Connect with us

Biashara/Uchumi

OGP yaigharimu serikali. Yashutumiwa kuvuruga  bajeti ya maendeleo

Published

on

Serikali imeshauriwa kuongeza uwazi na uwajibikaji katika mchakato wa kuandaa na utekelezaji wa bajeti kuu ili kuhakikisha wananchi wanapata taarifa muhimu za vipaombele, miradi na maendeleo katika jamii.

Akizungumza katika mdahalo wa bajeti ulioandaliwa na taasisi ya Policy Forum, Afisa Programu kutoka  HakiElimu, Godfrey Boniventura alisema uundaaji wa bajeti tangu ngazi ya kata hadi taifa sio shirikishi jambo linalokwamisha utekelezaji wa vipaumbele vya wananchi.

Alisema kuwa ushirikishwaji mdogo wa wananchi unatokana na serikali kushindwa kuweka wazi bajeti kuu kwenye tovuti ya wizara ya Fedha na Mipango na kutoa vitabu vya bajeti kama sheria ya Bajeti (2014) inavyoagiza ili viwafikie wananchi katika maeneo yao.

Boniventura ambaye alishiriki kwenye utafiti uliofanywa na Shirika la Kimataifa la Ubia wa Bajeti (IBP) juu ya uwazi wa bajeti za nchi mbalimbali duniani mwaka 2017 ulibaini kuwa taarifa muhimu za bajeti ya Tanzania haziwafikii wananchi kwa wakati ambapo ni changamoto katika kukuza uwazi na uwajibikaji serikalini.

“Changamoto ni kwamba vitabu vya bajeti havitolewi kwenye website (tovuti) ya wizara, ukienda sasa hivi mara ya mwisho kilitolewa mwaka wa fedha 2015/2016. Mwaka wa fedha 2016/2017, 2017/2018 havipo kwahiyo ni changamoto kidogo”.

Kulingana na ripoti ya utafiti huo inaeleza kuwa mwaka 2017, Tanzania ilipata alama 10 kati ya 100 ambapo iko chini ya wastani unaotakiwa wa 42 na kujumuishwa kwenye nchi ambazo hazina uwazi kwenye bajeti ya taifa inayotakiwa kuwa wazi kwa wananchi wa kada zote.

Tanzania imeshuka kwa alama 36 ikilinganishwa na mwaka 2015 ambapo ilipata alama 46. Alama za Tanzania zimeshuka kutokana na mabadiliko yaliyofanywa na utafiti huo ambayo yanazitaka nchi ziweke bajeti zao kwenye mtandao (tovuti) kama kigezo muhimu cha uchapishaji wa taarifa za bajeti.

“Matokeo ya uwazi wa mfumo wa bajeti ni mabaya sana kwasababu Tanzania imepata alama 10 kati ya 100 kwa mwaka 2017 sasa kuna tofauti kubwa sana na matokeo ya 2015 ambapo ilikuwa alama 46, hii ni ishara kwamba kuna taarifa nyingi hazikuweza kutolewa”, alisema Boniventura na kuongeza kuwa,

“Taarifa ya msingi ambayo ilitakiwa itolewe kwenye tovuti au kwenye mtandao ni taarifa ya bajeti ya awali lazima kwa viwango vya utafiti ilitakiwa kutolewa mwezi mmoja kabla sasa haikuweza kutolewa”.

Alama hizo zinaiweka Tanzania miongoni mwa nchi zenye fursa chache kwa wananchi kutengeneza bajeti inayoakisi vipaumbele na matakwa yao katika jamii.

Ripoti ya utafiti huo inaeleza kuwa Bunge la Tanzania kupitia kamati za kudumu zimefanya kazi nzuri ya kusimamia mchakato wa kutengeneza bajeti lakini imeonyesha udhaifu wa usimamizi wakati wa utekelezaji wa bajeti.

Ikumbukwe kuwa mwaka 2017, serikali ya Tanzania ilijitoa kwenye Mpango wa Uendeshaji serikali kwa Uwazi (OGP) kwa madai kuwa inafungamana na kanda nyingine ambazo zinatekeleza uwazi na uwajibikaji.

