Connect with us

Biashara/Uchumi

Soko Kuu la Bukoba Mjini kubomolewa

Published

on

WAFANYABIASHARA wa soko kuu mjini Bukoba wamepewa muda wa miezi mitano kufanya maandalizi ya kuhama ikiwa kama kengele ya mwisho kabla ya soko halijabomolewa na kujengwa upya.

Kwa zaidi ya kipindi cha nusu karne soko hilo limeendelea kuwa kama lilivyo,  likishindwa kuhimili utoaji wa huduma zenye sifa ya kiwango cha wananchi wanaoishi ndani ya Manispaa kama ilivyo katika miji mingine.

soko-bukoba

Manispaa ya Bukoba imetoa ofa ya miezi mitano tangu Julai hadi Novemba na katika kipindi hicho wafanyabiashara hawatatozwa ushuru wala kodi yoyote ili wakusanye nguvu ya kuhama na kupisha ujenzi wa soko jipya.

Tangu kutangazwa kwa mpango huo, wafanyabiashara walionekana kutofautiana na hata malumbano yao kuwafumbua macho walioko nje ya soko baada ya kufichua siri nzito iliyofichika miaka mingi.

Kwamba ndani ya soko hilo kuna mfumo sugu wa ‘Nyarubanja’ambao uliwezesha kundi dogo kumiliki maeneo mengi ya biashara ambayo huyakodisha kwa gharama kubwa huku wakipeleka malipo kiduchu Manispaa.

Hivyo ujenzi wa soko jipya ilikuwa ni zaidi ya habari  mbaya kwa kundi hilo kwani ulikuwa unavunja mfumo wa Nyarubanja na badala yake kuwepo kwa utaratibu mpya ambao utakuwa wazi zaidi tofauti na sasa.

Mfumo huo unadaiwa kuasisiwa na Madiwani ambapo baadhi yao baada ya kuwa madarakani kwa muda mrefu walitumia nafasi hiyo kuhodhi maeneo mengi kwa kuwashawishi viongozi wa Manispaa.

Kwa muda mrefu utaratibu wa kupangisha maeneo ya biashara katika soko kuu la Bukoba ulitawaliwa na utata kutokana na maeneo mengi kumilkiwa na kundi dogo ambalo nalo hupangisha maeneo hayo kwa watu wengine.

sokoni-bukoba

Hata hivyo baadhi ya wafanyabiashara hao wameanza kuhamisha  shughuli zao na kutafuta maeneo mengine katika mitaa mbalimbali ikiwa ni dalili ya kukubali kuwa uboamoaji wa soko sasa haukwepeki.

Miezi miwili iliyopita maduka mapya yameibuka kwa kasi katika mitaa ya Uswahilini, Nyakanyasi, Kashai na kwenye vichochoro vya mji wa Bukoba na wengi wanatajwa kuwa wafanyabiashara wanaohama kutoka sokoni.

Hali hiyo pia imechangia kupanda kwa bei ya kukodisha vyumba vya biashara, ambapo katika mtaa wa Kashenye kodi imepanda na kuwa kati ya shilingi elfu thelathini na arobaini kwa mwezi tofauti na ilivyo kuwa kabla ya kuwepo kwa taarifa za kuvunja soko.

Kauli ya Kagasheki

Balozi Khamis Kagasheki ambaye ni Mbunge wa jimbo la Bukoba Mjini anasema ujenzi wa soko jipya haukwepeki na soko linalotumiwa na wafanyabiashara kwa sasa halikuwahi kubadilika tangu akiwa kijana mdogo.

Anasema haikubaliki wafanyabiashara kuendelea kufanyia shughuli zao katika soko kuu kuu ambalo halina miundombinu bora inayokwenda sambamba na wananchi wanaohitaji huduma za soko hilo kutoka ndani na nje ya mji.

Pia anashangazwa na baadhi ya wafanyabiashara wanapinga ujenzi wa soko jipya kwamba hiyo ni miongoni mwa ahadi zake kubwa alizozitoa wakati akiomba kura kwa wananchi katika uchaguzi mkuu uliopita.

“Wakati naomba kura nilihaidi ujenzi wa soko jipya, nakumbuka wananchi walishangilia na kupiga makofi, hili lililopo limechoka na limekuwepo tangu nikiwa kijana lazima tukubali mabadiliko ujenzi wa soko jipya haukwepeki”anasema Balozi Kagasheki

Mkuu wa Wilaya ya Bukoba Zipolla Pangani anasema mbio za kusaka maendeleo ya mji wa Bukoba lazima ziende sambamba na kubadili taswira ya mji kupitia utekelezaji wa miradi mbaimbali likiwemo soko kongwe la mji huo.

