Connect with us

Michezo/Burudani

Hatimaye Simba yakwea pipa, yaitandika Mbao FC 2-1 fainali Kombe la Shirikisho

Published

on

BAADA ya rufaa yake kutupwa na Shirikisho la Soka la Kimataifa (FIFA), hatimaye Simba wamejifariji kwa kunyakua Kombe la Shikirisho la Azam kwa kuifunga Mbao FC mabao 2-1 kwenye mechi iliyochezwa dakika 120. Simba sasa itashiriki Kombe la Shirikisho barani Afrika.

FikraPevu inafahamu kwamba, Simba ilikata rufaa FIFA kupinga hatua ya Shirikisho la Soka Tanzania (TFF) kuipoka ushindi wa pointi tatu dhidi ya Kagera Sugar ambayo walidai ilimchezesha Mohamed Fakhi akiwa na kadi tatu za njano.

FikraPevu inaripoti kwamba, FIFA imesema kwa mujibu wa Kanuni za Nidhamu (FDC), Ibara ya 108 (1) na (2), haina mamlaka ya kutengua uamuzi uliofanywa na Shirikisho la Soka la nchi mwanachama.

FIFA imesema baada ya kupitia nyaraka zote zilizowasilishwa na Simba SC pamoja na TFF wameona kwamba uamuzi uliofanywa na kamati maalum ya TFF ulikuwa sahihi na utaendelea kubaki kama ulivyo.

Hatua hiyo iliifanya Simba igangamale katika mchezo wa leo Jumamosi, Mei 27, 2017 wa fainali dhidi ya Mbao FC kutoka Mwanza, ambao ulipigwa katika dimba la Jamhuri mjini Dodoma na hatimaye kupata tiketi ya kukwea pipa wakati itakaposhiriki mamshindano ya kimataifa mwakani baada ya kutakosa kwa miaka minne.

Simba imetwa taji hilo pamoja na kitita cha Shs. 50 milioni.

Kumbukumbu za FikraPevu zinaonyesha kwamba, mara ya mwisho kwa Simba kushiriki mashindano ya kimataifa ilikuwa mwaka 2013 wakati iliposhiriki Ligi ya Mabingwa na kutolewa katika raundi ya awali na Recreativo do Libolo ya Angola kwa jumla ya mabao 5-0.

Kwanza ilikubali kipigo cha bao 1-0 kwenye Uwanja wa Taifa jijini Dar es Salaam Februari 17, 2013 na ziliporudiana mjini Luanda Machi 3, 2013 ikatandikwa 4-0.

Hata hivyo, haikuwa kazi rahisi kwa timu hiyo kupata ushindi kwani vijana wa Mbao FC, ambao waliwatoa Yanga kwenye nusu fainali, walionyesha ushindani mkubwa wakiwa na shauku ya kushiriki mashindano ya kimataifa kwa mara ya kwanza baada ya kupanda daraja msimu huu.

Bao la Kichuya katika dakika ya 120 ndiyo iliyowapatia Simba tiketi ya mashindano ya kimataifa baada ya kuongoza na hatimaye kukosa penati katika dakika ya 105 iliyopigwa na Blagnon kufuatia mlinzi wa Mbao kuunawa mpira katika jitihada za kuzuia shuti la Juuko.

Dakika 90 zilishuhudia milango ya timu zote ikishindwa kufunguka, lakini katika dakika ya 5 ya muda wa nyongeza, yaani dakika ya 95, Blagnon aliweza kuiandikia Simba bao la kuongoza baada ya kupokea pasi safi kutoka kwa Abdi Banda.

Mbao FC hawakukata tamaa, wakaendelea kulisakama lango la Simba na kufanikiwa kusawazisha bao hilo dakika ya 109 kupitia kwa Ndaki Robert, ambaye mabeki wa Simba walidhani ameotea.

Mbao ilikuwa na usongo mkubwa wa kutwaa taji hilo na kushiriki kwa mara ya kwanza mashindano ya kimataifa na kuandika historia mpya ya timu za Mwanza tangu Pamba FC ilipofanya hivyo zaidi ya miaka 20 iliyopita.

