Connect with us

Kimataifa

Pendekezo la “Ukanda mmoja, Njia moja” lafikisha hariri na kauri mpya barani Afrika

Published

on

Kwa wenye uelewa wa ndani juu ya historia ya dunia, bila shaka watakuwa wanafahamu kwamba katika kipindi fulani kwenye historia ya dunia (207 BC–220 AD), China ilikuwa ni moja ya nchi muhimu duniani, na ilikuwa na mchango wa kipekee kwa dunia uliohimiza maingiliano ya kibiashara kati yake na nchi nyingine. Wakati huo kulikuwa na bidhaa mbili muhimu kutoka China kwenda katika mabara mengine, nazo ni vyombo vya kauri na vitambaa vya hariri.

Umuhimu huo ndio ulifanya jina la kichina la China liundwe kwa herufi mbili za kichina, 中国 (Zhong Guo). Herufi ya kwanza yaani 中 ina maana katikati au kiini, na herufi ya pili 国(Guo) ina maana “Nchi ya Kiini”.

Kulikuwa na njia mbili kuu za kusafirisha bidhaa hizo. Njia ya kwanza ilikuwa ni kutoka kusini kupitia bahari ya Hindi na kufika kwenye nchi ikiwa ni pamoja na Indonesia, India na hata pwani ya Afrika Mashariki, hiyo iliitwa ‘Njia ya hariri ya baharini’. Njia ya pili ilikuwa ni njia ya barabara kupita sehemu ya kaskazini magharibi mwa China, na kuelekea uajemi, mashariki ya kati hadi Ulaya. Njia hii ya Ulaya ibebe jina la ‘Njia ya hariri’, kwa kuwa hariri ilikuwa ni moja ya bidhaa muhimu iliyosafirishwa kwenye njia hiyo.

Kutokana na kuwa wakati ule, bahari na njia za ardhi zilikuwa ndio njia pekee za mawasiliano. Tunaweza kusema kuwa China ilitumia njia hizo kujiunga vizuri na dunia. Na kutokana na kuwa kauri na vitambaa vya hariri vilifika katika sehemu mbalimbali duniani, tunaweza kusema China haikuwa na choyo kwa nchi nyingine kutokana na uvumbuzi wake.

Hali ya dunia ya sasa imebadilika sana ikilinganishwa na miaka ya 207 BC–220 AD. Dunia imepiga hatua kubwa kimaendeleo na vyombo vya kauri na vitambaa vya hariri, havina nafasi tena kwenye biashara. Lakini, njia ya hariri baharini bado ipo na njia ya hariri ya kaskazini magharibi pia ipo.

Mabadiliko makubwa pia yametokea kwenye uchumi wa China na kufanya nafasi yake duniani irudi kama ilivyokuwa wakati wa ‘Nchi ya kiini’.

China sasa imekuwa ni nchi ya pili kwa nguvu ya uchumi duniani, na umuhimu wa bidhaa zake duniani umekuwa ni zaidi ya ule Kauri na Hariri. Kwa sasa mbali na bidhaa kama nguo, vifaa vya elektroniki, na vifaa vya ujenzi, nchi hii sasa imekuwa ni chanzo cha teknolojia, mikopo, misaada na hata masoko kwa nchi nyingi duniani. Hizi ni hariri na kauri mpya kutoka China, zinazoifanya iwe mhimili muhimu wa uchumi wa dunia.

Uwingi wa bidhaa zilizopo China kwa sasa, umeleta mahitaji ya kupanua njia za ushirikiano. Ndio maana pendekezo la ‘Ukanda Mmoja na Njia Moja’ lilitolewa na serikali ya China mwaka 2013, limekuwa na maana pana zaidi na kuleta manufaa zaidi kwa nchi zinazoshiriki, ikilinganishwa na njia ya hariri na njia ya hariri baharini ya mwaka 207BC.

Serikali ya China imekuwa ikisema mara kwa mara, haitakuwa na uchoyo na maendeleo yake. Hatua nyingi zimechukuliwa na serikali hii kufanya maendeleo yake yanufaishe nchi nyingine.

