Connect with us

Afya

Matumizi ya Kahawa kupunguza idadi ya watu wanaopata shambulio la moyo, kiharusi

Published

on

Matumizi ya kahawa ni tiba ya asili kwa mwili wa binadamu. Habari njema ni kuwa kahawa ina mchango mkubwa katika kuzuia magonjwa ya moyo ikiwemo shambulio la moyo na kuziba kwa mishipa ya damu iliyopo kwenye ubongo.

Kutokana na mtindo wa maisha na ulaji wa vyakula usiozingatia lishe bora, idadi ya watu wanaokumbana na magonjwa ya moyo na kiharusi inaongezeka. Ili kukabiliana na hatari ya kushambuliwa kwa moyo; kiungo muhimu kwa uhai wa binadamu wataalamu wa afya wanashauri watu kunywa kahawa angalau vikombe 2 hadi 6 kwa siku ili kujiweka katika nafasi ya kuruhusu mzunguko wa damu na hewa ya oksijeni mwilini.

Kwa muda mrefu wataalamu wa afya wamekuwa wakifanya tafiti kubaini sababu na njia za kuzuia shambulio la moyo na kupata kiharusi, lakini baadhi ya watafiti waliamua kuafanya uchambuzi na mchanganuo wa tafiti zilizofanywa ili kubaini njia ambazo zimekuwa zikitumiwa na watu katika kupambana na magonjwa ya moyo.

Watafiti kutoka Chuo Kikuu Cha Colorado Kitengo Cha Afya wamechanganua data za utafiti wa moyo uliowahusisha wakazi 15,000 wa Framingham nchini Marekani ambao walikuwa wanaangalia mahusiano yaliyopo ya ulaji wa vyakula na utendaji wa moyo tangu mwaka 1940. Walijikita zaidi kuangalia sababu zisizojulikana za kupata  kiharusi na shambulio la moyo ambalo hupelekea moyo kushindwa kufanya kazi.

 Wamebaini  kuwa unywaji wa kahawa unahusishwa kupunguza hatari ya kupata shambulio la moyo na kiharusi (stroke). Kila kikombe cha kahawa kinachotumiwa kila siku kinapunguza matatizo hayo kwa asilimia 5 hadi 7  ikiwa mtu atakunywa hadi vikombe sita kwa siku.

Utafiti wa awali ambao uliwasilishwa katika Taasisi ya Moyo ya Aneheim iliyopo California Marekani ni muendelezo wa tafiti mbalimbali ambazo zinaelezea faida ya kahawa kwa moyo wa binadamu.

Walitumia njia ya kitaalamu inayojulikana kama mashine ya kujifunzia (machine learning) ambayo inafuatilia takwimu za muda mrefu juu ya matatizo ya moyo na vyakula ambavyo watu walikuwa wanatumia na athari za kiafya zinazohusiana na moyo. Njia hii ni sahihi kwa sababu inaangazia namna watu walivyokuwa wanaishi ikilinganishwa na maisha ya watu wa sasa.

“Katika hali halisi ya dunia, tulikuwa na uwezo wa kutabili magonjwa ya shambulio la moyo na kiharusi kwa uhakika wa 100% muda mrefu kabla ya tukio kutokea”, anasema Mwandishi Laura Stevens akihojiwa na jarida la TIME. “Changamoto iliyopo hapa ni kuwepo kwa sababu nyingi hatarishi, kuzijaribu zote kwa kutumia njia za asili tungetumia muda mrefu na haiwezekani”, amesema Laura.

Katika uchambuzi huo wa tafiti wamebaini kuwa kahawa ina mchango mkubwa wa kupunguza hatari ya kupata kiharusi na shambulio la moyo.  Kahawa inasaidia kutanua mishipa ya damu inayoingia na kutoka kwenye moyo n aubongo ili kusafirisha damu vizuri bila kizuizi.

 Karibu wanywaji wote wa kahawa (97%) waliowekwa kwenye majaribio walitumia kikombe 1 hadi 6 kwa siku na watafiti hao hawana uhakika kama faida hizo zinaweza kuendelea ikiwa kiwango cha matumizi kitaongezeka.  Na wamegundua kuwa hata kama mtu alikunywa au hakunywa kahawa iliwasaidia kubashiri sababu hatarishi za kupata kiharusi na shambulio la moyo.

