Connect with us

ELIMU

Mtwara: Wanafunzi Mtiniko Sekondari wafeli kabla ya mtihani. Miaka 10 hawana walimu wa Hisabati na Fizikia

Published

on

WANAFUNZI wa Shule ya Sekondari Mtiniko, Halmashauri ya Mji wa Nanyamba mkoani Mtwara huanza kufanya mitihani wakiwa tayari wamefeli masomo mawili kati ya saba yanayohitajika.

Kimsingi, wanafunzi hao huingia katika vyumba vya mitihani ya masomo ya Hisabati na Fizikia wakiwa tayari na majibu ya kufeli kutokana na kukosa walimu tangu kuanzishwa kwa shule hiyo mwaka 2007.

Uchunguzi wa FikraPevu umebaini kuwa hiyo ni moja ya sababu zilizofanya shule hiyo ya Kata ya Mtiniko kufanya kushika mkia katika matokeo ya mtihani wa kipimo wa kidato cha pili taifa mwaka 2016.

Wanafunzi wa kidato cha pili Shule ya Sekondari Mtiniko mkoani Mtwara wakiwa darasani.

Shule hiyo ambayo iko zaidi ya kilometa 45 kusini-mashariki mwa Mji wa Mtwara ilikuwa na watahiniwa 144 kati ya wanafunzi 150 waliosajiliwa, ambapo 55 pekee ndiyo walioweza kufaulu.

Uongozi wa shule walonga

Jengo mojawapo katika Shule ya Sekondari Mtiniko mkoani Mtwara.

“Tangu shule ianze mwaka 2007 haijawahi kuwa na mwalimu wa Hisabati na Fizikia, hii ndiyo kusema kabla ya mtihani wanafunzi tayari wanakuwa wamefeli masomo hayo mawili, shule ina walimu 19 lakini watatu kati yao wapo masomoni, tuna upungufu wa walimu watano, kati yao watatu wa Hisabati na wawili wa Fizikia,” Lwitiko Mwakabende, Makamu Mkuu wa Shule hiyo aliiambia FikraPevu.

Mwalimu Mwakabende anasema kuwa, changamoto nyingine iliyosababisha shule hiyo kuingia katika shule 10 zilizofanya vibaya ni wanafunzi 22 ambao walifanya mitihani hiyo wakiwa hawajui kusoma wala kuandika Kiswahili, wakiwa ni miongoni mwa wanafunzi 89 ambapo kati yao 43 wavulana na 49 wasichana waliofeli mtihani huo.

“Unaweza kujiuliza inawezekanaje mwanafunzi asiyejua kusoma na kuandika Kiswahili alifaulu mtihani wa darasa la saba…tuliwapokea wanafunzi 150, baada ya upembuzi tukagundua kuwa 22 kati yao walikuwa mbumbumbu, lakini tuliendelea kuwafundisha.

“Kama alishindwa kujua kusoma na kuandika Kiswahili kwa miaka saba, hivi kweli tunataraji ndani ya miaka miwili ajue kusoma na kuandika Kiingereza? Sidhani kama kuna muujiza wa kufanikisha hilo,” anasisitiza Mwakabende.

Mwalimu huyo anaongeza kwamba, katika wanafunzi waliofanya mtihani wa kidato cha pili mwaka 2016, kulikuwa na watoro 75, ambapo 45 kati yao ni watoro wa kudumu na 30 watoro wa rejareja, lakini walifanya mtihani huo na kufeli.

“Wanafunzi sita walishindwa kufanya mtihani kutokana na utoro, watatu kati yao walipata mimba… kuna wanafunzi ambao utayari wao ni mdogo kuendelea na shule lakini wazazi nyumbani ni wakali, na katika hali ya ya kuwakomoa wazazi walichokifanya ni kuunda makundi ya kufanya vibaya mtihani ili wasiendelee na shule, na kweli kundi hilo lote limeanguka,” anasisitiza.

Ameieleza FikraPevu kwamba, walimu waliyabaini hayo baada ya mtihani kumalizika na wao kupata taarifa kutoka kwa wanafunzi wengine juu ya uwepo wa kundi la wanafunzi lililojipanga kufanya vibaya ili wasiendelee na shule.

