Connect with us

Jamii

Kamati ya Ulinzi na Usalama Mwanza yawahoji vigogo wa Misungwi tuhuma za ufisadi

Published

on

SIKU chache baada ya Taasisi ya Kuzuia na Kupambana na Rushwa nchini (Takukuru), Mkoani Mwanza, kuanza kuwahoji baadhi ya vigogo wa Halmashauri ya Wilaya ya Misungwi Mkoani hapa, kwa tuhuma za ufisadi wa mamilioni ya fedha za miradi ya maendeleo wilayani humo, Kamati ya Ulinzi na Usalama ya Mkoa huo nayo imeanza kuwahoji baadhi ya vigogo wa halmashauri ya wilaya hiyo; FikraPevu imeelezwa.

Imeelezwa kwamba, kazi hiyo ya kuwahoji vigogo wa halmashauri ya wilaya hiyo ya Misungwi, imeanza Jumatatu wiki hii, ambapo inadaiwa kamati hiyo ya Ulinzi na Usalama ya Mkoa iliyopo chini ya uenyekiti wake Mkuu wa mkoa huo wa Mwanza, Injinia Evarist Ndikilo, iliwahoji vigogo watano juu ya tuhuma nzito za ubadhilifu wa fedha zinazoikabili halmashauri hiyo, inayoongozwa na Mkurugenzi wake, Xavier Tilweselekwa na mwenyekiti wake, Bernard Polcarp.

Vyanzo vya habari vimeiambia FikraPevu leo kwamba, vigogo hao ambao majina yao tunayahifadhi, waliwekwa kiti moto na wajumbe wa kamati hiyo inayojumuisha vigogo wa jeshi la polisi, wanajeshi, usalama wa taifa pamoja na watumishi mbali mbali wa Serikali.

“Jumatatu Kamati ya Ulinzi na Usalama ya Mkoa iliwaweka kitimoto vigogo watano wa halmashauri ya Misungwi kuhusu tuhuma za ufisadi wa fedha za maendeleo.

“Hawa watu walikuwa wakihojiwa mmoja mmoja na kamati hiyo. Na mimi nilifika hapo nikakuta wameanza kuhojiwa, na mmoja wao alikuwa ndani akihojiwa na kamati hiyo ya ulinzi na usalama ya mkoa juu ya tuhuma hizo nzito za ufisadi wa fedha za miradi ya maendeleo”, kilisema chanzo chetu cha habari na kuongeza:

“Wakati nikiwa mkoani hapo, nilikuwa nikiwaona vigogo hao hawana raha kabisa, na kila aliyekuwa akitoka kuhojiwa ndani ya ofisi alionekana hana raha. Na hii inaonekana pengine walikuwa wakibanwa maswali magumu sana!. Lakini acha wabanwe maana wanatuhumiwa kwa ufisadi”.

Wiki iliyopita, baadhi ya vigogo wa halmashauri hiyo, walianza kuhojiwa na Takukuru kuhusiana na tuhuma za ubadhilifu huo wa fedha zinazoikabili halmashauri ya wilaya hiyo ya Misungwi, na kwamba hiyo ni moja ya hatua za kisheria zilizoanza kuchukuliwa na vyombo vya dola, ambapo inadaiwa huenda vigogo hao wakafikishwa mahakamani kujibu tuhuma hizo.

Inadaiwa kwamba, kuanza kuhojiwa kwa vigogo hao wa halmashauri ya wilaya ya Misungwi Mkoani Mwanza, inatokana na ripoti mbali mbali za wakaguzi, ikiwemo ya TAMISEMI na Mkaguzi na Mdhibiti Mkuu wa Hesabu za Serikali (CAG), ambazo zinadai kuwepo kwa ubadhilifu mkubwa wa mali za umma katika halmashauri ya wilaya hiyo ya Misungwi, na wahusika wametajwa moja kwa moja kwa majina yao.

