Connect with us

Siasa

Kesi namba 456 inayowakabili Wakurugenzi wa JamiiForums kuendelea kuunguruma Kisutu leo

Published

on

KESI namba 456 inayowakabili wakurugenzi wa kampuni ya Jamii Media inayomilikia gazeti tando la FikraPevu na mtandao maarufu wa JamiiForums, Maxence Melo na Mike Mushi, inatarajiwa kuendelea tena leo katika Mahakama ya Hakimu Mkazi Kisutu baada ya kuanza kusikilizwa jana Mei 2, 2017.

Jana, shahidi wa kwanza wa upande wa mashtaka, SSP Ramadhan, kutoka Ofisi ya Mkuu wa Upelelezi Kanda Maalum ya Dar es Salaam alipanda kizimbani kutoka ushahidi.

Fuatilia mtiririko mzima wa kesi hii ktk mtandao wa JamiiForums.com

Shahidi huyo na yuko kwenye ofisi hiyo kwa mwaka mmoja na nusu, ambapo kabla alikuwa Ofisi ya Mkuu wa Upelelezi wa Mkoa wa Kipolisi wa Temeke.

Shahidi huyo alieleza: "Mwaka jana mwishoni nilitoa amri lifunguliwe jalada dhidi yao, msingi wa amri hiyo ni kwa sababu washtakiwa walishindwa kutoa taarifa sahihi kwa maafisa wa upelelezi kuhusu shauri lililoripotiwa polisi."

“Tarehe 19/02/2016 alifika mwananchi aitwae Usama Mohammed katika ofisi yetu, huyu ni ofisa msimamizi wa mauzo ya rejereja katika kampuni ya Oilcom. Alifika na malalamiko kuwa tarehe 13/02/2016 alisoma habari moja JamiiForums kwamba kampuni yake ya Oilcom imetuhumiwa kukwepa kodi Bandarini na kuiibia Serikali na akasema taarifa hizo hazina ukweli wowote.

“Baada ya kumsikiliza kwa kina yaliandikwa maelezo na kufunguwa jalada DSMZ/CID/PE/64/2016. Jalada hilo lilikuwa la uchunguzi wa ukweli wa taarifa hiyo iliyoletwa na mteja wetu. ASP Fatuma Kigondo alielekezwa kuandika barua JamiiForums.

“Ili kupata taarifa za mtu aliyejiita "fuhra JF" au Expert Member, Mkurugenzi aliandikiwa barua ili kutoa taarifa za mtu huyo, barua iliandikwa tarehe 23/2/2016.

“Tulipokea barua kutoka JamiiForums, ilitoa maelezo marefu lakini haikuwa na majibu chanya tuliyoyaomba.

“Walihoji mamlaka ya polisi kutaka taarifa hizo na kusema wana haki ya usiri wa taarifa za wateja wao.”

 (Hakimu akaoneshwa barua ambayo inarejea: REJEA YA MADA TAJWA: USHUHUDA: Hivi ndivyo mafuta yanavyoibiwa Bandarini Dar.

Shahidi alisema anaikumbuka barua ile aliiona kwa macho yake na akaiomba aitoe mahakamani kama kielelezo. Shahidi akaambiwa aisome barua.

Wakili akamuuliza shahidi ana maoni gani kuhusu barua kutoka JamiiForums, lakini shahidi akasema yeye hakuona taarifa yoyote ya faragha katika zile walizoomba.

Akaendelea kueleza kuwa tarehe 01/04/2016 waliandika barua nyingine kukumbushia taarifa hizo na walinukuu kifungu cha 10 vifungu vidogo vya 2-8 vya Sheria ya Makosa ya Mtandao (Crime Procedure Act).

“Kifungu hicho kinawapa mamlaka polisi kupata taarifa kutoka ofisi yoyote kama taarifa inahusiana na suala linalofanyiwa upelelezi. Baada ya barua hiyo JamiiForums hawakujibu tena, hivyo tukaona kuwa wanadhoofisha upelelezi wetu tukaamua tuwakamate wakurugenzi,” akaeleza shahidi huyo.

Alipoulizwa walichukua hatua gani, akasema wamefungua shauri ambalo liko mbele ya mahakama.
Baada ya hapo, aliingia wakili Tundu Lissu ambaye alisema ana maswali mengi sana.

Tundu Lissu: Anasema aeleze kisomo chake mpaka amekuwa SSP wa Polisi.

