Connect with us

Sayansi na Teknolojia

Maendeleo na Usalama wa Mtandao vinatakiwa kwenda sambamba

Published

on

Kwa mara nyingine tena, China ni mwenyeji wa mkutano kuhusu mtandao wa Internet, unaofanyika katika mji wa Wuzhen, mkoani Zhejiang hapa China. Mada mbalimbali zinajadiliwa kwenye mkutano huu, ikiwa ni pamoja na maendeleo ya huduma ya Internet na Usalama wa Internet. Kwenye hotuba iliyotolewa na Rais Xi Jinping, na kusomwa kwa niaba yake na mkuu wa Idara ya usimamizi wa mtandao wa Internet ya China Bw. Wang Huning, Rais Xi amesema, “China iko tayari kuweka kanuni na mifumo mipya ya usimamizi wa mtandao wa Internet, ili kuzinufaisha pande zote na kukabiliana na hali ya kukosa uwiano iliyopo kwa sasa”.

Rais Xi ametoa kauli hii kutokana na ukweli kwamba China kwa sasa imepiga hatua kubwa kwenye sekta ya mtandao wa Internet, ikiwa ni pamoja na kufikisha mkonga wa mawasiliano karibu katika kila kona ya nchi, kuwa na viwanda vingi vya kutengeneza zana zinazotumia huduma ya internet kama vile kompyuta na simu aina ya smartphone, makampuni makubwa ya huduma za Tehama kama Huawei na ZET, na hata kuweka sheria na kanuni zilizopevuka kwenye usimamizi wa mtandao wa internet. Maendeleo haya bila shaka yanaifanya China istahili kuwa mwenyeji wa mkutano huu.

Kwa watu wengi wa nje au hata wageni wanaokuja kwa mara ya kwanza hapa China, licha ya kuvutiwa na maendeleo iliyopata China kwenye sekta ya mtandao wa internet, pia wanapenda kujua ni mbinu gani ambazo China imeweza kutumia kufanya mtandao wa Internet uwe salama.

Tukianza kuangalia upande wa maendeleo, kwa sasa hapa China, watu wengi wamepiga hatua kwenye matumizi ya Internet, kutoka kuwa njia ya mawasiliano au kupata habari, na kufikia kuwa njia muhimu ya kupata huduma za kimsingi za jamii, na hata kupunguza matumizi ya pesa taslimu. Kwa sasa miamala mbalimbali inafanyika kwa kutumia tovuti au vikoa kama vile Wechat na Alipay, au kufanya biashara au manunuzi kwa kutumia tovuti na vikoa kama vya tovuti maarufu za Taobao, au Jingdong. Lakini pia watu wanaweza kununua tiketi za ndege, treni au hata kufanya booking ya hoteli kwa kutumia tovuti na vikoa mbalimbali, teknolojia hii pia imefika kwenye eneo la matibabu na hata elimu.

Kwenye upande wa usalama, serikali ya China imewekeza vya kutosha kwenye kile kinachoitwa Great Firewall, ambacho kinazuia tovuti na vikoa visivyoendana na sheria, kanuni, maadili na hata kuhatarisha utulivu na masikilizano ya jamii. Na pia kuna sheria na kanuni matumizi ya internet

Kwenye mkutano huu Tanzania imewakilishwa na Dr. Kennedy Gastorn, ambaye ni katibu mkuu wa Shirika la ushauri wa kisheria la Asia na Afrika, ambaye kwenye mkutano huo ametaja hatua inazopiga Tanzania kwenye matumizi ya mtandao wa Internet, hasa kuwanufaisha watu wa kawaida, akitolea mfano kikoa kinachoweza kuwafahamnisha wakulima wa muhogo maendeleo ya zao la muhogo na hata kugundua kama muhongo umeathiriwa na ugonjwa. Kwa nchi kama Tanzania, hayo ni mafanikio makubwa, japokuwa tukiangalia ukubwa wa internet na matumizi yake, ni sawa na tone la mvua kwenye bahari.