“Shule hii inahudumia wanafunzi wa kata mbili ya Mtiniko na Mtimbwilimbi, wapo wanafunzi wengine wanatoka mbali sana, kwahiyo utakuta mwanafunzi hafiki shule kwa madai baiskeli iliharibika.”

Aidha, aliiambia FikraPevu kwamba, umbali huo pia unagharimu wanafunzi kwa sababu hata wakitoka shule saa nane mchana, hadi kufika nyumbani ni jioni huku wakiwa wameshinda na njaa.

Wanafunzi nao wazungumza

Sharafi Lihundu, mwanafunzi wa kidato cha tatu shuleni hapo anakiri kuwa ukosefu wa walimu wa Hisabati na Fizikia umechangia shule hiyo kufanya vibaya.

“Hatuna mwalimu wa Hisabati na Fizikia lakini tunalazimika kufanya mitihani ya masomo hayo, ni vigumu kufaulu,” anaeleza Lihundu.

Mwanafunzi mwingine, Zulepha Mjinga, ambaye ni mmoja wa waliofeli, anasema utoro ndio uliomfanya akafeli huku akibainisha kwamba, hali hiyo ilisababishwa uduni wa maisha nyumbani kwao.

“Kuna wakati nililazimika kutokwenda shule kwa sababu nilikosa chakula nyumbani, ninaishi na bibi hivyo nilikuwa nafanya vibarua ili tupate chakula,” aliiambia FikraPevu.

Uongozi wa Kijiji unasemaje?

Baadhi ya wanafunzi wa Shule ya Sekondari Mtinikio mkoani Mtwara wakitoka darasani.

Mwenyekiti wa Kijiji cha Mbambakofi ilipo shule hiyo, Hamis Dadi, anasema sababu za kufanya vibaya zinatokana na shule za msingi kushindwa kuwajengea msingi imara wanafunzi hao.

“Matokeo mabaya yanachangiwa na wanafunzi kukosa msingi imara katika shule za msingi kutokana na changamoto lukuki zinazozikabili shule hizo, zikiwemo uhaba wa walimu,” anasema mwenyekiti huyo.

Wazazi nao wakiri

Rehema Ismail ni mmoja wa wazazi wenye watoto waliopo sekondari, lakini anakiri kwamba hajawahi kufuatilia maendeleo ya mwanaye kutokana na kulelewa na baba yake.

“Matokeo mabaya yanasabishwa na watoto kulelewa na mzazi mmoja, mfano mimi mwanangu simfuatilii kwa sababu anakaa na baba yake baada ya kuachana,” anasema Rehema.

Kwa upande wake, Mohamed Hamad, anasema kama mzazi akielimishwa kutambua umuhimu wa elimu kwa mtoto ni rahisi kufuatilia maendeleo ya watoto shuleni.

“Wazazi mkituelimisha sasa tunaelimika, siyo kama miaka ya 1980, sababu za utoro ni wazazi hatujawa tayari, na wanafunzi wenyewe ukiwaambia wasome wanasema ‘kichwani hamna kitu’ na hata wale wanaokwenda hatujui kama wanafika shuleni,” anasema Hamad.

Mkurugenzi azungumza

Kaimu Mkurugenzi wa Halmashauri ya Mji wa Nanyamba ambaye pia ni Ofisa Elimu Sekondari, Bumi Kasege, anakiri kwamba wamekuwa wakikumbana na chagamoto ya wanafunzi wasiojua kusoma, kuhesabu na kuandika huku baadhi wakisoma neno moja moja na wengine wakishindwa kabisa.

Aliiambia FikraPevu kwamba, sababu hiyo inachangiwa na aina ya mtihani wenyewe kutokana na kuwa na maswali ya kuchagua na kuweka kivuli pekee, hivyo mwanafunzi mwingine anaweza kuibia kwa wenzake au kubahatisha na kufaulu.

“Inatokana na aina ya mtihani, mtoto anaweza akawa amekaa karibu na wenye uwezo sababu unakuta maswali yote ni ya kuchagua na kuweka kivuli, kwahiyo anaweza akaangalia kwa mwenzake na pengine ikawa ni bahati yake anabahatisha akapatia,” anasema Kasege.