Shaidi anasema: Mei 2001 nilihitimu Chuo cha Polisi Moshi (CCP) kama Konstable wa Polisi, kati ya Februari 2002 na Julai 2003 nilipanda cheo na kuwa Mkaguzi Msaidizi wa Polisi (Assistant inspector). Mnamo Desemba 2006, alipanda na kuwa Mkaguzi wa Polisi. Kati ya Februari – Julai 2009 nilipata mafunzo ya uofisa na kuwa Mrakibu Msaidizi wa Polisi (ASP). Mwaka 2014 nikiwa katika ulinzi wa amani Sudan nilipanda kutoka ASP hadi kuwa SP. Mwaka 2016 ndiyo akawa SSP.

Tundu Lissu:Kkwa maelezo yako ni sawa nikisema wewe ni afisa wa polisi mwenye uzoefu wa upelezi wa makosa ya jinai? 

Jibu: Ndio.

Tundu Lissu: Ni sahihi kuwa una uzoefu wa upelelezi ndani na nje ya nchi? 

Jibu: Ndio.

Tundu Lissu: Kwa mujibu wa maelezo yako taarifa ya Usama Mohammed ndio ilipelekea mfungue jalada?

Jibu: Ndio 

Tundu Lissu: Na ndio zilipelekea muandike barua kwa JF 23 Februari 2016? 

Jibu: Kweli.

Tundu Lissu: Naomba umueleze hakimu kama hiyo barua iko mahakamani.

Jibu: Haipo.

Tundu Lissu: Sasa shahidi mimi ninayo hiyo barua(Anampa shahidi na kumwambia aiangalie).

Tundu Lissu: "Angalia hiyo barua SSP Kingai".

Tundu Lissu Anamwambia amwambie mheshimiwa hakimu kama ile barua imeandikwa kwa Maxence Melo.

Jibu: Haijataja jina la mtu.

Tundu Lissu: Kwahiyo jina la Max Melo Mubyazi halipo? 

Jibu: Halipo.

Tundu Lissu: Je! Imeelekezwa kwa Mike William?

Jibu: Haijataja jina.

Tundu Lissu: Sasa naomba useme kama kwenye hiyo barua mmesema kuwa mmepata taarifa toka kwa Usama Mohammed?

Jibu: hatujaandika na hatukuwa na sababu ya kufanya hivyo.

Tundu Lissu: Jamiiforums ni kampuni?

Jibu: Ni kampuni.

Tundu Lissu: Kama ni kampuni inatakiwa aiandikishwe brela, hati ya kuandikishwa Brela iko wapi? 

Jibu: Mheshimiwa mimi natoa ushahidi kama mtoa maelekezo, walioandika hizo barua watakuja na kueleza.

Tundu Lissu: Nauliza iko wapi? Yaani iko mahakamani sasa?

Jibu: Ndio.

Tundu Lissu: Kama kampuni inatakiwa iwe na Memorandum of Association, iko wapi?

Jibu: Sifahamu.

Tundu Lissu: Inatakiwa iwe na Bodi ya Wakurugenzi…ipo?

Jibu: Sifahamu.

Tundu Lissu: Nilikusikia ukisema mliwaandikia wakurugenzi ili wawape taarifa, ulimaanisha nini kama sasa unasema haujui kama ina bodi ya wakurugenzi?

Jibu: Mimi najua Wakurugenzi, bodi sijui.

Tundu Lissu: Una ushahidi wa aina yoyote kutoka brela kuhusu JF kama kampuni na washtakiwa kama wakurugenzi.

Jibu: kwa sasa sina ushahidi.

Tundu Lissu Kampa ile hati ya mashtaka, anasema aeleze kama kuna sehemu wanasema kama walipata taarifa kutoka kwa Usama Mohammed.

Jibu: Hakuna.

Tundu Lissu: Naomba useme kama kuna sehemu mmesema kuwa mlikuwa mnachunguza taarifa zinazohusu ukwepaji kodi au kuiibia serikali. 

Jibu: Hapana.

Tundu Lissu: Taarifa za ukwepaji kodi za Fahrer mliziprint??

Jibu: Sijui kama ziliprintiwa.

Tundu Lissu: Kwa hiyo ziko wapi?? Wewe si ndio kiongozi wa upelelezi.

Jibu: Hazipo mahakamani kwa sasa.

Tundu Lissu: Unataka hakimu azifate shimoni?

Jibu: Mimi ni shahidi mmoja kati ya wengi wengine watakuja nazo.

