Connect with us

Michezo/Burudani

Taifa Stars na Rwanda, Mwanza patakuwa hapatoshi wikiendi hii

Published

on

IKIWA imetoka kulamba Dola za Marekani 10,000 kwa kushinda nafasi ya tatu katika Mashindano ya Kombe la Castle la Baraza la Soka kwa Nchi za Kusini mwa Afrika (Cosafa), Taifa Stars sasa inaelekeza nguvu zake kukabiliana na timu ya taifa ya Rwanda, Amavubi, katika mashindano ya kuwania tiketi ya fainali za Kombe la Afrika kwa wachezaji wa ligi za ndani (CHAN).

Stars itahitaji ushindi katika mechi hiyo itakayofanyika kwenye Uwanja wa CCM Kirumba jijini Mwanza wikiendi hii ili kujiwekea mazingira mazuri ya kushiriki kwa mara ya pili fainali hizo baada ya kufanya hivyo mwaka 2009.

Kikosi cha Stars kilichokuwa Afrika Kusini kilicho chini ya kocha mzalendo, Salum Shabani Mayanga, hakijabadilika sana kwani bado kinao makipa Aishi Salum Manula (Azam FC), Benno David Kakolanya  (Yanga) na Said Mohammed Said (Mtibwa Sugar).

Walinzi wa pembeni upande wa kulia walikuwa Shomari Salum Kapombe (Azam FC) na Hassan Hamis Ramadhan ‘Kessy’ (Yanga) wakati upande wa kushoto walikuwa Gadiel Michael (Azam FC) na Amim Abdulkarim (Toto Africans).

Walinzi wa kati ni Erasto Nyoni  (Azam FC), Salim Hassan Abdallah (Mtibwa Sugar), Abdi Banda (Simba) na Nurdin Chona (Tanzania Prisons) wakati viungo wa kuzuia ni nahodha Himid Mao Mkami (Azam FC) na Salmin Hoza wa Mbao FC.

Aidha, viungo wa kushambulia ni Mzamiru Yassin Selembe (Simba), Simon Happygod Msuva (Yanga), Raphael Daudi (Mbeya City) na Shizza Ramadhani Kichuya (Simba) huku washambuliaji wakiwa Mbaraka Abeid Yusufu (Kagera Sugar), Stamili Mbonde, Elius Maguli (Dhofar SC) na Shabani Idd Chilunda (Azam FC).

Hii ni mara ya kwanza kwa Tanzania kukutana na Rwanda katika mashindano ya Afrika ukiachilia mbali mashindano ya Kombe la Chalenji, ingawa ni mara yao ya nane kukutana.

Kumbukumbu zinaonyesha kwamba, Rwanda imekutana na Tanzania mara sita katika Kombe la Chalenji na Tanzania imeshinda mara moja tu na kufungwa mechi nne, huku wakitoka sare mara moja.

Julai 28, 1999 ndiyo ilikuwa mara ya kwanza kwa Rwanda na Tanzania (ikicheza kama Kilimanjaro Stars kwa kuhusisha wachezaji wa Tanzania Bara pekee) kumenyana katika mashindano hayo tangu Rwanda ilipojiunga na Baraza la Vyama vya Soka Afrika Mashariki na Kati (CECAFA).

Katika mechi hiyo iliyofanyika kwenye Uwanja wa Amahoro, jijini Kigali, Tanzania ilicheza na timu ya kwanza ya Rwanda (Amavubi) katika Kundi A ambapo zilitoka suluhu, hivyo wenyeji wakaongoza kundi hilo na Taifa Stars ikashika nafasi ya pili, ambapo haikufanya vizuri baada ya kuishia kwenye robo fainali.

Desemba 17, 2001 Tanzania ilipangwa Kundi la 2 na kufuzu robo fainali ambako ilikumbana na Rwanda B lakini ikakubali kipigo cha mabao 2-1. Rwanda ilifunga bao katika dakika ya kwanza tu kupitia kwa Witakenge Jeannot kabla ya Yussuf Macho ‘Musso’ kusawazisha katika dakika ya 5, lakini Kombi akaipatia Rwanda bao la ushindi dakika ya 56.