Kauli ya utafiti huo inaungwa mkono na Mbunge wa Kigoma Mjini, Zitto Kabwe ambaye alisema nguvu ya Bunge kusimamia bajeti imepungua ukilinganisha na Bunge la awamu ya nne chini ya Rais mstaafu Jakaya Kikwete kwasababu Serikali imeingilia mamlaka ya Bunge na kuzuia wabunge kujadili kwa uwazi vipaumbele za wananchi.

“Nyingine ambayo tumeiona ni Bunge kutopata taarifa ya utekelezaji wa bajeti ya mara kwa mara. Kwa mujibu wa sheria ya Bajeti ya mwaka 2014 ilikuwa inatakiwa Serikali kila baada ya miezi mitatu kwa maana mara nne kwa mwaka iwe inapeleka taarifa Bungeni juu ya utekelezaji wa bajeti” alisema Zitto na kufafanua kuwa,

“Baadaye kifungu hicho kilibadilishwa mpaka ikawa ni mara mbili kwa mwaka lakini Serikali haifanyi hivyo kwasababu inatakiwa taarifa ipelekwe kwenye kamati ya Bunge ya Bajeti ambayo kwa sasa hivi inaongozwa na mama Hawa Ghasia lakini Serikali haifanyi hivyo. Kwahiyo hivi ni baadhi ya vitu ambavyo vinasababisha vigezo vyetu kushuka kimataifa na sasa hivi katika nchi za Afrika Mashariki sisi ni wa pili kutoka chini tumezidiwa na Burundi tu”

Zitto amesema kama hakuna uwazi katika bajeti ni rahisi kutumia matumizi nje ya bajeti. “Kuna haja kama watanzania na kupitia Bunge na Asasi zisizo za kiserikali kuangalia uwezekano wa kuhakikisha kwamba tunarudi katika mstari na vigezo tulivyokuwa navyo”

Ameongeza kuwa ripoti ya utafiti huo ni muhimu ipelekwe mbele ya kamati ya Bunge ya bajeti ili kuiamsha Serikali kutekeleza wajibu wake katika kuhakikisha uwazi na uwajibikaji unakuwepo kwenye uandaji na utekelezaji wa bajeti.

Kwa upande wake, Mwakilishi kutoka taasisi ya kilimo ya wanawake Tanzania (TAWLAE), Mary Liwa alisema wananchi wanapaswa kuelimishwa na kujengewa uwezo wa kufuatilia mchakato wa bajeti inapoandaliwa na mpaka utekelezaji wake ili kuhakikisha inakidhi matakwa yao na sio maslahi ya wanasiasa.

Naye, Mhadhiri kutoka Chuo Kikuu Cha Dar es Salaam (UDSM), Dkt. Richard Mbunda alishauri kuwa serikali inatakiwa itathimini na kutengeneza mipango na mikakati itakayosaidia matumizi yote kujumuishwa kwenye bajeti kuu ili kuepusha ufisadi kwenye utekelezaji wa miradi ya maendeleo.

Continue Reading
Click to comment

Leave a Reply

Your email address will not be published. Required fields are marked *

Biashara/Uchumi

Wakulima wa mahindi kuunganishwa kwenye mnyororo wa thamani

Published

on

Imeelezwa kuwa kukosekana kwa  teknolojia ya kisasa na masoko ya mazao  ni miongoni mwa changamoto zinazokwamisha  ukuaji wa sekta  ya kilimo nchini. Changamoto hizo zinachochewa na  uwekezaji mdogo wa rasilimali watu na fedha  kwenye huduma muhimu za kilimo.

Kwa kuwa kilimo ni uti wa mgongo wa uchumi wa Tanzania, serikali inawajibika kuwawezesha wakulima nchini kupata pembejeo na teknolojia ya kisasa kuhakikisha wanazalisha mazao yenye ubora yanaweza kushindana kwenye soko la kimataifa.

Kwa kutambua hilo serikali ilianzisha benki ya Maendeleo ya Kilimo Tanzania (TADB) ili kuhakikisha wakulima wanapata fedha kutoka taasisi hiyo kuendesha shughuli zao. Lakini tangu kuanzishwa kwake, benki hiyo haijawafikia wakulima wengi, jambo linalowakosesha fursa ya kupata mikopo na ushauri wa kiteknolojia.

