Connect with us

ELIMU

Mbagala, Dar: Mwalimu mmoja anafundisha watoto 666. Wazazi kuchangishana kuokoa jahazi

Published

on

UHABA wa walimu wa masomo ya sayansi nchini umesababisha mwalimu mmoja wa sayansi katika Shule ya Sekondari Mbagala jijini Dar es Salaam kulazimika kufundisha watoto 666 wa kidato cha kwanza, FikraPevu inaripoti.

Hali hiyo inaelezwa kuchangiwa na mpango wa elimu bure, ambapo kumekuwepo na ongezeko kubwa la uandikishaji wanafunzi, hususan mwaka huu 2017, kuliko idadi ya walimu waliopo.

Mwalimu Bugwema, ambaye ni mkuu wa taaluma shuleni hapo, amesema kwamba, masomo yote manne ya sayansi – Hisabati, Fizikia, Kemia na Baolojia – yana mwalimu mmoja mmoja ambaye analazimika kufundisha watoto wote 666 wa kidato cha kwanza – wavulana 243 na wasichana 423 – waliopo katika mikondo 13.

“Tuna hali mbaya sana kwa masomo ya sayansi kwa kidato cha kwanza mwaka huu, kwa sababu mwalimu mmoja ana takriban vipindi 66 kwa wiki badala ya vipindi 30, jambo ambalo ni mzigo mkubwa,” alisema Mwalimu Bugwema katika kikao cha wazazi kilichofanyika leo hii.

Kaimu Mkuu wa Shule hiyo, Mwalimu Silvia Sebastian, amesema wana changamoto kubwa ya uhaba wa walimu huku idadi ya wanafunzi ikiwa kubwa.

Amesema kwamba, wamepeleka maombi muda mrefu kwa Mkurugenzi wa Manispaa ya Temeke kuomba kuongezewa walimu, hususan wa masomo ya sayansi, lakini bado maombi hayo hayajapatiwa ufumbuzi.

“Kesho mimi na mjumbe mmoja wa Bodi ya Shule tunatarajia kwenda kuomba miadi ya kuonana na Mkurugenzi ili kumweleza mzigo mzito tulionao pamoja na maombi yetu ya kupatiwa walimu wa sayansi, hali ni ngumu sana wazazi na ndiyo maana tumewaita ili tujaribu kuangalia ni namna gani kwa pamoja tunaweza kutatua changamoto hii katika kuwajengea msingi imara watoto wetu,” alisema Mwalimu Sebastian.

Kwa mujibu wa mkuu huyo wa shule, shule hiyo ina jumla ya wanafunzi 1982 na walimu 68 tu, huku wengi wao wakiwa ni wa masomo ya sanaa na biashara.

Kulingana na idadi hiyo, ina maana kwamba wastani wa jumla wa mwalimu kwa wanafunzi ni 1:23, lakini katika uhalisia wake mgawanyo unawaelemea zaidi walimu wa sayansi hata kwa vidato vingine kwa kuwa wako wachache. Walimu wa kidato cha kwanza jumla yako wako 14, ukiwa ni uwiano wa mwalimu mmoja kwa wanafunzi 48.

FikraPevu ilihudhiria mkutano huo ambapo mbele ya wazazi 384, Mwalimu Bugwema amesema kwamba, uhaba wa walimu ni changamoto kubwa inayosababisha kushuka kitaaluma kwa wanafunzi na kwamba hata matokeo ya kidato cha pili kwa mwaka 2016 hayaridhishi.

“”Mwaka 2016 wanafunzi wa kidato cha pili waliofanya mitihani walikuwa 473, lakini waliopata daraja la kwanza walikuwa 21 tu huku wengine 94 wakifeli kwa kupata daraja 0,” alisema.

Aliongeza kwamba, waliopata daraja la pili walikuwa 34, daraja la tatu 55 na daraja la nne walikuwa 249, matokeo ambayo yanakatisha tamaa ingawa alisisitiza kwamba ukosefu wa walimu wa kutosha, hasa wa sayansi, ni changamoto kubwa.

