Connect with us

Michezo/Burudani

Taifa Stars ‘yanyolewa kwa wembe butu’, safari ya Kenya 2018 yachina

Published

on

TIMU ya soka ya Taifa ya Tanzania, Taifa Stars, imeendelea kudhihirisha kauli ya Rais mstaafu wa awamu ya pili, Alhaj Ally Hassan Mwinyi, kwamba ni ‘kichwa cha mwendawazimu’ baada ya ‘kunyolewa kwa wembe butu’ na Rwanda Jumamosi, Julai 22, 2017.

Baadhi ya mashabiki wanajifariji kuwa, Stars haijafungwa na Rwanda katika mechi mbili, lakini ukweli kwamba imetolewa katika kinyang’anyiro cha kusaka tiketi ya kucheza kwa mara ya pili fainali za Afrika kwa wachezaji wa ligi za ndani (Kombe la CHAN) unadhihirisha kuwa Tanzania ina safari ndefu ya kufanya vizuri kwenye mashindano ya kimataifa.

Timu hiyo ililazimisha kwenda suluhu na wenyeji Amavubi kwenye Uwanja wa Stade Regionale Nyamirambo jijini Kigali na kuwapa fursa Rwanda kusonga mbele katika raundi ya tatu kwa faida ya bao la ugenini kufuatia sare ya bao 1-1 katika mchezo wa kwanza uliofanyika kwenye Uwanja wa CCM Kirumba jijini Mwanza Julai 15, 2017.

Matumaini ya Watanzania mamia kwa maelfu kwenda kuishangilia timu hiyo na kushuhudia fainali za Kombe la CHAN 2018 katika nchi jirani ya Kenya yameota mbawa kwa mara nyingine na inahitajika miujiza kama enzi za kocha Mbrazili Marcio Maximo ambaye aliipeleka kwenye fainali hizo kwa mara ya kwanza mwaka 2009.

Fainali za Kombe la CHAN zitachezwa nchini Kenya kuanzia Januari 11 hadi Februari 2, 2018 katika viwanja vya Nyayo na Moi Kasarani jijini Nairobi, Uwanja wa Manispaa mjini Mombasa na Uwanja wa Kinoru mjini Kisumu.

Timu hiyo sasa inabidi isubiri fainali za mwaka 2020 na kwa sasa inapaswa kujipanga kwa ajili ya kuwania tiketi ya kushiriki Kombe la Mataifa ya Afrika mwaka 2019.

Wakati Stars ikifungashiwa virago, Uganda na Rwanda zimefuzu kwa raundi ya tatu ambapo zitamenyana katika mechi ya kwanza Agosti 11, 2017.

Uganda imefuzu hatua hiyo baada ya kupata ushindi mnono wa mabao 5-1 dhidi ya Sudan Kusini katika mechi ya marudiano kwenye Uwanja wa Nakivubo jijini Kampala. Mechi ya kwanza baina yao ilikwisha kwa suluhu.

Burundi, ambayo awali ilikuwa imefurahia kusonga mbele kabla ya Shirikisho la Soka la Kimataifa (FIFA) halijaondoa adhabu ya kifungo kwa Sudan, ndoto zake zinaweza kutindikiwa hasa baada ya leo Jumapili Julai 23, 2017 kulazimishwa suluhu na Sudan katika mchezo uliofanyika Uwanja wa Prince Louis Rwagasore.

Timu hizo zitarudiana Julai 28, 2017 kwenye Uwanja wa Khartoum na mshindi baina yao atamenyana na Ethiopia katika raundi ya tatu.

Ethiopia imesonga mbele kwa jumla ya mabao 8-1 dhidi ya Djibouti. Haikupata shida kwenye raundi hiyo baada ya Djibouti kujitoa hivyo Ethiopia, ambayo ilikuwa imeshinda mechi ya kwanza 5-1, ikapewa ushindi wa chee wa mabao 3-0.