Mbali na njia ya hariri na njia ya hariri ya baharini kuboreshwa na kuwa na ufanisi zaidi kwenye kusafirisha bidhaa nje na kuagiza bidhaa, kumekuwa na njia mpya kama vile mawasiliano ya habari (ICT) na mawasiliano kwa njia ya ndege ambayo yamehimiza biashara.

Ya hivi karibuni, ni kuanzisha Benki ya Uwekezaji kwenye maendeleo ya ujenzi wa miundo mbinu AIIB, na kumekuwa na mabaraza mbalimbali ya kuhimiza ushirikiano na maendeleo na nchi na sehemu nyingine, kama vile FOCAC, na hata kumekuwa na mifuko ya kuendeleza maendeleo na pande mbalimbali, kama vile CAD FUND (China-Africa Development Fund).

Mwishoni mwa juma hili, mkutano wa ‘Ukanda Mmoja na Njia Moja’ unafanyika hapa Beijing. Viongozi wa nchi mbalimbali na wawakilishi watahudhuria kujadili maendeleo ya utekelezaji wa mipango ya pendekezo la ‘Ukanda Mmoja na Njia Moja’.

Kumekuwa na manufaa mengi ya pendekezo hilo kwa nchi mbalimbali. Mifano ya wazi ni kama mradi wa ujenzi wa reli ya SGR nchini Kenya, mipango ya ujenzi wa Bandari ya Bagamoyo na mji wa viwanda mkoani Tanga, Tanzania.

Baada ya mkutano huo inatarajiwa mengi zaidi kuhusiana na manufaa ya pendekezo hilo yatafahamika na tutaleta mwendelezo hapa FikraPevu.

Continue Reading
Click to comment

Leave a Reply

Your email address will not be published. Required fields are marked *

Jukwaa la Maisha

GREENLAND: Ulevi, ukosefu wa usingizi unavyochochea watu kujiua

Published

on

Matukio ya watu kujiua yameendelea kushamiri katika maeneo mbalimbali nchini. Watu ambao wanaondoa uhai wao kwa kunywa sumu, kujinyonga au kujirusha kwenye majengo marefu, sio mambo mageni tena. Zipo sababu mbalimbali ambazo zinawasukuma watu kujiua ikiwemo mabadiliko ya mfumo wa maisha.

Lakini umewahi kujiuliza ni nchi gani inayoongoza kwa watu kujiua? Greenland inatajwa kuwa nchi ya kwanza yenye viwango vikubwa vya watu wanaojiua duniani.

Kimsingi Greenland sio nchi. Bado inachukuliwa kama sehemu ya Ufalme wa Denmark. Hata hivyo, katika siku za karibuni, Greenland imetambuliwa kama ‘nchi huru’, ikiwa na maana kuwa inafanya kazi kama Taifa huru katika maeneo mengi lakini sio katika mambo yote.

Greenland haitambuliki kama nchi rasmi, na huwezi kuiona kwenye orodha ya nchi zenye viwango vikubwa vya kujiua, lakini kiuhalisia inaongoza duniani kwa matukio hayo. Kwenye orodha hiyo, Guyana inatajwa kuwa katika nafasi ya kwanza, kwa wastani watu 44.2 kati ya 100,000. Ikiwa ina maana kuwa kati ya watu 100,000 wa nchi hiyo 44 hujiua kila mwaka.

Hata hivyo, nchini Greenland hali ni mbaya zaidi. Kulingana na ripoti za kuanzia mwaka 1985 hadi 2012, wastani wa  viwango vya kujiua katika nchi hiyo ulikuwa watu 83 kati ya 100,000, ambapo ni karibu mara mbili zaidi ya Guyana.

                                      Polisi wakibeba mwili wa mtu aliyejiua

Greenland imeziacha kwa mbali nchi zote duniani katika matukio makubwa ya watu wake kujiua, na matukio haya hayapungui badala yake yanaongezeka kila mwaka. Kwa kawaida, lazima kuna tatizo ambalo linasababisha hali hiyo kutokea.

