Connect with us

Uchunguzi

Mauaji ya albino: Pendo na Said Abdallah wametoweka, makaburi yanafukuliwa. Juhudi za serikali zimepotelea wapi?

Published

on

JANUARI 3, 2017 majira ya saa 3:00 usiku katika Kitongoji cha Songambele, Kijiji cha Mumba, Kata ya Masoko katika Wilaya ya Mbeya Vijijini mkoani Mbeya, wakati wananchi wengine wakiwa wameanza kupitiwa na usingizi, kundi la watu watano lilikuwa makaburini.

Hawakuwa wakizika maiti, bali walikuwa na kazi kubwa ya kuchimbua kaburi alimozikwa Bi. Sisala Simwali, dada aliyekuwa na ulemavu wa ngozi (albino).

FikraPevu inafahamu kwamba, marehemu Sisala alifariki dunia Februari 28, 2008 baada ya kuugua na kuzikwa Februari 29, 2008 katika makaburi ya familia.

Mtuhumiwa mmoja aliyeuawa na wananchi wenye hasira baada ya kukutwa akichimbua kaburi la marehemu Sisala Simwali huko Mbeya.

Kishindo cha kuchimbua kaburi kikawaamsha wananchi, ambao licha ya kupiga simu polisi katika Wilaya ya Kipolisi ya Mbalizi, walianza kupambana na watu hao na wakafanikiwa kuwakamata wawili huku mmoja akiuawa na wananchi wenye hasira na wengine kukimbia.

Lengo la watu hao, kwa mujibu wa mahojiano ya awali kati ya polisi na watuhumiwa, lilikuwa kupata mifupa ya albino ambayo walikuwa wameelekezwa na mganga wa jadi kwamba wakiipeleka basi watatengenezewa dawa ya utajiri.

FikraPevu inatambua kwamba, tukio hilo ndilo la kwanza kwa mwaka 2017 likihusisha matukio ya albino ambayo kwa miaka kadhaa sasa yametamalaki nchini Tanzania na kuwafanya watu wenye albinism kuishi kwa mashaka katika nchi yao wenyewe.

Na linaleta hofu kubwa kwa jamii kuona kwamba badala ya kuwateka, kuwakata viungo na hata kuwaua albino, sasa majahili wameanza kuyasaka makaburi walimozikwa albino na kuyafukua ili wachukue mifupa na kupeleka kwa waganga kwa imani za kishirikina.

FikraPevu inajua kuwa, mpaka sasa mtoto Pendo Emmanuel Nundi (6) wa Kijiji cha Ndamhi wilayani Kwimba mkoani Mwanza hajapatikana tangu alipotekwa nyara Desemba 27, 2014.

Aliyekuwa Kamanda wa Polisi Mkoa wa Mwanza, CP Valentino Longino Mlowola, akionyesha picha ya mtoto Pendo Emmanuel ambaye mpaka sasa hajapatikana.

 

Mauaji kila mahali

Uchunguzi wa FikraPevu umebaini kwamba, matukio ya kushambuliwa, kutekwa na kuuawa kwa albino kwa sasa yametamalaki nchini kote, ingawa zamani yalikuwa yakiripotiwa zaidi katika mikoa ya Kanda ya Ziwa.

Itakumbukwa kwamba, tangu Januari 31, 2017 mpaka sasa, Said Abdallah (47) mwenye ualbino, mkazi wa Kijiji cha Mbezi Mlungwana wilayani Mkuranga katika Mkoa wa Pwani, hajapatikana tangu alipotoweka katika mazingira ya kutatanisha.

Taarifa za uchunguzi zilieleza kwamba, mara ya mwisho kabla hajatoweka, Abdallah aliwaaga wenzake anaoishi nao kuwa anakwenda kuuza mboga za majani katika Kijiji cha Mtipule ambacho kipo kati ya Kijiji cha Nyakenge na Kitongoji cha Kaloleni ambapo ilielezwa kuwa siku hiyo alionekana katika kilabu inayouza pombe za kienyeji huko Mkuranga.

Ikaelezwa pia kwamba, siku hiyo ya Janauri 31, 2017 Abdallah aligombana na wenzake aliokuwa akinywa nao pombe majira ya saa 1:30 usiku na kisha aliondoka kilabuni hapo na kuelekea kusikojulikana. Hajapatikana mpaka leo.

FikraPevu inafahamu kuwa, ndugu wa Abdallah waliripoti tukio hilo katika Kituo cha Polisi cha Kimanzichana, Mkuranga na kupewa RB namba KIM/RB/50/2016 na kama hiyo haitoshi pia waliamua kupeleka taarifa katika Kituo Kikuu cha Polisi Wilaya ya Mkuranga na kupewa RB namba MKU/PE/05/2016.

Mpaka sasa hakuna taarifa zozote zilizotolewa hadharani kuhisiana na kutoweka kwa Abdallah, na kama zipo za siri pengine Polisi ndio wanaojua zaidi.

