Connect with us

Siasa

Migogoro ndani ya vyama vya siasa inavyochochea ukuaji wa Demokrasia nchini

Published

on

Katika mfumo wa vyama vingi hasa vyama vikubwa vyenye ushawishi katika jamii, migongano na malumbano ya ndani kwa ndani ni jambo la kawaida. Na hii hujidhihirisha kwa kuibuka vikundi vya wanachama wachache wenye mawazo mbadala kupaza sauti zao pale wanapoona baadhi ya mambo hayaendi sawa au wakiwa na nia ya kupigania maslahi ya uongozi ndani ya chama. 

Hili limetokea na linatokea katika nchi za Afrika ikiwemo Tanzania ambayo ni mdau mkubwa wa siasa za vyama vingi. Hali hii imekuwa ikitafsiriwa kuwa ni mapinduzi dhidi ya mwenyekiti na uongozi wake. Na kwasababu kila mtu anapenda kuendelea kuongoza na kuwa na ushawishi katika chama, kila jitihada hufanyika kuwasulubisha wale wote wenye mawazo mbadala pasipo kuangalia madhara kwa chama husika.

Migogoro ya namna hii imeviathiri vyama vingi na kuvifanya vipoteze ushawishi mbele ya jamii, lakini kwa upande mwingine migogoro hiyo imekuwa ni faida kwa wale wanaofukuzwa na hata kwa wananchi wasio na vyama ambao viongozi wanaowaongoza katika jamii, wengi wao wanatokea kwenye vyama vya siasa.

Mfano mzuri ni migongano ya kiungozi katika Chama cha African National Congress (ANC) cha Afrika Kusini ambacho kwa sasa kinaongozwa na Rais Jacob Zuma. Mwaka 2012 Rais Zuma ambaye ni Mwenyekiti wa chama hicho aliingia katika mgogoro wa kisiasa na Julius Malema, ambaye alikuwa Mwenyekiti wa Tawi la Vijana katika chama cha hicho.

Kwa mujibu wa duru za kisiasa, Malema alionekana kutishia uenyekiti wa Rais Zuma, kwa kuleta mawazo mbadala katika chama na kukitaka chama kirejee katika misingi yake ya kuwatumikia watu wa hali ya chini kama sera yake inavyokitaka.

Baadhi ya viongozi wa chama hicho wanatajwa kuhusika katika ufisadi, kuwakumbatia mabwenyenye na wafanyabiashara wakubwa, jambo ambalo lilizua minong’ono na hisia tofauti miongoni mwa wanachama hicho na wananchi wa Afrika Kusini.

Kwa kutambua hilo Malema na baadhi ya wenzake katika chama walitumia fursa hiyo kukemea mambo hayo ya kifisadi yaliyokuwa yakiendelea katika chama hicho. Kutokana na ushawishi wa hoja zake, Malema alipata umaarufu ndani na nje ya chama na kutishia kukigawa chama, ndipo Rais Zuma akiwa Mwenyekiti aliitumia Kamati Kuu (Central Committee) ya chama kumuundia zengwe Malema na kufikia hatua ya kumuondoa katika chama ili kurejesha utulivu miongoni mwa wanachama.

Kiongozi wa Chama Cha Economic Freedom Fighters (EFF), Julius Malema akiwa katika moja ya mikutano ya chama chake

Kwa kutokujua madhara yatakayotokea baada ya kuondoka Malema na kundi lake, chama cha ANC kilipoteza baadhi ya viti vya uwakilishi katika bunge. Kutokana na tuhuma alizozitoa Malema, wabunge na wananchi wameendelea na jitihada za kumshinikiza Zuma kuondoka katika nafasi ya urais, baada ya kuhusishwa na ufisadi ikiwemo kujenga makazi yake binafsi kwa kwa fedha za umma.

Malema alipoondoka ANC aliunda chama chake kinachoitwa Economic Freedom Fighters (EFF) ambacho katika uchaguzi uliopita wa 2014 kilijipatia viti 25 vya Uwakilishi Bungeni na bado kinazidi kupata umaarufu mkubwa miongozi mwa jamii kutokana na sera yake ya kuwatetea wanyonge dhidi ya sera za unyonyaji na ubaguzi, ambazo baadhi ya viongozi wa ANC wanatajwa kuzikumbatia.

Matukio kama haya yameendelea kutokea katika nchi yetu, hasa kwa vyama vikubwa vya CCM, CUF na CHADEMA. Migogoro hiyo ya ndani ya vyama imekuwa na faida katika ustawi wa demokrasia hasa pale kundi la wanachama linapoondoka katika chama, huunda vyama vingine ambavyo hutoa ushindani wa kisiasa vikiwa na mawazo mbadala katika maendeleo ya taifa. Ili mfumo wa vyama vingi uendelee kuwa na maana ni lazima vyama vikongwe vikumbwe na migogoro kama hii ili kuzalisha vyama vingine.

Chama Cha Demokrasia na Maendeleo (CHADEMA) ambacho ndio chama kikuu cha upinzani kwa sasa nchini, ni matokeo ya migongano ya kimaslahi iliyotokea katika chama cha CCM miaka ya nyuma.

Baadhi ya wanachama wakiongozwa na Gavana wa kwanza wa Benki Kuu ya Tanzania (BOT), Edwin Mtei walitoka CCM na kuunda chama cha demokrasi na maendeleo ambacho tangu uanze mfumo wa vyama vingi mwaka 1992 kimekuwa kikitoa ushindani mkubwa kwa chama tawala CCM.