Mchuano mkali tangu mwanzo

Tangu mwanzo wa mashindano ya Kombe la Shirikisho la Azam, ilionekana kulikuwa na mchuano mkali na Mbao FC walionyesha kudhamiria kufanya vizuri zaidi.

FikraPevu inatambua kwamba, Mbao walifuzu hatua hiyo ya fainali kwa kuichapa Yanga bao 1-0 kwenye nusu fainali iliyochezwa Uwanja wa CCM Kirumba jijini Mwanza, wakati Simba wao walipata ushindi kama huo dhidi ya Azam FC kwenye Uwanja wa Chamazi jijini Dar es Salaam.

Simba SC

Mbao FC

Kabla ya hapo, Mbao walikuwa wameitoa Toto African pia ya Mwanza kwa mikwaju ya penalty katika Raundi ya 6 baada ya kutoka suluhu muda wa dakika 90, wakati Simba yenyewe iliifunga African Lyon 2-1.

Katika Robo Fainali, Mbao wakaitandika Kagera Sugar mabao 2-1 kwenye Uwanja wa Kaitaba mjini Bukoba, na Simba ikapata ushindi mwembamba wa bao 1-0 dhidi ya Madini FC ya Arusha kwenye Uwanja wa Sheikh Amri Abeid.

Matokeo ya Ligi Kuu

Pengine Simba itajivunia matokeo mazuri dhidi ya Mbao FC kwenye Ligi Kuu msimu huu baada ya kushinda mechi zote mbili – kwanza ikiifunga bao 1-0 Oktoba 20, 2016 na baadaye mabao 3-2 Aprili 10, 2017.

Hata hivyo, FikraPevu inatambua kwamba Mbao FC, ambayo huu ndio msimu wake wa kwanza kwenye Ligi Kuu, imeonyesha kiwango kizuri licha ya matokeo ya mwishoni kuitia mashakani na kukaribia kushuka daraja.

Miongoni mwa matokeo ya ajabu ambayo Mbao ilionyesha kwenye msimu wa Ligi Kuu ni kuitandika Azam FC 2-1 Novemba 6, 2016, ikaifunga Ruvu Shooting 2-0 kabla ya kuichabanga Mtibwa Sugar mabao 5-0.

Haya yalikuwa matokeo ya kushangaza kwa mashabiki wengi wa soka ambao wanaamini hata katika mechi ya fainali dhidi ya Simba, timu hiyo inaweza kufanya maajabu makubwa na hata kunyakua taji.

Continue Reading
Click to comment

Leave a Reply

Your email address will not be published. Required fields are marked *

Afya

MAZOEZI: Kutembea au kukimbia? Wataalamu watoa neno

Published

on

Watu wanaofanya mazoezi ya kukimbia na kutembea wana mambo mengi yanayofanana. Wote wanatumia njia mbalimbali kufikia malengo ya kuimarisha afya ya mwili.

Changamoto inajitokeza ni kwenye faida na hasara za mazoezi ya kukimbia au kutembea ambapo kila kundi lina hoja zake ambazo zinatofautiana na kundi lingine. Wakimbiaji wanafikiri kukimbia kunachoma mafuta haraka, kuongeza mzunguko wa damu na kumaliza haraka mazoezi. Watembeaji wanasema athari za viungo vya mwili ni ndogo, mapigo ya moyo huenda vizuri.   

Njia ya kuondoa utata kwa makundi yote mawili ni kuwaruhusu wataalamu wa mazoezi kushauri faida na watu gani ambao wanastahili kukimbia au kutembea kulingana na afya ya mtu.

 

Mazoezi ya Kutembea

Kutembea kunaepusha madhara mbalimbali ikiwemo majeraha ya magoti, kiuno na nyonga. Kukimbia kunatumia nguvu nyingi za kukanyaga ardhi na kusababisha msuguano kwenye mifupa na muunganiko wa mifupa kuliko mazoezi ya kutembea.

