Connect with us

Siasa

Safari bado ni ndefu kuelekea uhuru wa kweli kwa vyombo vya Habari Tanzania

Published

on

Tanzania inaungana na nchi zingine duniani kusherekea Siku ya Uhuru wa Vyombo vya Habari Duniani huku kukiwa sintofahamu ya uhai wa vyombo hivyo kutokana na baadhi ya matukio yanayoendelea nchini,

Licha ya ahadi nyingi za viongozi wa serikali kulinda na kuheshimu uhuru wa vyombo vya habari,  hali ni tofauti ikizingatiwa kuwa kauli za viongozi na sheria zilizopo zimeendelea kuminya uhuru wa wanahabari pale wanapoibua mambo yanagusa maslahi ya taifa.

Katika kipindi cha miaka miwili ya serikali ya awamu ya tano, yametokea baadhi ya matukio ikiwemo vitisho, kupigwa faini, kufungiwa vyombo vya habari na kuteswa na kutekwa kwa wanahabari. Matuki hayo ni tishio kwa mstakabali wa uhuru wa kujieleza nchini.

 

Kuvamiwa na kupigwa faini kwa runinga na redio

Machi 17, 2017 Ofisi za Clouds Media zilivamiwa na Mkuu wa Mkoa wa Dar es Salaam akiongozana na watu wapatao 4 wenye silaha ambapo aliwalazimisha waandaji wa kipindi cha SHILAWADU kurusha kipande cha video hewani kinyume na taratibu za habari. Uvamizi huo ulizua tafrani ikizingatiwa kuwa Mkuu huyo wa mkoa hakufuata taratibu za kuingia kwenye ofisi za Clouds zilizopo Mikocheni jijini Dar es Salaam.

                Wanahabari wanahitaji uhuru zaidi kutekeleza majukumu yao

Januari 1, 2018, Mamlaka ya Mawasiliano Tanzania (TCRA) ilivitoza faini sh. Milioni 60 vituo vya runinga vya Star TV, Azam, Channel  Ten, EATV na ITV baada ya kutangaza habari ya Kituo cha Sheria na Haki za Binadamu (LHRC) kuhusu tamko la tathmini ya uchaguzi mdogo wa marudio wa kuchagua madiwani uliofanyika katika kata 43 kwenye mikoa 19 ya Tanzania  Novemba 24 mwaka jana.

Tathmini hiyo iliibua mambo mbalimbali ikiwemo matumizi mabaya ya nguvu ya vyombo vya dola, matukio ya watu kutekwa na watu wasiojulikana, watu kupigwa, kujeruhiwa  kwa lengo la kuharibu na kuvuruga uchaguzi  na vilevile kuwatia hofu wapiga kura.

Lakini TCRA ilidai kuwa habari hiyo ilikuwa ya ‘kichochezi’, haikuwa na mizania wala kuzingatia maadili ya uandishi wa habari.

Baadhi ya redio ikiwemo Magic FM, Redio 5, Times FM, Clouds FM kwa nyakati tofauti zimekuwa zikionywa na kupewa adhabu kwa kile kinachotajwa kutangaza maudhui yasiyozingatia weledi na taaluma ya habari.

 

Vitisho na Kupotea kwa Wanahabari

Novemba 2017, Mwandishi wa habari kutoka Kampuni ya Mwananchi, Azory Gwanda, aliripotiwa kutekwa na watu wasiojulikana Mkoa wa Pwani na mpaka sasa hajulikani alipo. Inadhaniwa kuwa tukio la kutekwa kwake linahusiano na kuripoti kwa matukio ya mauaji ya raia katika eneo la Kibiti-Wilaya ya Mkurunga.

Disemba 21, 2016, mwandishi wa runinga ya ITV, Khalfan Liundi alikamatwa na kuwekwa mahabusu kwa amri ya aliyewahi kuwa Mkuu wa Wilaya ya Arumeru, Alexander Mnyeti kwa kile kilichodaiwa ni kuripoti mgogoro wa maji katika Wilaya hiyo na kudai kuwa taarifa hiyo ilikuwa na harufu ya ‘uchochezi’.

Aprili 12, 2018, Spika wa Bunge la Tanzania, Job Ndugai aliiagiza Kamati ya Maadili, Haki na Madaraka ya Bunge, kumuhoji mwanahabari Paschal Mayallah na wahariri wa gazeti la kila wiki, la Raia Mwema kwa madai ya kuchapisha habari iliyodaiwa kuchafua hadhi ya bunge, iliyotoka Aprili 9 mwaka huu.

Pascal aliandika habari yenye kichwa ‘Bunge linajipendekeza kwa serikali?’ ikiwa ni maoni yake juu ya nguvu ya bunge kuiwajibisha serikali pale inapokosea.

