Connect with us

Michezo/Burudani

Kandanda: Yanga yanyakua ubingwa mara ya tano kwa tofauti ya mabao

Published

on

YANGA imetwaa ubingwa wa soka wa Tanzania Bara kwa mara ya tatu mfululizo na kuibeba ‘ndoo’ moja kwa moja katika msimu ambao umekuwa na changamoto nyingi zaidi.

Mabingwa hao wa kihistoria, ambao wamewanyima watani wao wa jadi, Simba, fursa ya ubingwa walioukosa kwa misimu mitano sasa, wameweza kuwa timu pekee yenye safu kali zaidi pamoja na ngome imara kuliko timu zote zilizoshiriki ligi hiyo msimu wa 2016/2017.

Licha ya sherehe zao za ubingwa kuingia mkosi baada ya kufungwa bao 1-0 na Mbao FC jijini Mwanza Jumamosi, Mei 20, 2017, lakini Yanga imeunyakua ubingwa huo kwa tofauti ya idadi ya mabao ya kufunga na kufungwa dhidi ya mahasimu wao, Simba, ambao katika mechi yao ya mwisho walishinda 2-1dhidi ya Mwadui kwenye Uwanja wa Taifa Dar es Salaam.

Simba na Yang azote zimefikisha pointi 68, lakini uwiano wa mabao ndio uliowanyima ubingwa vijana hao wa Msimbazi ambao waliongoza ligi kwa muda mrefu hasa duru la pili na kulikuwa na matumaini makubwa ya kunyakua ubingwa.

FikraPevu inatambua kwamba, Yanga ilikuwa katika kipindi kigumu kwa muda mrefu tangu kuanza kwa msimu, hasa baada ya kumwondoa kocha Mholanzi Hans van Pluijim na kumleta Mzambia George Lwandamina, lakini mambo yaliyumba zaidi baada ya mdhamini wa timu hiyo aliyepewa mkataba wa miaka 10, Yussuf Manji, kukumbwa na matatizo yaliyosababisha hata akaunti zake kufungwa na serikali.

 

Ubingwa wa mabao

Yanga imepata ubingwa kwa uwiano wa mabao baada ya kufunga mabao 57 na kufungwa 14, wakati Simba imefunga mabao 50 na kufungwa 17.

Hii siyo mara ya kwanza kwa Yanga kunyakua ubingwa kwa staili hiyo, kwani kumbukumbu ambazo FikraPevu inazo zinaonyesha kwamba, katika kipindi cha miaka 52 ya uhai wa kusaka ubingwa wa soka Tanzania, vijana hao wa Jangwani wamewahi kutwaa ubingwa mara nne huko nyuma kwa staili hiyo hiyo.

Wachezaji wa Simba wakishangilia moja ya mabao yao katika ushindi wa mabao 4-0 dhidi ya Maji Maji msimu wa 2016/2017.

Katika Ligi Kuu ya Muungano mwaka 1983 iliyozishirikisha timu nne – mbili kutoka Tanzania Bara na mbili Zanzibar – ubingwa ulionekana kuwa ama wa Simba au KMKM wakati timu zote zimebakiza mechi moja moja.

Kumbukumbu za FikraPevu zinaonyesha kwamba, kabla ya Oktoba Mosi, 1983 ambayo ilikuwa siku ya mwisho ya kukunja jamvi la ligi hiyo, Simba ilikuwa inashika nafasi ya pili nyuma ya KMKM, lakini zote zikiwa na pointi 6, ingawa KMKM walikuwa na mabao sita ya kufunga na kufungwa matatu, huku Simba ikiwa na mabao matano ya kufunga na matano ya kufungwa.

Yanga wenyewe walishika nafasi ya tatu wakiwa na pointi tano, wakiwa wamefunga mabao manne na kufungwa matatu.

Kwahiyo KMKM na Simba kila moja ilihitaji ushindi na wakati huo huo kuiombea Yanga ifungwe na Small Simba ili kuunyakua ubingwa.

Lakini ushindi wa Yanga wa mabao 4-1 dhidi ya Small Simba ya Zanzibar na kutoka suluhu kwa Simba na KMKM ndio ulioipa Yanga ubingwa wa Muungano mwaka huo kwa tofauti ya uwiano wa mabao.

Yanga ilifikisha pointi 7 sawa na KMKM na Simba, lakini ilikuwa na mabao 8 ya kufunga na manne ya kufungwa, hivyo kuwapiku ‘Wanamaji’ KMKM ambao walikuwa na nafasi kubwa zaidi ya ubingwa.