Hali hiyo imewalazimu wazazi waliohudhuria kikao hicho kuamua kwa nia moja kuangalia uwezekano hata wa kuwaajiri walimu 6 wa muda wa masomo ya sayansi kwa kidato cha kwanza ili wafundishe watoto wao kwa gharama zao wenyewe.

Maazimio hayo ya wazazi, ambayo yalifanyika baada ya kuwaomba walimu waondoke kwa kuwa hayawahusu, ni pamoja na kutafuta mwalimu mmoja wa Fizikia, mwalimu mmoja wa Kemia na walimu wawili wawili kwa masomo ya Baolojia na Hisabati.

“Jamani serikali imesema elimu ni bure, lakini kwa changamoto hii wanayokabiliana watoto wetu lazima tutafute namna hata ya kuchangishana tutafute walimu wa sayansi wawafundishe wanetu kwa sababu mpaka sasa serikali bado haijaajiri watumishi, wakiwemo wa sekta hii ya elimu,” walisema wazazi hao katika makubaliano hayo.

Aidha, wamekubaliana pia kugharamia mitihani ya kujipima ya watoto hao walau mara moja kwa mwezi ili kujua uwezo wao na maendeleo.

Kwa kauli moja walimchagua Deodatus Magomba kuongoza Kamati ya Watu Watano itakayosimamia na kuratibu zoezi la kukusanya michango kwa wazazi.

Wajumbe wengine kwenye kamati hiyo ni Mussa Shaaban (Katibu), Ally Said Magani, Salma Mtei na Sarah Mwanginde.

Kamati hiyo inalazimika kuandika muhtasari na kupeleka maombi kwa Mkurugenzi wa Manispaa ya Temeke ili kuridhia wao kama wazazi watafute walimu wa muda kwa gharama zao kufundisha watoto wao hadi hapo serikali itakapoajiri walimu wa kudumu.

Hata hivyo, Mkuu wa Shule hiyo, Mwalimu Sebastian amezitaja changamoto nyingine zinazoikabili shule yake kuwa ni ukosefu wa uzio ambao unasababisha watoto kuzurura ovyo hata nyakati za masomo, jambo ambalo amesema atalikumbusha pindi atakapokutana na Mkurugenzi wa Manispaa.

Kuhusu changamoto ya vyumba vya madarasa, Mwalimu Sebastian amesema wana uhaba mkubwa ingawa kwa sasa jengo jipya litakalokuwa na vyumba vinne linajengwa.

“Idadi ya wanafunzi ni kubwa mno, tumeamua kuwagawa kwa makundi, ambapo kidato cha kwanza na cha tatu wanaingia mchana kwa sababu vyumba havitoshi… kukamilika kwa jengo hilo kutapunguza adha hiyo, lakini bado vyumba zaidi vinahitajika,” alisema.

Awali, Mwalimu Abihudi, ambaye anashughulikia nidhamu, aliwataka wazazi washirikiane kuhusu suala la nidhamu na utoro, ambao unachangia kushuka kwa maendeleo ya kitaaluma shuleni hapo.

“Japo kuna sababu nyingine kama utoro na watoto wenyewe kutokuwa tayari kujifunza, lakini endapo uzio utajengwa utasaidia kuzuia watoto wasitoroke maana ni vigumu kwa hali ya sasa kuwachunga watoto zaidi ya 1,000,” alisema.

Akaongeza: “Suala la nidhamu linaanzia nyumbani kwa sehemu kubwa, mimi mwalimu kazi yangu kumfundisha tu mtoto  na kumlea kitaaluma na kimaadili, lakini wazazi ndio wenye sehemu kubwa ya kujenga nidhamu ya watoto wao. Wahimizeni waachane na makundi na kama mtawalea katika imani ya kidini itasaidia sana kuliko baadhi yenu kutuletea wanenu eti ‘wamewashinda’. Sasa kama ninyi wazazi watoto wenu wamewashinda, mimi mwalimu nitamfanyaje?”