Desemba 11, 2002 jijini Mwanza, Kilimanjaro Stars ilikumbana na Rwanda katika nusu fainali ya mashindano hayo na safari hii ikafanikiwa kuichapa Amavubi mabao 3-0 kupitia kwa Abdul Mtiro dakika ya 44, Salvatory Edward dakika ya 69 na Athumani Machupa dakika ya 83.

Vikosi vya siku hiyo kwenye Uwanja wa CCM Kirumba vilikuwa; Tanzania: Juma Kaseja, Mecky Mexime, Alphonce Modest, Costa Victor, Boniface Pawasa, Selemani Matola, Ulimboka Mwakigwe, Salvatory Edward, Athumani Machupa, Emmanuel Gabriel (Zuberi Katwila 74), Abdul Mtiro (Joseph Mwanakusha 69).

Rwanda: Ishimana Claude, Makara Pappy, Habimana Kheri, Lita Mana (Mukerezi Marie 68), Eric Nshimiyamana (Muhayimana Theoneste 46), Jean-Paul Habyarimana, Kamanzi Elias, Sibomana Abdul, Witakenge Jeannot, Jimmy Gatete (Nkuzingowia Rama 75), Milly Hassan.

Mwaka 2004 Tanzania na Rwanda zilipangwa Kundi A wakati mashindano hayo yalipofanyika jijini Addis Ababa, Ethiopia, kundi ambalo lilikuwa na wenyeji pamoja na Burundi na Zanzibar.

Lakini safari hii Tanzania ilitia aibu baada ya kufungwa mechi zote nne huku ikikubali kipigo cha aibu cha mabao 5-1 kutoka kwa Rwanda Desemba 19.

Licha ya kuundwa na wachezaji mahiri kama Boniface Pawasa, Juma Kaseja, Mecky Mexime, Shaaban Kisiga, Athuman Machupa, Christopher Alex, Said Sued, Ahmed Haidery, Nurdin Bakari, Jumanne Ramadhani, Athuman Idd, Ally Miluno, Juma Jabu, Julius Mrope, Nizar Khalfan, Omari Matuta, Patrick Mangunguru, Hassan Bwaza, Ulimboka Mwakingwe, Victor Costa ikiwa chini ya kocha John Simkoko, timu hiyo haikuweza kufurukuta hata kidogo kwenye mashindano ya mwaka huo.

Katika mashindano ya mwaka 2005, Tanzania ilipangwa kundi A pamoja na Rwanda mjini Kigali ambapo pia kulikuwa na timu za Zanzibar, Burundi na Eritrea.

Kilimanjaro Stars ilijikuta ikipata kipigo cha mabao 3-1 kutoka kwa Rwanda Desemba 6, ambapo mabao ya Amavubi yalifungwa na Jean Lomani aliyepachika mawili na Jimmy Gatete, wakati lile la Stars lilifungwa na Sammy Kessy.

Mara ya mwisho kwa timu hizo kukumbana kwenye mashindano hayo ilikuwa wakati wa robo fainali Desemba 5, 2006 jijini Addis Ababa, Ethiopia ambapo Rwanda ilishinda 2-1 huku Stars ikifaidika na bao la kujifunga la beki Elias Uzamukunda katika dakika ya 26. Mabao ya Rwanda yalifungwa na Robert Ujenza dakika ya 41 na Jeannot Witakenge kwa penalty dakika ya 55.

Kilimanjaro Stars wakati huo iliundwa na wachezaji wafuatao: Makipa – Juma Kaseja (Simba), Sudi Slim (aka Sued Suleiman?) (Mtibwa); walinzi – Saidi Morad (Ashanti), Idrissa Rajabu (Moro United), Yasini Juma (Pangolini), Dickson Daudi (Mtibwa), Juma Rajabu (Kagera), Erasto Nyoni (Burundi).

Viungo walikuwa – Adam Matunga (AFC), Hussein Sued (Ashanti), Meck Michael (Under-17), Amir Maftah (Mtibwa), Bantu Admin (Polisi Dodoma), Mrisho Ngassa (Kagera Sugar), Kigi Mkasi (Rolling Stone); washambiliaji – Danny Mrwanda (Simba), Jerrison Tegete (Makongo), Gasper Simon (Ruvu Shooting) na kocha alikuwa John Simkoko aliyekuwa akiinoa Polisi Morogoro.

 

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Muhimu Kusoma

Copyright © 2018 FikraPevu.com