Hivi karibuni, baadhi ya vyombo vya habari liliwemo gazeti hili viliripoti kuwepo kwa tuhuma hizo nzito za ubadhirifu wa fedha za miradi mbali mbali ya maendeleo wilayani humo, ambapo baadaye uongozi wa halmashauri hiyo uliwaita baadhi ya waandishi wa habari (si wa FikraPevu), kwa ajili ya kwenda kutembelea miradi na ‘kukanusha’ habari za awali.

Hata hivyo, tuhuma hizo za ufisadi katika halmashauri hiyo, ziliibuliwa upya Januari 25 mwaka huu na Mkuu wa Mkoa wa Mwanza, Injinia Evarist Ndikilo, baada ya kiongozi huyo kufanya ziara ya kikazi ya siku moja wilayani humo, ambapo pamoja na mambo mengine alikutana na watumishi wa halmashauri hiyo kisha kuzungumzia tuhuma hizo nzito.

Katika kikao hicho, RC Ndikilo ambaye alikuwa akitumia ripoti mbali mbali za wakaguzi kwa kutaja baadhi ya majina ya watumishi waliotajwa kwenye ripoti hizo kwa ufisadi, alitumia muda wa dakika 57 kukemea hali hiyo, na alisema atamshauri Waziri Mkuu, Mizengo Pinda aivunje halmashauri hiyo, ili ianze upya.

Alipitafutwa jana ili azungumzie taarifa hizo za kamati yake ya Ulinzi na Usalama ya Mkoa wa Mwanza kudaiwa kuwahoji vigogo hao wa halmashauri ya wilaya ya Misungwi, mwenyekiti wa Kamati hiyo ambaye pia ni Mkuu wa mkoa huo wa Mwanza, Evarist Ndikilo hakupatikana mara moja baada ya kuelezwa kwamba yupo na vikao vya Kiserikali.

Habari hii imeandaliwa na Sitta Tumma – FkraPevu Mwanza

Continue Reading
1 Comment

1 Comment

  1. Upanga Kataya

    17/04/2012 at 11:23 pm

    Nikubaliane kimsingi kuwa hatua inayodaiwa kushughulikiwa na Mkuu wa mkoa wa Mwnza ambaye ni m/kiti wa kamati ya ulinzi na usalama ya Mkoa inastahili kupongezwa na kuigwa na taasisi zingine, Mimi nitoe wito kwa ngazi za kata na vijiji waliko wananchi wengi. Wazihuishe na kuzitumia kamati za ulinzi na usalama za kata/shehia na vijiji kudhibiti aina mbalimbali za uhalifu kama alivyo onyesha mkuu huyo wa Mkoa.

    Tuna majambazi kwenye mitaa yetu, Mafisadi yanatesa ktk mitaa , wauza unga ( madawa ya kulevya) nikitaja mifano michache. KUU Ya Kata/Shehia,Mtaa na Kijiji ni fursa muhimu sana ktk kudhibiti kama Mkuu huyo alivyofanya, Ninatamani hamasa ya mkuu huyo ishuke ngazi za Chini ili kuboresha ulinzi na usalama. Hapa napenda nimshauri, awaite wajumbe wa KAMATI ZA ULINZI NA USALAMA ZA KATA walau kwa awamu hata wakae chini ya mti awafunde akishiriana na Jeshi la Polisi na wadau wengine kudhibiti, kuzuia na kukabiliana na kila aina ya uhalifu katika HIMAYA ZAO ili kuwaponya waliowengi kule chini, wazungu wanasema To serve the people at the glassroot level /Community level…. ni mimi mpenda amani ya kweli

    UPANGA KATAYA

Leave a Reply

Your email address will not be published. Required fields are marked *

Afya

Watumishi wa afya 200 kupatiwa mafunzo ya utoaji dawa ya usingizi kuokoa maisha wajawazito

Published

on

Kufuatia upungufu wa wataalamu wa dawa za usingizi (anaesthesia), serikali itatoa mafunzo ya dawa za usingizi kwa watumishi wa afya 200 katika vituo vya afya vya upasuaji wa dharura kwa akina mama wajawazito.