Kwa haraka haraka utakuwa na maswali mengi ya kutaka kufahamu kwanini wakazi wa Greenland wanashawishika kuondoa uhai wa maisha yao kwa kiasi hicho. Watu wengi katika nchi hiyo wana kipato kizuri na uhakika wa kupata pensheni nzuri kabla na baada ya kustaafu.

Lakini bado asilimia 20 ya wakazi wa Greenland wamewahi kuthubutu kujiua angalau mara moja katika maisha yao. Hiyo ina maana kuwa watu 2 kati ya 10 wana uwezekano mkubwa wa kujiua.

Swali la kujiuliza ni kwamba nani alaumiwe kwa matukio ya kujiua nchini Greenland? Jibu ni wananchi wenyewe wa Greenland kutokana na sababu zifuatazo:

 Ulevi

Kwa tafsiri nyepesi neno ‘Greenland’ ni ardhi yenye uoto wa kijani. Lakini Greenland tunayoizungumzia hapa haina sifa hizo. Hali ya hewa ya nchi hiyo ni ya baridi nyingi. Sehemu kubwa imefunikwa na barafu na kuzuia mimea kuota.

Kulingana na historia ya nchi hiyo, alikuwepo mtu mmoja maarufu ajulikanaye kama Viking Erik ambaye alilipa jina eneo hilo ‘Greenland’ (ardhi ya kijani). Alifanya hivyo ili kumshawishi mwenzake kuungana naye ili waanzishe makazi katika nchi hiyo.

Ili kufanikisha hazima yake, alichagua jina la ‘Green’land, japokuwa kulikuwa hakuna kitu kama hicho katika nchi hiyo.

Wakati wa majira ya joto, wastani wa jotoridi katika nchi hiyo huwa kati ya juzi joto 0 hadi 10 (10C). Wakati wa majira ya baridi (winter), jotoridi hushuka hadi juzi joto sifuri (0C). Nachelea kusema, Greenland ni kama kisiwa kilichofunikwa kwa barafu.

                       Barafu imefunika sehemu kubwa ya nchi ya Greenland

Ukweli ni kwamba, watu wanaoishi kwenye miji yenye baridi wanaowezekano mkubwa wa kuathirika na ulevi.  Watafiti wanaeleza kuwa kuna uhusiano wa moja kwa moja kati ya idadi ya watu wanaojiua na matumizi ya pombe.

Matumizi ya pombe ni tatizo kubwa la kijamii nchini Greenland. Pombe inasimama kama chanzo kikubwa cha ugomvi wa kifamilia, udhalilishaji wa kingono, ukosefu wa ajira, jambo linalochangia janga kubwa la kujiua katika nchi hiyo.

Ukosefu wa usingizi

Sehemu kubwa ya Greenland iko kwenye eneo la juu kabisa la nchi za Kaskazini, ambazo zinapata kipindi kimoja cha baridi. Pia inapata kipindi kimoja cha joto ambapo jua halipotei (sunset).

Katika eneo hilo la juu kabisa la Kaskazini mwa dunia, nchi zake nyingine zinatawaliwa na vipindi vingi vya baridi na giza hata wakati wa mchana na wakati wa majira ya joto, jua haliondoki angani.

Katika eneo hilo, kuna siku 120 katika mwaka ambapo jua halitui (sun never set), siku 108 katika mwaka jua halichomozi, na siku 137 tu ndiyo hupata mwanga na giza.

Unaweza kufikiri kwamba watu wanaweza kujiua kwasababu hakuna ishara ya jua wakati wa mchana hasa majira ya baridi, lakini la kushangaza ni kwamba tafiti zinaeleza kuwa matukio mengi ya kujiua yanatokea wakati wa majira ya joto.

