Connect with us

Kimataifa

Ubakaji unavyotumika kama silaha ya mapambano Somalia

Published

on

Imebaki changamoto moja katika bara la Afrika nayo ni vita vya wenyewe kwa wenyewe ambavyo vinatokea katika nchi mbalimbali na kukwamisha ukombozi wa bara hili  kuwa huru kiuchumi na kisiasa.

Sio dhamira yangu kujadili hali halisi ya Afrika bali nazungumzia athari mojawapo ya vita ambayo inajidhihirisha katika nchi ya Somalia ambayo inakabiliwa na mzozo mkubwa wa kisiasa hasa katika mji wa Mogadishu ambao unapiganiwa na serikali na makundi mengine likiwemo kundi la Al-Shabab.

Ubakaji ni moja ya vitendo vya kikatili ambavyo vimeshamiri sana katika nchi hiyo na kuwaathiri wanawake  ambao ndio wahanga wa ukatili huo, ambapo wengi wamelazimika kuikimbia nchi hiyo na kwenda uamishoni kujinusuru na usumbufu unaofanywa na kundi la kigaidi la Al-Shabab.

Ukatili wa kingono umekuwa sugu katika nchi ya Somalia. Miongo miwili ya vita vya wenyewe kwa wenyewe na kuangushwa kwa dola mara kwa mara kumesababisha idadi kubwa ya watu kutawanyika katika maeneo mbalimbali. 

Kutokana na hali hiyo taasisi na mashirika ya serikali yanayotakiwa kuwalinda wanawake na hatari hiyo nayo yameshindwa kufanya kazi na kukabiliwa na changamoto mbalimbali za utendaji. Wanawake waliopo katika kambi za wakimbizi na jamii za watu wanaoishi pembezoni mwa nchi pia wako katika hatari hiyo.

Tangu mwaka 2013, Umoja wa Mataifa umeripoti zaidi ya kesi 800 za ukatili wa kingono na kijinsia katika mji wa Mogadishu pekee. Idadi halisi ya waathirika ni kubwa kuliko takwimu zinazotolewa.

Waathirika wengi hawaripoti vitendo vya kikatili wanavyofanyiwa kwasababu ya kukosa ujasiri, kutofikiwa na  huduma za afya na sheria, pia unyanyapaa na kuogopa aibu kwa jamii inayowazunguka kwa vitendo vya ubakaji.


“Katika kambi yetu kila tulipomuona mtu tulizoea kusema ‘habari yako’ lakini sasa kila tukionana tunaulizana ‘umebakwa leo?’” – Maryam.


Kwa mujibu wa Shirika la watoto (UN Chidren’s Fund), robo tatu ya waathirika wa ukatili wa kingono katika nchi ya Somalia ni watoto. Matokeo yake, wanawake na wasichana wadogo kwa mujibu wa mtaalamu wa Umoja wa Mataifa katika masuala ya haki za binadamu anasema wanakabiliwa na uathirika wa aina mbili ‘double victimazation’ – ambao ni kubakwa na kushindwa kwa mamlaka za serikali kutoa huduma bora za afya, misaada  ya kisheria na huduma za jamii.

Serikali ya Shirikisho ya Somalia ambayo ilianzishwa Agosti 2012 inategemea misaada ya Kimataifa na kijeshi kutoka kwa Umoja wa Afrika katika programu yake ya kutunza amani ya AMISOMI. Kutokana na kuwa nguvu ndogo ya kijeshi inatawala eneo dogo la mji mkuu wa Moghadishu hivyo kushindwa kuthibiti vitendo vya ubakaji kwasababu ya kukosa mamlaka kamili katika nchi hiyo.

Shirika la Umoja wa Mataifa la Haki za binadamu (Human Right Watch) likishirikiana na wadau wa maendeleo lilifanya utafiti ulioitwa  katika nchi hiyo na kuandaa  mapendekezo mbalimbali ya kushughulikia suala hilo.

Utafiti huo ni muendelezo wa ushirikiano wa nchi hiyo na jumuia za Kimataifa kutokomeza ubakaji, ambapo mwaka 2013 serikali ya Somalia ilisaini itifaki ya pamoja na mjumbe maalumu wa Umoja wa Mataifa ili kutafuta njia mbadala za kumaliza tatizo hilo na kulifanya suala hilo kuwa moja ya kipaumbele muhimu katika mipango ya serikali.