Wakati nikipitia maendeleo ya huduma ya Internet kwa Tanzania, bado kuna kitu kimoja ambacho naona kinatatiza. Serikali imekuwa na kasi kubwa sana katika kuwekeza kwenye kufikisha huduma ya internet karibu kila kona ya Tanzania, lakini matumizi ya internet na elimu kuhusu matumizi yenyewe bado viko nyuma sana. Bado kuna uelewa mdogo sana kuhusu faida za mtandao wa internet kwa watanzania wengi. Matumizi makubwa ya internet yamejikita kwenye mitandao ya kijamii. Karibu kila mtanzania ukimuuliza atakwambia anafahamu tovuti za mitandao wa Facebook, YouTube, na wengine wengi watakwambia wanafahamu au hata kutumia vikoa vya WhatsApp, Line, IMO na vingine. Lakini ni karibu hakuna au ni wachache sana wanaofahamu wanaotumia tovuti zinazohusu taaluma mbalimbali kama kilimo, biashara, afya, elimu, au hata kujua tovuti ya serikali au hata idara zake. Hali hii inasikitisha na kukatisha tamaa.

 

Hapa China kuna idara maalum inayosimamia mtandao wa internet Cyberspace Administration of China (CAC), na kazi yake ni hiyo tu, kusimamia mtandao wa Internet. Lakini kwa sisi Tanzania inaonekana kama bado eneo hili halijapewa msimamizi maalum, na badala yake limepachikwa kwenye tume ya usimamizi wa mawasiliano TCRA. Hapa China pia watu wanaelemishwa kuhusu matumizi ya mtandao wa internet na faida na manufaa yake, lakini kwa sisi Tanzania bado watu wanajifunza wenyewe baada ya kununua simu au kompyuta. Hii ni changamoto. Wachina hapa wanawekewa ulinzi dhidi ya wadukuzi na hata kuchukua hatua watu wanapobainika kufanya vitendo hivyo, lakini kwa sisi maeneo haya yote bado tuna udhaifu. Hakuna ubaya kama tukifanya ushirikiano zaidi kwenye maeneo haya.

Ni vizuri tukitambua kuwa matumizi ya internet kwa sasa yamepiga hatua kubwa ikilinganishwa na miaka kumi iliyopita. Hivi karibuni tume ya mawasiliano ilisema idadi ya watanzania wanaotumia simu za mkononi imeongezeka kutoka watu milioni 2.1 wa mwaka 2005 na kufikia watu milioni 40.1 kwa mwaka 2016. Na karibu kila mtanzania mwenye smartphone, akitaka kutumia huduma ya internet anaweza kufanya hivyo. Lakini maendeleo hayo pia yameonyesha udhaifu mkubwa kwenye jinsi watanzania tunavyitumia internet, kiasi kwamba wengine wanaishia kuvunja sheria.

Utafiti uliofanywa hivi karibuni na Twaweza, umeonyesha kuwa watu 358 walikamatwa katika mwaka 2015, na wengine 911 walikamatwa katika mwaka uliofuata kutokana na makosa ya mtandao wa internet. Kwa baadhi ya watu wanaweza kuilamu serikali kuwa inazuia uhuru wa kutoa mawazo, lakini mimi nalaumu “ujinga” au matumizi mabaya ya uhuru wa kutoa maoni, ndivyo vinawaponza watu. Hatuwezi kuilaumu serikali kwa kuwaadhibu watu wanaotumia mtandao kutukana viongozi wetu au kueneza chuki na uongo, kwa kisingizio cha kulinda uhuru wa kutoa maoni. Labda tujiilamu kuwa hatujaweka utaratibu wa kuwafundisha watu kuhusu mambo ya kuepuka wakati wa kutumia mtandao wa internet.

Tukubali kuwa tunatakiwa kupata japo “elimu ya kufuta ujinga” kwenye matumizi ya internet, iwe ni mashuleni au hata kama ni kwenye madarasa maalum. Na sio kuilaumu serikali bila kuangalia ni kwanini serikali inachukua hatua inazochukua. Sheria zilizowekwa na bunge, zipo kuhakikisha watu wanatumia internet kwa njia inayostahili, na sio kuzuia uhuru wa watu kutoa maoni, kama inavyosemwa na baadhi ya watu. Tunatakiwa kukumbuka kuwa tunapotumia internet tuna haki na wajibu.