Hata baadhi ya wanachama wake mara kadhaa wameingia katika migongano na serikali kutokana na kugusa maslai ya watawala ambayo yanatajwa kukiuka misingi ya utawala bora na haki za raia.

Kwa sasa CHADEMA kimejiimarisha katika maeneo mengi kutokana na ushirikiano uliopo kati yake na Umoja wa Katiba ya Wananchi (UKAWA), ambapo kimefanikiwa kupata Viti vya Ubunge na kuongoza baadhi ya Halmashauri za Wilaya nchini. 

Kuondoka kwa Mtei na kundi lake kutoka CCM kuliteta maana katika siasa za vyama vingi. Huenda CHADEMA tunayoiona leo isingekuwepo, ikiwa watu wachache wenye mawazo mbadala ambao walikuwa wanatafuta sehemu sahihi ya kuyasemea wasingeondoka  CCM.

Ni faida kuwa na chama kinachotoa ushindani kwa chama tawala kwa sababu kinaongeza uwajibikaji na uwazi miongoni mwa viongozi wa serikali na kuifanya itimize majukumu yake ipasavyo kuwatumikia wananchi.

CHADEMA kama CCM, kinakumbana na mikinzano na mitafaruku ya ndani kwa ndani ambayo ni kundi la watu wachache kuleta mawazo mbadala. Mfano mzuri ni mgogoro wa kiungozi uliojitokeza baina ya Mwenyekiti wa Chama hicho Freeman Mbowe na Naibu Katibu Mkuu wa wakati huo Zitto Kabwe uliotokea mwaka 2014 wakati chama kikijiandaa kufanya uchaguzi wa ndani kuwapata viongozi wapya.

Wakati harakati za maandalizi ya uchaguzi zikiendelea zilizuka tuhuma kuwa Zitto na baadhi ya wanachama akiwemo Profesa Kitila Mkumbo waliandaa waraka unaodhaniwa ni mapinduzi ya uongozi ndani ya chama. Zitto na wenzake walihojiwa na Kamati Kuu (CC) juu ya waraka huo na walikiri kuuandaa lakini walidai haukulenga kuupindua uongozi uliokuwepo, na ilikuwa ni mbinu za kupata ridhaa ya kuongoza chama.

Kutokana na umaarufu aliokuwa nao Zitto Kabwe ndani na nje ya chama ilionekana dhahiri akiachiwa aendelee na mpango wake wa kugombea nafasi ya Uenyekiti atakigawa chama na baadhi ya viongozi watapoteza nyadhifa zao.

Mwenyekiti Freeman Mbowe kama alivyofanya Zuma dhidi ya Malema, aliamua kuitumia Kamati Kuu kumsulubu Zitto kwa nia ya kukinusuru chama. Zitto akavuliwa nyadhifa zake zote ndani ya chama na kilichofuata ni kusimamishwa uanachama, na hivyo kutishia kutenguliwa ubunge wake.

Kiongozi Mkuu wa ACT Wazalendo, Zitto Kabwe akiwa na Mwenyekiti wa CHADEMA, Freeman Mbowe, bungeni hivi karibuni.

Ilimlazimu akimbilie mahakamani kutafuta haki baada ya jitihada za ndani ya chama kushindikana na wanachama wengi kukosa imani naye. Wakati kesi ikiendelea mahakamani, chama kupitia Mwanasheria wake, Tundu Lissu kilitangaza kumvua uanachama Zitto na wenzake akina Profesa Kitila Mkumbo na aliyewahi kuwa Mwenyekiti wa chama hicho mkoa wa Arusha Samson Mwigamba.

Mwaka 2015 Zitto akaunda chama chake cha Accountability and Transparency (ACT) na baadaye kubadilisha jina na kuwa ACT Wazalendo kikisimamia falsafa ya ujamaa na kujitegemea. Zitto mwenyewe aliteuliwa kuwa Kiongozi Mkuu wa chama na Mwenyekiti wa sasa ni Jeremiah Maganja. Kwa muda mfupi chama hicho kilifanikiwa kupata wanachama na kushiriki uchaguzi mkuu wa Oktoba 2015 huku kikiwa ni chama pekee kilichomsimamisha mwanamke kugombea nafasi ya urais.

Hata hivyo akikupata mafanikio makubwa katika uchaguzi wa mwaka 2015, lakini kilipata kiti kimoja cha uwakilishi bungeni na kufanikiwa kuongoza halmashauri ya mji wa Kigoma Ujiji.

Baadhi ya wachambuzi wa siasa wanaitaja ACT Wazalendo kama chama mbadala cha upinzani baada ya CHADEMA kwa miaka ijayo kutokana na falsafa yake ya ujamaa na kujitegemea ambayo inatetea zaidi maslahi ya wanyonge na kupingana na sera za kibebari ambazo sio rafiki kwa mtu wa hali ya chini.

Migogoro ndani ya vyama vya siasa itaendelea kuwepo na kufukuzana pia kutaendelea kwasababu kila siku zinaibuka fikra mpya ambazo ndio zinatoa muelekeo mpya katika maendeleo ya nchi. Na hapo ndipo dhana ya mfumo wa vyama vingi hujidhihirisha kwa uwazi ili kuendeleza ushindani baina ya vyama, kutafuta ridhaa ya kushika dola na kuwatumikia wananchi.

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2018 FikraPevu.com