Lakini serikali hiyo bado haijathibitisha kuchukua hatua za makusudi kuwazuia baadhi ya watu walioko katika vyombo vya usalama kutofanya vitendo hivyo na kuwaajibisha kisheria.

Shirika hilo lilimuhoji mwanamke mmoja aliyejulikana kwa jina moja la Maryam (37) ambaye alisema usiku mmoja kabla ya kuhojiwa na Shirika la Kimataifa la Haki za Binadamu, alimsikia mwanamke akishambuliwa na wanaume ambapo alikuwa na watoto sita katika mji mkuu Mogadishu. Tukio hilo lilimrudisha nyuma katika siku aliyofanyiwa ukatili wa kingono.

Maryam alisema ubakaji umekuwa ni tabia sugu katika kambi iliyoko wilaya ya Wadajir na hali ya wanawake ni mbaya kwa sababu na yeye alibakwa hapo hapo mwaka 2012.

Maryam anasema wakati anabakwa kwa mara ya kwanza alikuwa na ujauzito wa miezi mitano na alikuwa amelala katika kambi iliyopo wilaya ya Wadajir.

 “Wanaume wanne wote walinibaka wakati mmoja wao alikaa nje akilinda. Niligombana na mwanaume wa mwisho lakini alinipiga kwa kitako cha bunduki yake. Nilipiga kelele lakini hakuna mtu aliyekuja kunisaidia”.

Siku iliyofuata, Meneja wa kambi alikwenda kumuangalia kwasababu taarifa za kubakwa kwake zilienea katika kambi yote. Alichukuliwa mpaka kituo cha polisi ambako alidai kuwa mmoja wa wabakaji alivalia sare za polisi.

“Nilianza kutoka damu mfululizo ukeni”.

 “Waliniambia niende nyumbani na waliniamuru nioshe sakafu ambayo ilikuwa imetapakaa damu kabla sijaondoka na ndipo nilisafisha sakafu”.

Maryam hakurudi tena kituo cha polisi kufuatilia kesi yake, akihofia wabakaji wanaweza kuja tena na kumfanyia kitu kibaya zaidi. Baada ya muda mfupi mimba ya Maryam ilitoka na miezi mitatu baadaye alibakwa tena katika nyumba yake na kundi lingine la waharifu.

 Katika ripoti ya Shirika la Kimatifa la Haki za binadamu yenye kichwa  ““‘Here, Rape is Normal’: A Five-Point Plan to Curtail Sexual Violence in Somalia,”’  inaeleza kwa undani shuhuda za wanawake waliobakwa tangu serikali ya Shirikisho ya Somalia ianzishwe mwaka 2012.

Ripoti hiyo ilitazama tatizo hilo katika mji mkuu wa Mogadishu na wilaya ya Benadir, maeneo ambayo serikali inadhibiti na ambako mashirika ya kimataifa yanachunguza rasilimali muhimu za kuimarisha usalama na kuunda upya taasisi za  serikali ikiwemo vyombo vya sheria na huduma za afya.

Wakati rais Hassan Sheikh Mohamud akiingia madarakani aliahidi kutoa kipaombele katika usalama na haki, katika hali halisi ni sehemu ndogo ya juhudi hizo zimefanyika kutatua changamoto ya ubakaji na udhalilishaji wa kingono hasa kwa makundi na jamii zilizo katika hatari ya kukumbwa na vitendo hivyo.

Ripoti hiyo imeainisha mapendekezo matano ambayo yataisaidia serikali, wafadhili na mashirika mengine kuwa na mikakati endelevu ya kitaifa kupunguza udhalilishaji wa kingono, kuwapatia waathirika msaada wa haraka na kutengeneza mpango wa muda mrefu katika  kumaliza tatizo.

Njia ya kwanza ni kuimarisha usalama katika kambi za wakimbizi, kwa sababu wanawake wengi wanabakwa nyakati za usiku. Doria za usiku ambazo zitahusisha askari na wananchi zitasaidia kubaini waharifu na kuwalinda wasichana na wanawake wasivamiwe na kufanyiwa vitendo hivyo vya kidharimu.