Anasema mji huo unatakiwa kushindana na miji mingine katika nyanja mbalimbali hasa kuboresha na kuwa na maeneo yanayovutia tunapoelekea shirikisho la Jumuiya ya Afrika Mashariki alilosema kasi yake ni mkubwa.

Anasema ni lazima wananchi wakubali mabadiliko chanya yanayoendana na mikakati inayotekelezeka na kuwa hakuna sababu ya kushindwa kujenga soko jipya wakati uwezo wa kufanya hivyo upo.

Mkuu huyo wa Wilaya anasisitiza kuwa ni bora kuwa na mtazamo wa kusonga mbele na hapa anaomba Rais Jakaya Kikwete asimhamishe katika mji huu kabla ya soko jipya halijajengwa na kukamilika.

Aidha, anaongeza kwa kusema kuwa Bukoba ni mji pekee unaopakana na nchi nyingi za Jumuiya ya Afika Mashariki na hautakiwi kuendelea kuwa hivi ulivyo kama wananchi wake wanataka kuingia katika ushindani wa biashara kimataifa.

Ujenzi miezi 18

Mkurugenzi wa Manispaa ya Bukoba Hamis Kaputa anasema baada ya soko kubomolewa wafanyabiashara hawatakaa nje ya soko kwa muda mrefu kwani ujenzi utachukua kipindi cha miezi kumi na nane tu.

Anasema miongoni mwa masharti atakayopewa mkandarasi baada ya tenda kutangazwa ni pamoja na uhakika wa kumaliza kazi hiyo kwa muda uliotajwa ili wafanyabiashara waweze kuendelea na shughuli zao kwa kuafuata utaratibu mpya utakaowekwa.

Kuhusu haki za wafanyabishara waliopo, Kaputa anasema wameanza kuhakiki majina ya wale waliopo na kuwa hao ndio watapewa kipaumbele cha kupangishwa baada ya ujenzi kukamilika na kuwa hakuna mfanyabishara yeyote aliyeko sokoni atakayepoteza haki yake.

Hata hivyo anasema wamelazimika kufanya uhakiki wa majina bila kujali kama mfanyabiashara ana mkataba ili hata wale waliopangishwa na watu wengine waweze kupewa maeneo yao ya biashara baada ya ujenzi kukamilika.

“Wote wana haki sawa na kila aliyeko sokoni atarudi, tunahakiki hata yule aliyepangishwa na mwingine ili naye baadaye awe mpangaji bila kulazimika kupitia mgongo wa mtu mwingine” anabainisha Kaputa

Mshangao wa Meya wa Manispaa hiyo Dokta Anatory Aman ni jinsi zoezi la uhakiki lilivyoibua kundi dogo la ‘Nyarubanja’ ambapo mmoja wa wapangaji mbaye pia anapangisha  ana maeneo zaidi ya kumi ya kufanyia biashara.

Anasema utaratibu mpya utakaotumika baada  ya ujenzi kukamilika utatoa nafasi kwa wafanyabiashara wengi kuwa na mikataba yao na kumiliki maeneo tofauti na sasa ambapo wananyonywa na wanaowapangisha.

Pamoja na kutokuwa tayari kuyari kutaja gharama halisi za mradi huo kwani hata utaratibu wa tenda haujatangazwa alisema soko jipya litakuwa na uwezo mkubwa  na kufanya kila aina ya biashara kuwa na nafasi yake.

Anasema miongoni mwa maandalizi yaliyofanyika ni kuhainisha maeneo mbadala watakapohamia wafanyabiashara kwa muda na tayari Manispaa imeandaa michoro kwa ajili ya kuboresha maeneo hayo.

Maeneo hayo ni pamoja na kuboresha masoko ya Nyakanyasi na Kashai, kiwanja cha Bukoba Sekondari kilichopo Mafumbo ambapo baadhi ya wafanyabiashara wengine watahamia  uwanja wa jengo la CCM kwa muda.

Anasema soko jipya litakuwa na maeneo ya uwekezaji na hivyo kuvutia wafanyabiashara wa aina mbalimbali kupitia shughuli ambazo zitaongeza pato la wananchi baada ya kuongezeka maeneo ya kufanyia biashara.