Naibu Waziri wa Fedha na Mipango, Dkt. Ashatu Kijaji amesema  serikali imeitaka benki hiyo kuongeza matawi  ili kuwafikia wakulima wengi ambao wanahitaji mikopo kuongeza tija kwenye kilimo.

Amesema tayari benki hiyo imefika mkoa wa Dodoma na hadi kufikia Juni 30, 2018 itakuwa imefunguliwa ili kuwahudumia wakulima wa kanda ya kati  inajumuisha mikoa ya Dodoma, Singida.

“Baada ya ufunguzi wa ofisi ya Kanda ya Kati kukamilika Benki Itafanya uchambuzi wa fursa zilizopo Kikanda na hivyo kuchukua hatua na taratibu za kufungua ofisi nyingine kulingana na upatikanaji wa rasilimali fedha”, alisema Dkt. Kijaji.

Ameongeza kuwa TADB inatekeleza mpango wa miaka mitano (2017- 2021), wa kusogeza huduma karibu na wateja kwa kuanzisha ofisi za Kikanda katika Kanda ya Kaskazini, Kusini, Kati, Ziwa, Nyanda za Juu Kusini na Zanzibar kwa awamu mbalimbali.

Dkt. Ashatu amesema mikopo itakayotolewa kwa wakulima itatumia mfumo wa makundi; kundi la kwanza litahusisha wakulima wadogo wadogo kwa riba ya asilimia 8- 12, kundi la pili la miradi mikubwa ya kilimo kwa asilimia 12 – 16 kwa mwaka. Kundi la mwisho ni mikopo ya ushirika ambapo riba yake inaendana na hali ya soko la matumizi ya mkopo.

Amebainisha kuwa serikali inafanya majadiliano na wadau wa kilimo ili kupunguza kiwango cha riba ili kuwavutia wakulima wengi kukopa na kufaidika na kuwa sehemu ya ukuaji wa uchumi wa viwanda nchini.

Kwa upande wake, Mkurugenzi Mwendeshaji wa TADB, Thomas Samkyi alisema kukosekana kwa masoko ya mazao ya kilimo ni changamoto nyingine inayorudisha nyuma maendeleo ya sekta ya kilimo nchini.

Katika kutekeleza majukumu ya Benki hiyo, serikali imeanza kutoa huduma kwa kulenga minyororo michache ya ongezeko la thamani katika kilimo cha mahindi kwa kutoa mikopo ya ununuzi wa pembejeo, vifaa na vifungashio vya kisasa vya kuhifadhia mahindi na teknolojia ya uhifadhi wa mahindi ili kukidhi mahitaji ya soko la kimataifa.

“Kwa sasa tumejikita katika mnyororo mzima wa uongezaji wa thamani kuanzia uandaaji wa shambani hadi kwa upatikanaji wa masoko, ikiwemo mahitaji ya uzalishaji wenye tija kwenye sekta nzima ya kilimo kuanzia hatua za awali za utayarishaji wa mashamba.

“Kupima ubora wa udongo na virutubisho vinavyohitajika kwenye uzalishaji wa mahindi, upatikanaji wa pembejeo za kilimo zikiwemo mbegu bora, mbolea, madawa na vifaa na teknolojia mbali mbali za umwagiliaji na fedha kwa ajili ya kulipia gharama mbalimbali za uzalishaji wa mahindi,” alisema.

Samky alisema usaidizi na mikopo itakayotolewa itakuwa kwa ajili ya ujenzi na uboreshaji wa miundombinu ya kilimo katika kuimarisha minyororo ya thamani katika kilimo

“Inajumuisha ujenzi wa miundombinu ya umwagiliaji na mitambo ya umwagiliaji, uchimbaji wa visima vya maji ya umwagiliaji, ujenzi wa mabawa ya uvunaji maji ya mvua, ujenzi wa maghala bora ya kuhifadhia mahindi na ujenzi wa miundombinu ya masoko,” alisema.