Hatua hiyo inakuja ikiwa imepita miezi 6 baada ya Chuo Kikuu cha Afya na Sayansi Shirikishi Muhimbili (MUHAS) kutangaza kuanza kutoa shahada ya dawa ya usingizi (Bsc. Anaesthesia Nursing).

Katika taarifa iliyotolewa na Kitengo cha Mawasiliano serikalini cha Wizara ya Afya, Maendeleo ya Jamii, Jinsia, Wazee na Watoto, inaeleza kuwa mafunzo hayo yatatolewa sambamba na uboreshaji wa huduma ya upasuaji wa dharura kwa wajawazito ili kuokoa maisha ya wanawake na watoto ambao hufariki kwa kosa huduma muhimu za uzazi kwenye vituo vya afya.

“Mkakati wa kuhakikisha huduma za afya kwa akina mama wajawazito zinakuwa salama na uhakika kwa kuandaa rasilimali watu, miundombinu ya majengo na vifaa vitakavyowezesha huduma hizi ikiwemo upasuaji wa dharura kwa akina mama wajawazito wakati wa kujifungua,” imeeleza taarifa hiyo.

Kwa mujibu wa takwimu za Wizara ya Afya, vifo 556 vitokanavyo na uzazi kwa kila viumbe hai 100,000 huripotiwa kila mwaka katika maeneo mbalimbali nchini. Maana yake ni kwamba watoto na wajawazito hufariki hasa wakati wa mama akijifungua.

Aidha, serikali itaboresha vituo vya afya 288 vya serikali vilivyopo nchini ili kuviwezesha kutoa huduma ya dharura ya upasuaji kwa wajawazito ambapo waaguzi katika vituo hivyo watapatiwa mafunzo ya dawa za usingizi ili kuokoa maisha ya akina mama na watoto wachanga.

Utekelezaji wa mafunzo hayo ni matokeo ya ushirikiano wa Wizara ya Afya na Mfuko wa Pamoja wa Afya ambapo zaidi ya sh1,079 bilioni zimepatikana kufakisha mafunzo hayo ya dawa ya usingizi kwa wauguzi na matabibu waliopo kwenye vtuo vya afya nchini.

“Fedha hizo zitasomesha watumishi wapatao 200, kati ya watumishi hao 100 watapata mafunzo yao katika Hospitali ya Taifa Muhimbili na MOI, watumishi 50 watafanya mafunzo katika hospitali ya KCMC, na 50 watafanya mafunzo hayo kwenye hospitali ya Bugando,” imefafanua taarifa ya wizara.

Lengo la serikali ni kuhakikisha ifikapo 2019 na kabla ya 2020 vituo vyote vya afya vinavyomilikiwa na serikali vinakuwa na watumishi maalum wa kutoa huduma ya dawa ya usingizi kwaajili ya wapasuaji wasiopungua wawili kwa kila kituo.

Mafunzo hayo ya mwaka mmoja ni mpito wakati serikali ikiendelea kukamilisha taratibu za kurasimisha utoaji wa shahada ya kwanza ya kutoa dawa ya usingizi katika Chuo cha MUHAS katka mwaka huu wa 2018/2019.

Hali halisi ya huduma ya dawa za usingizi nchini
Takwimu za wizara ya Afya zinaonyesha kuwa kuna upungufu mkubwa wa madaktari wenye utaalamu wa kutoa dawa ya usingizi hasa wakati wa huduma ya upasuaji ambapo kwa sasa waliopo ni asilimia 1.2 tu ya mahitaji yote.

Ili kuweza kukidhi mahitaji yote ya huduma hiyo wanahitajika madaktari 2000, lakini waliopo sasa ni madaktari 30 pekee.

Kufuatia changamoto hiyo Januari 31, mwaka huu wadau mbalimbali wa afya na elimu walikutana na kujadili namna ya kuondoa changamoto hiyo na kupendekeza mtaala utakaotumika kufundishia kozi ya Aesthesia kabla ya kuupeleka kwa Tume ya Vyuo Vikuu Nchini (TCU).