Wataalamu wanasema wakati wa joto, watu hawapati usingizi wa uhakika jambo linalowaletea msongo wa mawazo na mkazo. Zaidi ya hapo, ukosefu kabisa wa giza unaweza kuathiri mwili wa binadamu na kutengeneza homoni ya ‘serotonin’ ambayo ni mahususi kusawazisha hali na hisia.

Swali la kujiuliza ni rahisi kwa kiasi gani akili zetu zinaweza zikabadilisha mfumo wa kupata usingizi kulingana na hali ya hewa? Hata hivyo sababu zote mbili – ulevi na ukosefu wa usingizi hazichukuliwi kama sababu zenye nguvu.

Kujiua halikuwa tatizo la siku zote nchini Greenland. Matukio ya kujiua yalikuwa machache katika miaka ya 1950. Baada ya kuingia miaka ya 1960, idadi ya matukio ya kujiua iliongezeka maradufu. Sababu za asili kama hali ya hewa zisingeweza kusababisha ongezeko hilo. Lakini zipo sababu zingine…

Uhamiaji na utengano

Greenland haina wakazi wengi ukilinganisha na nchi nyingine duniani. Japokuwa ni miongoni mwa visiwa vikubwa duniani ina wakazi wapatao 56,400 na 16,000 kati ya hao wanaishi katika mji mkuu wa Nuuk. Wakazi wengine wanaishi pembezoni mwa jiji hilo na wengine kwenye vijiji vya mbali ambapo vijiji vingine vina wakazi wasiozidi 50.

                            Makazi ya watu wa mji wa Nuuk, Greenland

Mnamo 1960, Greenland iliamua kutoendelea kuvisaidia vijiji vya mbali. Vijiji hivyo vilikuwa mbali na makao makuu ya Serikali na ikawa vigumu kwa wakazi wake kupata huduma muhimu za kijamii. Watu waliokuwa tayari kuondoka kwenye vijiji hivyo walipelekwa mjini ili kupata makazi na huduma za kijamii.

Lakini watu wengine walikataa kuondoka na kuamua kubaki katika vijiji hivyo. Walitaka kuendelea kulinda utambulisho na nyumba za waasisi wa kabila la Inuit. Kwa bahati mbaya, hawakuwa na chaguo tena zaidi ya kuondoka na kuungana na wenzao waliopo mjini.

Wakazi wa mjini hasa mji mkuu wa Nuuk wanawaona watu hao wanaohamia katika miji yao kama wakimbizi na wakati mwingine wanawatenga katika shughuli muhimu za kiuchumi na  kijamii. Kutokana na kadhia hiyo, wale wanatajwa kuwa ni wakimbizi hujiua kwasababu ya kutengwa na kunyimwa haki za msingi za kuishi.

Hata hivyo, Serikali ya Greenland imechukua hatua mbalimbali kupambana na janga hilo kwa kutengeneza miundombinu ya simu za mkononi kuongeza mawasiliano na kutoa ushauri kwa watu wenye hatari ya kujiua kuendelea na maisha.

Continue Reading

Biashara/Uchumi

Waziri awataka wakulima kutumia mbaazi kwa chakula kukabiliana na anguko la bei

Published

on

Kutokana na kudorora kwa soko la nje la mbaazi, Serikali imewataka wakulima kutafuta na kuimarisha soko la ndani kwa kutumia kama chakula ili kujenga na kuimarisha afya za wananchi.

Msimamo huo wa Serikali umetolewa na Naibu Waziri wa Viwanda, Biashara na Uwekezaji, Eng. Stella Manyanya wakati akijibu swali la Mbunge wa Mtama, Nape Nnauye ambaye alitaka kufahamu mkakati wa Serikali katika kuwatafutia wakulima soko la nje la mbaazi.

Nape amesema kuwa Serikali iliwaahidi wakulima wa mbaazi kuwatafutia soko baada ya wanunuzi wakubwa toka nchi za nje kama India kusitisha mkataba na Tanzania wa kununua zao hilo katika msimu uliopita.