Dokta Aman anasema ni sera kandamizi na kuwaletea wananchi umasikini kufunga soko kila siku za Jumapili na sikukuu, ambazo baadhi ya wafanyabiashara haziwahusu na wangependa kuendelea na shughuli zao kwani wanaohitaji huduma hata siku hizo wapo.

Ni mwezi mmoja sasa tangu aondoe utaratibu huo uliodumu kwa miongo kadhaa katika soko hilo ambapo wafanyabiashara wanaonekana kufanya shughuli zao pamoja na upungufu wa wateja huku huduma nyingine zikiwa zimefungwa.

Hofo ya wafanyabiashara

Tangu Manispaa kutangaza dhamira ya kutekeleza mradi wa ujenzi wa soko jipya wafanyabiashara wengi walikubwa na hofu ya kutofahamu hatima yao kabla na baada ya ujenzi wa soko jipya kukamilika.

Pamoja na tofauti ndogo iliyopo miongoni mwao, idadi kubwa ya wafanyabiashara wanakubaliana na mpango wa ujenzi wa soko jipya kwani wamehaidiwa kupewa kipaumbele cha kupanga maeneo ya biashara  baada ya ujenzi kukamilika.

Mwenyekiti wa wafanyabiashara hao Habibu Mayoro anasema Manispaa inawashirikisha katika hatua mabli mbali ikiwemo zoezi la kuhakiki majina ya wafanyabiashara walioko sokoni na hawaoni sababu ya kupingana na mipango ya ujenzi wa soko jipya.

Hata hivyo hofu ya Geraldina John ambaye ni mfanyabiashara wa ndizi katika soko hilo anasema huenda wakapoteza wateja wa bidhaa hiyo kutokana na umbali wa maeneo watayotakiwa kuhamia.

Kwa upande wake Zainabu Marijani mpangaji katika banda namba tisa eneo la mitumba anasema yuko tayari kuhama ingawa anatoha tahadhari kwa Manispaa juu ya ukweli wa ahadi yake ya kuwapa kipaumbele cha kurudi kama wapangaji wapya.

Naye Rashid Ismail ambaye ni mfanyabishara wa nyama bucha namba tisa na kumi anataka kabla ya maeneo yao kuvunjwa lazima wakubaliane kwanza nani analipa fidia kwani wamefanya ukarabati mkubwa wa maeneo yao kwa gharama kubwa katika kipindi cha mwaka mmoja uliopita.

Anasema kimsingi kwa ukarabati uliofanyika bado wanaidai Manispaa gharama walizotumia kuboresha maeneo yao ya biashara na ni bora wakaelezwa kwanza hatima ya jambo hilo kabla ya ubomoaji kufanyika.

Naye Audax Mathias mtengeneza mihuri na fundi cherehani katika soko hilo anataka zoezi la kuhakiki majina ya wafanyabiashara walioko sokoni lifanyike kwa umakini ili kuepuka uandikaji wa majina hewa au wasiokuwa wafanyabiashara katika soko hilo.

Vyovyote iwavyo Bukoba inahitaji viongozi watakaodhubutu kuanzisha na kusimamia safari ya mabadiliko na kukabili changamoto mbele ya safari ambayo ni lazima yaanze sasa ikiwemo ujenzi wa soko jipya .

Phinias Bashaya-Mwandishi wa FikraPevu – Kagera

Continue Reading
3 Comments

3 Comments

  1. mwambungu

    24/10/2012 at 1:06 pm

    halmashauri itoe muongozo namna gani wafanya biashara wa soko hilo watarejeshwa katika soko hilo baada ya ujenzi wake kukamilika vinginevyo itakuwa ngumu sana kwa wao kurudi sokoni hapo baada ya ujenzi kukamilika.

  2. Matungwa,MJ

    29/10/2012 at 10:08 am

    Ndugu Mwambungu,hoja yako ni ya msingi sana,pale Bukoba kuwa ombwe kubwa la kiuongozi Wafanyabiashara wanyonge,watarudi soko kuu kwenda kuemea tu si kupata meza na kuendelea na maisha yao ya kufanya biashara kama walivyozoea.Namaanisha hawatakuwa na uwezo wa kulipia gharama mpya za kukodi vibanda.

  3. revocatus oswald

    04/05/2013 at 9:04 am

    napenda na vyo ona mabadiliko ya nakua sana mikoani serikali na jamii kwa ujumula tusikate tama tukazane tupinge atua na bukoba yetu ni nzuli na iwe mfano kwa wengine.