Pia uboreshaji wa vituo vya dharura vinavyotoa huduma za afya, ambapo vifaa tiba na madawa yote yapatikane kwa wakati ili kuwasaidia wanawake ambao wanakumbwa na kadhia hiyo. Pia uanzishwaji wa madawati ya kijinsia ambayo yatasaidia kutoa elimu na ushauri na nasaha kwa wasichana. Hili linaenda sambamba na uboreshaji wa miundombinu ya barabara na huduma za jamii ili kuwasaidia wahanga hao kufika kwa wakati katika vituo hivyo.

Kuhakikisha kunakuwa na taasisi imara zenye kutoa msaada wa kisheria kwa wananchi. Msaada huo utasaidia wananchi kuelimika na kutambua athari za ubakaji, ambapo vyombo vya usalama vimetakiwa kudumisha umoja na ushirikiano na wananchi wanaoishi katika makambi ya wakimbizi.

Serikali imetakiwa kutunga sera na sheria mathubuti ambazo zitatekelezwa kikamilifu kupambana na vitendo vyovyote vya ubakaji. Zaidi ya hapo ni kufufua usawa wa kijinsia ambao kwa muda mrefu umekuwa changamoto, na wanawake nchini Somalia hawathaminiwi na kupewa haki zao za msingi ikilinganishwa na wanaume.

Somalia yenye neema iliyo na amani na utulivu inawezekana, ikiwa kila mwananchi na jumuiya za kimataifa kushirikiana kutokomeza vitendo vyote vya kibaguzi na kikatili ambavyo vinazuia nchi hiyo kupata maendeleo yaliyokusudiwa.

Continue Reading
Click to comment

Leave a Reply

Your email address will not be published. Required fields are marked *

Biashara/Uchumi

Mradi wa Stiegler’s Gorge kutua mikononi mwa Kamati ya Urithi wa Dunia

Published

on

Kamati ya Urithi wa Dunia ya Umoja wa Mataifa inatarajia kuamua kama Pori la akiba la Selous liondolewe miongoni mwa maeneo ya urithi wa dunia, kufuatia Serikali ya Tanzania kuanza mchakato wa kujenga bwawa la Stiegler’s Gorge kwa ajili ya kuzalisha umeme wa kilowati 2,100 ndani ya pori hilo.

Kamati hiyo inatarajia kukutana baadaye mwezi Juni katika jiji la Manama, Bahrain na miongoni mwa ajenda zitakazojadiliwa ni uamuzi wa Serikali kujenga mradi mkubwa wa kuzalisha umeme katika pori hilo ambalo ni urithi muhimu wa dunia ambao uko hatarini kutoweka.

Kamati hiyo inakutana kila mwaka na kikao cha mwaka huu kitakuwa cha 42 tangu kuanzishwa kwake na ina kazi moja kubwa ya kujadili maendeleo ya utunzaji wa maeneo ya urithi na kufanya maamuzi ya kufuta au kuendelea kuyaweka maeneo yaliyopewa hadhi ya kuwa kwenye orodha ya Urithi wa dunia ulio katika hatari ya kutoweka.

Akizungumza hivi karibuni na jarida moja la kila wiki la Afrika Mashariki, Meneja wa Programu wa Kituo cha Urithi wa Dunia cha Shirika la Umoja wa Mataifa la Elimu, Sayansi na Utamaduni (UNESCO), Richard Lo Giudice amesema; mradi wa uzalishaji umeme katika pori la Selous utajadiliwa kwenye mkutano wa mwaka wa Kamati ya Urithi wa Dunia na kisha UNESCO itatoa mrejesho.

Suala hilo litajadiliwa katika kikao cha 42 cha Kamati ya Urithi wa Dunia itakayoketi Manama kuanzia Juni 24 hadi Julai 4, wakati inatathmini hali ya uhifadhi wa pori la akiba la Selous,” alinukuliwa Giudice na jarida hilo.

Serikali imetenga Bilioni 700 ambayo ni sawa na asilimia 41 ya bajeti ya Wizara ya Nishati ya mwaka wa fedha wa 2018/2019 inayofikia Trilioni 1.69 kwaajili ya mradi huo, ambapo imesema ni muhimu kwa ajili ya uzalishaji wa umeme ili kuchochea ajenda ya uchumi wa viwanda.