 

Kufungia magazeti

Mwaka 2017, Jumla ya magazeti 4 (Tanzania Daima, Raia Tanzania, Mawio na MwanaHalisi ) yalifungiwa na kulipishwa faini kwa sababu tofauti, ikiwemo chini ya sheria kandamizi ya Uhuru wa Vyombo vya Habari ya mwaka 2016, ambayo ina vifungu vyenye utata vinavyoweza kutumiwa vibaya.

Licha ya kufungiwa, baadhi ya magazeti yamekuwa yakipewa maonyo na vitisho pale yanapoandika habari nyeti zinazogusa maslahi ya ‘vigogo’ waliopo katika taasisi mbalimbali nchini.

Matukio yote haya dhidi ya vyombo vya habari yamekuwa yakienda sambamba na utekelezaji wa Sheria ya Makosa ya Mtandao ya mwaka 2015, Sheria ya Takwimu ya mwaka 2015, Sheria ya Upatikanaji wa Habari ya mwaka 2016 ambazo zote zimekuwa zikilalamikiwa kwa kuminya uhuru wa kujieleza nchini.

Sheria ya Upatikanaji wa Habari ya mwaka 2016 yalalamikiwa kuminya haki ya kupata taarifa

 

Sheria na kanuni za Maudhui Mtandaoni

Baada ya kupitisha Sheria ya Makosa ya Mtandao (The CyberCrime 2015), mwanzoni mwaka huu serikali  imekuja na Kanuni  za kusimamia Maudhui ya Mitandao ya Kijamii na Utangazaji wa vituo vya redio na runinga (TV)  ambapo kanuni hizi zinatajwa kama mkakati wa kuminya uhuru wa watu kujieleza na kupata taarifa.

Kanuni hizi zinawataka wamiliki wa runinga na redio za mtandaoni, blogu, majukwaa na tovuti za habari kupata kibali na leseni toka serikalini kabla ya kuendesha shughuli zao mtandaoni.

Kuna tetesi kuwa utungaji wa kanuni nyingine ya kulinda faragha na usalama wa  watumiaji iko mbioni kupitishwa.

Ikiwa hali iliyopo sasa haitabadilika wanahabari na vyombo vya habari nchini  hawana sababu ya kusheherekea Siku ya Uhuru wa Vyombo vya Habari Duniani wakati bado hawafurahii uhuru wa kujieleza ambao unatambulika na Katiba ya mwaka 1977 na Sheria za Kimataifa.

              Watumiaji wa Mitandao ya kijamii Tanzania bado wako kitanzini

 

Maoni ya wadau

Akizungumza hivi karibuni katika uzinduzi wa Ripoti ya Haki za Binadamu-2017, Mkurugenzi Mtendaji wa Kituo Cha Sheria na Haki za Binadamu (LHRC), Dk. Hellen Kijo Bisimba alishauri serikali kuzifanyia marekebisha sheria zote zinazokandamiza uhuru wa wanahabari ili wafanye kazi zao kwa uhuru bila kuingiliwa na mamlaka.

“Wizara ya Katiba na Sheria kuanzisha mchakato wa kupitia upya sheria zinazohusu uhuru wa kujieleza, hasa Sheria ya Huduma za Habari na Sheria ya Makosa ya Mtandaoni na kupeleka muswada bungeni ambao utapeleka vifungu vyenye utata na vinavyokiuka haki za msingi virekebishwe au kuondolewa kabisa,” alisema Dk. Hellen.

Kwa upande wake, Katibu Mkuu wa Umoja wa Mataifa, Antonio Guterres, akitoa tamko la Umoja wa Mataifa (UN) amezitaka serikali duniani kuimarisha uhuru wa vyombo vya habari ili vihabarishe ukweli uliopo katika jamii.

“Katika Siku ya Uhuru wa Vyombo vya Habari 2018,  nazitaka serikali kuimarisha uhuruwa vyombo vya habari, na kuwalinda wanahabari. Kuhimiza vyombo huru vya habari ni kusimamia haki yetu ya kupata ukweli”, amesema.

Maadhimisho ya Siku ya Uhuru wa Vyombo vya Habari hufanyika Mei 3 ya kila mwaka ambapo wadau na wanahabari huitumia siku hiyo kutathmini mchango wa vyombo hivyo katika maendeleo ya nchi zao.

Kauli mbiu ya mwaka huu ni “Kuweka usawa wa madaraka: Vyombo vya Habari, Haki na Utawala wa Sheria”. Na kimataifa maaadhimisho hayo yanafanyika Accra, Ghana.

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Must Read

Copyright © 2018 FikraPevu.com