Shahidi amesoma barua toka kwa wanasheria wa JF. Kipande kimoja kinasema "mteja wetu yuko tayari kutoa ushirikiano kwa jeshi la polisi kwa mujibu wa sheria".

Tundu Lissu anamuuliza sasa " ulisema kuwa katika barua hiyo JF ilijibu kuwa ina wajibu wa kulinda faragha za wateja wao. Kwa ufahamu wako kuna haki ya kila mtu kulindiwa faragha ya mawasiliano yake au hakuna?"

Jibu: Inategemea.

Tundu Lissu: Haki ipo au haipo?

Jibu: Kwa private person sifahamu…

Tundu Lissu: Kwa ufahamu wako kuna haki ya kulindiwa faragha ya mawasiliano kwa kila mtu including private persons? 

Jibu: Sifahamu.

Tundu Lissu: Barua ile ya kutoka kwa wanasheria wa JF inasema " mteja wetu anaomba ufafanuzi wa sheria itumikayo kuomba taarifa za mteja" kwa uelewa wako mtu anayeomba ufafanuzi amekataa kutoa taarifa au hajakataa?

Jibu: Kwa maelezo hayo amekataa.

Tundu Lissu: Mtu anayeandika kuwa " mteja wetu angependa kujua kipi cha sheria kinatumika kuomba taarifa za mteja ukiacha kifungu namba 32 cha Cyber Crime Act" Mtu aliyeuliza ni kifungu kipi cha sheria kinatumika amekataa kutoa taarifa au hajakataa?

Jibu: Kwa maelezo hayo ya sasa hajakataa.

Tundu Lissu: Umesema baada ya kupokea barua ya kutoka kwa wanasheria wa JF mliandika nyingine 1/4/2016…je iko mahakamani?

Jibu: Sina uhakika nadhani ipo mahakamani.

Hakimu: Mimi sina.

Tundu Lissu: Mimi ninayo.

Hakimu: Haiwezi kutumika wakati mimi sina haijafika mahakamani.

Tundu Lissu: Inaweza tumika Sababu ameitaja.

Tundu Lissu: Mweleze hakimu kama barua imewataja watuhumiwa.

Jibu: Haijawataja.

Tundu Lissu: Kwenye ushahidi wako wa msingi umesema kuwa barua hii haikujibiwa si ndio?

Jibu: Sijui kama haikujibiwa.

Tundu Lissu: Wewe ni msimamizi gani wa upelelezi usiyejua taarifa muhimu.

Jibu: Sikupata taarifa kama imejibiwa.

Tundu Lissu: Katoa barua toka kwa Victory attorneys iliyojibu barua ile ya 01/04/2016.

Tundu Lissu: Shahidi tafadhali ieleze mahakama kama barua hiyo haina mhuri wa kupokelewa na ofisi ya mkuu wa upelelezi kanda maalum ya Dar.

Jibu: Sina uhakika na Mhuri huu na wala Mhuri sina uhakika nao.

Tundu Lissu: Naomba uulinganishe mhuri huo na ule wa kwenye exhibit PI (barua ya majibu ya mwanzo) .

Jibu: Mimi sio expert wa hayo mambo siwezi kulinganisha.

Tundu Lissu: Tusomee hiyo document imeandikwa kupokewa lini

Jibu: Kwa mujibu wa document hiyo inaonesha ilipokewa 06/05/2016.

Wakili wa serikali alipinga suala hilo na kusema shahidi hawezi kuendelea kuhojiwa kwa document asiyokuwa na uhakika nayo.

Tundu Lissu: Naomba barua hii iwe admitted in evidence for purposes of impeaching….(itumike kama kielelezo).

Upande wa serikali: Shahidi aliyesimama mahakamani ameletwa na jamhuri, kumuimpeach shahidi ni kwa yule aliyemwita mahakamani….Lissu hawezi kumuimpeach shahidi aliyeletwa na jamhuri. Purpose of cross examination ni kucheck credibility ya shahidi…hawatakiwi kumuimpeach…wasubiri muda wa defence kutumia hizo documents…shahidi hawajamleta wao. Au wanipe kifungu wanachotumia kutaka kumuimpeach shahidi.

Tundu Lissu anatoa kifungu…Hakimu anapelekewa akisome 164 (1).

Baada ya kusoma hicho kifungu, Hakimu akaahirisha kesi hiyo hadi leo.