     

Leave a Reply

Your email address will not be published. Required fields are marked *

Biashara/Uchumi

Ukosefu wa taarifa sahihi za viwango na aina ya samaki wakwamisha ujenzi wa viwanda nchini

Published

on

Tanzania itaanza kufaidika na rasilimali za bahari baada ya kuanza kutekeleza Programu ya Udhibiti na Matumizi Endelevu wa Rasilimali Samaki (EAF-Nansen) kudhibiti mabadiliko ya tabia na uchafuzi wa mazingira yanavyoathiri uzalishaji wa mazingira ya bahari na afya.

Programu ya EAF-Nansen inayofadhiliwa na Norway na kutekelezwa na Shirika la Chakula na Kilimo la Umoja wa Mataifa (FAO) kwa kushirikiana na Taasisi ya Utafiti wa Mambo ya Bahari ya Norway (IMR) itasaidia kutunza mazingira na mifumo ya ikolojia kwa upande mmoja na kutatua mahitaji ya binadamu ya chakula na faida za kiuchumi.

Programu hiyo imekuja siku chache baada ya meli ya kisasa ya utafiti wa samaki na mazingira baharini yenye jina la Dkt. Fridtjof Nansen kukamilisha uchunguzi wake wa rasilimali na mazingira bahari katika maji ya Bahari ya Hindi nchini Tanzania.

Meli hiyo imebaini kuwa Tanzania ina uhaba wa taarifa sahihi za viwango na aina ya samaki, hali inayokwamisha ujenzi wa viwanda vya kusindika samaki nchini.

Chini ya Mpango wa Programu ya EAF-Nansen, meli hiyo inaendesha utafiti wake wa rasilimali bahari na mazingira baharini katika ukanda wa Kusini Mashariki mwa Afrika na Bahari ya Hindi. Nchi thelathini za Kiafrika ikiwemo Tanzania zitapata msaada wa kitaalamu na kisayansi wa namna ya kudhibiti rasilimali zao za samaki na viumbe bahari wengine kwa kutumia na kutekeleza mpango endelevu wa utunzaji wa mazingira.

Akizungumza katika hafla fupi ya kilele cha utafiti huo iliyofanyika ndani ya meli iliyotia nanga katika Bandari ya Dar es Salaam, Katibu mkuu kiongozi, Balozi John Kijazi amesema mpango huo umekuja kwa wakati muafaka kwani utachochea kasi ya uanzishwaji wa viwanda hapa nchini hususani katika sekta ya uvuvi.

Hii ni hatua kubwa sana kwa Tanzania ambayo itafaidika na huduma za utafiti wa kisasa wa meli hii kupitia ushirikiano wa wadau hapa nikizungumzia FAO na Serikali ya Norway, kuweza kujua kwa uhakika aina na kiwango cha samaki na rasilimali bahari nyingine tulizonazo katika maji yetu,” amesema Balozi Kijazi.

Amesema taarifa kuhusu rasilimali bahari yetu ni muhimu sana katika kufanya maamuzi na kupata fursa za ndani na kimataifa za uwekezaji katika sekta ya uvuvi na kutilia maanani mambo muhimu ya utunzaji wa mazingira.

Kwa kutumia taarifa sahihi tunaweza kuwavutia wawekezaji kuja na kujenga viwanda vya kusindika samaki na vingine vinavyohusiana na sekta hii ya uvuvi na hivyo kuongeza kasi kwenye mpango wetu wa kujenga Tanzania ya viwanda,” amesema Balozi Kijazi.

Kwa upande wake,Waziri wa Mifugo na Uvuvi, Luhaga Joelson Mpina amesema, mpango huo utaongeza ajira na matumizi ya teknolojia ya kisasa katika sekta ya uvuvi. “Hii itatuwezesha kupata wawekezaji katika eneo hili ambao watajenga viwanda vya kuchakata na kusindika mazao ya samaki ambapo mbali ya kutoa fursa za ajira kwa watu wetu hususani vijana katika mnyororo wa thamani, lakini pia utakuza mapato ya Serikali.”

Wadau wa mazingira wanasema ikiwa mpango huo utatekelezwa kikamilifu unaweza kusaidia kupunguza athari za mabadiliko ya hali ya hewa ambayo yameathiri uhai wa bahari na rasilimali zilizopo.

Mbali ya taarifa ambazo zitawezesha udhibiti bora wa rasilimali kwa matumizi endelevu, utafiti huu utapekelea uelewa mzuri wa athari za mabadiliko ya tabia nchi na athari nyingine za nje, kama vile uchafuzi wa mazingira na mifumo ya uhai baharini.,” amesema Mwakilishi wa FAO nchini Tanzania, Fred Kafeero.