Continue Reading

Biashara/Uchumi

RIPOTI YA CAG: Rais Magufuli asisitiza trilioni 1.5 hazijapotea, aitupia lawama mitandao ya kijamii

Published

on

Rais John Magufuli amesema ripoti ya Mdhibiti na Mkaguzi Mkuu wa Serikali (CAG) aliyokabidhiwa haionyeshi upotevu wa trilioni 1.5 na kwamba ni upotoshaji unaofanywa na baadhi ya watu kwenye mitandao ya kijamii una lengo la kuigombanisha Serikali na wananchi.

Kauli ya Rais imekuja ikiwa zimepita siku chache tangu Katibu wa Itikadi na Uenezi wa Chama Cha Mapinduzi kutoa kauli inayofanana na ya Rais kuwa hakuna fedha iliyopotea na kilichopo ni kutokueleweka kwa ripoti ya CAG.

Akizungumza leo muda mfupi baada ya kuwaapisha Majaji wa Mahakama, Ikulu jijini Dar es Salaam, Rais Magufuli amesema aliwasiliana na CAG, Prof. Mussa Assad na kwamba alikiri kuwa hakuna upotevu wa trilioni 1.5 zinazosemekana hazijulikani zilipo.

“Nilikuwa ninasoma baadhi ya mambo mengine wanasema Serikali imeiba trilioni 1.5. Siku moja nikampigia Controller and General Auditor General (Mdhibiti na Mkaguzi Mkuu wa Serikali) mbona kwenye ripoti yako uliyonisomea hapa Ikulu hukunieleza huu wizi wa trilioni 1.5.” amesema Rais Magufuli.

Amesema kama kweli upotevu wa fedha huo ungekuwa umetokea angechukua hatua mapema za kuwafukuza kazi watendaji waliohusika na ufisadi huo lakini kinachoonekana ni upotoshaji unaofanywa kwenye mitandao ya kijamii na kuwaaminisha wananchi kuwa fedha zimeibwa na Serikali.

“Kwasababu ungenisomea hapo siku hiyohiyo ningefukuza watu, kama nimefukuza wakurugenzi watatu siku hiyohiyo kwasababu ya hati chafu, hawa trilioni 1.5 uliwaficha wapi? Nimejaribu kusoma kwenye ripoti yako (ripoti ya Ukaguzi ya CAG) sioni mahali palipoandikwa zimepotea trilioni 1.5. Prof. Assad aliniambia hakuna kitu kama hicho, nikamuuliza Katibu Mkuu akasema hakuna kitu kama hicho.” Ameeleza Rais Magufuli.

Hata hivyo, Rais Magufuli hakufafanua trilioni 1.5 zimetumikaje kama kweli hazijapotea, zaidi ya kuwalaumu watumiaji wa mitandao ya kijamii kutumia uhuru wa kutoa maoni kujadili ripoti ya CAG ambayo inaonesha trilioni 1.5 hazijulikani zimetumikaje.

“Kuna ugonjwa tumeupata Tanzania wa kufikiri kila kinachoandikwa kwenye mitandao ni cha ukweli. Sasa sifahamu huu ugonjwa umetoka wapi? Lakini ni kwasababu hii mitandao hatuicontrol (hatuisimamii) sisi, wako huko wenye mitandao yao, wao interest (maslahi) yao ni kutengeneza biashara hawajali madhara mtakayoyapata.” Amesema Rais.

Kauli ya Rais imeungwa mkono na Naibu Waziri wa Fedha na Mipango, Dkt. Ashatu Kijaji akiwa bungeni Dodoma wakati akitoa tamko la Serikali juu kutoonekana kwa matumizi ya trilioni 1.5 kwenye matumizi ya Serikali kwa mwaka wa fedha wa 2016/2017.

“Kutokana na matumizi ya mfumo huu wa viwango vya Kimataifa vya Uhasibu katika sekta ya umma, napenda kuliarifu Bunge lako Tukufu na Watanzania kwa ujumla kwamba hakuna fedha taslimu ya shilingi trilioni 1.51 iliyopotea au kutumika kwenye matumizi ambayo hayakuidhinishwa na Bunge. Hivyo basi, madai ya baadhi ya watu wasiolitakia mema Taifa letu na Serikali yetu ya Awamu ya Tano hayana msingi wowote wenye mantiki.” Amesema Naibu Waziri.