Continue Reading
Click to comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Biashara/Uchumi

Ukosefu wa taarifa sahihi za viwango na aina ya samaki wakwamisha ujenzi wa viwanda nchini

Published

on

Tanzania itaanza kufaidika na rasilimali za bahari baada ya kuanza kutekeleza Programu ya Udhibiti na Matumizi Endelevu wa Rasilimali Samaki (EAF-Nansen) kudhibiti mabadiliko ya tabia na uchafuzi wa mazingira yanavyoathiri uzalishaji wa mazingira ya bahari na afya.

Programu ya EAF-Nansen inayofadhiliwa na Norway na kutekelezwa na Shirika la Chakula na Kilimo la Umoja wa Mataifa (FAO) kwa kushirikiana na Taasisi ya Utafiti wa Mambo ya Bahari ya Norway (IMR) itasaidia kutunza mazingira na mifumo ya ikolojia kwa upande mmoja na kutatua mahitaji ya binadamu ya chakula na faida za kiuchumi.

Programu hiyo imekuja siku chache baada ya meli ya kisasa ya utafiti wa samaki na mazingira baharini yenye jina la Dkt. Fridtjof Nansen kukamilisha uchunguzi wake wa rasilimali na mazingira bahari katika maji ya Bahari ya Hindi nchini Tanzania.

Meli hiyo imebaini kuwa Tanzania ina uhaba wa taarifa sahihi za viwango na aina ya samaki, hali inayokwamisha ujenzi wa viwanda vya kusindika samaki nchini.

Chini ya Mpango wa Programu ya EAF-Nansen, meli hiyo inaendesha utafiti wake wa rasilimali bahari na mazingira baharini katika ukanda wa Kusini Mashariki mwa Afrika na Bahari ya Hindi. Nchi thelathini za Kiafrika ikiwemo Tanzania zitapata msaada wa kitaalamu na kisayansi wa namna ya kudhibiti rasilimali zao za samaki na viumbe bahari wengine kwa kutumia na kutekeleza mpango endelevu wa utunzaji wa mazingira.

Akizungumza katika hafla fupi ya kilele cha utafiti huo iliyofanyika ndani ya meli iliyotia nanga katika Bandari ya Dar es Salaam, Katibu mkuu kiongozi, Balozi John Kijazi amesema mpango huo umekuja kwa wakati muafaka kwani utachochea kasi ya uanzishwaji wa viwanda hapa nchini hususani katika sekta ya uvuvi.

Hii ni hatua kubwa sana kwa Tanzania ambayo itafaidika na huduma za utafiti wa kisasa wa meli hii kupitia ushirikiano wa wadau hapa nikizungumzia FAO na Serikali ya Norway, kuweza kujua kwa uhakika aina na kiwango cha samaki na rasilimali bahari nyingine tulizonazo katika maji yetu,” amesema Balozi Kijazi.

Amesema taarifa kuhusu rasilimali bahari yetu ni muhimu sana katika kufanya maamuzi na kupata fursa za ndani na kimataifa za uwekezaji katika sekta ya uvuvi na kutilia maanani mambo muhimu ya utunzaji wa mazingira.

Kwa kutumia taarifa sahihi tunaweza kuwavutia wawekezaji kuja na kujenga viwanda vya kusindika samaki na vingine vinavyohusiana na sekta hii ya uvuvi na hivyo kuongeza kasi kwenye mpango wetu wa kujenga Tanzania ya viwanda,” amesema Balozi Kijazi.

Kwa upande wake,Waziri wa Mifugo na Uvuvi, Luhaga Joelson Mpina amesema, mpango huo utaongeza ajira na matumizi ya teknolojia ya kisasa katika sekta ya uvuvi. “Hii itatuwezesha kupata wawekezaji katika eneo hili ambao watajenga viwanda vya kuchakata na kusindika mazao ya samaki ambapo mbali ya kutoa fursa za ajira kwa watu wetu hususani vijana katika mnyororo wa thamani, lakini pia utakuza mapato ya Serikali.”

Wadau wa mazingira wanasema ikiwa mpango huo utatekelezwa kikamilifu unaweza kusaidia kupunguza athari za mabadiliko ya hali ya hewa ambayo yameathiri uhai wa bahari na rasilimali zilizopo.