Programu ya Udhibiti na Matumizi Endelevu wa Rasilimali Samaki (EAF) imekuwa ni moja ya marejeo makuu za FAO katika kusaidia nchi katika juhudi zao za kudhibiti na kutekeleza kanuni za maendeleo endelevu.

Kwa mujibu wa FAO, programu ya EAF ni njia ya kutekeleza kanuni sahihi za uvuvi kwa kutoa mwongozo wa namna ya kufikia malengo ya sera ya kiuchumi, kijamii na ikolojia kupitia malengo, viashiria na njia za tathimini. EAF inanuia kuweka uwiano kati ya mambo mawili muhimu; Utunzaji wa mazingira na mifumo ya ikolojia kwa upande mmoja na kuweza kutatua mahitaji ya binadamu ya chakula na faida za kiuchumi upande mwingine.

Uvuvi haramu bado ni changamoto

Utafiti uliotolewa hivi karibuni na Taasisi ya Overseas Development ya nchini Uingereza unaeleza tatizo la uvuvi haramu kwenye bahari kuu ikiwemo bahari ya Hindi kwamba unachochewa zaidi na ukosefu wa miundombinu ya mawasiliano, ushirikiano na teknolojia ya kutunza takwimu za meli za uvuvi kwenye bahari kuu ikiwemo bahari ya Hindi ambayo inaunganisha mataifa mbalimbali duniani.

Tatizo ni kubwa kwa nchi za Afrika ambazo hazina teknolojia ya kisasa na taasisi imara za kusimamia uvuvi ambapo kila mwaka nchi za Afrika Magharibi zinapoteza Dola bilioni 2 za kimarekani huku nchi zinazotumia bahari ya Afrika Mashariki (Kenya, Tanzania, Mauritius, the Comoros, Mozambique, and the Seychelles ) zinapoteza zaidi dola milioni 200 kila mwaka.

Licha ya kila nchi kuwa na taratibu zake katika kupambana na uvuvi haramu, hazijafanikiwa kumaliza tatizo hilo na changamoto inayojitokeza kwenye ukusanyaji wa takwimu na matumizi ya vifaa vya kusimamia mwenendo wa meli katika eneo la bahari kuu.

Utafiti huo unaeleza kuwa ili kufuatilia eneo na safari, meli zinapaswa kuwa na kifaa cha mawasiliano kijulikanacho, ‘Vessel Management Systems (VMS)’. Hata hivyo meli nyingi hazina kifaa hiki hasa katika nchi zinazoendelea ambako teknolojia hiyo haipatikani au wasimamizi wa meli huzima ili kuepuka kufuatiliwa na mamlaka husika.

Licha ya kifaa cha VMS kuwa na uwezo wa kutambua eneo, umbali na mwelekeo wa meli lakini hakiwezi kutambua meli zinazoharibu mazalia ya samaki na viumbe wengine wa baharini

Continue Reading

Biashara/Uchumi

Ushuru wa bidhaa: Kero ya Muungano iliyokosa ufumbuzi wa kudumu

Published

on

Serikali ya Tanzania Bara na ile ya Zanzibar kukutana kujadili kuhusu namna bora ya kupata ufumbuzi wa kudumu wa kero ya ulipaji kodi ya mizigo kutoka Zanzibar kwenda Tanzania Bara.

Hayo yameelezwa Bungeni Jijini Dodoma na Naibu Waziri wa Fedha na Mipango, Dk. Ashatu Kijaji alipokuwa akijibu swali la msingi la Mbunge wa Wingwi, Juma Kombo Hamad (CUF) aliyetaka kujua kama Serikali ipo tayari kuunda Kamati Ndogo ya Bunge kwa ajili ya kushughulikia mfumo wa ulipaji kodi ya mizigo kutoka Zanzibar kwenda Tanzania Bara.

Katika swali la msingi, Hamad ameeleza kuwa mfumo wa ulipaji kodi wa kusafirisha bidhaa kutoka Zanzibar kwenda Tanzania Bara umekuwa ukilalamikiwa kwa muda mrefu kwamba unawakwaza na kuvunja harakati za ukuaji wa sekta ya biashara Zanzibar na hivyo kusababisha uchumi wa nchi hiyo kushuka.

Akijibu swali hilo Dk. Kijaji, amesema kuwa Serikali hizo mbili zinaendelea kujadiliana ili suala hilo lipatiwe ufumbuzi wa kudumu na kuongeza kuwa Serikali hizo hazijashindwa kutatua changamoto hiyo na hakuna sababu ya kuunda kamati ya kushughulikia suala hilo.