Matukio ya ukatili dhidi ya watu wenye ualbino yanapnekana kurudi kwa kasi kubwa baada ya kudhibitiwa, kwani wakati Abdallah hajulikani aliko mpaka sasa, tukio jingine la kutekwa nyara mtoto mdogo wa kiume mwenye ualbino, Tito Nkuryu (3) huko Itilima mkoani Simiyu lilitokea usiku wa kuamkia Februari Mosi, kabla ya mtoto huyo kuokolewa na kupelekwa kituo cha kulelea watoto, Lamadi.

Watu Wawili Wakamatwa Na Mifupa Ya Albino, Walikuwa Wanaenda FikraPevu inafahamu pia kwamba, Aprili 29, 2017 watu wawili walikamatwa na Jeshi la Polisi mkoani Kagera wakiwa na viungo mbalimbali vya mwili ikiwemo mifupa mitatu inayodhaniwa kuwa ya mtu mwenye ualbino.

Mifupa iliyokamatwa Muleba ambayo inadhaniwa kwamba ni ya marehemu Zeulia ambaye alikuwa na ualbino.

Kamanda wa Polisi mkoani Kagera, ACPHenry Mwaibambe, alinukuliwa akisema kuwa tukio hilo lilitokea katika Kijiji cha Kyota, Kata ya Kimwani wilayani Muleba baada ya jeshi hilo kuweka mtego kwa watuhumiwa hao ambao walikuwa wanatafuta wateja wa viungo hivyo.

Watuhumiwa waliotiwa mbaroni ni James Rutozi (66) mkazi wa Kimwani ambaye ndiye aliyekuwa anahifadhi viungo hivyo na Emanueli Kaloli (50) ambaye pia ni mkazi wa Kimwani aliyekuwa anatafuta mteja wa viungo hivyo.

Kama ilivyotokea kule Mbeya, watuhumiwa waliokamatwa huko Muleba walifukua kaburi la marehemu Zeulia Jestus aliyekuwa na ualbino ambaye alifariki mwaka 2006 na kuzikwa katika Kijiji cha Rushwa, Kata ya Mushabago wilayani Muleba.

Taarifa ambazo FikraPevu inazo zinaeleza kwamba, marehemu Zeulia ambaye wakati huo alikuwa na miaka 24, alifariki dunia muda mfupi baada ya kujifungua na ndipo watuhumiwa hao walifukua kaburi hilo mwaka 2008 kwa maelekezo ya mganga wa jadi.

Jeshi la Polisi mkoani Kagera, baada ya kuomba kibali mahakamani, lilikwenda kufukua kaburi hilo Machi 23, 2017 na kugundua kuwa viungo hivyo walivyokamatwa navyo watuhumiwa vimetolewa katika mwili wa marehemu huyo.

Uchunguzi wa FikraPevu unaonyesha kwamba, tatizo la usalama wa albino nchini Tanzania ni sugu na limeibuka tena baada ya kupoa kwa muda na sasa linatishia hata usalama wa nchi.

Siku tatu kabla ya Uchaguzi Mkuu wa Oktoba 25, 2015, Mohammed Said (35), mkazi wa Mkuranga, alivamiwa na watu wasiojulikana na kushambuliwa kwa kumkata panga kichwani.

 

Operesheni nyingi

Hali ya kuongezeka kwa matukio hayo ndiyo inawafanya wananchi wahoji kwamba zile jitihada zilizoonyeshwa na Jeshi la Polisi pamoja na vyombo vingine vya usalama kwa kipindi cha takriban miezi nane mwaka 2015 zimepotelea wapi?

Taarifa ambazo FikraPevu inazo zinaonyesha kwamba, serikali iliongeza kasi ya kuwasaka wauaji wa albino mara baada ya kutoweka kwa Pendo Emmanuel, kasi ambayo siyo tu ilifanikisha kukamatwa kwa watuhumiwa wengi, lakini iliambatana na operesheni kabambe ya kuwasaka na kuwatia mbaroni waganga takriban 200 nchi nzima waliokuwa wakijihusisha kupiga ramli chonganishi.

FikraPevu inafahamu matukio takriban manne ya mfano yanayohusisha albino, ambapo polisi wakishirikiana na vyombo vingine vya usalama, walifanikiwa kupambana na kuwatia mbaroni baadhi ya watuhumiwa, huku pia wakikamata viungo vya albino.

Bi. Ester Jonas, mama wa marehemu Yohana Bahati, akiwa hajitambui katika Hospitali ya Rufaa ya Bugando jijini Mwanza baada ya kukatwa mapanga na kunyang'anywa mtoto wake.

Tukio la mtoto Yohana Bahati (1) wa Kitongoji cha Ilyamchele, Buseresere wilayani Chato lililotokea Februari 2015 lilivuta hisia za watu wengi, ikiwemo jumuiya ya kimataifa, baada ya majahili kuvamia nyumbani kwa Bahati Misalaba na kumkata mapanga mama wa mtoto kabla ya kumnyang’anya na kutoweka naye.