Continue Reading
Advertisement
Click to comment

Leave a Reply

Your email address will not be published. Required fields are marked *

ELIMU

Hamasa ya wazazi kufuatilia maendeleo ya watoto shuleni yaongezeka

Published

on

Elimu bora ina faida kubwa kwa maisha ya kila siku ya wananchi na pia huchangia ukuaji wa uchumi. Kwa kutambua hilo, Serikali nyingi katika nchi zinazoendelea na zile zenye uchumi wa kati zimeweka Elimu kuwa kipaumbele katika mipango ya maendeleo.

Tanzania ni miongoni mwa nchi hizo, na Serikali ya awamu ya tano imeipa kipaumbele sekta ya elimu kwa kuongeza bajeti ya elimu kwa trilioni 2.1 kwa sekta ya elimu katika mwaka wa fedha 2017/18 ukilinganisha na trilioni 1.7 zilizotengwa mwaka 2015/2016.

Lakini mafanikio ya elimu yanategemea wadau mbalimbali kutekeleza wajibu wao ili kufikia lengo la kuwaelimisha watoto ambapo wazazi au walezi ni miongoni mwa wadau hao. Utafiti mpya uliotolewa unaonesha mwamko wa wazazi kufuatilia maendeleo ya wanafunzi na shule umeongezeka ukilinganisha na miaka iliyotangulia.

Taasisi ya Twaweza katika utafiti wake; Elimu bora au bora elimu? Uliotolewa Mei, 2018 unaeleza kuwa Wazazi 7 kati ya 8 wenye watoto wanaosoma shule za msingi ambao ni sawa na asilimia 85 wanasema walikutana na walimu wa watoto wao angalau mara moja au mbili mwaka uliopita – na karibu idadi sawa na hiyo (86%) wanasema walitembelea shuleni kwa watoto wao angalau mara moja katika kipindi hicho hicho (haijaoneshwa kwenye jedwali).

Takwimu hizi zilikusanywa kutoka kwa wahojiwa 1,786 katika awamu ya 23 ya kundi la pili la Sauti za Wananchi, na zilikusanywa kati ya 25 Septemba na 15 Oktoba mwaka 2017 ambapo idadi ya kukutana kwa mzazi na mwalimu imeongezeka kutoka mwaka 2016 hadi 2017.

 

Lakini wazazi wengi wa watoto ambao wanasoma katika shule za msingi wanaamini njia pekee ya kuchangia maendeleo ya watoto wao ni kuwatunza na kuwalea katika maadili sahihi bila kusahau kuwafunza nidhamu watoto wao ili wawe wasikivu kwa walimu wao.

Kaya zenye watoto wanaosoma shule za msingi huwaadhibu watoto wao kama njia mojawapo ya kuusaidia uongozi wa shule (52%),” inaeleza ripoti ya utafiti huo.

Pamoja na hayo, idadi kubwa ya wazazi wanaona wana wajibu wa msingi wa kuhakikisha watoto wao wanajifunza lakini wanafikiri walimu ndio wenye jukumu kubwa la kufanikisha elimu ya watoto.

Utafti huo umeonyesha kwamba wazazi wako tayari kuchangia katika uboreshaji wa mazingira ya walimu ili wafudishe kwa ufanisi na kuwasaidia watoto wao kufanya vizuri katika mitihani.

Mkurugenzi wa Twaweza, Aidan Eyakuze akitoa maoni yake kuhusu utafiti huo, amesema wazazi wameongea kwa uwazi; wanajali zaidi ubora wa elimu kuliko gharama za kuipata elimu hiyo. Inawezekana kwamba mtazamo huu unetokana na changamoto za sasa katika sekta ya elimu kufuatia ongezeko la idadi ya watoto shuleni baada ya kufutwa kwa ada.

Ni vema viongozi wa ngazi zote wakayazingatia maoni haya ya wananchi wakati wa kuandaa na kutekeleza sera za elimu,” amesema Eyakuze.