Amesema chimbuko la malalamiko hayo linatokana na kuwepo kwa mifumo tofauti ya kutathmini bidhaa kati ya Zanzibar na Tanzania Bara hali inayosababishwa na viwango tofauti vya ushuru wa forodha vinavyopaswa kulipwa kwa bidhaa ya aina moja kutoka nje ya nchi na kusafirishwa kwenda sehemu ya pili ya Jamhuri ya Muungano wa Tanzania.

Dk. Kijaji amesema kuwa Mfumo wa uthaminishaji wa bidhaa zote zinazoingia Tanzania Bara unafanyika kwa kutumia mifumo ya ‘TANCIS’ na ‘Import Export Commodity Database (IECD) inayoratibiwa na kituo cha Huduma za Forodha kilichopo Dar es Salaam, lakini Serikali ya Mapinduzi ya Zanzibar haitumii mifumo hiyo na kusababisha kuwepo na tofauti ya kodi kati ya Bara na Zanzibar.

Kutokana na utofauti wa mifumo inayotumika, bidhaa zote za nje zinazoingia Tanzania Bara kupitia Zanzibar hufanyiwa uhakiki licha ya kuwa zimethaminiwa Zanzibar, iwapo uthamini wa Tanzania Bara utakuwa sawa na ule uliofanywa Zanzibar hakuna kodi itakayotozwa Tanzania Bara na ikiwa kodi iliyolipwa Zanzibar ni ndogo, Mamlaka ya Mapato hukusanya tofauti ya kodi iliyozidi”, amesema Dk. Kijaji.

Kulingana na utaratibu wa Mamlaka ya Mapato Tanzania (TRA), Ushuru wa bidhaa ni kodi inayotozwa kwa bidhaa au huduma maalumu zilizozalishwa ndani ya nchi au kuingizwa nchini kwa viwango tofauti. Kodi hii inatozwa katika viwango maalumu na viwango kulingana na thamani.

Dk. Kijaji amesisitiza kuwa utaratibu wa kukusanya tofauti ya kodi kati ya Zanzibar na Bara kwa kutumia mifumo ya TANCIS na IECD haina lengo la kuua biashara Zanzibar, bali hatua hiyo inalenga kuleta usawa wa gharama za kufanya biashara na ushindani hapa nchini.

Aidha Naibu Waziri huyo amesema kuwa kwa mujibu wa Katiba ya Jamhuri ya Muungano wa Tanzania Ibara ya 63 (2) Bunge ni muhimili unaojitegemea na hivyo Serikali haina mamlaka ya kuunda Kamati ndogo ya Bunge kwa ajili ya jambo hilo au jambo lolote.

Ikumbukwe kuwa kodi ya Mapato na ushuru wa bidhaa katika ya nchi hizo mbili umekuwa ni kero ya muda mrefu ya Muungano ambayo haijapatiwa ufumbuzi na kwa nyakati tofauti Wazanzibar wamekuwa wakilalamika kukosa sauti kwenye mapato wakidai hakuna usawa kwenye suala hilo.

Mwanasheria kutoka Zanzibar, Awadh Ali Said, alipokuwa anazungumzia matatizo ya Muungano katika muktadha wa mapato alinukuliwa; “suala la mapato linaanguka katika suala la uchumi huku uchumi ukiwa si suala la muungano”.

Anaongeza kwamba; “kila mmoja (kati ya Tanganyika na Zanzibar) ina uchumi wake na mzigo wa kushughulikia lakini nyenzo kuu za uchumi ambazo ni sera za fedha, sera za kodi, benki kuu, yote hayo yako upande mmoja (Tanzania Bara)”.

Kutokana na hali hiyo upande wa Zanzibar umekuwa ukilalamika kukosa nguvu ya kudhibiti uchumi na sarafu. Suala la kodi limezungumzwa kwa muda mrefu lakini mpaka sasa halijapatiwa ufumbuzi baina ya nchi hizo mbili.

Januari 4, mwaka huu, Rais wa Zanzbar, Dk. Ali Mohammed Shein wakati wa ufunguzi wa jengo la Takwimu mjini Zanzibar, alinukuliwa akisema “si busara kwa mambo ya muungano kufanywa upande mmoja tu au upande mmoja kuonekana unajivutia wenyewe kila kitu, hali hiyo inaweza kuleta madhara makubwa katika utendaji wa masuala ya muungano.”

