Connect with us

Siasa

Kesi namba 458 inayowakabili Wakurugenzi wa JamiiForums: Mawakili wavutana kuhusu kidhibiti, yaahirishwa hadi Juni 5

Published

on

MAWAKILI wa upande wa utetezi na wale wa mashtaka katika Kesi namba 458 inayowakabili wakurugenzi wa JamiiForums wamevutana leo kuhusiana kupokelewa kwa kidhibiti mahakamani.

Mvutano huo uliibuka baada ya wakili wa utetezi, Peter Kibatala, kuiomba Mahakama ipokee nakala ya Whois.com baada ya shahidi wa kwanza wa upande wa mashtaka, Habibu Rashid Ntahigie kuikubali, lakini wakili Salum wa upande wa mashtaka akapinga.

Kesi ambayo iko mbele ya Hakimu Mkazi wa Mahakama ya Kisutu, Victoria Nongwa, ilifunguliwa na Jeshi la Polisi ambapo washtakiwa Maxence Melo na Mike Mushi ambao ni wakurugenzi wa kampuni ya Jamii Media inayomiliki mitandao wa JamiiForums na FikraPevu wanakabiliwa na mashtaka mawili.

Wakili Salum alisema kwamba, shahidi yuko kizimbani kuwakilisha upande wa mashtaka na kwamba hawajui nakala hiyo ilitolewaje mtandaoni kwa kuwa hata muhuri ni wa Jamii Media ambao hawana mamlaka ya kuidhinisha nakala hiyo.

Hata hivyo, Wakili Kibatala alipinga na kusema hakuona pingamizi la kisheria kwa sababu shahidi ambaye ni mtaalam wa IT ameitambua na hajaikosoa na kwamba ameomba ipokelewe kama ilivyo.

“Sijaona objection (pingamizi) ya kisheria. Shahidi ambaye ni mtaalam wa IT ameitambua na hajaikosoa na ameomba ipokelewe kama ilivyo. Shahidi ni shahidi wa anayoyafahamu na ndiyo maana ameapishwa yeye, kazi ya upande uliomuita ni kumprompt (kumhamaisha) kueleza anayoyafahamu… So hakuna uwakilishi wa shahidi… na hii inaondoa hata objection (pingamizi) iliyowekwa… Mradi shahidi ameiown (ameimiliki) hiyo document (waraka) naomba ipokelewe kama Exhibit PI,” alisema Kibatala.

Upande wa mashtaka umepinga kwa kusema nakala hiyo siyo halisi hivyo ni lazima iidhinishwe.

Kutokana na mvutano huo wa kisheria, Hakimu Nongwa amesema kwa kuwa kuna vifungu wametaja itabidi akavipitie kwani sheria ya ushahidi kwa mambo ya mtandao imebadilika, hivyo atavipitia ili ajue kama ataipokea hiyo document au la.
“Tarehe 5 mwezi wa 6 tutatoa uamuzi na shauri litaendelea… shahidi naomba ufike siku hiyo,” alisema hakimu na kuahirisha kesi hiyo.

Bottom of Form

Kwa mujibu wa hati ya mashtaka, washtakiwa hao wanadaiwa Kuendesha mtandao ambao haujasajiliwa nchini do-tz, yaani .tz (Tanzania domain), na Kushindwa 'kutoa ushirikiano' kwa Jeshi la Polisi kwa kuzuia taarifa binafsi za wateja wa mtandao wake.
Habibu Rashid Ntahigie, ambaye ni shahidi namba moja katika kesyeye ni Meneja wa Rejistry ya .tz. Elimu yake ni shahada ya uzamili ya IT na Management, isipokuwa kitaaluma ni Mhandisi wa Umeme.