Licha ya tahadhari iliyotolewa na wadau mbalimbali wa mazingira na wanasiasa akiwemo Mbunge wa Kigoma mjini, Zitto Kabwe na Nape Nnauye wa Mtama kuhusu athari zitakazotokea endapo mradi huo utatekelezwa, bado Serikali imeendelea kushikiria msimamo wake wa kujenga mradi huo kwa madai kuwa wanaokosoa hawaitakii nchi mema.

Serikali ilienda mbali zaidi na kutahadharisha mtu yeyote atakayejaribu kuzuia mradi huo atakabiliwa na hatua kali za kisheria ikiwemo kufungwa jela.

Piga ua, garagaza Serikali itatekeleza mradi wa Stiegler’s Gorge. Hawa wanaopinga mradi huu ukiwatazama wanataka umeme ufike vijijini mwao, ukiwatazama wengine ni wachumi wanapinga’” alinukuliwa Naibu Waziri wa Ofisi ya Makamu wa Rais, Muungano na Mazingira, Kangi Lugola wakati akijibu hoja za wabunge Mei 26 mwaka huu.

Kamati ya Urithi wa Dunia inajumuisha wawakilishi 21 ambao wanachaguliwa na Baraza la Umoja wa Mataifa kwa ajili ya kuratibu shughuli za ulinzi wa Urithi na Utamaduni wa dunia.

“Hilo litakuwa pigo kwa asili,” limesema shirika la uhifadhi wa asili la World Wildlife Fund (WWF). Bwawa hilo litakuwa na urefu wa mita 130 na upana wa mita 700. Litatengeneza ziwa kubwa la zaidi ya kilomita 1000 za mraba, na maji yatasambaa katika eneo ambalo ni kubwa hata kushinda jiji la Berlin, Ujerumani.

 

Mambo Bayana

Kamati ya Urithi wa Dunia itakutana wakati Serikali kupitia Wakala wa Misitu Tanzania imetoa zabuni ya kukata miti isiyopungua milioni mbili katika eneo la Selous ambalo baadhi ya wabunge wamesema lina ukubwa unaolingana na jiji la Dar es Salaam.

Zabuni hiyo pia itahusisha ukataji na uuzaji wa miti hiyo ili kuiingizia Serikali mapato yatakayotumika katika huduma za kijamii.

Lakini wanaopinga mradi huo, wanaeleza kuwa miti itakayokatwa ni mingi sana na ujenzi wa bwawa hilo utasababisha athari za mazingira zinazoweza kuangamiza wanyama wengi zaidi na kuchangia ongezeko la joto duniani.

Kwa mujibu wa Ripoti ya Tathmini ya Mazingira juu ya Mradi pendekezwa wa Stiegler’s Gorge iliyotolewa mwaka 2009 na Prof. Raphael Mwalyosi wa Chuo Kikuu cha Dar es Salaam imebainisha wazi kuwa kutakuwa na athari kubwa katika eneo la Selous endapo mradi huo utatekelezwa.

Hata hivyo ripoti hiyo inaeleza kuwa mradi huo utazalisha umeme wa kutosha lakini ina mashaka juu ya matokeo ya kijamii na kiuchumi yanayoweza kupatikana.

Wachambuzi wa masuala ya mazingira, wanaeleza kuwa Tanzania ina kibarua kigumu cha kujieleza mbele ya kamati hiyo ikizingatiwa kuwa ni miongoni mwa wanachama wa kamati hiyo muhimu duniani. Nchi zingine za Afrika ambazo zinaingia katika kamati hiyo ni Burkina Faso, Tunisia, Uganda na Zimbabwe.

Kamati hiyo itakuwa na kazi ya kutathmini hali ya utunzaji wa maeneo mbalimbali yaliyoko kwenye urithi wa dunia na kuzitaka nchi wawakilishi kuchukua hatua za kutunza na kuhifadhi urithi huo ili kuhakikisha dunia inakuwa mahali salama pa kuishi.

       Baadhi ya wanyama kuathirika na mradi wa umeme

Historia ya Pori la Selous

Pori la Akiba la Selous ambalo lina eneo la kilomita 50,000 za mraba, ni moja ya mbuga kubwa zaidi barani Afrika, ambayo inajulikana kwa kupatikana kwa tembo, vifaru weusi, duma, twiga, viboko, mamba, na wanyama pori wengine.