Aidha, alikiri uwepo wa uhaba wa walimu wa masomo ya sayansi, kama Hisabati, Kemia na Fikizia pamoja na Biashara.

Ameiambia FikraPevu kwamba, halmashauri hiyo inahitaji walimu wa sayansi wapatao 86 lakini waliopo ni 31 na walimu wa masomo ya biashara wanaohitajika ni wanne.

Continue Reading
Click to comment

Leave a Reply

Your email address will not be published. Required fields are marked *

ELIMU

Hamasa ya wazazi kufuatilia maendeleo ya watoto shuleni yaongezeka

Published

on

Elimu bora ina faida kubwa kwa maisha ya kila siku ya wananchi na pia huchangia ukuaji wa uchumi. Kwa kutambua hilo, Serikali nyingi katika nchi zinazoendelea na zile zenye uchumi wa kati zimeweka Elimu kuwa kipaumbele katika mipango ya maendeleo.

Tanzania ni miongoni mwa nchi hizo, na Serikali ya awamu ya tano imeipa kipaumbele sekta ya elimu kwa kuongeza bajeti ya elimu kwa trilioni 2.1 kwa sekta ya elimu katika mwaka wa fedha 2017/18 ukilinganisha na trilioni 1.7 zilizotengwa mwaka 2015/2016.

Lakini mafanikio ya elimu yanategemea wadau mbalimbali kutekeleza wajibu wao ili kufikia lengo la kuwaelimisha watoto ambapo wazazi au walezi ni miongoni mwa wadau hao. Utafiti mpya uliotolewa unaonesha mwamko wa wazazi kufuatilia maendeleo ya wanafunzi na shule umeongezeka ukilinganisha na miaka iliyotangulia.

Taasisi ya Twaweza katika utafiti wake; Elimu bora au bora elimu? Uliotolewa Mei, 2018 unaeleza kuwa Wazazi 7 kati ya 8 wenye watoto wanaosoma shule za msingi ambao ni sawa na asilimia 85 wanasema walikutana na walimu wa watoto wao angalau mara moja au mbili mwaka uliopita – na karibu idadi sawa na hiyo (86%) wanasema walitembelea shuleni kwa watoto wao angalau mara moja katika kipindi hicho hicho (haijaoneshwa kwenye jedwali).

Takwimu hizi zilikusanywa kutoka kwa wahojiwa 1,786 katika awamu ya 23 ya kundi la pili la Sauti za Wananchi, na zilikusanywa kati ya 25 Septemba na 15 Oktoba mwaka 2017 ambapo idadi ya kukutana kwa mzazi na mwalimu imeongezeka kutoka mwaka 2016 hadi 2017.

 

Lakini wazazi wengi wa watoto ambao wanasoma katika shule za msingi wanaamini njia pekee ya kuchangia maendeleo ya watoto wao ni kuwatunza na kuwalea katika maadili sahihi bila kusahau kuwafunza nidhamu watoto wao ili wawe wasikivu kwa walimu wao.

Kaya zenye watoto wanaosoma shule za msingi huwaadhibu watoto wao kama njia mojawapo ya kuusaidia uongozi wa shule (52%),” inaeleza ripoti ya utafiti huo.

Pamoja na hayo, idadi kubwa ya wazazi wanaona wana wajibu wa msingi wa kuhakikisha watoto wao wanajifunza lakini wanafikiri walimu ndio wenye jukumu kubwa la kufanikisha elimu ya watoto.

Utafti huo umeonyesha kwamba wazazi wako tayari kuchangia katika uboreshaji wa mazingira ya walimu ili wafudishe kwa ufanisi na kuwasaidia watoto wao kufanya vizuri katika mitihani.

Mkurugenzi wa Twaweza, Aidan Eyakuze akitoa maoni yake kuhusu utafiti huo, amesema wazazi wameongea kwa uwazi; wanajali zaidi ubora wa elimu kuliko gharama za kuipata elimu hiyo. Inawezekana kwamba mtazamo huu unetokana na changamoto za sasa katika sekta ya elimu kufuatia ongezeko la idadi ya watoto shuleni baada ya kufutwa kwa ada.