Yuko kwenye ajira hiyo tangu 2008 wakati kampuni ilipoanzishwa na ni mwajiriwa namba moja wa kampuni.
Tanzania Network Information Centre (tzNIC) au Rajisi ya dot tz ni kampuni inayoendesha na kusimamia rasilimali ya nchi (dot tz) kwa ajili mawasiliano kupitia mtandao wa Intaneti.

tzNIC inasimamia rasilimali mojawapo ya mawasiliano Tanzania yaani kikoa cha .tz wakati rasilimali nyingine ni +255, ambapo Watanzania wamepewa herufi 2 wazitumie wakati wanatumia mitandao.

Mwenendo mzima wa kesi hiyo leo hii ulikuwa kama ifuatavyo:

Wakili wa Serikali anayeitwa Salum anauliza: Wadau wenu wakubwa ni nani? Au taasisi gani zinatumia hiyo .tz?

Shahidi: Kwa mujibu wa EPOCA imeainishwa kuwa taasisi zote za serikali na binafsi zinasisitizwa/kuhimizwa kutumia .tz

Salum: Dhumuni ni nini?

Shahidi: Kwanza, Identity (utambilisho) kwenye mtandao. Pili, Credibility (kuaminika) kwenye mtandao. Lengo lingine kubwa ni kupunguza gharama za mawasiliano kwenye mtandao.

Salum: Usajili umeanza rasmi lini?

Shahidi: 2009….

Salum: Ukiangalia upande wa pili wa mahakama (upande wa watuhumiwa) kuna unayemfahamu?

Shahidi: Ndio namfahamu Maxence Melo.

Salum: Ulimuona wapi?

Shahidi: Kwenye press conference ya kutangaza kikoa cha .tz New Africa Hotel mwaka 2010.

Salum: Ulifahamu anahusika na nini?

Shahidi: Wakati ule sikujua…ila baadae nilijua kuwa ana mtandao anaendesha. Nafahamu kuwa anaendesha mtandao wa Jamiiforums.com .
Salum: Wamewahi kujisajili kwenu? 

Shahidi: Ndio wamesajili majina mawili, JF.co.tz na jamiiforums.co.tz.

Salum: Unakumbuka walisajili lini?

Shahidi anataka arefresh memory sababu hakumbuki accurately…. (anataka kusoma).
Wakili wa JamiiForums anasema lazima na yeye aone atakachosoma.

Lissu anasema: Hicho atakachosoma ni lazima iwe alikiandika muda huo tukio lilipotokea… hivyo lazima waone asije kuwa kaandaliwa notes.

Wakili wa serikali amewithdraw ombi la shahidi la kurefresh.
Shahidi: Sikumbuki vizuri tarehe lakini ilikuwa 2013, zikisajiliwa miezi tofauti. 2016 zikafutwa miezi tofauti, baada ya kama mwezi mmoja zilisajiliwa tena 2016. Sasa hivi ziko kwenye database, moja ina-expire June mwaka huu nyingine Novemba…

Salum: Kwahiyo sasa hivi ziko mbili kwenye database?

Kibatala: That was a leading Question (Hilo lilikuwa swali la kuongoza).

(Wamevutana kidogo)

Salum: Tuhuma zilizopo mahakamani umezisikia?

Shahidi: Nimesikia kuwa mtuhumiwa hatumii kikoa cha .co.tz.

Salum: Ulichukua hatua gani baada ya kusikia hvyo?

Shahidi: Nilienda kuhakikisha kama wamesajili. Nikakuta ndiyo wamesajili. Ila katika kuhakiki kama wanatumia nimegundua jf.co.tz wala jamiiforums.co.tz hazitumiki. Nimeangalia kama yanatumika kwa barua pepe lakini hayana MS request…hivyo hayatumiki. Hivyo wamesajili lakini hawatumii kwa barua pepe wala tovuti. Kitaalam hiyo inaitwa 'domain parking' yani kuzuia mtu asitumie jina lako.

Salum: Zaidi ya kikoa cha .tz kuna vikoa vingine vinavyotumika kwenye mtandao?

Shahidi: Vipo vingi kama .com ambayo ni generic top level domain. .com inaendeshwa kwa mujibu wa sheria na taratibu za Marekani, .tz inaendeshwa kwa mujibu wa sheria za Tanzania.

