Connect with us

Michezo/Burudani

Kombe la CHAN: Taifa Stars yajiweka katika mazingira magumu dhidi ya Rwanda, yalazimishwa sare ya 1-1

Published

on

TIMU ya soka ya taifa ya Tanzania, Taifa Stars, leo imejiweka katika mazingira magumu ya kufuzu kwa fainali za Mashindano ya Afrika kwa wachezaji wa klabu za ndani (CHAN) baada ya kulazimishwa kwenda sare ya bao 1-1 na Rwanda katika mechi iliyochezwa kwenye Uwanja wa CCM Kirumba jijini Mwanza.

Mechi hiyo ya kwanza ya raundi ya kwanza ilishuhudia wageni wakipata bao la kuongoza katika dakika ya 18 kupitia kwa winga wa kushoto Dominique Savio Nshuti.

Hata hivyo, nahodha wa Stars, Himid Mao Mkami, aliweza kuisawazishia timu yake katika dakika ya 34.

Matokeo hayo yanaifanya Stars iwe na kazi ngumu ya kutafuta ushindi katika mechi ya marudiano itakayofanyika kwenye Uwanja wa Stade Regionale Nyamirambo, jijini Kigali Jumamosi ijayo, Julai 22, 2017.

Mshindi baina ya Rwanda na Tanzania atakumbana na mshindi kati ya Uganda na Sudan Kusini katika raundi ya pili ya mashindano hayo, ambayo yamepangwa kufanyika Kenya kuanzia Januari 11 hadi Februari 2, 2018.

Hii ni mara ya saba kwa Tanzania kukutana na Rwanda ambapo imeshinda mechi moja tu, kutoka sare mbili na kufungwa mechi nne.

Sudan Kusini ililazimishwa kwenda suluhu na Uganda jana Ijumaa kwenye Uwanja wa Taifa wa Juba na mechi ya pili itafanyika Julai 22, 2017 kwenye Uwanja wa Star Times, Lugogo, jijini Kampala.

Katika mechi nyingine, Afrika Kusini imeilaza Botswana mabao 2-0 katika mchezo uliofanyika mjini Francistown.

Akicheza kwa mara ya kwanza mechi ya kimataifa, kinda wa Kaizer Chiefs mwenye miaka 20, Ryan Moon, aliipatia Bafana Bafana bao la kuongoza dakika ya 28 kabla ya Gift Motupa kufunga la pili dakika ya 72 akiunganisha pasi ya Cole Alexander.

Ethiopia imetoa kipigo cha mbwa mwizi kwa Djibouti kwa kuifunga mabao 5-1 katika mchezo uliofanyika jijini Djibouti.

Mfungaji bora wa Ligi Kuu ya Ethiopia, Getaneh Kebede anayechezea klabu ya Dedebit alicheka na nyavu mara nne na mwenzake Mulualem Mesfin akafunga bao la tano kwa Ethiopia.

Timu hizo zitarudiana katika mji wa Hawassa ulioko kusini mwa Ethiopia mnamo Julai 23, 2017.

Jamhuri ya Kidemokrasia ya Congo ndio mabingwa watetezi wakati Kenya wataingia moja kwa moja kwa kuwa ndio wenyeji.

Senegal nusura waadhiriwe ugenini leo hii baada ya kulazimisha sare ya bao 1-1 kwa Sierra Leone jijini Freetown.

Sierra Leone walifunga bao la kuongoza lakini wakashindwa kulilinda baada ya Senegal kusawazisha katika dakika za mwishoni mwa mchezo, hivyo kujiweka katika nafasi nzuri kwa mechi ya marudiano ambapo mshindi wa jumla atapambana na timu kati ya Guinea-Bissau na Guinea.

Guinea wana nafasi kubwa ya kusonga mbele baada ya kuicharaza Guinea-Bissau mabao 3-1 mapema leo Jumamosi.

Sierra Leone haijawahi kushiriki fainali za CHAN na inafanya kila jitihada kuhakikisha inafuzu safari hii.

Gambia na Mali zimetoka suluhu katika mchezo mwingine wa awali wa mashindano hayo ambao ulifanyika kwenye Uwanja wa Independence mjini Bakau leo Jumamosi.

Mshindi baina yao atakumbana na mshindi baina ya Mauritania na Liberia katika raundi ya pili.

Liberia itaikaribisha Mauritania kesho Jumapili.

Mali wameshashiriki mashindano hayo mara tatu na mwaka 2016 walipoteza kwa Jamhuri ya Kidemokrasia ya Congo kwenye fanali jijini Kigali, Rwanda.

Nayo Comoro imeichapa Lesotho mabao 2-0 katika mchezo uliofanyika kwenye Uwanja wa Stade de Moroni hivyo kuiweka katika nafasi nzuri ya kusonga mbele na kukumbana na mshindi kati ya Namibia na Zimbabwe.

Mabao ya Comoro yalifungwa na Mohamed Youssouf mabema katika kipindi cha pili na lile la ushindi lilipatikana dakika ya 78 kupitia kwa Raidou Boina Bacar.

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Must Read

Copyright © 2018 FikraPevu.com