Continue Reading

Biashara/Uchumi

Mradi wa Stiegler’s Gorge kutua mikononi mwa Kamati ya Urithi wa Dunia

Published

on

Kamati ya Urithi wa Dunia ya Umoja wa Mataifa inatarajia kuamua kama Pori la akiba la Selous liondolewe miongoni mwa maeneo ya urithi wa dunia, kufuatia Serikali ya Tanzania kuanza mchakato wa kujenga bwawa la Stiegler’s Gorge kwa ajili ya kuzalisha umeme wa kilowati 2,100 ndani ya pori hilo.

Kamati hiyo inatarajia kukutana baadaye mwezi Juni katika jiji la Manama, Bahrain na miongoni mwa ajenda zitakazojadiliwa ni uamuzi wa Serikali kujenga mradi mkubwa wa kuzalisha umeme katika pori hilo ambalo ni urithi muhimu wa dunia ambao uko hatarini kutoweka.

Kamati hiyo inakutana kila mwaka na kikao cha mwaka huu kitakuwa cha 42 tangu kuanzishwa kwake na ina kazi moja kubwa ya kujadili maendeleo ya utunzaji wa maeneo ya urithi na kufanya maamuzi ya kufuta au kuendelea kuyaweka maeneo yaliyopewa hadhi ya kuwa kwenye orodha ya Urithi wa dunia ulio katika hatari ya kutoweka.

Akizungumza hivi karibuni na jarida moja la kila wiki la Afrika Mashariki, Meneja wa Programu wa Kituo cha Urithi wa Dunia cha Shirika la Umoja wa Mataifa la Elimu, Sayansi na Utamaduni (UNESCO), Richard Lo Giudice amesema; mradi wa uzalishaji umeme katika pori la Selous utajadiliwa kwenye mkutano wa mwaka wa Kamati ya Urithi wa Dunia na kisha UNESCO itatoa mrejesho.

Suala hilo litajadiliwa katika kikao cha 42 cha Kamati ya Urithi wa Dunia itakayoketi Manama kuanzia Juni 24 hadi Julai 4, wakati inatathmini hali ya uhifadhi wa pori la akiba la Selous,” alinukuliwa Giudice na jarida hilo.

Serikali imetenga Bilioni 700 ambayo ni sawa na asilimia 41 ya bajeti ya Wizara ya Nishati ya mwaka wa fedha wa 2018/2019 inayofikia Trilioni 1.69 kwaajili ya mradi huo, ambapo imesema ni muhimu kwa ajili ya uzalishaji wa umeme ili kuchochea ajenda ya uchumi wa viwanda.

Licha ya tahadhari iliyotolewa na wadau mbalimbali wa mazingira na wanasiasa akiwemo Mbunge wa Kigoma mjini, Zitto Kabwe na Nape Nnauye wa Mtama kuhusu athari zitakazotokea endapo mradi huo utatekelezwa, bado Serikali imeendelea kushikiria msimamo wake wa kujenga mradi huo kwa madai kuwa wanaokosoa hawaitakii nchi mema.

Serikali ilienda mbali zaidi na kutahadharisha mtu yeyote atakayejaribu kuzuia mradi huo atakabiliwa na hatua kali za kisheria ikiwemo kufungwa jela.

Piga ua, garagaza Serikali itatekeleza mradi wa Stiegler’s Gorge. Hawa wanaopinga mradi huu ukiwatazama wanataka umeme ufike vijijini mwao, ukiwatazama wengine ni wachumi wanapinga’” alinukuliwa Naibu Waziri wa Ofisi ya Makamu wa Rais, Muungano na Mazingira, Kangi Lugola wakati akijibu hoja za wabunge Mei 26 mwaka huu.

Kamati ya Urithi wa Dunia inajumuisha wawakilishi 21 ambao wanachaguliwa na Baraza la Umoja wa Mataifa kwa ajili ya kuratibu shughuli za ulinzi wa Urithi na Utamaduni wa dunia.

“Hilo litakuwa pigo kwa asili,” limesema shirika la uhifadhi wa asili la World Wildlife Fund (WWF). Bwawa hilo litakuwa na urefu wa mita 130 na upana wa mita 700. Litatengeneza ziwa kubwa la zaidi ya kilomita 1000 za mraba, na maji yatasambaa katika eneo ambalo ni kubwa hata kushinda jiji la Berlin, Ujerumani.