Mbali ya taarifa ambazo zitawezesha udhibiti bora wa rasilimali kwa matumizi endelevu, utafiti huu utapekelea uelewa mzuri wa athari za mabadiliko ya tabia nchi na athari nyingine za nje, kama vile uchafuzi wa mazingira na mifumo ya uhai baharini.,” amesema Mwakilishi wa FAO nchini Tanzania, Fred Kafeero.

Programu ya Udhibiti na Matumizi Endelevu wa Rasilimali Samaki (EAF) imekuwa ni moja ya marejeo makuu za FAO katika kusaidia nchi katika juhudi zao za kudhibiti na kutekeleza kanuni za maendeleo endelevu.

Kwa mujibu wa FAO, programu ya EAF ni njia ya kutekeleza kanuni sahihi za uvuvi kwa kutoa mwongozo wa namna ya kufikia malengo ya sera ya kiuchumi, kijamii na ikolojia kupitia malengo, viashiria na njia za tathimini. EAF inanuia kuweka uwiano kati ya mambo mawili muhimu; Utunzaji wa mazingira na mifumo ya ikolojia kwa upande mmoja na kuweza kutatua mahitaji ya binadamu ya chakula na faida za kiuchumi upande mwingine.

Uvuvi haramu bado ni changamoto

Utafiti uliotolewa hivi karibuni na Taasisi ya Overseas Development ya nchini Uingereza unaeleza tatizo la uvuvi haramu kwenye bahari kuu ikiwemo bahari ya Hindi kwamba unachochewa zaidi na ukosefu wa miundombinu ya mawasiliano, ushirikiano na teknolojia ya kutunza takwimu za meli za uvuvi kwenye bahari kuu ikiwemo bahari ya Hindi ambayo inaunganisha mataifa mbalimbali duniani.

Tatizo ni kubwa kwa nchi za Afrika ambazo hazina teknolojia ya kisasa na taasisi imara za kusimamia uvuvi ambapo kila mwaka nchi za Afrika Magharibi zinapoteza Dola bilioni 2 za kimarekani huku nchi zinazotumia bahari ya Afrika Mashariki (Kenya, Tanzania, Mauritius, the Comoros, Mozambique, and the Seychelles ) zinapoteza zaidi dola milioni 200 kila mwaka.

Licha ya kila nchi kuwa na taratibu zake katika kupambana na uvuvi haramu, hazijafanikiwa kumaliza tatizo hilo na changamoto inayojitokeza kwenye ukusanyaji wa takwimu na matumizi ya vifaa vya kusimamia mwenendo wa meli katika eneo la bahari kuu.

Utafiti huo unaeleza kuwa ili kufuatilia eneo na safari, meli zinapaswa kuwa na kifaa cha mawasiliano kijulikanacho, ‘Vessel Management Systems (VMS)’. Hata hivyo meli nyingi hazina kifaa hiki hasa katika nchi zinazoendelea ambako teknolojia hiyo haipatikani au wasimamizi wa meli huzima ili kuepuka kufuatiliwa na mamlaka husika.

Licha ya kifaa cha VMS kuwa na uwezo wa kutambua eneo, umbali na mwelekeo wa meli lakini hakiwezi kutambua meli zinazoharibu mazalia ya samaki na viumbe wengine wa baharini

Continue Reading

Biashara/Uchumi

BAJETI YA VIWANDA 2018/2019: Wabunge wampa waziri Mwijage somo la uwekezaji

Published

on

Hatimaye Waziri wa Viwanda, Biashara na Uwekezaji, Charles Mwijage amewasilisha bajeti ya Sh143.33 bilioni, ikiwa ni ongezeko la Sh21.1 bilioni ikilinganishwa na bajeti ya wizara hiyo kwa mwaka 2017/18 yenye vipaumbele 13, huku sakata la kupanda bei ya sukari  na mafuta ya kula likiendelea kuteka mijadala ya wizara hiyo.

Akiwasilisha bajeti hiyo bungeni jijini Dodoma, Mwijage alisema kati ya fedha hizo, Sh bilioni 43.3 ni za matumizi ya kawaida na Sh bilioni 100 ni za matumizi ya maendeleo.