Pia uchambuzi  ulitumia sampuli ya wanywaji wa kahawa wakihusianisha na sababu hatarishi umri wa kuishi, shinikizo la damu na mafuta katika mwili wa binadamu, majaribio hayo yalionyesha kuwa kahawa inaweza kupunguza hatari hiyo kwa 4%.

Watafiti hao walithibitisha matokeo ya utafiti kwa kupitia na kuchambua tafiti nyingine mbili zinazohusu Utendaji wa mishipa ya damu inayoingia kwenye moyo na  kuziba kwa mirija ya damu iliyopo kwenye moyo.

 Hata hivyo, imebainika kuwa kahawa ina faida nyingi kwa afya ya binadamu ikiwa itatumiwa kwa kiwango kizuri. Utafiti huo umebainisha wazi kuwa mashine ya kujifunzia inaweza kuwasaidia watafiti kutambua sababu nyingine hatarishi zinazosababisha na kuzuia magonjwa ya moyo.

Stevens anasema timu yake inakusudia kutumia uchambuzi huo kugundua muunganiko wa kafeini inayopatikana kwenye kahawa kama ina uhusiano wa afya ya moyo iliyoangaliwa kwenye utafiti. “lengo letu la msingi ni kutambua kama matumizi ya kahawa ni sehemu inayotumiwa na kliniki katika kutathmini njia ya kuzuia vihatarishi vya magonjwa ya moyo” amesema, “na kama mabadiliko ya matumizi ya kahawa au kafeini yanaweza kuwa njia ya kubadilisha vihatarishi”.

Dalili mojawapo ya shambulio la moyo ni maumivu ya kifua

 Shambulio la Moyo ni nini?

Shambulio la moyo ni kufa kwa sehemu ya misuli ya moyo ambayo husababishwa na damu kuganda katika mishipa inayosafirisha damu kwenye moyo. Ikiwa baadhi ya misuli ya moyo itakufa, mtu husikia maumivu ya kifua na mapigo ya moyo kutokuwa ya kwaida.

Sababu zinazosababisha Shambulio la Moyo

Hatari ya mtu kupata shambulio la moyo huongezeka ikiwa mwanaume amevuka umri wa miaka 45 na mwanamke amevuka miaka 55. Pia kupungua kwa hewa ya oksijeni katika mzunguko wa damu, uvutaji wa sigara na unene uliopitiliza ni sababu zinazo changia shambulio la moyo.  

Ugonjwa wa Kisukari na mafuta mengi mwilini ambayo ni matokeo ya ulaji wa vyenye mafuta, upasuaji wa moyo na shinikizo kubwa la damu. Watu wenye virusi vya UKIMWI na msongo wa mawazo unaotokana kazi.

Mara nyingi shambulio la moyo linapotokea, linasababishwa mjumuiko wa sababu mbalimbali kuliko sababu moja.           

Baadhi ya dalili ni kuchoka na kuishiwa nguvu, maumivu ya kifua ambayo hushuka hadi kwenye mkono na sehemu ya nyuma ya mgongo, hofu, kutapika, kukosa pumzi na kutokwa na jasho.                                                                                                                      

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Afya

Vyakula hivi vitakulinda dhidi ya athari za kiafya za uchafuzi wa hewa

Published

on

Tunaishi katika ulimwengu unaokabiliwa na athari kubwa za mabadiliko ya hali ya hewa. Moja ya athari hizo ni kuongezeka kwa joto na kupungua kwa mvua katika maeneo mbalimbali. Athari hizi zinagusa moja kwa moja afya ya binadamu.

Ripoti ya mabadiliko ya hali ya hewa ya mwaka 2017 imeonesha kuwa kuongezeka kwa joto kunaathiri afya ya binadamu kwa kiasi kikubwa. Ripoti hiyo inatoka kundi la vyuo mbalimbali na mashirika tofauti ya Umoja wa Mataifa inasema watu wengi wanaathirika na joto pamoja na mlo hafifu sambamba na kusambaa kwa magonjwa.

Moja ya kisababishi cha mabadiliko ya hali ya hewa ni uchafuzi wa anga. Uchafuzi wa anga ni kuchanganyika kwa hewa asili katika anga na vitu kama vile moshi, majivu, gesi za kemikali katika hali na kiwango ambacho huathiri sifa ya hewa na kusababisha madhara kwa binadamu na viumbe vingine.

Baadhi ya vitu na vitendo huathiri vibaya anga letu. Baadhi ya vitu hivyo ni kama gesi na moshi unaotoka kwenye viwanda, moshi kutoka kwenye magari, marashi, dawa ya kuuwa wadudu shambani na kadhalika.