Amesema wakati CAG akifanya ukaguzi wa mahesabu, Serikali ilikuwa inatekeleza mpango mpya wa kimataifa wa mahesabu katika sekta ya umma (International Public-Sector Accounting Standard IPSAS Accural) na kwamba ndio ulioleta mkanganyiko wa mahesabu.

“Napenda kulitaarifu Bunge lako Tukufu kwamba, kuanzia mwaka 2016/17, Mamlaka ya Mapato Tanzania ilianza rasmi kuyatambua mapato kwa mfumo wa Accrual. Hivyo basi, kati ya mapato haya ya shilingi trilioni 25.3, yalikuwemo pia mapato tarajiwa (receivables) kama mapato ya kodi yenye jumla ya shilingi bilioni 687.3 pamoja na mapato ya kodi yaliyokusanywa kwa niaba ya Serikali ya Mapinduzi ya Zanzibar ya jumla ya shilingi bilioni 203.92 (transfer to Zanzibar).” Amesema Naibu Waziri na kuongeza kuwa,

“Katika uandishi wa taarifa ya ukaguzi, CAG alitumia taarifa za hesabu na nyaraka mbalimbali ikiwa ni pamoja na Taarifa za Utekelezaji wa Bajeti (Budget Execution Report) ambapo hadi kufikia tarehe 30 Juni 2017, mapato yalikuwa jumla ya shilingi trilioni 25.3 na matumizi yalikuwa shilingi trilioni 23.79.”

Naibu Waziri amefafanua kuwa Matumizi ya trilioni 23.79 hayakujumuisha bilioni 697.85 zilizotumika kulipa dhamana na hati fungani za Serikali zilizoiva. Pia Matumizi hayo yalikuwa hayajafanyiwa uhamisho (re-allocation) wakati ukaguzi unakamilika.

Ameongeza kuwa, baada ya kufanya uhamisho jumla ya matumizi yote kwa kutumia Ridhaa za Matumizi (Exchequer issues) yalikuwa shilingi trilioni 24.4. Amedai kuwa trilioni 1.51 zilizodaiwa kutoonekana kwenye matumizi ya Serikali zilitokana na mchanganuo ufuatao;

Katika ripoti ya CAG aliyoitoa hivi karibuni katika ukurasa wa 34 imeelezea kwa undani kuhusu kutoonekana kwa matumizi ya fedha hizo, ambapo aliwataka wabunge kuihoji Serikali ziliko trilioni 1.5 kwasababu katika ukaguzi wake hakubaini zimetumikaje ingawa hakusema zimepotea.

Tangu kutolewa kwa ripoti ya CAG ya ukaguzi wa hesabu za Serikali na mashirika mbalimbali nchini kwa mwaka wa fedha unaoishia June 2017. Mijadala mbalimbali imeendelea kwenye mitandao ya kijamii kuhusu mambo mbalimbali yaliyoibuliwa na CAG ikiwemo kutojulikana kwa matumizi ya trilioni 1.5.

Baadhi ya vyama vikiwemo vya CCM, ACT-Wazalendo na CHADEMA vilitoa maoni yao kuhusu ripoti hiyo.

Mbunge wa Kigoma Mjini, Zitto Kabwe amekuwa alijitokeza kwenye mitandao ya kijamii akisisitiza kuwa ukaguzi wa CAG ulihusisha fedha zilizokusanywa na sio za hati fungani ambazo Serikali imezitolea maelezo.

Continue Reading

Biashara/Uchumi

Ripoti ya CAG kaa la moto. CCM yaibuka kuitetea serikali upotevu trilioni 1.5

Published

on

Kufuatia ripoti ya Mdhibiti na Mkaguzi Mkuu wa Hesabu za Serikali (CAG) kuibua upotevu mkubwa mapato Serikalini wa trilioni 1.5, Chama Cha Mapinduzi (CCM) kimejitokeza kutoa ufafanuzi na kudai fedha hizo hazijapotea bali ni mkanganyiko wa mahesabu ambao haujaeleweka kwa wananchi.