Jitihada za vyombo vya usalama zikasaidia kupatikana kwa kiwiliwili cha mtoto huyo kikiwa kimefukiwa shambani, lakini tayari majahili hao wakiwa wameondoka na mikono na miguu, viungo ambavyo mpaka leo bado havijapatikana ingawa baadhi ya watuhumiwa wametiwa mbaroni.

Mara baada ya tukio hilo, likafuata tukio la mtoto Baraka Cosmas (4) wa Kijiji cha Kikonde wilayani Sumbawanga ambaye alikatwa kitanga cha mkono wa kulia, lakini jitihada za wanausalama zikafanikisha, siyo tu kuwakamata watuhumiwa wote akiwemo tajiri aliyetoa tenda, bali hata kiganja chenyewe ambacho inaelezwa kwamba tajiri huyo alikihifadhi nyumbani kwake.

Baraka Cosmas akiwa amelazwa Hospitali ya Rufaa Mbeya baada ya kukatwa kitanga cha mkono wa kulia.

Mtuhumiwa Sajenti Kalinga Malonji aliyekamatwa na kiganja cha Baraka.

Hiki ndicho kiganja cha Baraka ambacho mtuhumiwa Sajenti Kalinga Malonji alikamatwa nacho.

Aidha, FikraPevu inajua kwamba, tukio la kukamatwa kwa Mwalimu wa shule ya msingi huko Kahama mkoani Shinyanga, akiwa na mifupa inayodhaniwa kuwa ya binadamu akiambatana na waganga wa jadi nalo lilivuta hisia kubwa na likafanikiwa kufichua mambo mengi ikiwemo mitandao ya mauaji dhidi ya watu wenye ualbino.

Taarifa zinaeleza kwamba, kazi kubwa ambayo inastahili pongezi kwa jeshi hilo ni ile ya kuubomoa ‘mnada’ wa albino mkoani Tabora hasa baada ya kumkamata mtu mmoja akiwa katika harakati za kumuuza binti mwenye ualbino wilayani Nzega.

Kukamatwa kwa Masanja Mwinamila (44), mkazi wa Kitongoji cha Kona Nne, Kijiji cha Ugembe II, Kata ya Mwakashanhala, Tarafa ya Puge wilayani Nzega katika Mkoa wa Tabora akitaka kumuuza hai Margreth Hamisi (6) binti wa dada yake kwa mamilioni ya fedha kunadhihirisha kwamba matukio mengi ya kuuawa au kujeruhiwa kwa watu wenye ualbino yanapangwa na kufanikishwa na wanandugu wenyewe kwa sababu ya mawazo potofu ya kutafuta utajiri kwa njia za mkato.

Masanja Mwinamila siku alipokamatwa akitaka kumuuza hai mtoto Margret Hamisi, ambaye ni binti wa dada yake.

Mwandishi wa FikraPevu, Daniel Mbega akiwa na manusura Margreth Hamisi (kushoto) na kaka yake Tano baada ya kuokolewa kwa binti huyo huko Nzega

FikraPevu inafahamu kwamba, Masanja alikwishahukumiwa kifungo cha miaka 10 jela tangu Juni 19, 2015 baada ya kukiri kutenda kosa la kuteka nyara mtoto mwenye albinism kwa lengo la kutaka kwenda kumuuza.

 

Kesi zisizo na watuhumiwa

FikraPevu inafahamu kwamba, tangu mwaka 2006 hadi Mei 2017 kumekuwepo na matukio mbalimbali ya mauaji, kujeruhi na kuteka nyara watu wenye ulemavu wa ngozi (albino).

Katika kipindi hicho takriban walemavu wa ngozi (albino) 39 waliuawa, 11 walijeruhiwa na wanne walitekwa nyara ambapo kati ya waliotekwa nyara, ni wawili tu waliokolewa – Margreth Hamisi wa Nzega na Tito Nkuryu wa Itilima mkoani Simiyu.

FikraPevu inaripoti bila shaka kwamba, kuna kesi takriban nne za mauaji ambazo hazina mtuhumiwa hata mmoja tangu matukio yatokee mwaka 2006 hadi 2009.

Mfano wa kesi hizo ambazo ziko mahakamani na upelelezi unatakiwa kufanyika ni Shauri lenye Namba. KAH/IR/92/2006, la mauaji ya Arip Amon wa Kahama; Shauri Namba. MIS/IR/2010/2007, la mauaji ya Sitakelewa Shitobelwa wa Misungwi; Shauri Namba. KDO/IR/1334/2008, la mauaji ya Safina Meshaki (miezi mitano) wa Mgalama – Kibondo; na Shauri Namba. GER/IR/2056/2009 la mauaji ya Gasper Elikana (10), aliyekuwa Mwanafunzi wa Shule ya Msingi Nyawilimirwa, Geita.