Mbunge wa zamani wa Bunge la Afrika Mashariki, Dk Perpetua Nderakindo anasema haitakiwi kuitegemea Serikali peke yake katika kuboresha elimu hivyo ni lazima kuwe na ushirikiano wa pamoja na uwajibikaji katika kutengeneza mfumo wa elimu nchini utakaozaa matunda yanayotakiwa katika Taifa.

Dunia ya sasa inahitaji ushirikiano na naamini wazazi wanataka elimu bora kwa watoto wao hivyo ushirikiano, uwajibikaji na uwekezaji ni vya muhimu katika elimu yetu,” anasema Dk Nderakindo.

Hata hivyo, baadhi wanaeleza kuwa usimamizi mzuri wa shule nchini utasaidia kurudisha ubora wa elimu itakayowaandaa vijana kukabiliana na changamoto za ulimwengu wa sasa.

Meneja wa Utafiti na Sera wa asasi ya kiraia ya Haki Elimu, Bonaventure Godfrey amesema suluhisho ya changamoto hizo katika elimu mojawapo ni usimamizi bora wa shule nchini.

Anaeleza kuwa shule zote za msingi na sekondari zikisimamiwa vyema kwa Serikali kuwajibika ipasavyo wananchi au wazazi nao watawajibika.

Continue Reading

Afya

Vyakula hivi vitakulinda dhidi ya athari za kiafya za uchafuzi wa hewa

Published

on

Tunaishi katika ulimwengu unaokabiliwa na athari kubwa za mabadiliko ya hali ya hewa. Moja ya athari hizo ni kuongezeka kwa joto na kupungua kwa mvua katika maeneo mbalimbali. Athari hizi zinagusa moja kwa moja afya ya binadamu.

Ripoti ya mabadiliko ya hali ya hewa ya mwaka 2017 imeonesha kuwa kuongezeka kwa joto kunaathiri afya ya binadamu kwa kiasi kikubwa. Ripoti hiyo inatoka kundi la vyuo mbalimbali na mashirika tofauti ya Umoja wa Mataifa inasema watu wengi wanaathirika na joto pamoja na mlo hafifu sambamba na kusambaa kwa magonjwa.

Moja ya kisababishi cha mabadiliko ya hali ya hewa ni uchafuzi wa anga. Uchafuzi wa anga ni kuchanganyika kwa hewa asili katika anga na vitu kama vile moshi, majivu, gesi za kemikali katika hali na kiwango ambacho huathiri sifa ya hewa na kusababisha madhara kwa binadamu na viumbe vingine.

Baadhi ya vitu na vitendo huathiri vibaya anga letu. Baadhi ya vitu hivyo ni kama gesi na moshi unaotoka kwenye viwanda, moshi kutoka kwenye magari, marashi, dawa ya kuuwa wadudu shambani na kadhalika.

Lakini umewahi kujiuliza kuwa aina ya chakula unachokula kinaweza kukusaidia kukabiliana na athari za kiafya zinazotokana na uchafuzi wa hewa?

Wanasayansi katika utafiti wao uliotolewa hivi karibuni, wanaeleza ulaji wa chakula cha Mediterania ( Mediterranean diet) chenye matunda mengi, mbogamboga, nafaka isiyokobolewa, samaki, maharage jamii ya soya, mafuta ya mizeituni na mayai yanaweza kuwalinda watu dhidi ya athari za afya zinazotokana na uchafuzi wa hewa.

Wanasayansi hao kutoka Shule kuu ya Udaktari ya NYU ya Marekani, walichambua data za watu takribani 550,000 wenye wastani wa umri wa miaka 62 kwa miaka zaidi ya 17 ambapo waliwapanga watu hao kwenye makundi kulingana na ulaji wao unaoendana na chakula cha Mediterania na kulinganisha na muda waliokaa kwenye hewa iliyochafuliwa.

Walibaini kuwa watu ambao walizingatia kula vyakula vilivyotajwa hapo juu walikuwa na uwezekano mkubwa wa kuepuka magonjwa na vifo vinavyotokana na uchafuzi wa hali ya hewa. Magonjwa hayo ni yale ya mfumo wa upumuaji, moyo na kansa.