Pia kuna muunganiko thabiti wa akili na mwili wakati wa kukimbia. Hata hivyo, kukimbia na kutembea kunaimarisha afya ya akili lakini kutembea kuna faida kubwa zaidi. Stephanie Powers, Mkufunzi wa Afya ya akili na mwandishi ya kitabu cha Thyroid First Aid Kit, anashauri watu watembee haraka na kurusha mikono ili kufaidika zaidi.

                            Mazoezi ya kutembea

 

Mazoezi ya Kukimbia

Haina mjadala kuwa kukimbia kunachoma zaidi mafuta ya mwili kuliko kutembea. Daktari Patrick Suarez, Mtaalamu wa afya ya Mifupa ameliambia Jalida la POPSUGAR kuwa mafuta ya mwili yanachomwa mara mbili zaidi kwa wakimbiaji kuliko watembeaji kwasababu kiwango cha mapigo ya moyo huongezeka maradufu.

Ikiwa lengo lako ni kupunguza uzito wa mwili basi kukimbia ni njia rahisi kuliko kutembea ambayo hutumia muda mrefu kuchoma mafuta.

Sio tu wakimbiaji wanachoma mafuta mengi, lakini kukimbia kunatengeneza homoni ya peptide YY, ambayo inawasaidia kutumia mafuta kidogo baada ya mazoezi. Kulingana na utafiti uliofanywa na Chama cha Fiziolojia cha Marekani (2008) unaeleza kuwa kukimbia kunazuia mafuta kutumika kwa wingi mwilini.

                        Mazoezi ya kukimbia

 

UAMUZI

Ikiwa unafanya mazoezi ya kutembea au kukimbia unaweza kuendelea nayo ili kupata faida zilizoainishwa hapo juu. Kulingana na Jo-Ann Houston, Mkuu wa Mafunzo wa kampuni ya GYMGUYZ anasema jambo la muhimu ni kutambua na kufurahia faida za muda mfupi na muda mrefu za kila zoezi unalofanya.

Ikiwa ndio unaanza kukimbia au kutembea, chagua zoezi ambalo litakufanya ujisikie vizuri kulingana na mwili wako na malengo unayotaka kuyapata. Jaribu kukimbia na kutembea ili kufanya uchaguzi sahihi wa aina ya mazoezi yanayokufaa. Muhimu chagua zoezi ambalo utadumu nalo muda mrefu.

Continue Reading

Afya

Je ni sawa kufanya mazoezi kabla ya kula?

Published

on

Mazoezi ni sehemu muhimu ya kuufanya mwili kuwa imara na wenye afya, lakini kumekuwa na mijadala mbalimbali juu ya kufanya mazoezi ukiwa na njaa au tayari umekula chakula.

Baadhi ya wataalamu wa afya ya binadamu wanasema kufanya mazoezi kabla ya kula kunamuweka mtu katika hatari ya kupoteza fahamu kwasababu sukari inakuwa imepungua katika mzunguko wa damu.

Jarida la TIME la afya lilimuhoji Prof. Douglas Paddon-Jones ambaye ni Mtafiti wa Sayansi ya Misuli ya Mwili ambapo alisema;

“Ukiwa umechoka au una hofu huwezi kufanya kazi vizuri tofauti na kama utakuwa umekula chochote. Ukila chakula cha kutosha kitakusaidia kufanya kazi zako kwa ufanisi huku ukiwa na nguvu zaidi”

Inashauriwa kwa watu wazima walio na umri zaidi ya miaka 55 kula kabla ya kufanya mazoezi hasa wakati wa asubuhi ambapo mtu anakuwa ametoka usingizini.

“Usiku mzima miili yetu hujiweka sawa ili kutuwezesha kuishi na kitendo hicho husababisha kiwango cha sukari kilichopo kwenye damu kupungua” anasema Prof. Nancy Rodriguez wa Sayansi ya Lishe katika Chuo Cha Connecticut.

Anafafanua kuwa kufanya mazoezi asubuhi kabla ya kula husababisha mwili kufanya kazi katika hali ya kuchoka na inaweza kusababisha kupungua kwa misuli.

Wataalamu hao wanasema ikiwa lengo la mazoezi ni kupunguza uzito, kufanya mazoezi kabla ya kula inaweza kuwa njia sahihi lakini tafiti zinahitajika zaidi katika eneo hili.