Pia pori hilo lina aina nyingi tofauti ya viumbe wa pori, vikiwemo miombo, msitu, sehemu za nyasi, kinamasi, ikisemekana kuwa mbuga hiyo ni maabara ya mabadiliko ya kibaolojia na kiekolojia.

Uwindaji kwa ajili ya biashara unaruhusiwa katika mbuga ya Selous. Ni chanzo cha pato kwa mbuga hiyo na zaidi ya watu milioni 1.2 ambao wanaishi viungani mwa mbuga hiyo. Katika baadhi ya maeneo, uwindaji haukubaliwi kabisa. Watalii wanaweza kuzuru. Lakini kuna watalii wachache ikilinganishwa na mbuga ya kitaifa ya Serengeti, ingawa mbuga ya Selous imeizidi Serengeti mara tatu kwa ukubwa.

Mto Rufiji ni mwokozi wa mbuga hiyo. Ni mto wenye urefu wa kilomita 600 na unaishia katika Bahari ya Hindi kusini mwa Dar es Salaam, lakini maji ya mto kwa sehemu kubwa yatatumika kuzalisha umeme.

Kutokana na umuhimu wake, mwaka 1982, UNESCO lilitangaza na kuiingiza Selous miongoni wa maeneo machache ya urithi wa dunia na kuanza kuhifadhiwa.

Lakini mwaka 2014, Kamati ya Urithi wa Dunia ya UNESCO, iliyokutana mjini Doha, Qatar, iliingiza mbuga ya Hifadhi ya Wanyama ya Selous, iliyopo kusini mashariki mwa Tanzania katika orodha ya Urithi wa Dunia ulio Hatarini kutoweka, kwa sababu ya ujangili wa kupindukia.

Ujangili ulisababisha kupungua kwa idadi ya wanyamapori, hasa kwa upande wa tembo na vifaru, ambao idadi yao imepungua kwa asilimia 90 tangu 1982, wakati mbuga hiyo ilipoorodheshwa kwenye urithi wa dunia.

Continue Reading

Kimataifa

Uuzaji, umiliki wa silaha Rwanda usiwe sababu ya kuvuruga amani Afrika

Published

on

Hivi karibuni Rwanda imebadili Sheria yake ya mwaka 2009 iliyokuwa inakataza umiliki na uuzwaji wa silaha za moto. Sheria mpya ya silaha za moto nchini humo inaruhusu wananchi kumiliki silaha na pia watu binafsi kufungua maduka ya uuzwaji wa silaha za moto.

Sheria inaenda mbali zaidi na kuruhusu uwekezaji wa viwanda vya silaha za moto nchini Rwanda.

Serikali ya Rwanda imetetea uamuzi huo kwa kusema ni wakati sahihi kwa raia wake kumiliki silaha na kudai kuwa itasimaia vizuri sekta hiyo ili isilete madhara.

Hatua hii ya kubadili Sheria na kuruhusu watu binafsi kuwa na maduka ya kuuza silaha za moto na pia kuruhusu uwekezaji katika viwanda vya silaha za moto imeamsha hisia tofauti za wananchi na wachambuzi mbalimbali masuala ya usalama Afrika.

Nchi zetu za Afrika bado zinakabiliwa na changamoto lukuki ikiwamo usalama, vita vya wenyewe kwa wenyewe, ujambazi uliokithiri, ugaidi, fujo katika chaguzi na mambo mengine mengi.

Haya na mengine mengi yanaleta hofu endapo ubinafsishaji holela unafanyika katika silaha za moto. Hapa najaribu kufikiria matokeo ya mbele zaidi, kwani madhara yake yanaweza yasiwe sasa ila katika muda mrefu ujao tunaweza kuyaona kwa wingi.

Nieleze wasiwasi wangu katika uamuzi huo wa kubinafsisha sekta ya silaha za moto. Kwanza kabisa sio wananchi kumiliki silaha, hili halina tatizo sana kwani hata Tanzania tunafanya hivi lakini kupitia kwa taasisi za Serikali.