Kuyaaga mashindano hayo, Tanzania ‘imeungwa mkono’ na Lesotho, Msumbiji na Zimbabwe ambazo zimeshindwa kufurukuta mbele ya Comoro, Madagascar na Namibia.

Ndoto za Zimbabwe zimetoweka leo Jumapili, Julai 23, 2017 baada ya kutolewa kwa mikwaju ya penalty 5-4 na Namibia kufuatia matokeo ya jumla kuwa bao 1-1.

Comoro nayo, ingawa imefungwa bao 1-0 na Lesotho, imefanikiwa kusonga mbele kwa jumla ya mabao 2-1 kufuatia ushindi wa mabao 2-0 ilioupata nyumbani Julai 15, 2017.

Timu hiyo ya visiwani itapambana na Namibia katika raundi ya tatu.

Msumbiji imeshindwa kutamba nyumbani baada ya kukubali kkipigo cha mabao 2-0 kutoka kwa Madagascar, ambayo imesonga mbele kwa jumla ya mabao 4-2 kwani katika mechi ya kwanza mjini Antananarivo timu hizo zilitoka sare ya 2-2.

Madagascar sasa itacheza na Angola ambayo imeshinda 3-2 dhidi ya Mauritius na kusonga mbele kwa jumla ya mabao 4-3 kufuatia sare ya 1-1 katika mechi ya kwanza.

Afrika Kusini imesonga mbele kwa jumla ya mabao 3-0 dhidi ya Botswana kufuatia ushindi wake wa bao 1-0 Jumamosi na sasa itakumbana na Zambia katika raundi ya tatu.

Zambia imesonga mbele kwa jumla ya mabao 7-0 dhidi ya Swaziland baada ya Jumamosi kushinda 3-0. Katika mechi ya kwanza Zambia ilishinda ugenini mabao 4-0.

Mauritania, licha ya kufungwa bao 1-0 nyumbani leo Jumapili, lakini imeifungashia virago Liberia kwa jumla ya mabao 2-1 kufuatia ushindi wake wa ugenini wa mabao 2-0.

Timu hiyo sasa itacheza na Mali, ambayo jana iliitandika Gambia mabao 4-0 na kusonga mbele kwa jumla ya idadi hiyo, kwani mechi yao ya kwanza ilikuwa tasa.

Senegal, ambayo imepata ushindi wa jumla ya mabao 4-2 dhidi ya Sierra Leone, itakutana na Guinea katika  raundi ya tatu.

Awali iliilazimisha Sierra Leone sare ya bao 1-1 na jana ikashinda mabao 3-1 nyumbani.

Guinea nayo imeifunga Guinea-Bissau mabao 7-0 jana na kusonga mbele ka jjumla ya mabao 10-1 kufuatia ushindi wake wa ugenini wa mabao 3-1 Jjulai 15, 2017.

Togo imefuzu kwa mikwaju ya penalty dhidi ya Benin baada ya matokeo ya jumla kuwa sare ya mabao 2-2. Kwanza zilifungana 1-1 na leo zimefungana 1-1.

Kwa matokeo hayo, Togo sasa itakutana na Nigeria katika raundi ya tatu.

Misri itacheza na Morocco katika raundi ya pili, wakati Sao Tome and Principe itacheza na Cameroon.

Ratiba kamili ni hii ifuatayo:

2017-08-11 Senegal vs Guinea

2017-08-11 Egypt vs Morocco

2017-08-11 Sao Tome and Principe vs Cameroon

2017-08-11 Congo vs DR Congo

2017-08-11 Equatorial Guinea vs Gabon

2017-08-11 Algeria vs Libya

2017-08-11 Rwanda vs Uganda

2017-08-11 Togo vs Nigeria

2017-08-11 Comoro vs Namibia

2017-08-11 Afrika Kusini vs Zambia

2017-08-11 Madagascar vs Angola

2017-08-11 Liberia vs Mali

2017-08-11 Niger vs Ivory Coast

2017-08-11 Burkina Faso vs Ghana

2017-08-11 Ethiopia vs Burundi

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Must Read

Copyright © 2018 FikraPevu.com