Mashauri mengine kadhaa yako mahakamani lakini kuna watuhumiwa ambao hawajapatikana, lakini kama serikali ingeongeza nguvu katika misako yake ingeweza kuwapata watuhumiwa.

Kama jeshi hilo lilifanikiwa walau kufuatilia na kukamata watuhumiwa katika kadhia hizo zilizotajwa, ni wakati sasa wa kuhoji nini kilichotokea hata ikawa wameshindwa kupambana na matukio hayo.

Yawezekana wako kazini, lakini kazi yenyewe ina ufanisi kiasi gani ikiwa kila siku kuna matukio mapya? Ni ufinyu wa bajeti au kujisahau? Ni kupuuza janga hilo ama kusubiri matukio yatokee ndipo waanze kukimbizana?

FikraPevu inaona kuna kila sababu, tena ya msingi kabisa, ya kuhakikisha serikali kupitia vyombo vyake vya usalama, inashughulikia masuala ya mauaji ya albino, ambayo yanakwenda sambamba na mauaji ya vikongwe, ili kurudisha amani ya wananchi badala ya kuzidi hofu na mashaka.

Kama serikali iliona iko salama, basi ni wakati wa kuongeza fungu katika kazi maalum kama hizi, ikibidi kuwashirikisha na albino wenyewe katika mapambano hayo katika msingi wa kujenga uwazi na uwajibikaji.

 

Continue Reading
Click to comment

Leave a Reply

Your email address will not be published. Required fields are marked *

Jamii

Vigogo Halmashauri za Monduli, Karagwe, Biharamulo kikaangoni upotevu wa milioni 171.8 za miradi ya maji

Published

on

Maji ni uhai. Ni uhai kwasababu  yanabeba dhana nzima ya mwanadamu yeyote kuishi na kufanya shughuli zingine za maendeleo. Pia maji ni uhai kwasababu yanagusa sekta zote za uzalishaji, popote utakapokwenda utahitaji maji. Hiyo ndiyo thamani ya maji.

Ni dhahiri kuwa jambo lolote linalofanyika kwa nia ya kuvuruga au kuhalibu mfumo wa upatikanaji wa maji safi na salama, linalenga kuuawa uhai wa binadamu. Kuanzia kwenye uhalibifu wa mazingira, vyanzo vya maji, ukosefu wa rasilimali fedha na watu kutekeleza miradi ya maji hadi kukosekana kwa utashi wa kisiasa kuhakikisha wananchi wanapata maji ya uhakika.

Katika makala hii tunajadili matumizi mabaya ya fedha za miradi ya maendeleo katika baadhi ya halmashauri za wilaya nchini ambazo zimetumia vibaya fedha na kuwahatarishia uhai wakazi wa maeneo yao.

Halmashauri hizo ni Monduli, Karagwe na Biharamulo ambazo  zimekiuka makubaliano ya mkataba wa utekelezaji wa miradi ya maji na kusababisha milioni 171.8 kutumika kwa matumizi ambayo hayakukusudiwa.

Halmashauri hizo 3 katika mwaka wa fedha unaoishia Juni 2017 zilikuwa zinatekeleza miradi ya maji chini ya ufadhili wa Mfuko wa Maendeleo ya Sekta ya Maji (WSDP). Fedha za mfuko wa WSDP hutolewa na nchi wahisani au mashirika ya kimataifa kuhakikisha wananchi hasa maeneo ya vijijini wanapata maji safi na salama.

Wahisani hao wanaongozwa na dhamira kuu; maji ni uhai na binadamu popote alipo ni lazima aypate ili aweze kuishi. Lakini wapo baadhi ya watendaji katika halmshauri hizo kwa kujua au kutokujua wanahujumu miradi inayofadhiliwa na wahisani hao.

Tabia hiyo inatajwa kuwa kikwazo kwa wafadhili kuendelea kuwasaidia wananchi kupata maji kwasababu kukosekana kwa utashi wa kisiasa  kwa baadhi ya watendaji ambao kwa namna moja ama nyingine wanatumia tatizo la maji kama mtaji wa kujinufaisha kisiasa na kupata nafasi za uongozi serikalini.

Kulingana na Mkataba wa makubaliano (MoU) wa uanzishaji wa Mfuko wa WSDP aya ya 9.2.2 pamoja na marekebisho yake ya mwaka 2013 inaeleza kuwa, “Serikali imekubali kusamehe kodi zote zilizowekwa moja kwa moja au zisizo za moja kwa moja kwenye matumizi yote yanayostahili ya bidhaa, kazi na huduma za kifedha chini ya WSDP”.

Lakini halmashauri za  wilaya za Monduli mkoani Arusha; Karagwe na Biharamulo mkoani Kagera zilikiuka kifungo hicho na kutoza kodi yenye thamani sh. Milioni 171.8 kwenye miradi minne ya maji iliyofadhiliwa na mfuko wa WSDP ambayo haikupaswa kukatwa.