” Ni kweli kumekuwepo kwa changamoto hiyo ya watalaamu wa dawa hizo lakini sasa mpango huu ukikamilika maana yake tutaongeza idadi ya madaktari kamili maana hawa waliopo wengi ni wale ambao wamesoma kozi kwa mwaka mmoja au miwili.

” Mafunzo yakianza kutolewa hapa chuoni Muhimbili wataweza kuchukua wanafunzi 200, Bugando 50 na KCMC 50 jambo ambalo litaongeza idadi kubwa ya watalaamu ili kuweza kufikia lengo letu la kuwa na wataalamu 2000 nchi nzima,” alinukuliwa Katibu Mkuu wa Wizara ya Afya, Jinsia, Wazee na Watoto, Dk Mpoki Ulisubisya.

Continue Reading

Jamii

Waziri Mkuu Majaliwa: Hatutangazi nyongeza ya mshahara hadharani kuepusha athari kwa jamii

Published

on

Waziri Mkuu, Kassim Majaliwa ameweka wazi kuwa serikali haitatangaza nyongeza ya mishahara kwa watumishi wa umma hadharani ili kuepusha athari kwa jamii ikiwemo kupanda kwa bei ya bidhaa.

Akizungumza leo Bungeni wakati akijibu swali la Mbunge wa viti maalumu (CHADEMA), Susan Lymo ambaye alitaka kufahamu kwanini Serikali imewanyima au imeshindwa kuwalipa watumishi wa umma nyongeza ya mishahara ambayo ni haki yao ya msingi kulingana na miaka waliyokaa kazini.

Akijibu swali la Mbunge huyo, Waziri Mkuu Majaliwa amesema Serikali ina utaratibu wa kutoa nyongeza ya mishahara kwa watumishi wake lakini haitangazi kwa wananchi wote kama ambavyo imekuwa ikifanyika kwenye sherehe za wafanyakazi za Mei Mosi kila mwaka.

Amesema Serikali ikitangaza mishahara hadharani inaweza kusababisha usumbufu kwa watu wasio watumishi wa umma na inaweza kupandisha bei ya bidhaa na kuathiri mwenendo wa mahitaji ya wananchi sokoni.

Nyongeza za mishahara ambazo zinatangazwa hadharani, mara nyingi zina athari yake sio kwamba Serikali haikusudii kutoa nyongeza ya mshahara kwa mwaka, lakini unapotumia Mei Mosi kutangaza nyongeza ya mshahara unaleta athari kwenye jamii kwasababu vitu vinaweza vikapanda bei, vikawasumbua hata na wananchi ambao hawalipwi mshahara,” amesema Waziri Mkuu.

Amebainisha kuwa siyo lazima Serikali itangaze hadharani kila inapoongeza mishahara kwa watumishi wa umma lakini ifahamike kuwa Serikali ina utaratibu wake mzuri wa kuboresha stahiki za wafanyakazi wake kila mwaka.

Suala la nyongeza ya mishahara liko Serikalini na Mhe Rais ameishawahakikishia wafanyakazi atawaongeza mishahara na sio lazima litangazwe hadharani. Mshahara ni suala la mtu binafsi hata ukiongezwa leo kuwa tumeitangaza leo tumeongeza mshahara kwa kiwango hiki. Ukifanya hivi tayari umeleta kupanda kwa gharama’” amebainisha Waziri Mkuu.

Ameongeza kuwa mkakati wa Serikali ni kupunguza gharama za mahitaji kwenye masoko ili kuzuia mfuko wa bei za bidhaa.

Hata hivyo, Waziri Mkuu Mjaliwa amesema Serikali inaendelea kufanya sensa ya watumishi wote nchi nzima na zoezi hilo likikamilika itaboresha nyongeza ya mwaka, nyongeza ya mishahara na upandishaji wa madaraja.