Kumbukumbu za FikraPevu zinaonyesha kwamba, mabao ya Yanga katika mechi hiyo ya mwisho yalifungwa na Charles Boniface Mkwasa katika dakika za 9, 41 na 76 na Abeid Mziba akafunga dakika ya 37, wakati lile la Small Simba lilifungwa na Suleiman Omari dakika ya 25.

Yanga siku hiyo iliwachezesha Joseph Fungo, Isihaka Hassan 'Chukwu', Ahmad Amasha, Athumani Juma 'Chama', Allan Shomari, Juma Mkambi, Fred Felix Minziro, Charles Boniface, Makumbi Juma/Moshi Majungu, Abeid Mziba, na Juma Kampala/Hussein Idd.

Small Simba yenyewe ilikuwa na Ali Muhsini, Leonard William, Salum Suleiman, Mohammed Khalfani, Yussuf Mussa, Fadhil Ramadhan, Abdulwakati Juma, Rashid Khamis, Suleiman Omari na Seif Bakari/Hussein Ally.

Kwa mujibuwa kumbukumbu za FikraPevu, mwaka 1987 Yanga pia ilitwaa ubingwa kwa tofauti ya mabao dhidi ya Pamba FC ya Mwanza Katika Ligi ya Tanzania Bara baada ya timu hizo kufikisha pointi 23.

Hata hivyo, Yanga ilikuwa na mabao 20 ya kufunga na 10 ya kufungwa, wakati Pamba ilikuwa imefunga mabao 18 na kufungwa 9.

Mechi ya mwisho Septemba 1, 1987 ilishuhudia Yanga ikiifunga Maji Maji bao 1-0 Songea kupitia kwa Mziba. Siku hiyo Yanga iliwachezesha Fungo, Yussuf Ismail Bana, Minziro, Allan Shomari, Lawrence Mwalusako, Issa Athumani, Abubakar Salum, Athumani China, Mziba, Edgar Fongo/Moshi Majungu na Lucius Mwanga/Said Mrisho ‘Zicco wa Kilosa’.

Kikosi cha Yanga cha mwaka 1987.

Maji Maji, ambayo ilishika nafasi ya tatu msimu huo kwa kufikisha pointi 20, iliwachezesha Steven Nemes, Hussein Kaitaba, Samli Ayoub, Peter Mhina, Mhando Mdeve, Abdallah Chuma, Ahmed Abbas, Kevin Haule, Peter Tino, Madaraka Selemani na Venance ‘Motto’ Mwamoto/Rajab Mhoza. Mechi hiyo ilichezeshwa na Kassim Chona wa Mwanza aliyesaidiwa na Shaaban Nyamwera wa Morogoro na Twaha Kaujanja kutoka Mbeya.

Siku hiyo Pamba nayo ilichapa Nyota Nyekundu bao 1-0 kwenye Uwanja wa CCM Kirumba, bao ambalo lilifungwa na Hamza Mponda katika dakika ya 81.

FikraPevu inakumbuka kwamba, mwaka huo Simba ilinusurika kushuka daraja, na ishukuru ‘sare ya ajabu’ ya mabao 5-5 dhidi ya Tukuyu Stars kwenye Uwanja wa Taifa ambayo iliifanya ichupe hadi nafasi ya tatu kutoka mkiani na kuzipisha Reli ya Morogoro na Nyota Nyekundu ambazo ziliteremka.

Kabla ya mechi hiyo ya mwisho, Simba ilikuwa na pointi 16 na mabao 14 ya kufunga huku ikiwa imefungwa mabao 15, lakini sare ikaifanya ichupe juu ikilingana pointi na Biashara (RTC) Mwanza, Coastal Union na Nyota Nyekundu ambayo hata hivyo ilikuwa na mabao 15 ya kufunga na 16 ya kufungwa.

Karibu mechi tatu za mwisho msimu huo zilikuwa na walakini, au kwa lugha nzuri, ‘zilipangwa’ matokeo yake.

Simba ilitoka sare 5-5 na Tukuyu Stars ambayo haikuwa katika hatari ya kushuka daraja huku mabao ya Wana Msimbazi yakifungwa na Edward Chumila (mawili), Francis Mwikalo, Daniel Menembe na Malota Soma ‘Ball Jugler’, wakati ya Tukuyu yalifungwa na Michael Kidilu na Lumumba Richard ‘Burruchaga’ aliyefunga manne.

