi Arabia, Umoja wa Kiarabu, China, Australia, Aljeria, Uturuki, Iraq, Pakistani, Vietnam. Katika orodha hii, utaona nchi za Afika ni chache sana kwani nyingi huagiza silaha kwa kiwango kidogo na nyingine hufanya biashara kwa magendo.

Kwa takwimu hizo hapo juu, ni dhahiri sasa mabepari hawa wanatafuta mahala pa kuwekeza viwanda vyao vya silaha za moto na Afrika ni chaguo lao kwa wakati huu.

Hata hivyo, Hii inaweza kuwa fursa nzuri kwa Rwanda kwani watapata wawekezaji wengi katika sekta hii ila waathirika wa silaha hizi za moto ni majirani ambao inatupasa tukae chonjo sasa.

Marekani kama mfano duniani imekuwa muhanga mkubwa wa Sera na Sheria zake za ubinafsishaji wa silaha za moto ambapo upatikanaji wa silaha umekuwa rahisi kiasi kwamba maduka binafsi yanauza silaha hizo.

Tangu mwaka 2011, kumezuka matukio mengi ya watu kupigwa risasi katika shule na maeneo yenye mikusanyiko ya watu. Matukio haya nchini Marekani yanazidi kila mwaka na sasa wananchi wameanza kuipigia kelele sheria ya silaha za moto ibadilishwe.

Ugumu wa kubadili Sheria hizi nchini Marekani unatokana na ukweli kwamba ni biashara inayoingiza kipato kikubwa kwa makampuni ya nchi hiyo. Takwimu za SIPRI za mwaka 2012 zinakadiria kuwa mapato ya jumla ya makampuni 100 makubwa ya uuzaji wa silaha za moto yanafika Dola za Marekani 395 bilioni.

Kwa hakika hii ni biashara kubwa inayoweza kuipatia nchi mapato. Na sasa tunaweza kushuhudia Rwanda ikiwa moja ya nchi inayoweza kufaidika na mpango huu wa ubinafsishaji sekta ya silaha za moto.

Lakini fursa hiyo ya Rwanda kutengeneza silaha inapaswa kuangaliwa kwa jicho la tatu ili isiwe chanzo cha kuchochea machafuko katika nchi za Afrika, ikizingatiwa kuwa bado bara hilo halijatulia; ziko nchi kama Sudan ya Kusini, Somalia, Congo DRC, Jamhuri ya Kati, Burundi ambazo zinakumbwa na mizozo ya kisiasa.

Nchi hizo zinaweza kutumia silaha zinazouzwa Rwanda kuendeleza mapigano katika nchi zao. Katika hili serikali ya Rwanda inapaswa kuweka mfumo madhubuti wa kusimamia utengenezaji na uuzaji wa silaha hizo ili zisivurue amani ya Afrika.

Continue Reading

Jamii

Raia wa Rwanda watahadharishwa kuingia pori la akiba Kimisi Kagera

Published

on

Rwanda imewaonya raia wake wanaoingia kinyume cha sheria katika Mbuga za Wanyama mkoani Kagera kwa madai kuwa wanahatarisha ujirani mwema baina ya nchi hiyo na Tanzania.

Hatua hiyo imekuja siku chache, baada ya wanaume wanne kuvuka mpaka na kuingia upande wa Tanzania kwa shughuli za kuchanja kuni. Watanzania walimkamata mmoja wao ambaye alitambulika kwa jina la Shumbushu na kumpiga vibaya na kumjeruhi. Wengine walifanikiwa kutoroka na kurudi Rwanda.

Gavana wa jimbo la Mashariki mwa Rwanda, Fredy Mfulunje akizungumza na wananchi wanaoishi mpakani mwa Tanzania amesema vitendo vya kuingia kwenye ardhi ya nchi nyingine bila kufuata taratibu za kisheria hazikubaliki kwasababu vinaweza kuhatarisha amani ya nchi hizo mbili.

“Kuna makosa yanayofanywa na wananchi wetu wanaovuka na kuingia kwenye ardhi ya nchi nyingine kinyume cha sheria, ndiyo maana tumekuja hapa kuwaeleza kuwa vitendo hivi havikubaliki hata kidogo. Sisi tunawaasa wananchi kuachana na vitendo hivi ambavyo havikubaliki kabisa,” amesema Mfulunje.

Raia hao wa Rwanda wamekuwa wakivuka mpaka na kuingia kwenye Hifadhi za Wanyama zilizopo mkoani Kagera kwa ajili ya uwindaji wanyama na kuchanja kuni kwa ajili ya matumizi ya nyumbani.

“Hayo mambo ya kuvuka kinyume cha sheria na kwenda Tanzania ni hatari kwasababu watu wanapata matatizo na kimsingi hakuna vyovyote vya maana wanavyotafuta huko huenda tu ni kuokota kuni, vitu vya kawaida tu,” amenukuliwa raia mmoja wa Rwanda wakati wa ziara hiyo ya Gavana Mfulunje.

                      Ndege wanaopatikana katika Pori la Akiba Burigi mkoani Kagera.

Taarifa za jimbo la Mashariki mwa Rwanda zinaeleza kuwa mwaka jana Wanyarandwa watano walipoteza maisha na wengine kujeruliwa baada ya kuingia kwenye mbuga ya Kagera kuwinda wanyama.

Kamanda wa Kanda Maalumu ya Jimbo la Mashariki na jiji la Kigali, Meja Jenerali Mbaraka Muganga amesema wataendelea kudumisha ujirani mwema na Tanzania licha ya kuwepo kwa kasoro ndogo za wananchi kukiuka sheria za mipakani.

Mazungumzo hayo ya viongozi wa Rwanda yanatarajiwa kuendelea kwa wananchi wote wanaoishi kwenye wilaya zilizo karibu na mipaka ya Burundi na Uganda.

Ikumbukwe kuwa mapema mwaka huu, Waziri wa Maliasili na Utalii, Dk. Hamis Kigwangala aliwataka Askari wa Hifadhi ya Wanyamapori kuwakamata na kuwachukulia hatua za kisheria raia wa Rwanda wanaovuka mpaka na kuingia kwenye kisiwa cha Izinga kilichopo kwenye pori la akiba la Kimisi mkoani Kagera.

Dk. Kigwangalla alidai kuwa watanzania wakienda upande wa Rwanda kuvua samaki katika Ziwa Ihema wanauawa mara moja bila mjadala, wakati upande wa Tanzania raia wa nchi hiyo wapo wengi na wengine wamepewa uraia wa kuasili na huwa hawafanyiwi vitendo vya unyanyasaji wala mauaji.

Kisiwa cha Izinga ambacho kipo katika wilaya ya Karagwe mkoani Kagera kina ukubwa wa kilomita za mraba 12 na kinapakana na Rwanda. Pori la Akiba la Kimisi lilianzishwa mwaka 2003 kwa Tangazo la Serikali namba 116 na lina ukubwa wa 1,030 km. Pori hilo lina wanyama mbalimbali wakiwemo Tembo, Twiga, Simba na Chui.

Continue Reading

Muhimu Kusoma