                                   Vyakula  jamii ya Mediterania

Vyakula hivyo jamii ya Mediterania vina uwezo mkubwa wa kukabiliana na vimelea vya maambukizi ya magonjwa kwa mtu ambaye atazingatia kwa usahihi kutumia katika maisha yake.

Uchafuzi wa hewa unasababisha athari mbaya za kiafya kupitia hewa ukaa na mlo wa Mediterania una virutubisho muhimu kupambana na vimelea vya magonjwa,” anasema Mwandishi Mtafiti wa utafiti huo, Chris Lim wa Chuo cha NYU.

Lim anasema vyakula vya aina nyingine vinaweza kusaidia kukabiliana na athari hiyo. “Nilipoangalia kila mchanganyiko wa chakula cha Mediterania, kina matunda, mbogamboga na mafuta yanayoweza kupambana na athari za hewa chafu,” anasema.

Utafiti kuhusu ulaji kama unaweza kuzuia athari za kiafya za uchafuzi wa hewa bado haujahakikiwa na kukubalika kisayansi. Lakini utafiti huo sio wa kwanza kutafuta uhusiano wa mlo na athari za kiafya za uchafuzi wa hali ya hewa.

Wakala wa Uhifadhi wa Mazingira wa Marekani (U.S. Environmental Protection Agency (EPA)) unatafiti kama mlo unaweza kumlinda mtu dhidi ya athari za uchafuzi wa mazingira. Pia wanatafiti ili kujiridhisha kama virutubisho hivyo vinaweza kutumika badala ya dawa za kitabibu na kwa kiasi gani mtu anatakiwa apate virutubisho hivyo kumhakikishia usalama dhidi ya uchafuzi huo.

Hata hivyo, bado watu wanashauriwa kutumia zaidi matunda na mbogamboga kwenye milo yao ya kila siku ili kupata faida mbalimbali za kiafya.

Continue Reading

ELIMU

Sababu 6 zinazothibitisha kwanini kukosolewa ni jambo zuri

Published

on

Mark Thomas anasema, kukosolewa kunaweza kuwa kitu kizuri bila kujali imetoka kwa mtu wa aina gani au anayefanya kazi gani.

Kukubali kukosolewa yaweza kuwa jambo gumu sana. Katika nafasi fulani katika ulimwengu huu unaotegemea mawazo na maoni, utakutana na mtu yeyote (anaweza kuwa mteja, hadhira au hata msomaji tuu) ambaye atataka kukwambia namna ya kufanya mambo yako kwa namna nzuri zaidi.

Yaweza kuwa vigumu kukabiliana na hali hiyo; ukizingatia kwamba hakuna mtu anayependa kuambiwa anakosea.

Sio wakati wote kukosolewa ni kubaya kwasababu wakati mwingine unaweza kutumia kukosolewa huko katika kujiboresha kitaaluma. Fahamu sababu sita zinazothibitisha kuwa kukosolewa ni jambo zuri:

Kukosolewa ni namna ya mawasiliano

Inapotokea mtu anakukosoa inamaanisha kwamba anataka kukupa mrejesho kuhusu huduma unayotoa na hii inaweza kuwa nafasi nzuri ya kujifunza kuhusu watu unaofanya nao kazi na jinsi ya kuwafanya wawe wateja wanaorizika na kazi yako.

Chukua muda kufikiria kile wanachokisema watu kabla hujajibu chochote, maana kwenye biashara au kufanya kazi na mtu ambaye yupo tayari kukosolewa na kufanyia kazi kile anachoambiwa humaanisha pande zote mbili zinaweza kufanya kazi kwa pamoja kufikia mafanikio mazuri. Uzalishaji unamaanisha kujua kile ambacho wateja wako wanataka.