Bajeti hiyo ambayo ilikuwa inasubiriwa kwa hamu imeainisha vipaumbele 13 vya wizara hiyo kwa kushirikiana na taasisi zake ni kutunisha mtaji wa Mfuko wa Taifa wa Maendeleo ya Wajasiriamali (NEDF); kuendeleza miradi ya kielelezo ya Mchuchuma na Liganga kwa kulipia fidia, mradi wa magadi Soda Engaruka na Kiwanda cha Matairi Arusha.

Vipaombele vingine ni uendelezaji wa eneo la Viwanda la TAMCO Kibaha, mradi wa kuunganisha matrekta ya URSUS, uendelezaji wa Mitaa na maeneo ya viwanda vya Shirika la Viwanda vidogo vidogo (SIDO);  Kuendeleza Kanda Kuu za Uchumi (Ruvuma, Tanga, Kigoma na Manyoni).

“Pia kuendeleza mradi wa Bagamoyo SEZ & BMSEZ; Kituo cha ughavi Kurasini na Eneo la Viwanda la Kigamboni; Kuendeleza utafiti kwa ajili ya TIRDO (Shirika la Utafiti na Maendeleo ya Viwanda Tanzania), CAMARTEC (Kituo cha Zana za Kilimo na Teknolojia Vijijini) na TEMDO (Shirika la Uhandisi na Usanifu wa Mitambo); Dodoma Leather and Dodoma SEZ; na ujenzi wa maeneo maalumu ya viwanda,” alisema Mwijage.

Pamoja na vipaumbele hivyo, wizara itaweka msukumo wa pekee katika kuhamasisha ujenzi wa sekta binafsi ya Kitanzania iliyo imara ili iweze kushiriki na kuchangia ipasavyo katika ujenzi wa uchumi wa viwanda.

 

Viwanda vilivyopo nchini

Wizara ya Viwanda, Biashara na Uwekezaji imelieleza Bunge kuwa, kwa mujibu wa Ofisi ya Taifa ya Takwimu (NBS), hadi Machi mwaka huu, Tanzania ilikuwa na viwanda 53,876 vikiwemo vikubwa 251 sawa na asilimia 0.46.

Waziri wa Wizara hiyo, Charles Mwijage amesema, hadi wakati huo, kulikuwa na viwanda vya kati 173, vidogo 6,957 na vidogo sana 46,495.

Amesema, tangu Serikali ya Awamu ya Tano ilipoingia madarakani, hadi Machi mwaka huu vimejengwa viwanda vipya 3,306.

 

Dhana ya Kiwanda

Waziri wa Viwanda, Biashara na Uwekezaji, Charles Mwijage amewaeleza wabunge wa Bunge la Tanzania na wananchi maana ya neno kiwanda, kutokana na kuwepo na mkanganyiko wa dhana halisi ya kiwanda.

Kwa mujibu wa Mwijage, kiwanda ni eneo ambalo malighafi huchakatwa kwa muktadha wa uongezaji thamani. Amesema, shughuli yoyote ndogo au kubwa ya kuongeza thamani kwenye malighafi kwa lengo la kutoa bidhaa ni shughuli ya kiwanda.

Amesema, kwa vigezo vya kimataifa, makundi ya viwanda huzingatia ajira, mtaji na mapato lakini kwa Tanzania vigezo vinavyozingatiwa ni kiwango cha mtaji na ajira zinazotokana na shughuli husika za kuongeza thamani.

 Kiwanda ni eneo ambalo malighafi huchakatwa kwa muktadha wa uongezaji thamani

 

Michango ya Wabunge

Waziri Kivuli wa Viwanda, Biashara na Uwekezaji, Anthony Komu amesema sera ya viwanda imeipa kisogo miradi ya Liganga na Mchuchuma jambo linaloilazimu Serikali kuagiza chuma nje ya nchi kwa ajili ya ujenzi wa reli na malighafi za viwanda vya nondo nchini.

Akichangia mjadala wa bajeti ya viwanda, biashara na uwekezaji, Komu amesema licha ya miradi hiyo kuanza kuzungumziwa miaka kadhaa iliyopita, serikali imeendelea kupiga danadana kuitekeleza.

Komu ambaye pia ni Mbunge wa Moshi vijijini (Chadema), amesema mwenendo huo unadhihirisha kuwa uwekezaji unaofanywa kwenye sekta ya viwanda hauwezi kuonesha dalili njema iwapo hakutakuwapo na maji ya kutosha.