Wasiwasi mkubwa nilionao ni kubinafsisha silaha za moto kuuzwa katika masoko huria na wawekezaji kuwekeza katika sekta hiyo.

Najaribu kutafakari, Je, hitaji la wananchi lilikuwa silaha za moto kana kwamba kulikuwa na upungufu kiasi cha kuruhusu watu kuwekeza katika sekta hiyo?

Je, ajenda hii haina msukumo wowote kutoka kwa mabepari ambao biashara yao kubwa ni uuzaji wa silaha za moto na wanatafuta masoko mapya Afrika?

Duka la silaha za aina mbalimbali

Twakimu za Taasisi ya Utafiti ya Stockholm International Peace (SIPRI) za mwaka 2015 zinaonesha kuwa makampuni makubwa kumi bora ya utengenezaji wa silaha za moto duniani, nane yanatoka Marekani, moja Italia na lingine Umoja wa Ulaya.

Takwimu hizi pia zinaonesha nchi zinazouza silaha za moto kwa wingi duniani ni pamoja na Marekani, Urusi, China, Ufaransa, Ujerumani, Uingereza, Uhispania, Italia, Ukraine na Israeli.

Taarifa ya SIPRI ya mwaka 2012 zinaeleza kuwa nchi kumi bora zinazoagiza silaha kwa wingi duniani ni India, Saudi Arabia, Umoja wa Kiarabu, China, Australia, Aljeria, Uturuki, Iraq, Pakistani, Vietnam. Katika orodha hii, utaona nchi za Afika ni chache sana kwani nyingi huagiza silaha kwa kiwango kidogo na nyingine hufanya biashara kwa magendo.

Kwa takwimu hizo hapo juu, ni dhahiri sasa mabepari hawa wanatafuta mahala pa kuwekeza viwanda vyao vya silaha za moto na Afrika ni chaguo lao kwa wakati huu.

Hata hivyo, Hii inaweza kuwa fursa nzuri kwa Rwanda kwani watapata wawekezaji wengi katika sekta hii ila waathirika wa silaha hizi za moto ni majirani ambao inatupasa tukae chonjo sasa.

Marekani kama mfano duniani imekuwa muhanga mkubwa wa Sera na Sheria zake za ubinafsishaji wa silaha za moto ambapo upatikanaji wa silaha umekuwa rahisi kiasi kwamba maduka binafsi yanauza silaha hizo.

Tangu mwaka 2011, kumezuka matukio mengi ya watu kupigwa risasi katika shule na maeneo yenye mikusanyiko ya watu. Matukio haya nchini Marekani yanazidi kila mwaka na sasa wananchi wameanza kuipigia kelele sheria ya silaha za moto ibadilishwe.

Ugumu wa kubadili Sheria hizi nchini Marekani unatokana na ukweli kwamba ni biashara inayoingiza kipato kikubwa kwa makampuni ya nchi hiyo. Takwimu za SIPRI za mwaka 2012 zinakadiria kuwa mapato ya jumla ya makampuni 100 makubwa ya uuzaji wa silaha za moto yanafika Dola za Marekani 395 bilioni.

Kwa hakika hii ni biashara kubwa inayoweza kuipatia nchi mapato. Na sasa tunaweza kushuhudia Rwanda ikiwa moja ya nchi inayoweza kufaidika na mpango huu wa ubinafsishaji sekta ya silaha za moto.

Lakini fursa hiyo ya Rwanda kutengeneza silaha inapaswa kuangaliwa kwa jicho la tatu ili isiwe chanzo cha kuchochea machafuko katika nchi za Afrika, ikizingatiwa kuwa bado bara hilo halijatulia; ziko nchi kama Sudan ya Kusini, Somalia, Congo DRC, Jamhuri ya Kati, Burundi ambazo zinakumbwa na mizozo ya kisiasa.

Nchi hizo zinaweza kutumia silaha zinazouzwa Rwanda kuendeleza mapigano katika nchi zao. Katika hili serikali ya Rwanda inapaswa kuweka mfumo madhubuti wa kusimamia utengenezaji na uuzaji wa silaha hizo ili zisivurue amani ya Afrika.