Kwa mujibu wa ripoti ya Mdhibiti na Mkaguzi Mkuu wa Hesabu za Serikali (CAG) ya mwaka wa fedha unaoishia Juni 2017 inaeleza kuwa katika halmashauri ya Wilaya ya Monduli ilibainika mikataba miwili ambayo ilitozwa kodi yenye thamani ya sh. Milioni 87.7 kutoka kwenye miradi ya maji ambayo haikustahili kulipa kodi katika wilaya hiyo.

“Nimebaini mikataba miwili, Na. LGA/004/2016/17/RWSSP/W/14 na Na. LGA/004/2016/17/RWSSP/W/10 katika Halmashauri ya Wilaya Monduli Mkoani Arusha, ambapo kiasi cha VAT (ongezeko la thamani) Sh. 87,765,679 kililipwa kwa ajili ya miradi ya maji iliyosamehewa kodi”, imeeleza ripoti hiyo ambayo ilitolewa na CAG, Prof. Mussa Assad wiki iliyopita.

Halmashauri za Karagwe na Biharamulo nazo zilifuata mkondo ule ule wa Monduli kwa kutoza kodi ya sh. Milioni 84.035 kwenye miradi miwili ya maji iliyokuwa ikitekelezwa na mfuko wa WSDP katika wilaya zao.

Taarifa ya CAG inafafanua kuwa “Nimebaini pia mikataba miwili katika Halmashauri za Wilaya Karagwe na Biharamulo yenye namba LGA/033/W/2016/17/W/NT/07 na LGA/032/2016-2017/HQ/WSDP/W/76 LOT 03 ambapo kodi ya ongezeko la thamani (VAT) yenye thamani ya Sh. 84,035,685 ilijumuishwa katika gharama ya miradi ya maji iliyosamehewa kodi.”

Kwa vyovyote vile katika miradi hiyo mitatu kuna harufu ya ufisadi, kama miradi hiyo haikutakiwa kulipa kodi fedha hizo zimeenda wapi?. Na kama serikali ilipokea hizo fedha ilitumia vigezo gani kwasababu masharti ya mkataba ambao serikali ilisaini hayaruhusu kodi ijumuishwe kwenye gharama za mradi wa maji.

Kiasi cha milioni 171.8 kukatwa kodi huenda kimewakosesha wananchi katika maeneo mengine kupata huduma ya maji. Kwa mafano fedha hiyo ingetumika vizuri ingeweza kujenga miradi mingine ya kusambaza maji katika halmashauri hizo na kuwapunguzia wananchi tatizo la upatikanaji wa maji.

 

Nini kifanyike…

CAG katika ripoti yake ameonyesha kusikitika na mwenendo  huo wa baadhi ya watendaji wa halmashauri kutozingatia maadili ya kazi zao. Amebainisha kuwa tabia hiyo ikiendelea inaweza kuwakatisha tamaa wafadhili kuendelea kutoa fedha za misaada.

“Kwa maoni yangu, malipo ya VAT kwa miradi iliyosamehewa kodi yanapunguza uwezo wa Halmashauri kugharamia miradi mingine. Aidha, kutofuata MoU kunakatisha tamaa nia za wafadhili kuendelea kutoa ruzuku katika miradi mingine.”, amesema CAG, Prof. Assad katika ripoti yake.

Kwa kutambua kuwa fedha zilizopotea ni nyingi, Makatibu Tawala wa halmashauri za wilaya hizo 3 wanapaswa kuchukuliwa hatua za kisheria kwa kitendo chao cha kukwamisha upatikanaji wa huduma muhimu ya maji kwa wananchi.

“Napendekeza kwamba, katika siku zijazo Uongozi wa Halmashauri ufuate mkataba wa makubaliano uliosainiwa. Aidha, Afisa Masuuli achukuliwe hatua kwa ulipaji wa VAT katika miradi iliyosamehewa kodi,” ameshauri CAG, Prof. Assad.

Continue Reading

Afya

Ubakaji, ulawiti watoto usifumbiwe macho Kinondoni

Published

on

Na Daniel Samson

Kulingana Sheria ya Mtoto ya mwaka 2009 sehemu ya pili (II) inatoa wajibu na majukumu ya mzazi katika kumlea mtoto ambapo inaeleza kuwa “Kila mzazi atakuwa na wajibu na majukumu yaliyowekwa ama na sheria au vinginevyo kwa mtoto wake ambayo yatajumuisha wajibu wa kumlinda mtoto dhidi ya utelekezwaji, ubaguzi, vurugu, unyanyasaji, madhara ya kimwili na kiakili na ukandamizaji”

Ni tofauti na matakwa ya sheria, wako baadhi ya wazazi ambao wanawafanyia watoto wao ukatili wa aina mbalimbali na kukiuka jukumu la msingi la kuwalinda na kuwatengenezea mstakabali mzuri wa maisha.

Lucy (4) (jina hilo sio halisi) ni miongoni mwa watoto wengi duniani ambao wamefanyiwa ukatili wa kijinsia na watu ambao wanapaswa kuwalinda na kuhakikisha wanakuwa na furaha wakati wote.