Ni vema viongozi wa ngazi zote wakayazingatia maoni haya ya wananchi wakati wa kuandaa na kutekeleza sera za elimu,” amesema Eyakuze.

Mbunge wa zamani wa Bunge la Afrika Mashariki, Dk Perpetua Nderakindo anasema haitakiwi kuitegemea Serikali peke yake katika kuboresha elimu hivyo ni lazima kuwe na ushirikiano wa pamoja na uwajibikaji katika kutengeneza mfumo wa elimu nchini utakaozaa matunda yanayotakiwa katika Taifa.

Dunia ya sasa inahitaji ushirikiano na naamini wazazi wanataka elimu bora kwa watoto wao hivyo ushirikiano, uwajibikaji na uwekezaji ni vya muhimu katika elimu yetu,” anasema Dk Nderakindo.

Hata hivyo, baadhi wanaeleza kuwa usimamizi mzuri wa shule nchini utasaidia kurudisha ubora wa elimu itakayowaandaa vijana kukabiliana na changamoto za ulimwengu wa sasa.

Meneja wa Utafiti na Sera wa asasi ya kiraia ya Haki Elimu, Bonaventure Godfrey amesema suluhisho ya changamoto hizo katika elimu mojawapo ni usimamizi bora wa shule nchini.

Anaeleza kuwa shule zote za msingi na sekondari zikisimamiwa vyema kwa Serikali kuwajibika ipasavyo wananchi au wazazi nao watawajibika.

Continue Reading

Afya

Vyakula hivi vitakulinda dhidi ya athari za kiafya za uchafuzi wa hewa

Published

on

Tunaishi katika ulimwengu unaokabiliwa na athari kubwa za mabadiliko ya hali ya hewa. Moja ya athari hizo ni kuongezeka kwa joto na kupungua kwa mvua katika maeneo mbalimbali. Athari hizi zinagusa moja kwa moja afya ya binadamu.

Ripoti ya mabadiliko ya hali ya hewa ya mwaka 2017 imeonesha kuwa kuongezeka kwa joto kunaathiri afya ya binadamu kwa kiasi kikubwa. Ripoti hiyo inatoka kundi la vyuo mbalimbali na mashirika tofauti ya Umoja wa Mataifa inasema watu wengi wanaathirika na joto pamoja na mlo hafifu sambamba na kusambaa kwa magonjwa.

Moja ya kisababishi cha mabadiliko ya hali ya hewa ni uchafuzi wa anga. Uchafuzi wa anga ni kuchanganyika kwa hewa asili katika anga na vitu kama vile moshi, majivu, gesi za kemikali katika hali na kiwango ambacho huathiri sifa ya hewa na kusababisha madhara kwa binadamu na viumbe vingine.

Baadhi ya vitu na vitendo huathiri vibaya anga letu. Baadhi ya vitu hivyo ni kama gesi na moshi unaotoka kwenye viwanda, moshi kutoka kwenye magari, marashi, dawa ya kuuwa wadudu shambani na kadhalika.

Lakini umewahi kujiuliza kuwa aina ya chakula unachokula kinaweza kukusaidia kukabiliana na athari za kiafya zinazotokana na uchafuzi wa hewa?

Wanasayansi katika utafiti wao uliotolewa hivi karibuni, wanaeleza ulaji wa chakula cha Mediterania ( Mediterranean diet) chenye matunda mengi, mbogamboga, nafaka isiyokobolewa, samaki, maharage jamii ya soya, mafuta ya mizeituni na mayai yanaweza kuwalinda watu dhidi ya athari za afya zinazotokana na uchafuzi wa hewa.

Wanasayansi hao kutoka Shule kuu ya Udaktari ya NYU ya Marekani, walichambua data za watu takribani 550,000 wenye wastani wa umri wa miaka 62 kwa miaka zaidi ya 17 ambapo waliwapanga watu hao kwenye makundi kulingana na ulaji wao unaoendana na chakula cha Mediterania na kulinganisha na muda waliokaa kwenye hewa iliyochafuliwa.