Continue Reading

Jamii

Raia wa Rwanda watahadharishwa kuingia pori la akiba Kimisi Kagera

Published

on

Rwanda imewaonya raia wake wanaoingia kinyume cha sheria katika Mbuga za Wanyama mkoani Kagera kwa madai kuwa wanahatarisha ujirani mwema baina ya nchi hiyo na Tanzania.

Hatua hiyo imekuja siku chache, baada ya wanaume wanne kuvuka mpaka na kuingia upande wa Tanzania kwa shughuli za kuchanja kuni. Watanzania walimkamata mmoja wao ambaye alitambulika kwa jina la Shumbushu na kumpiga vibaya na kumjeruhi. Wengine walifanikiwa kutoroka na kurudi Rwanda.

Gavana wa jimbo la Mashariki mwa Rwanda, Fredy Mfulunje akizungumza na wananchi wanaoishi mpakani mwa Tanzania amesema vitendo vya kuingia kwenye ardhi ya nchi nyingine bila kufuata taratibu za kisheria hazikubaliki kwasababu vinaweza kuhatarisha amani ya nchi hizo mbili.

“Kuna makosa yanayofanywa na wananchi wetu wanaovuka na kuingia kwenye ardhi ya nchi nyingine kinyume cha sheria, ndiyo maana tumekuja hapa kuwaeleza kuwa vitendo hivi havikubaliki hata kidogo. Sisi tunawaasa wananchi kuachana na vitendo hivi ambavyo havikubaliki kabisa,” amesema Mfulunje.

Raia hao wa Rwanda wamekuwa wakivuka mpaka na kuingia kwenye Hifadhi za Wanyama zilizopo mkoani Kagera kwa ajili ya uwindaji wanyama na kuchanja kuni kwa ajili ya matumizi ya nyumbani.

“Hayo mambo ya kuvuka kinyume cha sheria na kwenda Tanzania ni hatari kwasababu watu wanapata matatizo na kimsingi hakuna vyovyote vya maana wanavyotafuta huko huenda tu ni kuokota kuni, vitu vya kawaida tu,” amenukuliwa raia mmoja wa Rwanda wakati wa ziara hiyo ya Gavana Mfulunje.

                      Ndege wanaopatikana katika Pori la Akiba Burigi mkoani Kagera.

Taarifa za jimbo la Mashariki mwa Rwanda zinaeleza kuwa mwaka jana Wanyarandwa watano walipoteza maisha na wengine kujeruliwa baada ya kuingia kwenye mbuga ya Kagera kuwinda wanyama.

Kamanda wa Kanda Maalumu ya Jimbo la Mashariki na jiji la Kigali, Meja Jenerali Mbaraka Muganga amesema wataendelea kudumisha ujirani mwema na Tanzania licha ya kuwepo kwa kasoro ndogo za wananchi kukiuka sheria za mipakani.

Mazungumzo hayo ya viongozi wa Rwanda yanatarajiwa kuendelea kwa wananchi wote wanaoishi kwenye wilaya zilizo karibu na mipaka ya Burundi na Uganda.

Ikumbukwe kuwa mapema mwaka huu, Waziri wa Maliasili na Utalii, Dk. Hamis Kigwangala aliwataka Askari wa Hifadhi ya Wanyamapori kuwakamata na kuwachukulia hatua za kisheria raia wa Rwanda wanaovuka mpaka na kuingia kwenye kisiwa cha Izinga kilichopo kwenye pori la akiba la Kimisi mkoani Kagera.

Dk. Kigwangalla alidai kuwa watanzania wakienda upande wa Rwanda kuvua samaki katika Ziwa Ihema wanauawa mara moja bila mjadala, wakati upande wa Tanzania raia wa nchi hiyo wapo wengi na wengine wamepewa uraia wa kuasili na huwa hawafanyiwi vitendo vya unyanyasaji wala mauaji.

Kisiwa cha Izinga ambacho kipo katika wilaya ya Karagwe mkoani Kagera kina ukubwa wa kilomita za mraba 12 na kinapakana na Rwanda. Pori la Akiba la Kimisi lilianzishwa mwaka 2003 kwa Tangazo la Serikali namba 116 na lina ukubwa wa 1,030 km. Pori hilo lina wanyama mbalimbali wakiwemo Tembo, Twiga, Simba na Chui.

Continue Reading

Muhimu Kusoma

Copyright © 2018 FikraPevu.com