Connect with us

Jamii

KUMBUKIZI YA MWALIMU NYERERE: Wasomi wahoji uhuru wa kujieleza, utu, usawa na uadilifu wa viongozi

Published

on

Wasomi nchini wamesema kuyumba kwa msingi ya umoja wa kitaifa, uwazi na uwajibikaji miongoni mwa viongozi na wananchi ni kikwazo kwa Tanzania kujenga amani ya kudumu na uchumi wa kati ifikapo 2025.

Akizungumza kwenye  Kongamano la Mwalimu Nyerere lilofanyika katika Chuo Cha Kumbukumbu ya Mwalimu Nyerere, Kigamboni jijini Dar es Salaam, Mwenyekiti wa taasisi ya Mwalimu Nyerere, Joseph Butiku amesema  baba wa taifa alituachia msingi mzuri wa amani na umoja wa kitaifa na ili nchi ifikie uchumi wa viwanda, misingi hiyo inatakiwa iheshimiwe na kuendelezwa na viongozi.

Amesema Mwalimu Nyerere alifanikiwa kuboresha huduma za kijamii, kupambana na rushwa, maradhi, ujinga na umasikini kwasababu alijenga umoja wa kitaifa ambao uliwaongoza wananchi katika dira moja ya maendeleo.

“Sasa yako maandishi mengi, diwani ya Mwalimu katika umoja imeandikwa katika vitabu vingi lakini alisema umoja ni moja ya tunu yetu watanzania, ndio iliyotuwezesha kuja pamoja katika vyama”, amesema Butiku.

Ameongeza kuwa ili tunu ya amani idumu na kutawala lazima nguzo za watu,utu,usawa ziimarishwe kwenye jamii na viongozi wawe mstari wa mbele kuwaunganisha wananchi na kutekeleza nguzo hizo kwa vitendo.

“Yote haya ambayo Mwalimu Nyerere alihangaika nayo ameyatoa wapi ? ameyatoa katika maisha ya familia za kiafrika. Katika maisha ya nyumba yako ziko nguzo nne na mzikumbuke; moja wapo watu, wenye utu. Katika hilo la watu na watu ni usawa. Msingi mmoja wa umoja wetu ni kukubali hilo kwamba sisi watu ni sawa na binadamu wote kwahiyo ni sawa tusisahau hilo”, amesema Butiku.

Amebainisha kuwa ili nguzo hizo zisimame imara na amani itawale katika maisha ya kila siku ni muhimu kwa viongozi na wananchi kuheshimiana, kushirikiana na kuimarisha misingi ya katiba na sheria. Pia viongozi watoe uhuru wa watu kujieleza na kutoa maoni juu ya mstakabali wa nchi yao.

“Watu wenye akili, busara, wastaarabu wanaheshimiana. Tatu, watu wote wanapenda kuwa huru. Nyerere alikuwa muumini wa utu wa binadamu na ndivyo alivyo, muumini kabisa sio wa kubabaisha wa umoja. Na usipoamini juu ya binadamu mwenzako ukamuona mjinga sijui nini kwasababu anasema sema sana”, amesema Butiku na kuongeza kuwa,

“Napenda kuwashauri mzingatie hili; ninyi ni watu, watu sawa, watu huru, watu wanaoheshimiana, watu wanaojali demokrasia. Mwalimu Nyerere hakutanguliza kwanza viwanda, alisimamia umoja, uhuru, utu na demokrasia, viwanda ni kazi tu ambazo zipo ndani yake”.

      Mwenyekiti wa Taasisi ya Mwalimu Nyerere, Joseph Butiku akizungumza katika moja ya kongamano la wanazuoni.

 

Kwa upande wake,  Mzee Ibrahim Kaduma  amesema amani ndio msingi wa maendeleo ya nchi na kama taifa tunataka kufikia uchumi wa kati ni lazima tuhifadhi amani na viongozi waliopo madarakani wawe ni mfano wa uwajibikaji katika kuwatumikia wananchi.

“Amani ni tunda la imani na itikadi sahihi, matumaini, umoja na ukweli, huruma, haki na upendo na katika hayo yote kuu ni upendo. Ndio maana Mwalimu Nyerere aliandika yanayoitwa maendeleo hayana maana kama hayawezi kuwaendeleza watu na hasa wanyonge”, amesema Mzee Kaduma.

Amesema Mwalimu Nyerere alikuwa mcha Mungu na aliamini katika misingi ya amani na kutenda mema kwa wananchi wake.  Ameongeza kuwa changamoto iliyopo ni kwa viongozi wa sasa kukosa utu, upendo na uadilifu na wanaingia madarakani kwa nia ya kujinufaisha wao na familia zao.