Lakini umewahi kujiuliza kuwa aina ya chakula unachokula kinaweza kukusaidia kukabiliana na athari za kiafya zinazotokana na uchafuzi wa hewa?

Wanasayansi katika utafiti wao uliotolewa hivi karibuni, wanaeleza ulaji wa chakula cha Mediterania ( Mediterranean diet) chenye matunda mengi, mbogamboga, nafaka isiyokobolewa, samaki, maharage jamii ya soya, mafuta ya mizeituni na mayai yanaweza kuwalinda watu dhidi ya athari za afya zinazotokana na uchafuzi wa hewa.

Wanasayansi hao kutoka Shule kuu ya Udaktari ya NYU ya Marekani, walichambua data za watu takribani 550,000 wenye wastani wa umri wa miaka 62 kwa miaka zaidi ya 17 ambapo waliwapanga watu hao kwenye makundi kulingana na ulaji wao unaoendana na chakula cha Mediterania na kulinganisha na muda waliokaa kwenye hewa iliyochafuliwa.

Walibaini kuwa watu ambao walizingatia kula vyakula vilivyotajwa hapo juu walikuwa na uwezekano mkubwa wa kuepuka magonjwa na vifo vinavyotokana na uchafuzi wa hali ya hewa. Magonjwa hayo ni yale ya mfumo wa upumuaji, moyo na kansa.

                                   Vyakula  jamii ya Mediterania

Vyakula hivyo jamii ya Mediterania vina uwezo mkubwa wa kukabiliana na vimelea vya maambukizi ya magonjwa kwa mtu ambaye atazingatia kwa usahihi kutumia katika maisha yake.

Uchafuzi wa hewa unasababisha athari mbaya za kiafya kupitia hewa ukaa na mlo wa Mediterania una virutubisho muhimu kupambana na vimelea vya magonjwa,” anasema Mwandishi Mtafiti wa utafiti huo, Chris Lim wa Chuo cha NYU.

Lim anasema vyakula vya aina nyingine vinaweza kusaidia kukabiliana na athari hiyo. “Nilipoangalia kila mchanganyiko wa chakula cha Mediterania, kina matunda, mbogamboga na mafuta yanayoweza kupambana na athari za hewa chafu,” anasema.

Utafiti kuhusu ulaji kama unaweza kuzuia athari za kiafya za uchafuzi wa hewa bado haujahakikiwa na kukubalika kisayansi. Lakini utafiti huo sio wa kwanza kutafuta uhusiano wa mlo na athari za kiafya za uchafuzi wa hali ya hewa.

Wakala wa Uhifadhi wa Mazingira wa Marekani (U.S. Environmental Protection Agency (EPA)) unatafiti kama mlo unaweza kumlinda mtu dhidi ya athari za uchafuzi wa mazingira. Pia wanatafiti ili kujiridhisha kama virutubisho hivyo vinaweza kutumika badala ya dawa za kitabibu na kwa kiasi gani mtu anatakiwa apate virutubisho hivyo kumhakikishia usalama dhidi ya uchafuzi huo.

Hata hivyo, bado watu wanashauriwa kutumia zaidi matunda na mbogamboga kwenye milo yao ya kila siku ili kupata faida mbalimbali za kiafya.

Continue Reading

Afya

Ulaji mbaya wa chakula watajwa kusababisha kansa ya matiti kwa wanawake

Published

on

Thamani ya maisha haiko kwenye muonekano wa mtu na vitu vinavyomzunguka bali kwenye chakula anachokula kila siku ili kuwa na afya njema. Lakini umewahi kujiuliza, chakula kinawezaje kupunguza uwezekano wa kufa kutokana na magonjwa ikiwemo kansa?

Utafiti mpya uliofanyika huko Marekani umebaini kuwa kwa sehemu mlo kamili unaweza kupunguza hatari ya kufa kwa kansa.

Mtafiti Dk. Rowan Chlebowski wa Kituo cha Taifa cha Uuguzi cha City of Hope na wenzake walichambua takwimu za wanawake 48,000 waliosajiliwa katika mpango wa Afya ya Mwanamke unaoratibiwa katika vituo 40 nchini Marekani.