Continue Reading
Click to comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Siasa

Sakata la waraka wa Maaskofu KKKT lang’oka na Msajili Mambo ya Ndani

Published

on

Waziri wa Mambo ya Ndani Mambo ya Ndani, Mwigulu Nchemba amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba ili kupisha uchunguzi wa barua iliyoandikwa ukilitaka Kanisa la Kiinjili la Kilutheri Tanzania (KKKT) kufuta waraka ilioutoa Machi mwaka huu.

Barua iisambazwa kwenye mitandao ya kijamii ikiitaka KKKT kuufuta waraka wa Pasaka uliotolewa Machi 24 mwaka huu vinginevyo hatua kali za sheria zitachukuliwa dhidi ya kanisa hilo.

Waraka huo uliopewa jina la ‘Taifa letu amani yetu’ ulisainiwa na maaskofu 27 wa kanisa hilo. Ulijikita kujadili masuala ya jamii, uchumi, siasa, katiba mpya na matukio ambayo yako kinyume na kile lilichokiita tunu na misingi ya Taifa.

Akizungumza na wanahabari jijini Dar es Salaam, Waziri Nchemba amesema Serikali haipingani na dhehebu lolote na pale ambapo kuna uhitaji wa kufanyia kazi jambo kuhusu taasisi zilizopo chini ya wizara hiyo taratibu huwa zinatumika kuzungumza na sio kama ilivyofanywa taarifa hiyo inayosambaa.

“Serikali inalinda uhuru wa kuabudu na waumini hivyo huo waraka una maudhui kama matatu, ni barua batili na tunaendelea kuchunguza kama imetengenezwa basi imetengenezwaje, kwani haujapita kwetu.” amesema Waziri Mwigulu.

Kutokana na msimamo huo wa serikali, Waziri Nchemba, amemsimamisha kazi Mkurugenzi wa Idara ya Sheria na Usajili wa Jumuiya za Kidini na Vyama vya Kijamii, Merlin Komba, kupisha uchunguzi wa barua iliyoandikwa kwa maaskofu wa KKKT.

“Hivyo basi, namsimamisha Msajili wa hizo taasisi kupisha uchunguzi na ikithibitika ni za Wizara tuweze kujua maana jambo hilo halijapita kwa Waziri, Katibu Mkuu na wala si maelekezo ya serikali,” amesema.

Hata hivyo, amewatoa hofu viongozi wa dini kutokana na sakata hilo na kuwataka waendelee na majukumu yao huku ikitahadharisha jamii kuwa makini na taarifa zinazosambazwa kwenye mitandao ya kijamii.

“Tunawaomba viongozi wa dini waendelee na kazi zao, nasema jamii iwe macho na taarifa zinazosambaa kwenye mitandao ya jamii na wasifanyie kazi taarifa hizo. Viongozi wa dini wasiwe na taharuki na taarifa hizo, hazina baraka za Serikali na wasisite kuwasiliana na Serikali kujua uhalali wake,” amesema.

Waziri Nchemba amesema waraka wa viongozi wa dini uliotolewa miezi iliyopita ni jambo lililopita na hakukuwa na haja ya kuendeleza malumbano yasiyo na tija kwenye jamii.

Katika waraka wa ujumbe wa pasaka uliosomwa katika makanisa ya Kilutheri kote nchini Tanzania na kusambaa katika mitandao ya kijamii, baraza hilo limeorodhesha mambo kadhaa ambayo wameyataja kuwa ndio tishio la umoja na amani ya nchi hiyo.

Utekwaji wa watu wa hivi karibuni, utesaji, kupotea kwa watu, mashambulizi ya silaha dhidi ya viongozi wa kisiasa, muaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi ni baadhi tu ya mambo yaliyotajwa katika waraka huo.

Lakini pia Watanzania wamekuwa na hisia tofauti kuhusu viongozi wa dini kuzungumzia hali ya kisiasa nchini. Waraka wa KKKT ulikuja mwezi mmoja baada ya ule wa maaskofu wa kanisa katoliki ambao nao ulionya juu ya kuminywa kwa haki ya kufanya shughuli za kisiasa kama mikutano ya hadhara na maandamano.

Baada ya nyaraka hizo mbili kutolewa na Maaskofu, baadhi ya mambo yaliyokuwa yakilalamikiwa yalipata ufumbuzi ikiwemo kupungua kwa mauaji na uteswaji wa raia kulikuwa kunafanywa na watu wasiojulikana.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Must Read

Copyright © 2018 FikraPevu.com