Awali katika swali lake, Mbunge Lyima amesema Serikali inakiuka Sheria ya Utumishi wa Umma ya kuwapatia watumishi stahiki zao na kuwapunguzia motisha ya kufanya kazi kwa ufanisi katika maeneo yao ya kazi na kuathiri mafao baada ya kustaafu.

Hoja ya Mbunge huyo ni muendelezo wa malalamiko ya watumishi dhidi ya Serikali kwamba hawajapata stahiki zao tangu ilipoanza zoezi la ukakiki wa watumishi wa umma mwaka 2015. Katika zoezi hilo watumishi zaidi ya 9,000 walibainika kutokukidhi vigezo vya utumishi na hivyo kuondolewa kazini.

Huenda kauli aliyoitoa Waziri Mkuu leo Bungeni inaweza ikatofautiana na ile ya Rais John Magufuli aliyoitoa wakati wa sherehe za Mei Mosi, 2018 mijini Iringa ambapo alinukuliwa akisema hawezi kutoa nyongeza ya mishahara akidai Serikali haina fedha.

Kwangu mimi ninafikiria hizi pesa tunazotoa kwa ajili ya elimu bure ni nzuri kuliko fedha hizo kuzipeleka kuongezea mishahara, naona bora kuwapa mikopo wanafunzi wa vyuo vikuu kuliko kuongezea wafanyakazi mishahara,

Nikisema nitaongeza hizo pesa mimi nitazitoa wapi? naogopa kusema uongo. Hata mimi napenda kupandishiwa mshahara lakini kwa hali halisi ya sasa hivi lazima niwaeleze ukweli,” alinukuliwa Rais Magufuli.

Hata hivyo alibainisha kuwa kabla ya kuondoka madarakani ataboresha maslahi ya wafanyakazi wa umma, “Nawaahidi, kipindi changu cha urais hakitaisha kabla sijapandisha mishahara kwa wafanyakazi, kupandisha kwangu haitakuwa kwa shilingi elfu kumi, itakuwa ni kupandisha kwelikwel.”

Continue Reading

Jamii

Maaskofu KKKT wapewa siku 10 kufuta waraka

Published

on

Serikali imetoa siku 10 kwa Kanisa la Kiinjili la Kilutheri Tanzania (KKKT), kuufuta kwa maandishi waraka wao waliotuoa Machi 24 mwaka huu na kisha kuujulisha Umma kwa njia mbalimbali walizotumia kuusambaza.

Kanisa la KKKT kupitia Baraza lake la Maaskofu lilitoa waraka uliopewa jina la ‘Taifa Letu Amani Yetu’ wakati wa Pasaka ambao mbali na masuala ya kiroho, ulibainisha mambo kadhaa yanayogusa mstakabali wa taifa.

Katika mitandao ya kijamii leo imesambazwa barua yenye kumbukumbu no. SO.748/25 inayoonyesha imeandikwa na Ofisi ya Msajili wa Vyama Wizara ya Mambo ya Ndani kwenda kwa Mwenyekiti /askofu Mkuu wa KKKT iliyoandikwa Mei 30, 2018 ikitoa maelekezo ya kufutwa waraka huo ndani ya siku 10 tangu ilipoandikwa barua hiyo.

Ikiwa na kichwa cha habari ‘Ujumbe wa Baraza la Maaskofu wa KKKT’ barua hiyo inaeleza baraza hilo halitambuliki kisheria katika ofisi ya msajili.

“Unaelekezwa kuufuta waraka husika kwa maandishi na kuujulisha umma kuwa taasisi yako haikuwa na haina uwezo kisheria kufanya kile mlichokifanya. Maandishi hayo yaufikie umma wa Watanzania kwa kupitia vyombo vya habari na njia zingine zilezile zilizotumika kuufikisha waraka ule mliouita ‘Ujumbe wa Baraza la Maaskofu KKKT’.

Hata hivyo, barua hiyo imetoa onyo kali kwa taasisi hiyo dini nchi kutekeleza agizo mara moja la sivyo itachukuliwa hatua za kisheria.