Hatua hiyo ya CCM inakuja siku chache baada ya Kiongozi Mkuu wa Chama cha ACT Wazalendo, Zitto Kabwe kuitaka Serikali itoe maelezo ya kinakuhusu fedha hizo na kuzitaka Kamati za kudumu za Bunge za Hesabu za Serikali (PAC) na ile ya Bajeti kuchunguza upotevu huo ili waliohusika wachukuliwe hatua za kisheria.

Kauli hiyo ya Zitto aliyoitoa mwishoni mwa juma, imeibua mjadala mpana kwenye mitandao ya kijamii ambapo wananchi wanaitaka Serikali itoe ufafanuzi wa fedha hizo zimetumikaje na nani alihusika kuidhinisha malipo hayo ambayo hayapo kwenye bajeti iliyopitishwa na Bunge.

Mapema leo CCM kupitia Katibu wake wa Itikadi na Uenezi, Humphrey Polepole, amejitokeza mbele ya wanahabari kujibu tuhuma hizo na kudai kuwa chama chake kinakubaliana na ripoti ya CAG na mapendekezo aliyoyatoa wanayafanyia kazi ili kuongeza uwajibikaji Serikalini.

“Hivi karibuni kumekuwa na mjadala mkubwa ambao umejitokeza baada ya ripoti ya Mdhibiti na Mkaguzi Mkuu wa Hesabu kuwekwa hadharani. Ni utaratibu mzuri ambao Chama Cha Mapinduzi kimejiwekea na kimeielekeza Serikali katika dhamira njema ni kuhakikisha ukweli na uwazi na shughuli za Serikali unaendelea kuwa bayana wakati wote”, amesema Polepole.

Licha ya Polepole kuikubali ripoti ya CAG aliwatupia lawama wanasiasa akiwemo Mbunge wa Kigoma Mjini, Zitto Kabwe kwamba anaupotosha umma kwa kutoa taarifa za uongo juu ya kile kinachodaiwa ni kutojulikana kwa zilipo trilioni 1.5 ambazo ripoti ya CAG ilihoji.

“Sisi kama chama hatuna tatizo na mtu anayetoa taarifa mbalimbali hadharani; ni uhuru kutoa maoni hadharani lakini sisi tuna tatizo la mtu mwongo anayetoa taarifa za uongo za kuupotosha umma”, amesema Polepole.

                                              Katibu wa Itikadi na Uenezi wa CCM, Humphrey Polepole

Akizungumzia suala la trilioni 1.5, amesema kinachotokea ni kutokueleweka kwa kwa taarifa ya CAG kwasababu vitabu na hesabu za Serikali ziko vizuri na hakuna upotevu wa pesa yoyote na kinachofanyika ni wanasiasa kujenga taharuki kwa wananchi.

“Sasa nianze na trilioni 1.5 maana yake nini, tuoneshane hapa kuwa huyu mtu ni mwongo, mwongo mkubwa. Hesabu zote zimeeleza vizuri kabisa, vitabu vya Serikali vimeeleza vizuri kabisa. Mjue kwamba mtu huyu ni mwongo anatoa taharuki”, amesema Polepole na kuongeza kuwa,

“Ndio maana Mkaguzi na Mdhibiti wa fedha za Serikali amesema hili jambo ni hesabu na kwenye ukaguzi wa hesabu baada ya kuwa ukaguzi umepita yako mambo mnarekebisha ili mambo yakae sawasawa. Imepotea wapi? Hakuna senti tano iliyopotea”.

Amesema kulingana na mfumo mpya wa ukaguzi wa kimataifa unaitaka Serikali inapokuwa inahesabu fedha zake za mapato kuhusisha na fedha ambayo tayari imetolewa kwenye huduma mbalimbali kwa wananchi.

Ameeleza kuwa mfumo wa zamani ilikuwa ni lazima Serikali ihesabu fedha zake ambazo imekusanya tayari na sio zile ambazo ziko kwenye huduma na hazijaingizwa kwenye mapato.

“Matumizi ya Serikali katika mtindo mpya ambao unafuata vigezo vya kimataifa vya ukaguzi wa hesabu za umma unaitaka Serikali inapokuwa inahesabu fedha zake ziliyoingia kuhesabu pia na fedha baada ya kuwa Serikali imetoa huduma. Zamani ilikuwa lazima pesa tuishike mkononi”, amesema Polepole.