 

Mrejesho hukusaidia kuboresha huduma zako

Unapodhani kwamba unachokifanya kipo sawa lakini hupati mrejesho wowote kutoka kwa watu, unakuwa na uhakika kiasi gani kama unachokifanya kina uzuri wowote? Haijalishi unajishughulisha na nini, kusikiliza na kufanyia kazi mrejesho unaoupata kutoka kwa wateja wako kutakusaidia kujua kipi ni kizuri na kipi kiboreshwe zaidi.

Tumia taarifa unazozipata kuboresha kile unachokifanya, inaweza kuwa vigumu kusikiliza kauli hizo zinazoumiza lakini itafanya unachokizalisha kiwe imara katika uzalishaji wake.

 

Hukufanya ufikirie kuhusu utendaji kazi wako

Kukosolewa kunakojenga huweza kukufanya uachane na utendaji mbovu na kuhamia kwenye mzuri. Jaribu kuwa na malengo na chukulia kile unachokizalisha kama vile sio cha kwako.

Hii inaweza kuwa ngumu hasa pale ambapo unahusika kwa kiwango kikubwa kwenye kile unachokifanya, lakini ukijaribu kufikiria zaidi unaweza kugundua namna ambavyo utaweza kuboresha namna ya utendaji kazi wako na kuzuia kushindwa kwa namna yoyote ile wakati wa kazi.

Jaribu kuangalia kama kuna taarifa yoyote ya ziada unayoihitaji? Je, kuna kitu umekisahau wakati ulipouanza huo mradi? Je, kazi inaweza kumalizika kwa muda uliopangwa awali?.

 

Kukosolewa kunakofaa kunaweza kukuletea manufaa

Fikiria pale inapotokea ukapata mteja ambaye yupo tayari kukwambia namna ya kumuhudumia vizuri; na wewe tuu ndio ukawa na taarifa hizi.

Hii hukuweka katika nafasi nzuri kwenye soko kuliko mtu mwingine yeyote na huweza kutumika siku za usoni ili kuboresha vitu na kuvipata kwa haraka. Jitahidi kutafuta taarifa hizi kutoka kwa wateja wako na kuwafanya wawe wazi kwako kuhusu kile wanachokitaka.

 

Tumia lugha nzuri, kusababisha suluhu

Lugha unayoitumia kujibu pale unapokosolewa ni ya muhimu sana. Jitahidi kuepusha ugomvi katika kujibu kwako. Badala yake badilisha kujibu kwako kuwa katika mazungumzo kuhusu namna ya kulikabili tatizo.

Hii itakufanya ubaki kwenye nafasi nzuri katika kazi yako na hautapoteza muda mwingi kuwaza kuhusu nini kifanyike ili kurekebisha mambo.

Yaweke maneno yako katika vitendo ili kuonesha kwamba unakubali kukosolewa, toa mrejesho wako kwa namna nzuri na fanikisha kukamilisha kazi yako.

 

Usichukulie kukosolewa kama shambulio binafsi

Inapotokea mtu hajaipenda kazi yako kwa mara ya kwanza usichukulie kwamba mtu huyo anakuchukia.

Hata pale unapokosolewa kwa kuonewa usiwe mwepesi kujibu kwa haraka na kwa hasira maana unaweza kuharibu uhusiano wako wa kazi na mtu huyo na inaweza kukuharibia sifa nzuri uliyonayo kwenye soko.

Kuna wakati kukosolewa kunaweza kuonekana kama shambulio binafsi, na wakati mwingine utakuwa sahihi kuwaza hivi. Tambua kwamba watu hukosea hivyo ni muhimu kukumbuka kutoruhusu maoni ya watu kukukasirisha.

Hata hivyo mtu makini anaweza kupokea kukosolewa kwa aina yoyote ile na akatoa mrejesho mzuri hata kama kukosolewa kwake kumekuwa ni shambulio binafsi kwake.

Watu wa aina hii wanaweza kutumia nafasi hiyo kwa manufaa yao, na kama itashindikana kabisa vunja mkataba wa kufanya kazi na mtu huyo kwa namna nzuri na kuacha sifa yako katika soko ikiwa bado ni nzuri.

Continue Reading

Must Read

Copyright © 2018 FikraPevu.com