“Sasa miradi ya gesi asili haijatumika vya kutosha lakini cha ajabu serikali imekimbilia kuwekeza kwenye Stiggler’s Gorge na kuanzisha vita na mataifa mengine duniani, ambayo ni sawa na kuhamisha goli, hapakuwa na ulazima huo hasa ikizingatiwa miradi mikubwa iliyoanzishwa haijatumika ipasavyo wala kutengamaa,” amesema.

Kwa upande wake, Mbunge wa Kigoma Mjini, Zitto Kabwe amesema wizara ya viwanda inapaswa kuongozwa kidiplomasia na si kama Tawala za Mikoa na Serikali za Mitaa (TAMISEMI). Akiwa na maana kuwa waziri wa wizara hiyo anatakiwa kupewa safari za nje ya nchi kutafuta masoko ya bidhaa za viwanda vya ndani.

“Huwezi kuongoza wizara hii kama unaongoza Tamisemi, ni diplomasia,” alisema Zitto.

Kutokana na kauli hiyo, Spika wa bunge Job Ndugai amekiri kuguswa na mchango huo na kusisitiza kuwa ni kweli mawaziri inabidi wasafiri ili kuimarisha mahusiano na nchi za nje katika kukuza uchumi wa viwanda.

“Waziri wa Biashara hawezi kukaa na sisi hapa, lazima ende, tumuombee popote pale kwenye mamlaka lazima asafiri, maana bidhaa zetu tutauza Kongwa, kuna soko huko?

“Waziri wa utalii lazima asafiri ‘apige mawingu’ huko na wengine huko, ndiyo ukweli jamani, sisi wabunge lazima tuwasemee,” amesisitiza Ndugai.

Continue Reading

Sayansi na Teknolojia

Mahakama Kuu yazuia utekelezaji wa kanuni za Maudhui Mtandaoni

Published

on

  • Ni zile zinazowataka wamiliki wa blogu na runinga za mtandaoni kupata leseni toka serikalini
  • Wanaharakati wasema zinakiuka haki za msingi za binadamu

Mahakama Kuu Kanda ya Mtwara  imetoa  zuio la muda  linalozuia matumizi ya Kanuni za Maudhui ya Mtandaoni  ampaka kesi  ya msingi iliyofunguliwa na watetezi wa haki za binadamu itakaposikilizwa.

Kimsingi kanuni hizo zilipaswa kuanza kutumika Mei 5 mwaka huu, baadaya ya Mamlaka ya Mawasiliano Tanzania (TCRA) ambayo ilitoa wiki mbili kwa wamiliki wa blogu, majukwaa, redio na runinga za mtandaoni kuwasilisha maombi katika mamlaka hiyo ili kupata leseni ya kuendesha shughuli zao mtandaoni.

Hii inatokea kiwa imebaki siku moja kwa tarehe ya mwisho na iliyowekwa na TCRA kuwasilisha mambi ya leseni, Mahakama Kuu imetoa zuio hilo baada ya taasisi sita kuwasilisha mahakamani maombi ya kuzuia matumizi ya Kanuni hizo April 30, mwaka huu.

Taasisi zilizowasilisha maombi hayo mahakamani ni Kituo cha Sheria na Haki za Binadamu (LHRC), Mtandao wa Watetezi wa Haki za Binadamu Tanzania (THRD), Baraza la Habari Tanzania (MCT), Jamii Media, Chama Cha Wanawake Wanahabari Tanzania (TAMWA) na Jukwaa la Wahariri Tanzania (TEF).

Katika kesi ya msingi ya mapitio ya kanuni hizo, taasisi tajwa zimewashitaki  Waziri wa Habari, Utamaduni na Michezo, Mamlaka ya Mawasiliano Tanzania (TCRA) na Mwanasheria Mkuu wa Serikali.

Katika maombi ya msingi taasisi hizo zinaiomba Mahakama Kuu kufanya mapitio ya kanuni hizo kwa kigezo kwamba Waziri ametumia nguvu ya kisheria nje ya mamlaka yake ( Ultra vires). Pia kanuni hizo zinakiuka haki ya usawa  katika matumizi ya mitandao ya kijamii bila kuwekewa vikwazo vinavyoathiri kundi fulani la watu.