Mazoezi kabla ya kula

“Kuna baadhi ya tafiti zinakubaliana na hoja ya kufanya mazoezi ukiwa na njaa kwasababu husaidia kuchoma mafuta kuliko ukiwa umeshiba” Prof. Paddon-Jones anaeleza katika jarida la TIME.

Utafiti uliofanywa na Shirika la Obesity Society mwaka 2013 unaonyesha kuwa watu 64 ambao walikuwa na uzito uliopitiliza walianzishiwa program maalum ya kufunga kwa siku kadhaa na kula asilimia 25 tu ya chakula wanachokula kila siku. Waliposhiriki zoezi hilo matokeo yalionyesha kupungua kwa uzito bila ya kufanya mazoezi na kuzingatia mlo kamili.

Hata hivyo, hakuna jibu la moja kwa moja. Baadhi ya tafiti zimeshindwa kuthibitisha faida za kupunguza uzito kwa kufunga ikilinganishwa na kula chakula cha asili. Watafiti wengine wanapendekeza kuwa kutokunywa chai asubuhi ni hatari kwa afya.

Waatalamu wanashauri kuwa ikiwa mtu anataka kufanya mazoezi akiwa amefunga ni muhimu kumuona Daktari ili achunguze afya yake na kutoa mapendekezo yake. Na hili litategemea mlo anaopata mtu kila siku.

Watu wazima walio na umri zaidi ya miaka 50 wanapaswa kuwa makini katika kufanya mazoezi wakiwa wamefunga. “ Kadiri mtu anapokuwa na  umri mkubwa protini katika mwili huongezeka, na anahitaji mazoezi ya kila siku ili iweze kutumika vizuri” anasema Shivani Sahni, Mkurugenzi wa Programu ya Lishe katika Chuo Cha Harvard Marekani.

“Nafikiri kuna haja ya kulitaza kwa kina suala hili kabla ya kukubali kuwa kufanya mazoezi ukiwa umefunga ni sawa kwa aina fulani ya watu”.

Watu ambao sio wakiambiaji wa mbio ndefu, wanashauriwa kula chakula kabla ya mazoezi ili kuusaidia mwili kuchoma mafuta. Prof. Rodriguez anapendekeza kula chakula chenye protini na wanga muda mfupi kabla ya kula, “ Kula kipande cha ndizi mbivu, karanga na yai lililochemshwa”. Anasema mtu asile chakula kingi bali kidogo ili kuamsha nguvu za mwili kwa ajili ya mazoezi.

Baada ya mazoezi kunywa maji kiasi na subiri dakika 60 mpaka 90 kabla ya kula chakula ili kuandaa mfumo wa mmeng’enyo kupokea chakula.

Kumbuka wakati wote kumuoana daktari ili akushauri njia sahihi unayoweza kutumia kufanya mazoezi ili kuepuka matatizo ya kiafya yanayoweza kujitokeza.

 

 

 

 

Continue Reading

Afya

Kufanya mazoezi kupita kawaida ni hatari kwa afya yako

Published

on

Kuishi muda mrefu ni matamanio ya kila binadamu, kwa sababu kila aliyezaliwa ana kusudi la kutimiza kabla ya kuondoka duniani.

 Mazoezi ya mwili na ulaji wa chakula bora yanatajwa kuwa sehemu muhimu ya kumfanya mtu kuishi muda mrefu kwa sababu  huufanya mwili kuwa na mzunguko mzuri wa damu, mapigo ya moyo kwenda yanavyotakiwa na kuimarisha misuli ili kuwa na msawazo sawa wa viungo vyote.

Lakini baadhi ya mazoezi yakifanyika isivyotakiwa huweza kupunguza umri wa kuishi wa mtu. Mfano kukimbia kupita kawaida (extreme running) kunaweza kupunguza siku za kuishi pasipo muhusika kujua.

Tafiti mbalimbali zinabainisha kuwa ikiwa mtu atakimbia kwa mpangilio mzuri wa masaa 2 hadi 3 kwa wiki na dakika 15-30 kwa siku anajihakikishia kuishi muda mrefu ikilinganishwa na mtu anayefanya hivyo bila kuwa na mpangilio mzuri wa ukimbiaji wake.