“Kutokana na upendo wake na huruma kwa wanyonge, Mwalimu Nyerere alijatahidi sana mara baada ya uhuru kuonyesha kwa vitendo juu ya umuhimu wa viongozi kuwatumikia watu  na si kuzitumikia nafsi zao”, amebainisha Mzee Kaduma.

Ameongeza kuwa katika siku za hivi karibuni Tanzania imeshuhudia kuyumba kwa misingi ya amani na ameitaka jamii kutafakari na kufanya tathmini za kina juu mstakabali wa taifa katika kuelekea uchumi wa kati.

“Katika miongo hii mitatu tangu Mwalimu atutoke tumeshuhudia kuota mizizi ya unafiki, wivu na kutengwa kwa watu wenye mapenzi mema na mawazo ya Mwalimu Nyerere. Aidha tunashuhudia tamaa zenye kuvuka mipaka za kutafuta fedha na utajiri. Matatizo yetu kuhusu ukosefu wa uadilifu katika taifa letu yamefikia hali mbaya zaidi kuliko hata yale ya ubaguzi wa rangi wa Afrika Mashariki”, amesema Mzee Kaduma.

Hata hivyo, ameshauri kuwa nchi inahitaji mbinu za kisayansi kuchunguza sababu zilizotufikisha hapa na namna ya kushinda; na vijana ndio sehemu muhimu ya kuleta mabadiliko katika jamii ili kuhakikisha viongozi wanazingatia misingi ya uadilifu na amani.

Hoja yake imeungwa mkono na Spika wa Bunge mstaafu, Anna Makinda ambaye amesema vijana  wanapaswa kutafakari  na kumuenzi Mwalimu Nyerere kwa kusoma maandiko yake na kuafuta nafasi za uongozi ili kuleta mabadiliko katika jamii.

Ameongeza kuwa vijana waingie kwenye tunu za uongozi pasipo kujali umri walionao ili kuhakikisha mawazo na mtazamo chanya unajengeka katika gurudumu la maendeleo ya taifa.

“Hivi tunavyokongamana kitu gani tunaondoka nacho? Nyinyi watu mnaweza kuwa viongozi tena wakubwa kweli hata Mwalimu Nyerere alikuwa mdogo zaidi, inawezekana!”, ameshauri Anna Makinda.

Akichangia katika kongamano hilo, Mjumbe wa Kamati Kuu ya Chadema, Prof. Mwesiga Baregu amesema ili amani ipatikane na viongozi wawatumikia wananchi kwa uadilifu, kuna umuhimu wa kukamilisha mchakato wa katiba mpya ya Jaji Joseph Warioba ambayo iliakisi kwa sehemu kubwa fikra na mitazamo ya Mwalimu Nyerere.

“Rasimu ya pili ya Warioba imejengwa katika misingi ya mwalimu Nyerere. Nashangaa chama cha Mwalimu Nyerere (CCM) kinakwamisha mchakato wa katiba unaoenzi fikra za Mwalimu”, amesema Prof. Baregu.

Aliyewahi kuwa Makamu Mkuu wa Chuo Kikuu cha Dar es Salaam, Profesa Mukandara (kushoto) akiwa na Profesa Issa Shivji katika moja ya kongamano la Mwalimu Nyerere.

 

Akiiwakilisha serikali katika kongamano hilo, Waziri wa Mazingira Muungano, January Makamba amesema changamoto za uongozi bado zipo lakini jamii inatakiwa kurejea misingi  ya uadilifu wa waasisi wa taifa na kujisahihisha pale tulipokesea ili kujiletea maendeleo yaliyokusudiwa.

“Utaribu wa kuwaenzi viongozi wa kitaifa na kuhifadhi kumbukumbu zao ni kudumisha na kuendeleza misingi na falsafa zilizotawala maisha yao na kurithishwa kizazi hadi kizazi. Uhifadhi huo wa kumbukumbu za waasisi hautoshi tu kubaki katika hifadhi bali kuzifanya zikae katika akili na hatimaye kubadili maisha ya watu na katika kizazi cha leo na kijacho”, amesema Waziri Makamba.

Amesema serikali itaendelea kuwaenzi waasisi wa taifa na kulinda urithi wa historia na falsafa zao. Pia amewataka vijana kutumia ujana wao vizuri katika kudumisha amani na umoja wa kitaifa, kujenga mshikamano katika ujenzi wa uchumi wa kati ifikapo 2025.

Continue Reading
Click to comment

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Must Read

Copyright © 2018 FikraPevu.com