Walibaini kuwa watu ambao walizingatia kula vyakula vilivyotajwa hapo juu walikuwa na uwezekano mkubwa wa kuepuka magonjwa na vifo vinavyotokana na uchafuzi wa hali ya hewa. Magonjwa hayo ni yale ya mfumo wa upumuaji, moyo na kansa.

                                   Vyakula  jamii ya Mediterania

Vyakula hivyo jamii ya Mediterania vina uwezo mkubwa wa kukabiliana na vimelea vya maambukizi ya magonjwa kwa mtu ambaye atazingatia kwa usahihi kutumia katika maisha yake.

Uchafuzi wa hewa unasababisha athari mbaya za kiafya kupitia hewa ukaa na mlo wa Mediterania una virutubisho muhimu kupambana na vimelea vya magonjwa,” anasema Mwandishi Mtafiti wa utafiti huo, Chris Lim wa Chuo cha NYU.

Lim anasema vyakula vya aina nyingine vinaweza kusaidia kukabiliana na athari hiyo. “Nilipoangalia kila mchanganyiko wa chakula cha Mediterania, kina matunda, mbogamboga na mafuta yanayoweza kupambana na athari za hewa chafu,” anasema.

Utafiti kuhusu ulaji kama unaweza kuzuia athari za kiafya za uchafuzi wa hewa bado haujahakikiwa na kukubalika kisayansi. Lakini utafiti huo sio wa kwanza kutafuta uhusiano wa mlo na athari za kiafya za uchafuzi wa hali ya hewa.

Wakala wa Uhifadhi wa Mazingira wa Marekani (U.S. Environmental Protection Agency (EPA)) unatafiti kama mlo unaweza kumlinda mtu dhidi ya athari za uchafuzi wa mazingira. Pia wanatafiti ili kujiridhisha kama virutubisho hivyo vinaweza kutumika badala ya dawa za kitabibu na kwa kiasi gani mtu anatakiwa apate virutubisho hivyo kumhakikishia usalama dhidi ya uchafuzi huo.

Hata hivyo, bado watu wanashauriwa kutumia zaidi matunda na mbogamboga kwenye milo yao ya kila siku ili kupata faida mbalimbali za kiafya.

Continue Reading

ELIMU

Sababu 6 zinazothibitisha kwanini kukosolewa ni jambo zuri

Published

on

Mark Thomas anasema, kukosolewa kunaweza kuwa kitu kizuri bila kujali imetoka kwa mtu wa aina gani au anayefanya kazi gani.

Kukubali kukosolewa yaweza kuwa jambo gumu sana. Katika nafasi fulani katika ulimwengu huu unaotegemea mawazo na maoni, utakutana na mtu yeyote (anaweza kuwa mteja, hadhira au hata msomaji tuu) ambaye atataka kukwambia namna ya kufanya mambo yako kwa namna nzuri zaidi.

Yaweza kuwa vigumu kukabiliana na hali hiyo; ukizingatia kwamba hakuna mtu anayependa kuambiwa anakosea.

Sio wakati wote kukosolewa ni kubaya kwasababu wakati mwingine unaweza kutumia kukosolewa huko katika kujiboresha kitaaluma. Fahamu sababu sita zinazothibitisha kuwa kukosolewa ni jambo zuri:

Kukosolewa ni namna ya mawasiliano

Inapotokea mtu anakukosoa inamaanisha kwamba anataka kukupa mrejesho kuhusu huduma unayotoa na hii inaweza kuwa nafasi nzuri ya kujifunza kuhusu watu unaofanya nao kazi na jinsi ya kuwafanya wawe wateja wanaorizika na kazi yako.

Chukua muda kufikiria kile wanachokisema watu kabla hujajibu chochote, maana kwenye biashara au kufanya kazi na mtu ambaye yupo tayari kukosolewa na kufanyia kazi kile anachoambiwa humaanisha pande zote mbili zinaweza kufanya kazi kwa pamoja kufikia mafanikio mazuri. Uzalishaji unamaanisha kujua kile ambacho wateja wako wanataka.