Maombi hayo pia yamejikita kupitia kanuni hizo kwasababu zinapingana na haki ya kujieleza ( Freedom of exepression) haki ya kusikilizwa( rights to be heard) , na haki ya usiri ( Privacy rights) ambazo zote kwa pamoja zinawahusu moja kwa moja watumiaji wa mitandao ya kijamii.

Baada ya zuio hilo la Mahakama Kuu kanda ya Matwara, imepanga kusikiliza  tena kesi ya msingi Mei, 10 2018.

 

Kanuni za Maudhui ya Mtandaoni

Kanuni za Maudhui ya Mtandaoni (Online Content Regulations) zilipitishwa na serikali Februari mwaka huu ili kufanya kazi sambamba na Sheria ya Makosa ya Mtandao ya mwaka 2015, ambayo imekuwa ikilalamikiwa kwa kuminya uhuru wa kujieleza na kutoa maoni.

 Kwa mujibu wa Kanuni hizo ili mtu akubalike kutoa huduma ya blogu, jukwaa, redio na runinga za mtandaoni, muombaji atalazimika kujaza fomu inayoelezea gharama tarajiwa za uwekezaji, idadi ya wakurugenzi na wafanyakazi na wana hisa wa jukwaa/blogu husika . Pia kila mwana hisa anapaswa kuainisha mtaji aliochangia kwenye huduma husika, tarehe ya kuanza kufanya kazi na mipango ya baadaye ya ukuaji wa blogu.

Pia wamiliki wanapaswa kulipa kiasi kisichopungua milioni 2 ili apate leseni, jambo ambalo limepingwa na wadau wa habari nchini wakidai ada hiyo ni kubwa na inalenga kuzuia upatikanaji wa habari kwa wananchi kwasababu wamiliki wengi hawana hicho kiasi.

Licha ya mamlaka husika kutoa kibali au leseni ya kuendesha blogu, pia ina nguvu kisheria kunyang’anya kibali/leseni ikiwa blogu itachapisha maudhui yanayodhaniwa ‘ kusababisha au kuhatarisha amani, kuchochea machafuko au uhalifu’ au ‘yanatishia usalama wa taifa au afya na usalama wa umma’.

                         Watumiaji wa simu janja nao watakasa taarifa

 

Waliopewa mamlaka ya kusimamia maudhui ya mtandaoni ambao ni Mamlaka ya Mawasiliano Tanzania (TCRA) watakuwa na uwezo pia wa kuwalazimisha wamiliki wa blogu au tovuti kuondoa maudhui yanayodhaniwa kuwa hayafai ndani ya saa 12 na kama hawajatimiza maagizo hayo wanaweza kulipa fidia isiyopungua milioni tano  au kifungo kisichopungua mwaka mmoja jela.

Tangu zilipopendekezwa mwaka jana, wanaharakati na watetezi wa haki za binadamu ikiwemo Mwanzilishi wa JamiiForums, Maxence Melo walijitokeza na kuhoji baadhi ya vipengele ambavyo vilionekana kukiuka faragha za watu, kuminya uhuru wa wananchi kujieleza na kutoa maoni.

Kanuni hizo zitaithiri JamiiForums kwasababu watumiaji wake watatakiwa kutumia majina halisi na siyo ilivyo sasa ambapo mtu ana uamuzi wa kutumia jina lolote. JamiiForums ilifanya hivyo ili kulinda faragha za watumiaji wake na kuongeza uhuru kujieleza.

Haya yote yanatokea Tanzania, ambako juhudi mbalimbali za kuinua teknolojia ya mawasiliano na habari zinaendelea ili kushindana na nchi jirani za Afrika Mashariki kama Kenya.

“Masharti ya usajili na ada yanaonekana kuwa mzigo mkubwa kwa waanzilishi wa blogu na runinga za mtandaoni, hatimaye itakamwamisha mchakato wa kuinua uhuru wa habari nchini”, alisema, Angela Quintal, Mkurugenzi wa Kamati ya Afrika ya Kuwalinda wanahabari.

Continue Reading

Must Read

Copyright © 2018 FikraPevu.com