Awali wanawake wote walipata vipimo na hakuna aliyegundulika kuwa na kansa ya matiti lakini 20,000 kati yao walishauriwa kubadilisha mlo na kupunguza ulaji wa mafuta kwa asilimia 20 katika milo yao ya kila siku.

Pia waliambiwa wale zaidi matunda, mbogamboga na nafaka zisizokobolewa. Wanawake wengine hawakupewa maelekezo yoyote ya kuzingatia mlo kamili lakini walifundishwa kuhusu lishe nzuri na mlo wenye afya.

Baada ya miaka nane ya kuwafuatilia wanawake hao, watafiti hao waliangalia idadi ya kansa ambazo wanawake hao walitibiwa na zile ambazo zilisababisha vifo. Walibaini kuwa wanawake ambao walitumia kiasi kidogo cha mafuta walikuwa na hatari ndogo ya kufa kwa kansa ya matiti kwa asilimia 22, ukilinganisha na wanawake wengine.

Pia wanawake hao walipunguza kwa asilimia 24 hatari ya kufa kwa kansa zingine ikiwemo kwa 38%  magonjwa ya moyo ikilinganishwa na wanawake wa kundi ambalo walipata elimu ya mlo.

“Tunachokiona ni matokeo halisi,” anasema Dk. Chlebowski. Tafiti za awali ziliangalia madhara kabla ya uchunguzi wa kansa, lakini utafiti huu ulichambua kwa kiasi gani mlo unaweza kumuathiri mtu baada ya uchunguzi.

“Tulichobaini ni kuwa ushauri wa mlo baada ya uchunguzi wa kansa ya matiti ulikuwa muhimu kuliko kabla ya uchunguzi.”

                        Ulaji wa matunda na mboga unasaidia kupunguza hatari ya kupata kansa

Hata hivyo, utafiti huo ulibaini kuwa wanawake ambao wanazingatia kutumia kiasi kidogo cha mafuta katika maisha yao wana nafasi kubwa ya kuepuka kansa ya matiti.

Kutokana na idadi ya watu walioshirikishwa kwenye utafiti huo, Dkt. Chlebowski anasema wazo la kuhusisha mlo katika programu ya matibabu lilikuwa ni muhimu ili kupata matokeo chanya katika kukabiliana na kansa ya matiti kwa wanawake.

Watafiti hao wanaendelea na uchunguzi ili kufahamu kama ulaji wa chakula unaweza kuwa sehemu ya matibabu ya kansa ya matiti. “Inahamasisha kwasababu tunajaribu kuziba pengo kati ya mtindo wa maisha na mchakato wa kibaiolojia uliopo nyuma ya ugonjwa huo.”

 

Kansa ya matiti

Saratani ya matiti ni ugonjwa ambao huwapata wanawake na unatokana na athari za chembe ndogo ama seli kwenye matiti na matokeo yake ni kwamba hubadili mfumo wa kawaida wa kukua na kuongezeka.

Mabadiliko haya huanza polepole na yanaweza yakachukua muda mrefu hadi mtu kuweza kujua kama ana matatizo hayo. Ikiwa katika hatua hizo za mwanzo kwa kawaida huwa hakuna maumivu jambo hilo ni moja ya mambo ambayo huchangia baadhi ya wagonjwa kubaini tatizo hilo wakati tayari limekomaa.

Ni kutokana na sababu hizo, wanawake hutakiwa kuchunguza afya zao mara kwa mara kwasababu ugonjwa huweza kutibiwa kirahisi iwapo utabainika mapema.

Miongoni mwa dalili za saratani ya matiti ni uvimbe kwenye matiti ama makwapani. Titi kubadilika kiumbo, titi kutoa majimaji yaliyochanganyika na damu ama chuchu kuingia ndani.

Zipo aina mbalimbali za tiba na mojawapo ni upasuaji. Upasuaji huu kwa kawaida hufanywa katika hatua za mwanzo. Njia nyingine ni tiba ya mionzi au kupewa dawa. Jambo la kukumbukwa ni kwamba ugonjwa huu unaweza kusababisha kifo iwapo hautabainika mapema na kupatiwa tiba mwafaka.

Njia ambayo mtu aweza kujilinda asiathirike na saratani hii ya matiti ni kujichunguza mara kwa mara ili kubaini mapema na kupatiwa dawa.

Mwanamke anapaswa kuchunguzwa mara moja kwa mwaka ili kuona kama ameathirika na ugonjwa huo au la.

Continue Reading

Muhimu Kusoma

Copyright © 2018 FikraPevu.com