Connect with us

Jamii

MGOGORO WA MAJI: Jiji la Dar es Salaam kufuata nyayo za Cape Town

Published

on

Jiji la Cape Town nchini Afrika Kusini litazima mitambo inayopeleka maji kwa watumiaji ifikapo Aprili 29, 2018 na kuweka historia ya jiji hilo kukosa huduma hiyo muhimu, ambapo kuzimwa kwa mitambo hiyo ni baada ya maeneo mengi ya nchi hiyo kukabiliwa na ukame kwa miaka mitatu mfululizo.

Inaelezwa kuwa jiji hilo likifunga mitambo hiyo litakuwa jiji la kwanza duniani kukosa huduma ya maji. Meya wa jiji hilo Patricia De Lille amewashauri wakazi wa jiji hilo ambao wanafikia milioni 4 kupunguza matumizi ya maji ili kuendana na hali hiyo ya kupungua kwa maji.  

Kama wanavyoiita siku hiyo ya kukosa maji ‘Day Zero’,  ni kweli kwasababu wanaangalia takwimu kila wiki juu ya akiba ya maji iliyopo na matumizi ya kila siku. Januari 8 mwaka huu, Meya De Lille alikumbusha kuwa siku hiyo ya kukosa maji kabisa itakuwa Aprili 29 kulingana matumizi ya kila siku ya jiji hilo.

Kimsingi jiji hilo halitakosa maji kabisa kwenye maeneo ya kuhifadhia, kwasababu matope na uchafu mwingine kwenye mabwawa huchukua asilimia 10 ya maji yote yasiyotumika. Mamlaka za maji za jiji zinachukua tahadhari na  ikiwa mabwawa yatafika asilimia 13.5 ya uzalishaji maji, usambazaji maji kwa wakazi utazuiwa isipokuwa kwenye maeneo muhimu kama hospitali.

Baadhi ya wakazi wa Cape Town wakisubiri kupata maji mgao baada ya jiji hilo kukumbwa na uhaba mkubwa wa maji

 

Nini kitatokea kama mabomba yatokosa maji?

Wakazi wa jiji hilo watalazimika kwenda kuchota maji kwenye vituo 200 vya maji ambavyo vimetengwa katika maeneo mbalimbali ya jiji hilo ambapo kila mtu atapata lita 25 (6.6 gallons) kwa siku. Vikosi vya usalama vitasimamia zoezi hilo ili kuhakikisha vurugu hazitokei na watu hawachoti maji kuzidi kiwango walichopangiwa.

Lakini baadhi ya wafanyabiashara wameanza mchakato wa kununua maji katika miji mingine na kuyahifadhi kwenye matanki ili kuuza kwa bei ya juu hasa kwa matajiri wa jiji hilo ambao wana uwezo wa kumudu bei hiyo.

 

Hatua wanazochukua wakazi wa jiji hilo

 Jiji hilo limepunguza matumizi ya maji katika ngazi ya kaya hadi kufikia lita 87 (23 gallons) kwa mtu mmoja kila siku. Nyumba nyingi zimepunguza matumzi ya maji kwa kiasi kikubwa ikiwemo maji ya kuoga, hakuna tena kumwagilia bustani, kuosha magari, kuosha vyombo na mashine za kufulia nguo. Vyoo vingi vya umma havitumiki tena na matanki ya kuhifadhia maji yamebaki matupu.

 Kulingana na takwimu za jiji hilo, ni asilimia 54 ya wakazi ndio wanapata maji kwa sasa kwa kiwango kilichowekwa na ndio maana ‘Day Zero’ imesogezwa mbele kwa wiki kadhaa. Jiji linachukua hatua kwa watu ambao wanakiuka utaratibu uliowekwa ili kuhakikisha watu wote wanapata maji kidogo kukidhi mahitaji ya msingi.

Mamlaka za mipango miji zimesema kwa muda sasa uzalishaji maji katika jiji la Cape Town umeshindwa kuendana na ongezeko la watu ambalo limeongezeka maradufu katika kipindi cha miaka 20 iliyopita. Ukijumuisha na miaka 3 ya kushuhudiwa kwa kiwango kikubwa cha ukame nchini Afrika Kusini, kunalifanya tishio hilo la kupotea kwa maji kama tukio la Milenia, amesema Mtaalamu mmoja wa hali ya hewa nchini humo.

 Ili kukabiliana na janga hilo la ukosefu wa maji, jiji limeanza mchakato wa kufunga mitambo ya kushafisha maji ya bahari ya Hindi ili kuyaweka katika matumizi ya kawaida na kuchimba visima virefu ili kukabiliana na hali hiyo haraka iwezekanavyo.