Lucy alibakwa na baba yake mzazi aliyetambulika kwa jina la Clement (40) (jina la pili tumelihifadhia). Tukio hilo lilitokea kata ya Bunju B wilaya ya Kinondoni ambapo alimsababishia maumivu makali sehemu zake za siri.

“Baba aliniingiza vidole huku chini, amekuwa akinifanyia muda mrefu. Aliniingiza chumbani akanilaza kitandani na kufungua zipu na kutoa dudu”,amesema Lucy na kuongeza kuwa baba yake alimuingilia nyumbani kwao Bunju B ambako wanaishi kwenye nyumba ya kupanga.

Akihojiwa na mwandishi wa makala haya Lucy amesema baba yake alimkataza kuwa asimuambie mtu yoyote lakini maumivu yalipozidi alimwambia mama yake aitwaye Beatrice (jina la pili tunalihifadhi kwa ajili ya usalama)

Beatrice anasema aligundua kuwa mtoto wake ameingiliwa wakati akimuogesha ambapo alikuwa akilalamika kwamba anapata maumivu sehemu za siri.

“Nilimuuliza tatizo nini lakini hakuniambia akabaki analia na kuonyesha sehemu zake za siri”, amesema Beatrice na kuongeza kuwa alimuita mama Vena ambaye wanaishi pamoja katika nyumba yao ambapo walimchunguza na kukuta ameharibiwa sehemu zake za siri.

“Nikampandisha juu ya kiti nikwambia wapi panauma? Ebu nionyeshe akapanua miguu. Nikamuuliza mbona uko hivi kuna tatizo gani huku mbona kuna damu, kulikuwa na michubuko, maana kulikuwa kwekundu kote…”, Amesema Mama Vena.

“Nikamuuliza  mbona uko hivi umefanyaje? Akaniambia baba amefanya hivi, baba alifungua zipu akatoa dudu akaingia huku”, amebainisha Mama Vena.

Anasema usiku huo huo, aliambatana na Beatrice hadi kwa kaka yake (Clement) ambaye anaishi mtaa wa Idara ya Maji kata ya Bunju B ili wasaidiwe kumkamata mtuhumiwa. Walifanya kikao ambapo walianza kumtafuta Clement ambaye tayari alikuwa ameondoka nyumbani baada ya kutekeleza unyama huo.

Familia hiyo haikutaka kulifikisha suala hilo kwenye vyombo vya dola na ili kumnusuru mtuhumiwa. Inaelezwa kuwa msimamo huo wa familia ulipata nguvu kwasababu Beatrice, mke wa Clement ilikataa kumfikisha mme wake polisi kwa kuhofia kukosa matunzo.

Mama Vena anasema siku tatu baada ya tukio hilo alitoa taarifa kwenye ofisi ya serikali ya mtaa wa Idara ya Maji na kutaka suala hilo lifikishwe polisi.

 Lucy aliyefanyiwa udhalilishaji wa kingono na baba yake mzazi

 

 Kesi yafikishwa Polisi

Kutokana na shinikizo la majirani, Beatrice, aliripoti tukio hilo kwenye kituo cha Polisi cha Mabwepande ambako huko jalada la kesi ya ubakaji lilifunguliwa Novemba pili 2017.

Beatrice alipewa Fomu ya Polisi (PF3) ambapo alimpeleka mtoto huyo hadi hospitali ya Mwananyamala iliyopo Wilaya ya Kinondoni kwa ajili ya vipimo.  Alionana na daktari na Lucy alifanyiwa vipimo viwili, cha Maambukizi ya virusi vya UKIMWI na kile cha kuingiliwa kimwili.

Majibu ya daktari  yalionyesha dhahiri kuwa mtoto huyo amenajisiwa na sehemu zake za siri zimeharibiwa na majibu ya kipimo cha maambukizi ya UKIMWI yamefanywa kuwa siri ili kutoharibu upelelezi wa kesi hiyo ambayo iko polisi.

Siku hiyo hiyo aliwasilisha majibu hayo kwa Mkuu wa Kituo Cha Polisi Cha Mabwepande, ambapo majibu yalipokelewa kwa ajili ya ushahidi. Upelelezi wa tukio hilo unaendelea ili kumkamata mtuhumiwa Clement ambaye alitoroka kusikojulikana baada ya kupata taarifa kuwa anatafutwa na polisi.

 

 Ukubwa wa Tatizo la ubakaji

Katika kuangazia ukubwa wa tatizo la ubakaji katika Manispaa ya kinondoni, Chama Cha Wanahabari Wanawake  (TAMWA), kimeshirikiana na mwanadishi wa makala haya ili kuibua na hatimaye kutoa suluhu juu ya njia sahihi ya kukomesha vitendo hivi.