 

Mrejesho hukusaidia kuboresha huduma zako

Unapodhani kwamba unachokifanya kipo sawa lakini hupati mrejesho wowote kutoka kwa watu, unakuwa na uhakika kiasi gani kama unachokifanya kina uzuri wowote? Haijalishi unajishughulisha na nini, kusikiliza na kufanyia kazi mrejesho unaoupata kutoka kwa wateja wako kutakusaidia kujua kipi ni kizuri na kipi kiboreshwe zaidi.

Tumia taarifa unazozipata kuboresha kile unachokifanya, inaweza kuwa vigumu kusikiliza kauli hizo zinazoumiza lakini itafanya unachokizalisha kiwe imara katika uzalishaji wake.

 

Hukufanya ufikirie kuhusu utendaji kazi wako

Kukosolewa kunakojenga huweza kukufanya uachane na utendaji mbovu na kuhamia kwenye mzuri. Jaribu kuwa na malengo na chukulia kile unachokizalisha kama vile sio cha kwako.

Hii inaweza kuwa ngumu hasa pale ambapo unahusika kwa kiwango kikubwa kwenye kile unachokifanya, lakini ukijaribu kufikiria zaidi unaweza kugundua namna ambavyo utaweza kuboresha namna ya utendaji kazi wako na kuzuia kushindwa kwa namna yoyote ile wakati wa kazi.

Jaribu kuangalia kama kuna taarifa yoyote ya ziada unayoihitaji? Je, kuna kitu umekisahau wakati ulipouanza huo mradi? Je, kazi inaweza kumalizika kwa muda uliopangwa awali?.

 

Kukosolewa kunakofaa kunaweza kukuletea manufaa

Fikiria pale inapotokea ukapata mteja ambaye yupo tayari kukwambia namna ya kumuhudumia vizuri; na wewe tuu ndio ukawa na taarifa hizi.

Hii hukuweka katika nafasi nzuri kwenye soko kuliko mtu mwingine yeyote na huweza kutumika siku za usoni ili kuboresha vitu na kuvipata kwa haraka. Jitahidi kutafuta taarifa hizi kutoka kwa wateja wako na kuwafanya wawe wazi kwako kuhusu kile wanachokitaka.

 

Tumia lugha nzuri, kusababisha suluhu

Lugha unayoitumia kujibu pale unapokosolewa ni ya muhimu sana. Jitahidi kuepusha ugomvi katika kujibu kwako. Badala yake badilisha kujibu kwako kuwa katika mazungumzo kuhusu namna ya kulikabili tatizo.

Hii itakufanya ubaki kwenye nafasi nzuri katika kazi yako na hautapoteza muda mwingi kuwaza kuhusu nini kifanyike ili kurekebisha mambo.

Yaweke maneno yako katika vitendo ili kuonesha kwamba unakubali kukosolewa, toa mrejesho wako kwa namna nzuri na fanikisha kukamilisha kazi yako.

 

Usichukulie kukosolewa kama shambulio binafsi

Inapotokea mtu hajaipenda kazi yako kwa mara ya kwanza usichukulie kwamba mtu huyo anakuchukia.

Hata pale unapokosolewa kwa kuonewa usiwe mwepesi kujibu kwa haraka na kwa hasira maana unaweza kuharibu uhusiano wako wa kazi na mtu huyo na inaweza kukuharibia sifa nzuri uliyonayo kwenye soko.

Kuna wakati kukosolewa kunaweza kuonekana kama shambulio binafsi, na wakati mwingine utakuwa sahihi kuwaza hivi. Tambua kwamba watu hukosea hivyo ni muhimu kukumbuka kutoruhusu maoni ya watu kukukasirisha.

Hata hivyo mtu makini anaweza kupokea kukosolewa kwa aina yoyote ile na akatoa mrejesho mzuri hata kama kukosolewa kwake kumekuwa ni shambulio binafsi kwake.

Watu wa aina hii wanaweza kutumia nafasi hiyo kwa manufaa yao, na kama itashindikana kabisa vunja mkataba wa kufanya kazi na mtu huyo kwa namna nzuri na kuacha sifa yako katika soko ikiwa bado ni nzuri.

Continue Reading

Must Read

Copyright © 2018 FikraPevu.com