“Msimu uliopita soko la mbaazi lilisababisha kuanguka kwa bei ya mbaazi kutoka Tsh. 2000 (kwa kilo) kwenda mpaka sh.150. Serikali iliahidi hapa Bungeni kwamba itahakikisha kwamba inahangaika kupata soko la kuaminika la zao hili. Sasa mmefikia wapi kupata soko la zao hili?,” ameuliza Mbunge Nape.

Naibu Waziri, Eng. Stella Manyanya amekiri kushuka kwa bei ya mbaazi katika msimu uliopita wa 2016/2017 kwasababu ya kutofikiwa kwa makubaliano ya kibiashara na wadau ambao walikuwa wananunua zao hilo kwa wingi.

“Ni kweli kabisa katika msimu huu ulioisha kulikuwa na hali isiyopendeza katika soko la mbaazi lakini hiyo inatokana na wadau kusitisha manunuzi ya mbaazi toka Tanzania”, amesema Naibu Waziri.

Kutokana na hali hiyo Serikali imewataka wakulima kuachana na soko la nje na kuwekeza nguvu zao katika soko la ndani kwasababu bado bei ya zao hilo ni nzuri katika baadhi ya masoko kinyume na hoja za baadhi ya watu kuwa soko la zao hilo limeporomoka.

“ Tunaendelea kusisitiza hata sisi wenyewe, mbaazi inauzwa mpaka kilo 2400 kwahiyo tusitegemee soko toka nje hata ndani ya nchi bado kuna soko la uhakika”, amesema Naibu Waziri.

             Naibu Waziri wa Viwanda, Biashara na Uwekezaji, Eng. Stella Manyanya

 

Wakati huo huo amewataka watanzania kuchangamkia zao hilo kwasababu lina protini nyingi ambayo inahitajika mwilini. Ameongeza kuwa ikiwa ulaji wa mbaazi utaongezeka nchini, kuna uwezekano wakulima wakafaidika na soko la zao hilo.

“Mbaazi ni chakula ambacho kina protini na hata sisi wenyewe tunaweza tukawa soko kuliko kutegemea soko la watu wa nje”, amesema Naibu Waziri na kuongeza kuwa mbaazi inahitajika sana katika mikoa ya Dodoma na Dar es Salaam ambako wakulima wanaweza kuuza huko ili kujipatia bei nzuri itakayosaidia kuinua kipato.

Msimamo wa Naibu waziri unaonekana kutofautiana na ule wa awali uliotolewa na Waziri wa Viwanda, Biashara na Uwekezaji, Charles Mwijage mwaka jana ambapo aliahidi kuwatafutia wakulima soko la mbaazi kwa nchi zingine kutokana na nchi ya India kuzuia uingizwaji wa zao hilo kutoka Tanzania.

India ilisitisha uungizwaji wa zao hilo tangu mwaka jana kwa kile kinachodaiwa kuwa imezalisha ziada ya mbaazi nchini humo kwa zaidi ya asilimia 30.

Lakini tangu wakati huo hakuna majibu ya uhakika kutoka Serikalini yaliyotolewa kuwakwamua wakulima katika mdororo wa bei ya zao hilo ambalo linategemewa na wakulima wengi hasa wa mikoa ya Arusha na Manyara kama zao la biashara.

Aliyewahi kuwa Naibu Waziri wa Kilimo na Chakula, William Ole Nasha  akihojiwa na wanahabari mwaka jana alikiri India kusitisha manunuzi ya mbaazi na kwamba Serikali inaendelea kutafuta njia mbadala kuwasaidia wakulima.

“Ni ukweli kwamba India ambao ndiyo wanunuzi wakubwa wa mbaazi ya Tanzania wamesitisha kufanya hivyo kutokana na uzalishaji kupanda kwa asilimia 30 nchini humo hivyo kwa sasa hatuna jinsi ya kufanya kuwasaidia wakulima wetu isipokuwa kubuni njia mpya ya kuwasaidia katika msimu ujao wa kilimo”, alinukuliwa Ole Nasha na kuongeza kuwa,

“Moja ya Mbinu hiyo ni kuanza kuwahamasisha watanzania kuanza kutumia mbaazi kama chakula ili kupanua soko la ndani badala ya kutegemea soko la nje”.