Kwa mujibu wa takwimu za Jeshi la Polisi Tanzania (2016) zinaonyesha kuwa katika kipindi cha miezi saba ya kwanza ya mwaka 2016 yaani kuanzia Januari hadi Julai, Kinondoni ambayo Kipolisi ni Mkoa ilikuwa inaongoza kwa kuwa na kesi 187 za ubakaji katika kipindi hicho huku ikifuatiwa na Mbeya (177), Morogoro (160),  Pwani (159), Temeke (139) na Ilala (109).

Pia Takwimu za Jeshi hilo zinaonyesha kuwa matukio ya ubakaji nchini Tanzania yameongezeka kutoka 6,985 mwaka 2016 na kufikia matukio 7,460 mwaka 2017 na ongezeko hilo ni asilimia 6.8.  Makosa ya kunajisi yalikuwa 16 kwa mwaka 2016 na yaliongezeka hadi kufikia 25 mwaka uliofuata

Kinondoni inatajwa kuwa na matukio mengi ya ubakaji kwa sababu kuna mwamko wa watu kupinga vitendo vya ukatili wa kijinsia ikiwemo kuwaripoti  watuhumiwa wa vitendo hivyo ili wachukuliwe hatua za kisheria.

Kwa upande wake, Mkuu wa Wilaya ya Kinondoni, Ali Hapi ameitaka jamii kushirikiana na vyombo vya dola kwa kutoa taarifa sahihi za matukio ya ubakaji, “ Jeshi la Polisi limejipanga ili kila aliyepatikana na hatia ya ubakaji achukuliwe hatua”.

 

Ustawi wa Jamii

Mshauri na Mtaalamu wa Saikolojia kutoka Taasisi ya Ustawi wa Jamii Tanzania, Zainabu Rashidi amesema ubakaji una athari nyingi kwa watoto ambapo zinaweza kuendelea hadi ukubwani.

Amesema mtoto aliyebakwa hujiona duni na mpweke na hufikia hatua ya kujitenga na kuogopa kucheza na wenzake kwa sababu jamii humnyooshea kidole ambapo hujiona mwenye hatia.

“Athari kubwa ni kwamba mtoto anakuwa mnyonge, mpweke na anakosa hamu ya kushiriki na wenzake katika mambo mengine kwa sababu vitendo vya ubakaji katika jamii vinatafsiriwa kama aibu na unyonge. Na haijalishi mtoto amebakwa na nani? Jamii huanza kumnyoshea kidole kwamba Yule mtoto alibakwa”,  amesema Mtaalamu huyo na kuongeza kuwa,

“Anapokuwa mtu mzima anaendeleza tabia ambazo ni mbaya, anaweza kufanya vitendo vya kikatili, kulipiza kisasi, kumchoma mtoto mikono na mwingine anaweza kufikia hatua ya kuchanganyikiwa”.

Ameitaka jamii kujenga utamaduni wa kutoa taarifa na kuwasaidia waathirika wa ubakaji kwa kuwapeleka Ustawi wa Jamii ili wapate tiba ya kisaikolojia na kurejea katika hali ya kawaida.

                                            Beatrice, mama wa Lucy  aliyebakwa na baba yake mzazi

 

Msimamo wa Serikali dhidi ya Ukatili

Serikali kupitia Naibu Waziri wa Afya, Maendeleo ya Jamii, Jinsia, Wazee na Watoto, Dkt Faustine Ndungulile ameitaka jamii kutoyafumbia macho matukio ya ubakaji aidha inapaswa kutoa taarifa ili watuhumiwa wachukuliwe hatua za kisheria.

“Kupaza sauti katika kupinga ukatili wa kijinsia na kuondokana na utamaduni wa kukaa kimya dhidi ya vitendo vya kikatili na madhara yake yanamgusa kila mmoja katika ngazi tofauti”, amesema Dkt. Ndungulile.

Hata hivyo, Serikali imezifanyia maboresho Sera na Sheria ikiwemo  Sheria ya Elimu sura 353 ambayo inatoa adhabu ya kifungo kisichopungua miaka 30 kwa mtu yeyote atakayembaka na kumpa mimba mwanafunzi wa shule ya Msingi au Sekondari.

Pia Serikali imeanza utekelezaji wa Mpango Kazi wa Taifa wa kutokomeza Ukatili dhidi ya wanawake na watoto unaojumuisha sekta zote zinazohusu wanawake na watoto kwa lengo kuzuia aina zote za ukatili.

 

 Nini Kifanyike?

Ili kupunguza au kuyamaliza matukio haya, jamii inapaswa kuacha tabia ya kuwalinda wabakaji lakini wanatakiwa kuwafikisha kwenye vyombo vya dola ili wachukuliwe hatua za kisheria.

Pia kuboresha sheria na sera ikiwemo Sheria ya Ndoa ya mwaka 1971 ambayo inatoa mwanya kwa watoto kuolewa katika umri mdogo. Mabadiliko hayo yaambatane na mikakati ya kitaifa ya kuwalinda watoto dhidi ya vitendo vyote vya ukatili ukiwemo ubakaji na ulawiti.