RTC Kigoma ambayo haikuathirika na matokeo, ilifungwa mabao 5-1 na ‘ndugu zao’ Biashara Mwanza ili kuwaepusha wasishuke daraja. Bao la RTC Kigoma lilifungwa na Wastara Baribari dakika ya 35 wakati yale ya Biashara Mwanza yalifungwa na Philemon ‘Fumo’ Felician aliyefunga manne dakika za 9, 10, 64, na 73, na Dioniz John dakika ya 48.

Reli ndio waliochezea kibano hasa kutoka kwa Coastal Union baada ya kufungwa mabao 5-2, lakini nao hata kama wangeshinda mechi hiyo isingewasaidia kwani tayari walikuwa wameshuka daraja, hali ambayo inadhihirisha wazi kwamba mechi ‘ilipangwa’ kuinusuru Coastal Union isiteremke.

Kumbukumbu za FikraPevu zinaonyesha kwamba, hata bao la kujifunga la beki Salum Pembe katika dakika ya 18 lilikuwa la kizembe kwa sababu alifumua shuti la nguvu wakati akiuridisha mpira huo kwa kipa wake.

Mabao ya Reli siku hiyo yalifungwa naLivingstone Sanke dakika ya 23 na Madundo Mtambo dakika ya 62 (sasa ni Profesa na Mkurugenzi Mkuu wa

Tanzania Industrial Research Developments Organization (TIRDO), wakati yale ya Coastal yalifungwa na Idrissa Ngulungu dakika ya 5, Yassin Abuu Napili dakika ya 14, Salum Pembe (alijifunga dakika ya 18), na Hussein Mwakuruzo akafunga mawili dakika za 35 na 82.

Katika mwaka 1993, Yanga iliinyima Simba ubingwa wa Tanzania Bara kwa uwiano wa mabao pia, ambapo licha ya timu zote kufikisha pointi 43, lakini Yanga ilikuwa na mabao 46 ya kufunga na 15 ya kufungwa, wakati Simba ilifunga mabao 40 na kufungwa 13.

Kikosi cha Yanga cha mwaka 1993.

Hata hivyo, Yanga iliupata ubingwa huo kwa mbinde baada ya kuifunga Milambo mjini Tabora mabao 3-2 katika mechi ya mwisho, wakati Simba wenyewe waliichapa Pan African 2-0 jijini Dar es Salaam kupitia kwa Dua Said na Abdul Mashine.

Vile vile, katika msimu wa 2010/2011, Yanga ilitwaa ubingwa kwa uwiano wa mabao dhidi ya Simba japokuwa zote zilifikisha pointi 49.

Yanga ilifunga mabao 32 na kufungwa 7, wakati Simba ilifunga mabao 40 na kufungwa 17, hivyo ikaukosa ubingwa licha ya kushinda mechi yake ya mwisho dhidi ya Maji Maji kwa mabao 4-1. Yanga yenyewe iliifunga Toto African 3-0.

 

Timu nyingine pia

FikraPevu inafahamu kwamba, Yanga siyo timu pekee kutwaa ubingwa kwa uwiano wa mabao nchini Tanzania.

Kumbukumbu zinaonyesha kwamba, Coastal Union iliunyakua ubingwa wa Tanzania Bara mwaka 1988 kwa tofauti ya mabao ingawa ilifungana pointi na Yanga na African Sports. Zote zilikuwa na pointi 26.

Licha ya Abdallah Burhani na Kenneth Mkapa kuifungia Yanga mabao mawili katika dakika ya 3 na 74 na kuipa ushindi wa 2-0 dhidi ya Nyota Nyekundu Julai 16, 1988 bado ‘Wagosi wa Kaya’ waliweza kutwaa ubingwa.

Coastal ilifunga jumla ya mabao 27 na kufungwa 17 wakati Yanga ilifunga 24 na kufungwa 16 huku African Sports ikifunga 23 na kufungwa 13.

FikraPevu inakumbuka kwamba, msimu huo pia Simba ilinusurika kushuka daraja kwa mara ya pili mfululizo na katika mechi yake ya mwisho ilichapwa bao 1-0 na Pamba kwenye Uwanja wa CCM Kirumba jijini Mwanza.

 

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Muhimu Kusoma

Copyright © 2018 FikraPevu.com