Hata hivyo,  inaelezwa kuwa watu ambao hawafanyi mazoezi ya kukimbia na wanaokimbia kupita kawaida kwa kiasi kikubwa wana maisha mafupi ikilinganishwa na wale wanaokimbia kawaida. Lakini baadhi ya Waatalamu wa mazoezi wanapingana na tafiti hizo kwa kusema kuwa hakuna mahusiano ya moja kwa moja katika ya kukimbia na umri wa kuishi.

Wakimbiaji wa mbio ndefu

Jarida la TIME ambalo ni mahusu kwa masuala ya afya katika makala yake ya hivi karibuni linaeleza kuwa kupata mazoezi ya kawaida inasaidia kuimarisha mwili na kuwa na afya bora. Lakini mazoezi yaliyopitiliza kiwango kinachohitajika ni hatari kwa afya.

Jarida hilo lilimuhoji Mtafiti Dkt. James O’Keefe, Daktari wa Moyo katika hospitali ya Mtakatifu Luka iliyopo jiji la Kansas Marekani ambapo alisema mazoezi kama zilivyo dawa nyingine zikitumiwa zaidi ya inavyopendekezwa na daktari zinaweza kuleta madhara katika mwili.

“ Mazoezi yana faida kama zilivyo dawa” alisema. “ lakini lazima yafanyike kwa kiwango kinachostahili, zaidi ya hapo madhara yanaweza kutokea na kuleta matatizo kwa afya na hata kupunguza umri wa kuishi”.

Dkt. O’Keefe alipitia tafiti za watu ambao walifunzwa na kushiriki katika mbio ndefu na mashindano ya baiskeli kwa kiwango kinachostahili ambapo alibaini kuwa watu walioshiriki mbio hizo walipata faida nyingi za kiafya, na walitarajiwa kuishi miaka saba zaidi kuliko watu ambao hawafanyi mazoezi kabisa.

Anasema wakimbiaji wa mbio ndefu ambao walikimbia kupita kawaida walipata madhara fulani ya kiafya ambayo yalitokana na sumu iliyotengenezwa katika mwili na hivyo kupunguza umri wa kuishi.  

 Tafiti zinaonyesha kuwa wakati mtu anashiriki mbio ndefu mapigo ya moyo huenda kasi na ikiwa atakimbia kwa kasi sana, moyo unaweza kudhurika kwa sababu unafanya kazi kupita kawaida.  

 “Ukiwa umekaa, mapigo ya moyo wako yanasukuma damu mara 5 kwa dakika moja, lakini ukikimbia kwenye ngazi za ghorofa ili kujiweka sawa, moyo utasukuma damu mara 35 au 40 kwa dakika,” anasema Dkt. O’Keefe.

“ikiwa utakimbia maili 26 bila kupumzika unaufanyisha moyo kazi kupita kawaida. Moyo utasukuma damu mara 25 kila dakika na kuifanya misuli kukakamaa na kusababisha baadhi ya seli za misuli ya moyo kufa”

 Hali hiyo huufanya moyo kutanuka ili kuendana na mabadiliko ya mzunguko wa damu na mtu anaweza kupata matatizo ya moyo ikiwemo moyo kushindwa kusukuma damu na hatimaye kifo.

 Mtazamo wa Dkt. Martin Matsumura ambaye ni Mkurugenzi wa Taasisi ya Utafiti wa Magonjwa ya Moyo ya Lehigh Valley Health Network ya Marekani anasema wakati mwingine tafiti zinachanganya watu kwa sababu hazitoi majibu ya moja kwa moja.

Njia sahihi ya kukubaliana na kutokukubaliana na tafiti ambazo zinahusu mazoezi ya kukimbia ni kufanya mazoezi kwa maelekezo ya daktari ili kujiweka katika upande ulio salama. Hata hivyo, tunatakiwa kujifunza kufanya jambo lolote kwa kiasi.

 

 

 

Continue Reading

Muhimu Kusoma

Copyright © 2018 FikraPevu.com