                                   Mbaazi ikiwa shambani kabla ya kuvunwa

Bei ya Mbaazi iliimarika katika msimu wa mwaka 2015 ambapo kilo moja ilikuwa ikiuzwa kwa sh. 2,800 hadi 3,000 (sawa na 280,000/300,000 kwa gunia la kilo 100) ambapo ilikuwa neema kwa wakulima na msimu uliofuata wa 2016 uzalishaji uliongezeka zaidi lakini matatizo ya soko yakaanza kujitokeza.

Mpaka kufikia msimu wa 2017, inasemekana bei ilishuka hadi sh. 150 kwa kilo kutokana na mabadiliko ya bei ya kimataifa na kuathiri wakulima wengi wao zao hilo nchini.

Tanzania ni moja ya nchi za Afrika zinazozalisha kwa wingi mbaazi, ambapo asilimia 95 ya zao hilo ilikuwa inauzwa nchini India na sehemu ndogo iliyobaki inatumika kwa chakula.

Continue Reading

Afya

Ni wakati sahihi kwa Tanzania kutumia roboti kwenye matibabu ya binadamu?

Published

on

Licha ya kuimarika kwa huduma za afya nchini China bado wagonjwa wanaoenda kutibiwa katika hospitali nyingi wanalazimika kukaa kwenye foleni kwa dakika kadhaa kabla ya kumuona daktari na kupata matibabu. Lakini hospitali moja katika mji wa Kusini wa Guangzhou imeanza kushughulikia tatizo hilo kwa  kuvumbua mashine mpya ya kompyuta inayotumia roboti kutoa huduma.

Kwa mujibu wa Hospitali ya Kati ya jimbo la  Guangzhoua imejumuisha mfumo huo wa mashine zinazoendeshwa kwa kompyuta katika shughuli zake ikiwemo huduma ya kwanza, vipimo (CT Scans), utunzaji wa kumbukumbu za wagonjwa na usambazaji wa vifaa na dawa.

China ambayo  ni mshindani mkubwa wa Marekani duniani katika ukuaji wa teknolojia hasa ya mashine za kisasa (Artificial intelligence) – inaamini kuwa  matumizi ya roboti yanaweza kupunguza tatizo la uhaba wa madaktari kwenye vituo vya afya na hospitali.

Taarifa za kitabibu za mwaka 2016 zinaeleza kuwa nchini humo madaktari 2 huudumia wagonjwa 1,000 ukilinganisha na Switzerland ambayo ni madaktari 4 kwa wagonjwa 1000 na Uingereza (3/1000). Teknolojia hiyo inatarajiwa kutumika zaidi katika nchi ambazo zina idadi kubwa ya wazee ambao wanahitaji uangalizi wa karibu wa madaktari.

Teknolojia hiyo imevumbuliwa na kutolewa na kamapuni ya Titan Tencent na iFlytek ambazo zinafanya kazi na hospitali hiyo kuunda mifumo ya kompyuta ambayo itafanya kazi ambazo zingefanywa na watu ili kuongeza ufanisi wa utoaji huduma za afya kwa wananchi wa jimbo la Guangzhoua.

Pia wametengeneza program maalum ya mtandao wa WeChat ambayo inawawezesha wagonjwa kuingia kwenye akaunti ya hospitali na kusajili taarifa zao. Mtandao huo umeunganishwa na daktari roboti ‘intelligent doctor’ ambaye anafanya mahojiano na mgonjwa na kushauri vipimo anavyopaswa kufanyika.

