Connect with us

Michezo/Burudani

Taifa Stars imefanya vizuri Cosafa, lakini si wakati wa kubweteka

Published

on

TIMU ya Taifa, Taifa Stars, jana usiku Ijumaa, Julai 7, 2017 ilifanikiwa kushika nafasi ya tatu katika mashindano ya Kombe la Castle yanayoandaliwa na Baraza la Soka kwa Nchi za Kusini mwa Afrika (Cosafa) baada ya kuifunga Lesotho kwa mikwaju ya penalti 4-2.

Stars, ambayo inatarajiwa kurejea usiku wa kuamkia kesho Jumapili Julai 9, inatakiwa kuangalia matokeo mazuri katika mezi zijazo na siyo kubweteka na ushindi huo.

Nahodha wa Taifa Stars, Himid Mkami, akimiliki mpira huku akizongwa na mchezaji wa Lesotho, Napo Matsoso wakati wa mechi ya kutafuta mshindi wa tatu wa Kombe la Cosafa Castle kwenye Uwanja wa Moruleng mjini Rustenburg jana Ijumaa, Julai 7, 2015. Stars ilishinda kwa penalti 4-2.

Timu hiyo ambayo itarejea kwa ndege ya Shirika la Ndege la Rwanda itaondoka tena kwenda Mwanza Jumatatu saa 12.00 jioni kwa ndege ya Shirika la Ndege la Fast Jet ili kuweka kambi kujiandaa na mchezo wa kufuzu kwa fainali za Kombe la Mataifa ya Afrika kwa wachezaji wanaocheza ligi za ndani (CHAN) dhidi ya Rwanda unaotarajiwa kufanyika Jumamosi Julai 15, 2017.

Ni kweli kwamba, katika michezo tisa ya kimataifa iliyocheza mwaka huu, Stars imefanya vizuri kwa kushinda mitano, kutoka sare mitatu na kufungwa mmoja wa nusu fainali za Cosafa dhidi ya Zambia.

Mshindi wa tatu

Katika mchezo huo wa kutafuta mshindi wa tatu uliofanyika kwenye Uwanja wa Moruleng mjini Rusternburg, Afrika Kusini, timu hizo zilitoka suluhu katika muda wa dakika 90, hivyo kuingia hatua ya kupigiana mikwaju ya penalti.

Himid Mao, Abdi Banda, Simon Msuva na Raphael Alpha waliifungia Taifa Stars penalti huku mkwaju uliopigwa na Shiza Kichuya ukigonga mwamba wa juu, lakini Lesotho walikosa mapigo mawili – moja likiwa limegonga mwamba wa pembeni na penalti ya nahodha wa Lesotho, Thapelo Mokhehle, ikipanguliwa na kipa Said Mohammed.

Penalti za Lesotho katika mchezo huo uliochezeshwa na refa Romeo Kasengele wa Zambia, aliyesaidiwa na Thomas Kusosa wa Zimbabwe na Helder de Carvalho wa Angola, zilifungwa na Hlompho Kalake na Tsoanelo Koetle.

Kwa ushindi huo, Taifa Stars imetwaa medali za dhahabu pamoja na kitita cha Dola za Marekani 10,000 wakati Lesotho wamepata dola 8,300.

Bingwa wa michuano hiyo atakayepatikana kesho Jumapili, Julai 9, 2017 baina ya Zambia na Zimbabwe katika Uwanja wa Royal Bafokeng, Phokeng mjini Rusternburg atapata Dola za Marekani 42,000 na mshindi wa pili Dola za Marekani 21,000.

Taifa Stars, ambayo ilikuwa Kundi A pamoja na Angola, Mauritius na Malawi, ilikwenda kushiriki mashindano hayo ikichukua nafasi ya Comoro ambayo ilijitoa.

Hii ni mara ya tatu kwa Tanzania kushiriki mashindano hayo, ambapo mara ya kwanza ilikuwa mwaka 1997 na ikashiriki tena mwaka 2015.

Kikosi cha Stars kilichokuwa Afrika Kusini chini ya kocha mzalendo, Salum Shabani Mayanga, kiliundwa na makipa Aishi Salum Manula (Azam FC), Benno David Kakolanya  (Yanga) na Said Mohammed Said (Mtibwa Sugar).

Walinzi wa pembeni upande wa kulia walikuwa Shomari Salum Kapombe (Azam FC) na Hassan Hamis Ramadhan ‘Kessy’ (Yanga) wakati upande wa kushoto walikuwa Gadiel Michael (Azam FC) na Amim Abdulkarim (Toto Africans).