 

Mambo Bayana

Kamati ya Urithi wa Dunia itakutana wakati Serikali kupitia Wakala wa Misitu Tanzania imetoa zabuni ya kukata miti isiyopungua milioni mbili katika eneo la Selous ambalo baadhi ya wabunge wamesema lina ukubwa unaolingana na jiji la Dar es Salaam.

Zabuni hiyo pia itahusisha ukataji na uuzaji wa miti hiyo ili kuiingizia Serikali mapato yatakayotumika katika huduma za kijamii.

Lakini wanaopinga mradi huo, wanaeleza kuwa miti itakayokatwa ni mingi sana na ujenzi wa bwawa hilo utasababisha athari za mazingira zinazoweza kuangamiza wanyama wengi zaidi na kuchangia ongezeko la joto duniani.

Kwa mujibu wa Ripoti ya Tathmini ya Mazingira juu ya Mradi pendekezwa wa Stiegler’s Gorge iliyotolewa mwaka 2009 na Prof. Raphael Mwalyosi wa Chuo Kikuu cha Dar es Salaam imebainisha wazi kuwa kutakuwa na athari kubwa katika eneo la Selous endapo mradi huo utatekelezwa.

Hata hivyo ripoti hiyo inaeleza kuwa mradi huo utazalisha umeme wa kutosha lakini ina mashaka juu ya matokeo ya kijamii na kiuchumi yanayoweza kupatikana.

Wachambuzi wa masuala ya mazingira, wanaeleza kuwa Tanzania ina kibarua kigumu cha kujieleza mbele ya kamati hiyo ikizingatiwa kuwa ni miongoni mwa wanachama wa kamati hiyo muhimu duniani. Nchi zingine za Afrika ambazo zinaingia katika kamati hiyo ni Burkina Faso, Tunisia, Uganda na Zimbabwe.

Kamati hiyo itakuwa na kazi ya kutathmini hali ya utunzaji wa maeneo mbalimbali yaliyoko kwenye urithi wa dunia na kuzitaka nchi wawakilishi kuchukua hatua za kutunza na kuhifadhi urithi huo ili kuhakikisha dunia inakuwa mahali salama pa kuishi.

       Baadhi ya wanyama kuathirika na mradi wa umeme

Historia ya Pori la Selous

Pori la Akiba la Selous ambalo lina eneo la kilomita 50,000 za mraba, ni moja ya mbuga kubwa zaidi barani Afrika, ambayo inajulikana kwa kupatikana kwa tembo, vifaru weusi, duma, twiga, viboko, mamba, na wanyama pori wengine.

Pia pori hilo lina aina nyingi tofauti ya viumbe wa pori, vikiwemo miombo, msitu, sehemu za nyasi, kinamasi, ikisemekana kuwa mbuga hiyo ni maabara ya mabadiliko ya kibaolojia na kiekolojia.

Uwindaji kwa ajili ya biashara unaruhusiwa katika mbuga ya Selous. Ni chanzo cha pato kwa mbuga hiyo na zaidi ya watu milioni 1.2 ambao wanaishi viungani mwa mbuga hiyo. Katika baadhi ya maeneo, uwindaji haukubaliwi kabisa. Watalii wanaweza kuzuru. Lakini kuna watalii wachache ikilinganishwa na mbuga ya kitaifa ya Serengeti, ingawa mbuga ya Selous imeizidi Serengeti mara tatu kwa ukubwa.

Mto Rufiji ni mwokozi wa mbuga hiyo. Ni mto wenye urefu wa kilomita 600 na unaishia katika Bahari ya Hindi kusini mwa Dar es Salaam, lakini maji ya mto kwa sehemu kubwa yatatumika kuzalisha umeme.

Kutokana na umuhimu wake, mwaka 1982, UNESCO lilitangaza na kuiingiza Selous miongoni wa maeneo machache ya urithi wa dunia na kuanza kuhifadhiwa.

Lakini mwaka 2014, Kamati ya Urithi wa Dunia ya UNESCO, iliyokutana mjini Doha, Qatar, iliingiza mbuga ya Hifadhi ya Wanyama ya Selous, iliyopo kusini mashariki mwa Tanzania katika orodha ya Urithi wa Dunia ulio Hatarini kutoweka, kwa sababu ya ujangili wa kupindukia.

Ujangili ulisababisha kupungua kwa idadi ya wanyamapori, hasa kwa upande wa tembo na vifaru, ambao idadi yao imepungua kwa asilimia 90 tangu 1982, wakati mbuga hiyo ilipoorodheshwa kwenye urithi wa dunia.

Continue Reading

Must Read

Copyright © 2018 FikraPevu.com