Mfumo huo unasaidia wagonjwa kuepukana na foleni ya kuwasubiri madaktari wa kawaida. Mtumiaji wa program hiyo aliyejulikana kwa jina la Zeng aliulizwa maswali 24 kuhusu afya yake. Zeng alifikiri maumivu ya kongosho aliyonayo yanatokana na tatizo la mfumo wa chakula, lakini mashine hiyo ilimuambia anatakiwa kumuona daktari anayeshughulikia magonjwa ya uzazi kwa wanawake.

Taarifa za hospitali hiyo zinaeleza kuwa walitumia karibu miaka 2 kutafiti zaidi ya kumbukumbu  100,000 za dijitali za matibabu ambazo zinaweza kutumika kwa miaka 12 ijayo. Programu hiyo pia imeunganishwa na data zingine milioni 300 kutoka hospitali zingine kutoka 1990 ili kuhakikisha mashine hizo za kompyuta zinafanya kazi ya matibabu kwa ufanisi mkubwa unaofikia asilimia 90 na kutibu zaidi ya magonjwa 200 bila kuwepo daktari wa kawaida.

Pia Hospitali hiyo inatumia utambuzi wa sura kutengeneza mafaili hasa kwa wagonjwa wanaotibiwa kwa mara ya kwanza. Baada ya kurekodi video fupi, mfumo unalinganisha sura ilitochukuliwa kwenye video hiyo na ile iliyopo kwenye mfumo wa taifa wa kutunza kumbukumbu za wananchi.

Licha ya kuanza kutumika kwa mfumo huo mashine za kisasa hasa roboti katika baadhi ya hospitali za China, lakini changamoto inabaki kuwa ni nani atawajibika ikiwa mfumo huo utafanya makosa au utatoa matibabu yasiyoendana na mgonjwa.

Hata hivyo, matumizi ya mfumo huo wa roboti kwenye hospitali yanahitaji daktari wa kawaida kusaini ripoti na maelekezo ya kitabibu.

 

Ni wakati sahihi Tanzania kutumia teknolojia hiyo?

Tanzania kama zilivyo nchi zingine duniani, bado inakabiliwa na uhaba mkubwa wa madaktari ambapo umekuwa ni tatizo sugu kwenye sekta ya afya.

Kulingana na takwimu za Shirika la Afya Duniani (WHO) zinaonyesha kuwa Tanzania bado ina uwiano usioridhisha wa daktari kwa wagonjwa ambapo katika kipindi cha miaka 10 iliyopita ilikuwa katika nafsi ya mwisho duniani kwa kuwa na uwiano wa daktari mmoja kwa wagonjwa 50,000.

FikraPevu imelezwa kuwa kwa sasa uwiano kati ya daktari na wagonjwa nchini ni daktari mmoja kwa wagonjwa 25,000, kiwango ambacho ni kikubwa kuliko uwiano wa Shirika la Afya Duniani (WHO) ambalo linaitaka Tanzania kuwa na daktari mmoja kwa wagonjwa 8,000.

Kulingana na takwimu za Wizara ya Afya, Maendeleo ya Jamii, Jinsia, Wazee na Watoto kwa sasa Tanzania ina upungufu wa madaktari unaofikia zaidi ya asilimia 49. Hadi 2017 upungufu huo ulifikia watumishi wa afya 95,059 ambapo waliopo ni 89,842 ili kukidhi mahitaji yote wanahitajika watumishi 184,901 katika vituo vya afya na zahanati.

Uvumbuzi wa teknolojia hiyo ya kisasa inaweza kuwa mbadala wa tatizo la uhaba wa madaktari nchini lakini changamoto inabaki, kama taifa tumejiandaje kupokea na kutumia mfumo wa roboti kwenye matibabu? Kwasababu mfumo huo unahitaji umakini na rasilimali fedha na watu wa kuendesha mitambo hiyo ya kisasa.

Serikali inashauriwa kushirikiana na wadau mbalimbali kuvumbua teknolojia ya kisasa itakayosaidia kutatua changamoto mbalimbali katika sekta ya afya ili kuhakikisha afya za wananchi zinalindwa na kuboreshwa.

Continue Reading

Must Read

Copyright © 2018 FikraPevu.com