Wakili wa serikali ameuliza swali ila kaambiwa abadilishe aina ya maswali kwani ilikuwa leading question.

Salum: Baada ya kuanzishwa kwa sheria, je vipi kuhusu vikoa vingine?

Shahidi: Sheria haijaongelea vikoa vingine bali imesisitiza tu matumizi ya .tz.

Advocate Peter Kibatala kaingia kufanya cross examination ya shahidi.

Kibatala: Shahidi umesema wewe ni meneja wa tznic?

Shahidi: Ndiyo.

Kibatala: Je, tukitaka kuhakikisha wewe ni meneja utatusaidiaje?

Shahidi: Inabidi umuulize mwajiri wangu.

Kibatala: Kwahiyo hapo uliposimama hatuwezi kujua?

Shahidi: Sijabeba kitambulisho (kaweka mikono mfukoni hakimu kamwambia aitoe).

Kibatala: Kampuni yenu ni registry, je mna register/registers? Yaani mna sehemu ambapo tukitaka kujua huyu kajisajili huyu hajajisajili tunaweza kwenda?

Shahidi: Ndio papo…

Kibatala: Je mahali hapo panaitwaje?

Kibatala: Ukienda kwenye tovuti yetu tznic.org.tz ukurasa wa 1 kabisa ukiweka jina litakupa jibu.

Kibatala: Je, ni nani custodian wa mahali huko?

Shahidi: Kila kikoa kina custodian wake…Pia kama ni mtaalam ukienda kwenye platform ya unix unaweza kuingiza domain name kwenye who is.com.

Kibatala: Kutokana na maelezo yako nimeelewa kuwa hakuna issue ya non-compliance kwa kusajili upande wa jamiiforums, ni kweli?

Shahidi: Ni kweli.

Kibatala anaonesha document: Shahidi naomba utuambie kama hii ndio extract ya who is unayozungumzia.

Shahidi: Ni kweli hii ni extract ya who is…

Kibatala: Inaonesha nini hapo kuhusu jamiiforums?

Shahidi: Inaonesha jina jamiiforums.co.tz limesajiliwa June 2016.

Kibatala: Je hiyo jamiiforums.co.tz kama inavyoonekana hapo imekidhi vigezo vya kisheria vya kiusajili?

Shahidi: Nilishatoa ufafanuzi hapo awali kuwa wamesajili majina mawili…lakini sheria inaongelea kuhusu usajili na utumizi.

Kibatala: Je uko tayari kuikabidhi hii document kwa hakimu(extract ya whois) ili itumike kama kithibitisho cha yale uliyosema?

Shahidi: Sina kipingamizi…ni public info.

Wakili wa serikali: Shahidi yuko kizimbani lakini anatuwakilisha sisi…hii document iko mtandaoni na hatujui imetolewaje huko….hata muhuri ni wa Jamii Media, hawana authority ya kucertify hii document.

Kibatala: Sijaona objection ya kisheria..shahidi ambae ni mtaalamu wa IT ameitambua na hajaikosoa na ameomba ipokelewe kama ilivyo…Shahidi ni shahidi wa anayoyafahamu na ndio maana ameapishwa yeye…kazi ya upande uliomuita ni kumprompt kueleza anayoyafahamu…So hakuna uwakilishi wa shahidi…na hii inaondoa hata objection iliyowekwa… Mradi shahidi ameiown hiyo document naomba ipokelewe kama Exhibit PI.

Upande wa Serikali: Hii document ni copy…original document iko kwenye whois…hii copy lazima iwe certified.

Hakimu kasema kwakuwa kuna vifungu wametaja itabidi akavipitie kwani sheria ya ushahidi kwa mambo ya mtandao imechange hivyo atavipitia ili ajue km ataipokea hyo document au la.

Hakimu: Tarehe 5 mwezi wa 6 tutatoa uamuzi na shauri litaendelea…shahidi naomba ufike siku hiyo.

Continue Reading
Click to comment

Leave a Reply

Your email address will not be published. Required fields are marked *

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2018 FikraPevu.com