Ameendelea kutoa maelezo na kudai kuwa “Tumekusanya trilioni 25.3 pesa ambayo huduma imetoka inatarajiwa tumekwisha kuiingiza ipo. Lakini hii trilioni 25.3 ambayo ni makusanyo ya jumla. Ukitaka kujua makusanyo halisi unachukua pesa halisi unatoa makusanyo tarajiwa”.

Amesema makusanyo tarajiwa ambayo yanapatikana kwenye huduma ambazo Serikali imetoa kwa mwaka 2016/2017 na zilikuwa bado hazijakusanywa ni bilioni 687.3 na trilioni 25.3 ni fedha au mapato ghafi ambayo yanajumuisha fedha halisi na mapato tarajiwa (receiver bonds).

Amebainisha kuwa katika trilioni 25.3 ziko fedha zingine za Serikali ya Zanzibar ambazo zinafikia bilioni 203.92 na kwamba hazijumuishwi kwenye mapato na bajeti ya Tanzania Bara lakini zinatambulika kwenye mfumo wa mapato.

“Ukichukua trilioni 25.3 ukatoa bilioni 687.3, ukatoa bilioni 203.92 utapata 24.4 (trilioni 24.4), hii ndio pesa halisi iliyotumika 2017/2018. Sasa yule Bwana wa chama cha Mbunge mmoja anasema ilitumika kutoka ile trilioni 25.3 ni 23.79 (trilioni) kwahiyo kwenye trilioni 25.3 imetumika 23.79”, amesema Polepole.

Amesema katika trilioni 23.79 wakati CAG anakagua mapato, fedha ya Serikali ilikuwa kwenye hati fungani (unmatured bonds) yenye thamani ya bilioni 697.85 ambapo ikijumlishwa na fedha halisi za trilioni 23.79 unapata trilioni 24.4 ambazo zilikuwa ni makusanyo halisi ya mwaka 2017/2018.

“Nimekueleza mapato na matumizi, ukichukua trilioni 25.3 ukatoa trilioni 23.79 (fedha zilizotumika) utapata 1.5 trilioni ambayo huyu Bwana Zitto anasema imepotea, hesabu hajui”, amesema Polepole.

 

Zitto kushtakiwa

Kutokana na kile kinachodaiwa ni upotoshaji wa ripoti ya CAG kwa wananchi juu ya upotevu wa trilioni 1.5 kulikofanywa na Zitto, CCM kimetaka mwanasiasa huyo achukuliwe hatua za kisheria.

 “Siasa za namna hii ni siasa za hovyo, kauli ya Chama Cha Mapinduzi ni kwamba wale wenye dhamana ya kusimamia sheria wafanye hivyo; mizaha na kuchekacheka na watu wa tabia kama hii ndiyo iliyotufikisha pabaya. Kutoa taarifa za uongo ni kosa katika nchi yetu”, ameshauri Polepole na kuongeza kuwa,

“Tabia hii haivumiliki, wanaosema mambo ya uongo, wanaoleta taharuki kwa watu wetu sheria ichukue mkondo wake”.

Kulingana na Sheria ya Takwimu ya mwaka 2015, inaeleza kuwa mtu yeyote anayetoa taarifa za uongo zenye lengo la kupotosha au kupingana na zile zilizotolewa na mamlaka husika atakabiliwa na adhabu ya kufungwa kifungo kisichopungua miaka 2 au kulipa fidia.

Kwa upande wake, Zitto ameandika katika ukurasa wake wa Facebook kuwa, “Kuna mtu anasema nikamatwe kwa kupotosha Kuhusu TZS trilioni 1.5 zinazohojiwa na CAG. Mimi Kabwe Zuberi Ruyagwa Zitto, Mwenyeji wa Kigoma, Muislam, NAAPA kwamba Serikali ya CCM ya Awamu ya Tano imeshindwa kuonyesha kwa CAG matumizi ya shilingi trilioni 1.5.

Nipo tayari kukamatwa kwa kusema hivyo ( haitafuta ukweli wa ubadhilifu huo ). Nipo tayari kuuwawa kwa kusema hivyo ( mawazo yangu hayatakufa)”.

Continue Reading

Must Read

Copyright © 2018 FikraPevu.com