Continue Reading

Afya

Waendesha bodaboda wanachangia asilimia 13 ya mimba za utotoni nchini

Published

on

  • Kuna uhusiano gani kati ya bodaboda na ongezeko la mimba za utotoni kwa wasichana wanaosafiri umbali mrefu kwenda shule?

Gazeti la The Guardian la Tanzania, linawaweka waendesha bodaboda kama kiini cha ongezeko la mimba za utotoni nchini Tanzania. Kwa mujibu wa tafiti zilizofanywa hivi karibuni, waendesha bodaboda wanachangia asilimia 13 ya mimba za utotoni nchini.

Matumizi ya bodaboda, ama pikipiki kwaajili ya biashara, yameongezeka sana nchini Tanzania hasa pale ambapo ni ngumu kupata usafiri mwingine. Umaarufu wake unasababishwa na upatikanaji mgumu wa usafiri pamoja na bei nafuu za pikipiki; na huwa zinaendeshwa na vijana wadogo waliotoka kumaliza tu elimu ya sekondari.

Kwa mujibu wa utafiti huo, wasichana wadogo, hasa wale wa vijijini, wako katika mazingira hatarishi zaidi kushawishika kingono kwasababu inawabidi kusafiri umbali mrefu kwenda shule. Gazeti la Financial Times linasema, baadhi ya wasichana huishi umbali wa hadi kilometa 15 kutoka shuleni, hivyo huwalazimu kupanda bodaboda badala za kutembea umbali huo.

Kwakuwa hawana fedha za kutosha kuwalipa waendesha bodaboda hao, huishia kulala nao kama njia ya malipo. Wanapopata ujauzito kwa jinsi hii, huishia kufukuzwa shuleni.

 

Swali hapa ni je, mimba ngapi za utotoni ambazo zinasababishwa na waendesha bodaboda nchini Tanzania?

PesaCheck imefanya uchunguzi na kubaini ya kwamba, madai ya kuwa waendesha bodaboda wanachangia ongezeko la mimba za utotoni Tanzania ni kweli kwa kiasi kikubwa kwa sababu zifuatazo:

Utafiti wa Taifa kuhusu Vichocheo na Madhara ya Ndoa za Utotoni nchini Tanzania, unafafanua kwamba wasichana kutoka kaya masikini ni kundi hatarishi kwasababu ya hali yao ya kiuchumi. Kukosa mahitaji yao ya msingi, kama kuweza kulipia usafiri, kunawafanya iwe rahisi kunyanyaswa kingono.

Ni ngumu kujua idadi kamili ya mimba zilizosababishwa na waendesha bodaboda. Lakini, kilicho bayana ni kwamba wasichana waishio vijijini nchini Tanzania ni kundi hatarishi la kunyanyaswa kingono na watu wanaohusika na usafiri sehemu mbalimbali nchini.

Watoto wengi hukumbana na changamoto mbalimbali wanapokuwa njiani kwenda na kutoka shule. Baadhi ya makondakta hukataa kuwachukua kwasababu wanalipa nauli ndogo. Safari ya kwenda na kutoka shule huwaweka watoto katika mazingira hatarishi. Ripoti ya “Ukatili Dhidi ya Watoto Tanzania” inaonyesha kwamba kati ya wasichana wanne waliotoa taarifa ya kufanyiwa ukatili wa kijinsia, mmoja kati yao ilimtokea akiwa anaenda shule, aidha kwa usafiri wa umma au akiwa anatembea.

Kwa mujibu wa Ripoti ya Ukatili Dhidi ya Watoto Tanzania (2011), msichana 1 kati ya 25 mwenye umri wa miaka 13 hadi 17 amewahi kupewa pesa au zawadi ili afanye ngono. Ripoti hii inaonyesha kwamba asilimia 23 ya wasichana wananyanyaswa kijinsia wakiwa wanaenda au kutoka shule.

Hivyo, madai ya kwamba waendesha bodaboda wanachangia ongezeko la mimba za utotoni nchini Tanzania ni kweli kwa kiasi kikubwa. Kuna ushahidi unaoonyesha kuwa wasichana wanaotoka kwenye kaya masikini, hasa walioko vijijini, wanapata shinikizo kubwa kulipia usafiri wao kingono. Kwa kuwanyanyasa wasichana hao, waendesha bodaboda huwaongezea ugumu ambao tayari wanao.

Matokeo yake, maamuzi ya kuwafukuza shule wasichana waliopata ujauzito huleta matokeo hasi. Kunawafanya wakose nafasi ya kupata elimu ambayo wangeihitaji kujikwamua na umasikini. Hivyo, huwaweka katika hali hatarishi zaidi.

 

Makala hii imeandikwa na PesaCheck Fellow Belinda Japhet, Mwandishi na Mshauri Mtaalamu wa maswala ya mawasiliano.

Continue Reading

Muhimu Kusoma

Copyright © 2018 FikraPevu.com