Walinzi wa kati ni Erasto Nyoni  (Azam FC), Salim Hassan Abdallah (Mtibwa Sugar), Abdi Banda (Simba) na Nurdin Chona (Tanzania Prisons) wakati viungo wa kuzuia ni nahodha Himid Mao Mkami (Azam FC) na Salmin Hoza wa Mbao FC.

Aidha, viungo wa kushambulia ni Mzamiru Yassin Selembe (Simba), Simon Happygod Msuva (Yanga), Raphael Daudi (Mbeya City) na Shizza Ramadhani Kichuya (Simba) huku washambuliaji wakiwa Thomas Emmanuel Ulimwengu (AFC Eskilstuna – Sweden), Mbaraka Abeid Yusufu (Kagera Sugar), Stamili Mbonde, Elius Maguli (Dhofar SC) na Shabani Idd Chilunda (Azam FC).

Harakati zake

Taifa Stars ilianza harakati zake Juni 25, 2017 kwa kuikabili Malawi kwenye Uwanja wa Moruleng ambapo iliichapa mabao 2-0 yaliyopachikwa na Salim Abdallah.

Katka mechi yake ya pili Juni 27, Tanzania ikailazimisha suluhu Angola, ambayo ni bingwa mara tatu wa mashindano hayo, katika mchezo uliofanyika kwenye Uwanja wa Royal Bafokeng Sports Palace.

Juni 29, 2017 mshambuliaji Simon Msuva aliipeleka Stars robo fainali baada ya kuisawazishia bao katika mechi dhidi ya Mauritius iliyomalizika kwa matokeo ya bao 1-1 katika Uwanja wa Moruleng.

Mauritius ndio waliokuwa wa kwanza kupata bao la kuongoza kupitia kwa Kelvin Perticots aliyefunga katika dakika ya 67 kabla ya Simon kuisawazishia Taifa Stars katika dakika ya 68.

Matokeo hayo yakaifanya Stars imalize ikiwa kinara wa kundi lake ikiwa na pointi 5 sawa na Angola, lakini yenyewe ilifunga mabao matatu wakati Angola ilifunga bao moja tu.

Katika robo fainali ikakumbana na wenyeji Afrika Kusini na kwenye mchezo wao uliofanyika katika Uwanja wa Royal Bafokeng Julai 2, 2017, ikawashangaza wengi baada ya kushinda kwa bao 1-0 na kutinga nusu fainali.

Shujaa wa Stars alikuwa Elias Maguri ambaye alipachika bao hilo pekee katika dakika ya 18 kwa shuti la mahesabu akiunganisha pasi ndefu ya kiungo Muzamil Yassin, Stars ikitoka kushambuliwa.

Kwenye nusu fainali ilikumbana na Zambia, ambapo licha ya kuongoza, ikajikuta ikifungwa mabao 4-2 na kuyeyusha ndoto zake za kutinga kwa mara ya kwanza hatua ya fainali za michuano hiyo.

Hiyo ilikuwa mechi yao ya 31 katika historia, ambapo katika mechi 30 zilizopita za mashindano mbalimbali, ambapo Tanzania imemshinda mara tano tu huku Zambia ikishinda mechi 16 na mechi tisa zikiwa za sare.

Karia aipongeza Stars

Katika hatua nyingine, Kaimu Rais wa Shirikisho la Soka Tanzania (TFF), Wallace Karia, ameipongeza Taifa Stars kwa mafanikio ya kushika nafasi ya tatu katika michuano ya Kombe la Castle la Cosafa.

“Haya ni matunda ambayo tunayaota kila wakati kwa timu kupata ushindi. Tunawapongeza wachezaji, benchi nzima la ufundi likiongozwa na Kocha Salum Mayanga, pamoja na watendaji wote kwa mafanikio ya timu yetu ya Taifa Stars,” alisema Karia.

Alisema timu hiyo imeonyesha uzalendo wa hali ya juu katika kutafuta mafanikio na ana imani kwamba Tanzania itashiriki michuano mingi ya kimataifa kwa kuwa ina wachezaji wengi makinda huku TFF ikiendelea kuwakuza wengine kwa ajili ya kutimiza ndoto za furaha ya Watanzania kwa sasa na hapo baadaye.

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Muhimu Kusoma

Copyright © 2018 FikraPevu.com