Hata hivyo, juhudi hizo zinaweza zisifanikiwe mpaka siku ya kufungwa kwa mitambo itakapofika au hata kabla ya kuanza kwa mvua za msimu mwezi Mei mwaka huu kama zitanyesha. Watafiti wa mabadiliko ya hali ya hewa wanatabiri kuwa vipindi vya ukame vitaendelea kwa miaka mingi ijayo na kushuhudiwa kwa vipindi vichache vya mvua. Kwa hali hiyo, wakazi wa Cape Town wanajiandaa kwa jambo ambalo siku zijazo litakuwa la kawaida.

Bwawa la Berg linalotumika kuzalisha maji katika jiji la Cape Town

 

  Jiji la Dar es Salaam liko salama?

Mamlaka za Maji jijini Dar es Salaam zina mengi ya kujifunza kwa hali inayoendelea Cape Town kwasababu mazingira hayatofautiani sana na hatua muhimu zichukuliwe ili kutatua tatizo la maji kabla halijakomaa na kuwa janga.

Taarifa ya Mkoa ya Dar es Salaam inaonyesha kuna kasi kubwa ya ongezeko la watu katika jiji hilo ukilinganisha na mikoa mingine. Mpaka sasa jiji hilo lina wakazi zaidi ya milioni 4 juu kidogo ya Cape Town.

Dar es Salaam ni kitovu cha shughuli za uchumi nchini ikiwemo shughuli za viwanda na biashara. Lakini linakabiliwa na athari za mabadiliko ya hali ya hewa ambazo zinaweza kuathiri uzalishaji wa maji siku zijazo ikiwa hatua muhimu hazitachukuliwa kutafuta ufumbuzi wa kudumu wa hadha ya maji.

FikraPevu inafahamu kwamba, idadi ya watu jijini Dar es Salaam inaongezeka kwa asilimia 6 kwa mwaka huku DAWASCO  (Kampuni ya kusambaza maji) ikiwa na wakati mgumu kuhudumia kikamilifu idadi ya watu wasiofika hata robo ambao wameunganishwa na mtandao wa maji ya bomba wa kampuni hiyo ya umma.

Licha ya jitihada kadhaa zinazofanyika, lakini Mamlaka ya Maji ya mkoani humo (DAWASA) imeendelea kuwa na uwekezaji usioendana na kasi kubwa ya ongezeko hilo la watu, ambapo wengi wao wanalazimika kutumia maji ya siyo salama.

 Uchunguzi wa FikraPevu umeonyesha kwamba, asilimia 70 ya maji ambayo wanatumia wakazi wa jijini Dar es Salaam yanatokana na visima kutokana na wakazi wengi kutounganishiwa na mifumo ya maji.

Kwa bahati mbaya zaidi ya asilimia 60 ya visima vilivyojengwa jijini humo maji yake si salama na mamlaka ya maji imeshindwa kabisa kutanua wigo wa kuwaunganishia maji wakazi wengi wa jiji hilo.

Kwa mujibu wa taarifa ya Mkoa wa Dar es Salaam, kuna mahitaji kwa wastani wa zaidi lita milioni 400 huku asilimia 40 ya maeneo ya jijini hayakupitiwa na mtandao wa maji achilia mbali idadi ndogo sana ya wateja wanaotumia maji yanayosambazwa na DAWASCO.

Ongezeko la asilimia 6 la watu kwa mwaka linafanya ongezeko la mahitaji ya maji kuwa lita milioni 27. Baadhi ya miradi kama ule wa Kidunda mkoani Morogoro ambao ulitarajiwa kuongeza kiwango cha uzalishaji maji jijini Dar es Salaam lakini kwa wadadisi wa mambo wanasema haitaondoa tatizo la maji isipokuwa njia mbadara zikitumika. 

 

Nini kifanyike

Mamlaka za Maji zinapaswa kujifunza kwa hali inayoendelea Cape Town ambayo imeingia kwenye janga kubwa la ukosefu wa maji. Serikali iongeze bajeti ya maji ili kuruhusu ujenzi wa miundombinu na kubuniwa kwa vyanzo vingine vya maji ikiwemo usafishaji wa maji ya bahari (desalination plants ) ili kuongezaa uzalishaji wa maji unaofanywa na mitambo ya Ruvu Chini na Ruvu Juu ambayo inategemea mito na mvua.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2018 FikraPevu.com