“Maelekezo haya yatekelezwe ndani ya siku kumi tangu kupokea kwa barua hii vinginevyo hatua kali zaidi za kisheria zitachukuliwa dhidi ya taasisi hii,” inasema barua hiyo.

Ikumbukwe kuwa  waraka huo ulisainiwa na maaskofu 27 wa kanisa hilo nchini na kutaja baadhi ya mambo hayo kuwa ni pamoja na utekaji, utesaji, kupotea kwa watu, mashambulizi ya silaha dhidi ya viongozi wa kisiasa, mauaji yenye mwelekeo wa kiitikadi, vitisho, ubambikiziaji wa kesi, na matumizi mabaya ya vyombo vya dola dhidi ya wananchi.ni hali ya kijamii na kiuchumi, maisha ya siasa, na masuala mtambuka likiwamo suala la Katiba Mpya.

Waraka uliongeza pia kwamba uhuru wa kujieleza, kutoa na kupokea habari umeendelea kutoweka nchini huku ukionya kubanwa na hatimaye kuelekea kupungua kwa uhuru wa Bunge, Mahakama, na Tume ya Uchaguzi, ukisema hatua hii ni pamoja na kudhoofishwa kwa serikali za Mitaa.

Lakini kabla ya KKKT kutoa waraka wao, Kanisa Katoliki nalo lilitoa waraka kama huo likionya baadhi ya mambo ikiwemo uminywaji wa misingi ya demokrasia ya vyama vingi na uhuru wa kujieleza.

Baada ya kusambaa kwa waraka huo, yalijitokeza mambo mengi ikiwemo kutofautiana na kwa mawazo ya wananchi kuhusu wajibu wa viongozi wa dini katika kutoa ushauri, kuonya au kukemea pale mambo yanapoenda mrama.

Waziri Mkuu, Kassim Majaliwa akiwa na Maaskofu wa KKKT

Hata hivyo, barua hiyo imepokelewa kwa hisia tofauti na watumiaji wa mitandao ya kijamii ikizingatiwa kuwa suala hilo lilijadiliwa na kupita, iweje linaibuka tena wakati huu ambapo kuna utulivu na yale mambo waliyoyapigia kelele na maaskofu  yamepungua ikiwemo kuteswa, kupotea kwa watu na vitisho dhidi ya viongozi wa kisiasa.

 

Wananchi bado wanawaamini viongozi wa dini

Wadau mbalimbali wa masuala ya kijamii wamesema kama kweli barua hiyo imetolewa na serikali, inaweza kuchochea taharuki zaidi kwa waumini wa kanisa hilo na wananchi kwasababu linagusa moja kwa moja imani zao.

Amebainisha kuwa bado waumini wengi wana imani na viongozi wao dini na kwamba yale wanayotamka yanakuwa na nia njema kwa jamii yao. Na katika muktadha huo serikali inapaswa kuwa makini ili kuepusha matatizo zaidi yanayoweza kutokea.

Akizungumza na FikraPevu, Katibu wa Jukwaa la Wahariri Tanzania (TEF), Neville Meena amesema kama serikali ilibaini kuna tatizo kwenye usajili wa Baraza la Maaskofu la KKKT ingekaa na wahusika na kulimaliza kuliko kujitokeza hadharani na kuendeleza jambo ambalo limepita.

“Mimi namwamini Mungu kuliko serikali na viongozi wangu wa dini hasa Maaskofu. Hivyo serikali inapaswa kuwa makini na mambo yanayogusa imani za watu. Katika hili walipaswa kutafakari sana jinsi ya kushughulika nalo. Vinginevyo halina afya kwa ustawi wa taifa letu,” amesema Meena.

Amesema Maaskofu walitimiza wajibu wao wa kuonya kabla mambo hayajaharibika na serikali inapaswa kuyafanyika kazi yale yalyotajwa kwenye waraka au kukaa kimya ili kuepusha migongano isiyo na faida kwa taifa.

Continue Reading

Muhimu Kusoma

Copyright © 2018 FikraPevu.com